Sarong Kahadian na Daing Katapusan

Sarong banggi, may pambihirang pangaturugan si Hading Nabucodonosor kaya dai siya nakaturog. Ipinaapod niya an mga salamangkero niya asin sinabihan: ‘Ipaliwanag nindo sako an pangaturugan ko.’ Nagsimbag sinda: ‘Sabiha tabi an pangaturugan mo, O hadi.’ Pero nagtaram si Nabucodonosor: ‘Dai! Kamo an magsabi kan napangaturugan ko, ta kun dai, gagadanon ko kamo.’ Nagsabi giraray sinda sa hadi: ‘Sabiha tabi an pangaturugan mo, dangan ipapaliwanag mi iyan.’ Nagtaram an hadi: ‘Gusto lang nindong dayaon ako. Sabihon nindo sako kun ano an napangaturugan ko!’ Nagsimbag sinda: ‘Mayong tawo na makakagibo kaiyan. Imposible po an ipinapagibo mo.’

Angguton si Nabucodonosor kaya ipinagbuot niya na gadanon an gabos na salamangkero asin madudunong na lalaki sa Babilonya. Kaiba diyan si Daniel, Sadrac, Mesac, asin Abednego. Nakiulay si Daniel sa hadi na tawan siya nin dikit na panahon. Dangan siya saka an saiyang mga amigo namibi ki Jehova para sa tabang. Ano kaya an ginibo ni Jehova?

Paagi sa sarong bisyon, ipinahiling ni Jehova ki Daniel an pangaturugan ni Nabucodonosor asin an kahulugan kaiyan. Kan sunod na aldaw, sinabi ni Daniel sa lingkod kan hadi: ‘Dai mo paggadanon an siisay man na madunong na lalaki. Kaya kong ipaliwanag an pangaturugan kan hadi.’ Dinara kan lingkod na ini si Daniel ki Nabucodonosor. Sinabi ni Daniel sa hadi: ‘Ipinaaram po saimo kan Diyos an mangyayari sa maabot. Ini an pangaturugan mo: Nakahiling ka nin sarong dakulaon na estatuwa. An payo kaiyan bulawan, an daghan asin mga takyag plata, an tulak asin mga habayan tanso, an mga tabay lansang,a asin an mga bitis pinagsalak na lansang saka dalipay. Dangan sarong gapo an natipak hali sa sarong bukid, tapos tinamaan kaiyan an bitis kan estatuwa. Narunot an estatuwa asin napulbos na siring sa alpog dangan ipinadpad kan duros. An gapo nagin sarong dakulang bukid, asin napano kaiyan an bilog na daga.’

Dangan nagsabi si Daniel: ‘Ini po an kahulugan kan pangaturugan mo: An kahadian mo iyo an payóng bulawan. An platab sarong kahadian na mamamahala pagkatapos kan kahadian mo. Dangan may maabot na arog sa tanso, na mamamahala sa bilog na kinaban. An sunod na kahadian magigin arog sa lansang kakusog. Sa huri, magkakaigwa nin nababangang kahadian na an ibang parte arog sa lansang kakusog asin an ibang parte arog sa dalipay kaluya. An gapo na nagin bukid iyo an Kahadian nin Diyos. Iyan an marunot sa gabos na kahadian na ini asin dai iyan magkakaigwa nin katapusan.’

Suminubsob si Nabucodonosor sa atubangan ni Daniel dangan nagsabi: ‘Ipinaaram saimo kan saimong Diyos an pangaturugan na ini. Dai nin ibang Diyos na arog niya.’ Imbes na gadanon si Daniel, ginibo siya ni Nabucodonosor na tagapamahala kan gabos na madunong na lalaki asin kan bilog na probinsiya nin Babilonya. Nahiling mo kun paano sinimbag ni Jehova an pamibi ni Daniel?