Binayaan ni Joas si Jehova Huli sa Maraot na Pag-iriba

TERIBLE an panahon kaidto sa Jerusalem, an siudad na namumugtakan kan templo nin Dios. Si Hadeng Ahazias ginadan pa sana. Masakit nganing imahinaron an ginibo kan ina ni Ahazias, si Atalia, kan panahon na iyan. Ipinagadan nia an mga aki ni Ahazias, an saiya mismong mga makoapo! Aram mo daw kun taano?​—a Tanganing sia an mamahala imbes na an siisay man sa sainda.

Minsan siring, nakaligtas an saro sa mga makoapo ni Atalia, an omboy na si Joas, asin dai ngani aram kan lola nia an manongod dian. Gusto mong maaraman kun paano?​— Bueno, an omboy may tiyaon na an ngaran Jehoseba, asin itinago nia si Joas sa templo nin Dios. Magigibo nia ini huli ta an saiyang agom iyo an Halangkaw na Saserdote na si Joiada. Kaya sinegurado ninda na magdanay na ligtas si Joas.

Sa laog nin anom na taon, si Joas sekretong itinago sa templo. Dian tinokdoan sia nin gabos na bagay manongod ki Jehova Dios asin sa saiyang mga ley. Sa katapustapusi, kan si Joas siete anyos na, naggibo nin paagi si Joiada tanganing gibohon na hade si Joas. Gusto mong maaraman kun paano ini ginibo ni Joiada asin kun ano an nangyari sa lola ni Joas, an maraot na si Reyna Atalia?​—

Bueno, sekretong ipinaapod ni Joiada an espesyal na mga guardia na naglilingkod kaidto sa mga hade sa Jerusalem. Sinabi nia sa sainda kun ano an ginibo nia asin kan saiyang agom tanganing iligtas an omboy na aking lalaki ni Hadeng Ahazias. Dangan ipinaheling ni Joiada si Joas sa mga guardiang iyan, asin nasabotan ninda na sia talaga an dapat mamahala. Kaya naggibo sinda nin plano.

Ilinuwas ni Joiada si Joas asin kinoronahan sia. Kan panahon na iyan, an mga tawo “nagpoon [na] mag-upak asin magsabi: ‘Mabuhay an hade!’ ” Pinalibotan kan mga guardia si Joas tanganing protehiran sia. Bueno, kan madangog ni Atalia an gabos na paggayagayang ini, nagdalagan sia paluwas asin nagkontra. Alagad paagi sa pagboot ni Joiada, ginadan kan mga guardia si Atalia.​—2 Hade 11:​1-16.

Sa paghona mo daw si Joas padagos na naghinanyog ki Joiada asin naggibo nin tama?​— Iyo, mientras na nabubuhay pa si Joiada. Sinegurado pa ngani ni Joas na magtao nin kuarta an mga tawo tanganing hirahayon an templo nin Dios, na napabayaan kan saiyang ama na si Ahazias asin kan saiyang lolo na si Joram. Alagad helingon niato kun ano an nangyari kan magadan an Halangkaw na Saserdoteng si Joiada.​—2 Hade 12:​1-16.

Kan panahon na iyan, mga 40 anyos na si Joas. Imbes na padagos na makiiba sa mga naglilingkod ki Jehova, nakikatood si Joas sa mga nagsasamba sa falsong mga dios. Si Zacarias na aki ni Joiada iyo an saserdote ni Jehova kan panahon na iyan. Ano sa paghona mo an ginibo ni Zacarias kan maaraman nia an manongod sa maraot na mga ginigibo na ngonyan ni Joas?​—

Sinabihan ni Zacarias si Joas asin an mga tawo: “Huli ta binayaan nindo si Jehova, babayaan man nia kamo.” An mga tataramon na iyan nakapaanggot na gayo ki Joas kaya ipinagboot nia na gapoon si Zacarias sagkod na magadan. Isip-isipa na sana​—ilinigtas si Joas sa sarong paragadan, alagad ngonyan sia mismo an nagpagadan ki Zacarias!​—2 Cronica 24:​1-3, 15-22.

May naheling ka daw na mga leksion na manonodan niato sa estoryang ini?​— Bueno, dai niato noarin man gugustohon na magin arog ni Atalia, na maongison asin maringis. Imbes, maninigo na kamotan niato an satong mga kapwa parasamba asin dawa an satong mga kaiwal, arog kan itinokdo ni Jesus na gibohon ta. (Mateo 5:44; Juan 13:​34, 35) Asin girumdoma, kun kita nagpoon sa paggibo nin marahay, arog kan ginibo ni Joas, kaipuhan na padagos kitang makikatood sa mga namomoot ki Jehova asin nagdadagka sa sato na paglingkodan sia.