LEKSIYON 18

Nakakapagtukdo sa mga Nagdadangog

1 Corinto 9:19-23

SUMARYO: Tabangan an mga nagdadangog na pag-isipan an mensaheng nadangog ninda asin masabi ninda sa saindang sadiri na igwa sindang mahalagang nanudan.

KUN PAANO GIGIBUHON:

Isipon kun ano an dati nang aram kan mga magdadangog. Imbes na utruhon sana an dati na nindang nadangog, tabangan sinda na hilingon an impormasyon sa iba na man na anggulo.

Tukaron nin mas marikas an pamilyar nang mga punto, pero luway-luway sana kun bagong mga ideya an iinaatubang.
Mag-research asin maghurop-hurop. Kun posible, gumamit nin bakong gayong pamilyar na mga detalye o nin presenteng mga pangyayari tanganing ipaliwanag an panginot na mga punto. Adalan na marhay an ipepresentar mong impormasyon asin an koneksiyon diyan kan mga detalye na plano mong iiba.

Mantang pinag-aadalan mo an ipepresentar na impormasyon, paganahon an saimong isip paagi sa paghapot sa saimong sadiri kan ‘ano, taano, nuarin, sain, siisay, asin paano.’ Tawan nin buhay an saimong pagtutukdo paagi sa pagbangon asin pagsimbag kan pira sa mga hapot na iyan sa bilog mong presentasyon.
Ipahiling an pakinabang kan saimong mensahe. Ipaliwanag kun paano an mga punto sa Kasuratan makakatabang sa mga nagdadangog sa saindang pang-aroaldaw na buhay. Magsambit nin espesipikong mga sitwasyon, ugali, asin gibo na aplikado sa mga nagdadangog.