An Kusog nin Buot ni Jehoiada

Maraot man an aking babayi ni Jezebel na si Atalia. Agom siya kan hadi kan Juda. Kan magadan an agom niya, an aki niyang lalaki an nagin hadi. Pero kan magadan man an aki niyang hadi, ginibo niyang tagapamahala kan Juda an sadiri niya. Dangan hininguwa niyang gadanon an gabos na lalaking kapamilya kan aki niyang hadi. Ipinagadan niya an siisay man na puwedeng magin tagapamahala imbes na siya, dawa an saiya mismong mga makuapo. Takuton an gabos saiya.

Aram kan Halangkaw na Saserdoteng si Jehoiada asin kan agom niyang si Jehoseba na marauton an ginigibo ni Atalia. Isinapeligro ninda an saindang buhay para itago an saro sa mga makuapo ni Atalia, an umboy na si Jehoas. Pinadakula ninda ini sa templo.

Kan siyete anyos na si Jehoas, tiniripon ni Jehoiada an gabos na namamayo asin mga Levita dangan sinabi sainda: ‘Bantayan nindo an mga pinto kan templo, asin dai pagpalaugon an siisay man.’ Dangan ginibo niyang hadi kan Juda si Jehoas asin kinoronahan ini. Nagkururahaw an mga tawo: ‘Mabuhay an hadi!’

Nadangog ni Reyna Atalia an ribok kaya nagduman tulos siya sa templo. Kan mahiling niya an bagong hadi, nagkurahaw siya: ‘Nagsarabwatan kamo!’ Puwersahan na ilinuwas kan mga namamayo an maraot na reyna asin ginadan ini. Pero pa’no na an nagin maraot na impluwensiya niya sa nasyon?

Tinabangan ni Jehoiada an nasyon na makipagtipan ki Jehova kun sain nangako sindang Siya sana an sasambahon. Ipinarumpag niya sainda an templo ni Baal asin nagbuot na parasaon an mga diyos-diyosan. Ipinagbuot man niya sa mga saserdote asin sa mga Levita na maglingkod sa templo para makasamba giraray duman an mga tawo. Nagbugtak siya nin mga bantay sa trangkahan kan templo para daing makalaog na bakong malinig. Dangan si Jehoiada asin an mga namamayo dinara si Jehoas sa palasyo asin pinatukaw sa trono. Maugmahon an mga taga Juda. Makakapaglingkod na giraray sinda ki Jehova na mayo na an maraot na si Atalia asin an pagsamba ki Baal. Nahiling mo kun paano natabangan ni Jehoiada an dakul na tawo dahil sa kusog nin buot niya?