LEKSIYON 15

Pagigin Kumbinsido sa Pagtaram

1 Tesalonica 1:5

SUMARYO: Ipahiling na makusog an pagtubod mo na totoo asin mahalaga an sinasabi mo.

Maghandang marhay. Adalan an ipepresentar na impormasyon sagkod na masabutan mo an panginot na mga punto asin kun paano iyan sinusuportaran kan Kasuratan. Hinguwahon na sabihon sa simple asin pira sanang tataramon an panginot na mga punto. Isipon an pakinabang kaiyan sa mga magdadangog. Hagadon sa pamibi an tabang kan banal na espiritu.

Praktison nin makusog an saimong presentasyon tanganing makabisado mong marhay an saimong ipepresentar na impormasyon asin tanganing mapagayon mo an pag-atubang kaiyan.
Gumamit nin mga tataramon na nagpaparisang kumbinsido ka sa sinasabi mo. Imbes na utruhon sana kun ano an mismong nakasurat sa publikasyon, gumamit nin sadiri mong mga tataramon. Magtaram sa paaging nagpaparisa na sigurado ka sa saimong sinasabi.
Magtaram nin sinsero asin may pagkadesidido. Magtaram na may tamang kusog nin boses. Kun angay, parating hilingon sa mata an mga nagdadangog.

An pagigin kumbinsido sa pagtaram bakong kapareho kan daing ingat na pagtaram, pagigin dogmatiko, o agresibo. Dawa kun nagtataram nin may pagkadesidido, dagkahon an mga nagdadangog sa mamumuton na paagi.