Nakapagtotokdo sa mga Nagdadangog sa Saindo

TANGANI na an pag-atubang nindo magin nakapagtotokdo sa mga nagdadangog sa saindo, dai sana kamo kaipuhan na magtaram sa kapakipakinabang na tema. Ihapot sa sadiri: ‘Taano ta kaipuhan na madangog kan mga magdadangog na ini an temang ini? Ano daw an masasabi ko na makakapamate sa mga nagdadangog na talagang nakinabang sinda sa orolay?’

Sa paadalan, kun naasignaran kamong idemonstrar kun paano magpapatotoo sa saro, an kagharong nindo iyo an magdadangog sa saindo. Sa ibang mga kaso, tibaad mataram kamo sa kongregasyon sa kabilogan.

Kun Ano an Aram kan mga Nagdadangog sa Saindo. Ihapot sa sadiri, ‘Ano an aram kan mga nagdadangog manongod sa tema?’ Iyan an maninigong magdeterminar kun saen kamo mapoon. Kun kamo nagtataram sa kongregasyon na dakol an maygurang na Kristiano, dai sana pag-otrohon an pundamental na mga katotoohan, na aram na kan kadaklan sa sainda. Dugangan an pundamental na mga katotoohan na ini. Siempre, kun dakol man an bagong interesado, maninigong konsideraron nindo an mga pangangaipo kan duwang grupo.

Ibagay an rikas kan pagpahayag nindo segun sa aram na kan mga nagdadangog sa saindo. Kun iiniba nindo an nagkapirang detalye na posibleng marhay na pamilyar sa kadaklan, medyo madali sanang trataron an mga ini. Alagad magluwayluway kun iinaatubang an mga ideya na tibaad bago sa kadaklan kan mga naghihinanyog sa saindo tangani na masabotan ninda iyan nin malinaw.

Kun Ano an Makapagtotokdo. An pagigin nakapagtotokdo dai pirmeng nangangahulogan na kamo may bagong sasabihon. May mga nagpapahayag na nasasabi nin simpleng marhay an nagkapirang pamilyar na katotoohan kaya dian pa sana iyan lubos na nasasabotan kan dakol sa mga nagdadangog.

Sa ministeryo sa langtad, bakong igo na sambiton an sarong bareta sa pag-ilustrar na kita nabubuhay na sa huring mga aldaw. Gamiton an Biblia sa pagpaheling kan kahulogan kan pangyayari. Ini talagang magigin nakapagtotokdo sa kagharong. Siring man, kun minasambit nin detalye manongod sa ley sa naturalesa o manongod sa mga tinanom o hayop, maninigo na an pasohan nindo bakong magtao nin interesanteng gayo na sientipikong katotoohan na dai pa noarin man nadangog kan kagharong. Imbes, an maninigong magin obheto nindo pagkombinaron an ebidensia hale sa naturalesa asin an mga sinasabi sa Biblia tanganing ipaheling na may Kaglalang na namomoot sa sato. Matabang ini sa kagharong na maheling an mga bagay sa bagong punto de vista.

Puedeng magin depisil an pag-atubang nin tema sa mga nagdadangog na dakol nang beses na nakadangog kaiyan kaidto. Alagad tanganing magin epektibong paratokdo, kaipuhan na makanood kamong gibohon ini nin mapanggana. Paano iyan magigibo?

Makatatabang an pagsiyasat. Imbes na an iiba sana sa saindong pahayag mga detalye na nagigirumdoman nindo, gamiton an mga kasangkapan sa pagsiyasat na tinokar sa pahina 33 sagkod 38. Isaisip an mga suhestion na itinao dian manongod sa mga obheto na maninigong pagmaigotan nindong maabot. Sa pagsiyasat nindo, tibaad maheling nindo na direktamenteng konektado sa tema nindo an sarong pangyayari sa kasaysayan na daing gayo aram. O tibaad may maagihan kamong bagong sinasabi sa bareta na mailustrar kan puntong plano nindong tokaron.

Mantang sinisiyasat nindo an materyales, pukawon an mismong isip nindo paagi sa paghapot kan mga hapot na arog kan ano? taano? kasuarin? saen? siisay? asin paano? Halimbawa: Taano ta totoo ini? Paano ko iyan mapatutunayan? Anong popular na mga paniniwala an nagigin dahelan na depisil para sa nagkapira na masabotan an katotoohan na ini sa Biblia? Taano ta importante iyan? Paano ini maninigong makaapektar sa buhay nin sarong tawo? Anong halimbawa an nagpapaheling kan pakinabang sa pag-aplikar kaiyan? Ano an ihinahayag kan katotoohan na ini sa Biblia manongod sa personalidad ni Jehova? Depende sa materyales na tinotokar nindo, puede nindong ihapot: Kasuarin ini nangyari? Paano niato praktikal na ikaaaplikar an materyales na ini ngonyan? Puede ngani nindong gibohon na buhay an saindong pagpahayag paagi sa paghapot asin pagsimbag kan nagkapira sa siring na mga hapot kun kamo nagpapahayag na.

Tibaad hagadon kan pahayag nindo na gumamit kamo nin mga teksto na pamilyar sa mga nagdadangog sa saindo. Ano an magigibo nindo tangani na magin nakapagtotokdo an paggamit nindo kaini? Dai sana iyan pagbasahon; ieksplikar iyan.

Puedeng magin mas nakapagtotokdo an pagtokar sa pamilyar na teksto kun babangabangaon nindo an teksto, na isinisiblag an mga kabtang na konektado sa pinakatema kan pahayag nindo dangan ieksplikar iyan. Estudyare an mga posibilidad sa teksto na arog kan Miqueas 6:8 sa New World Translation. Ano an “hustisya”? Kiisay na pamantayan nin hustisya an pinag-oolayan? Paano nindo iiilustrar an boot sabihon kan ‘paggibo nin hustisya’? O ‘pagkamoot sa kabootan’? Ano an kababaan nin boot? Paano nindo iaaplikar an materyales sa kaso nin may edad na? Siempre, an materyales na aktuwal nindong gagamiton maninigong determinaran nin mga bagay na arog kan pinakatema nindo, obheto nindo, mga nagdadangog sa saindo, asin an oras na magagamit.

Parateng nakatatabang an simpleng pagpakahulogan sa mga termino. Para sa nagkapira, nakabibiglang maaraman an kahulogan kan “kahadean” na sinasabi sa Mateo 6:10. An pagpagirumdom kan pagpakahulogan tibaad makatabang pa ngani sa haloy nang Kristiano na mas tamang mamansayan an aktuwal na sinasabi nin sarong teksto. Malinaw ini kun basahon niato an 2 Pedro 1:5-8 dangan ipaliwanag an kahulogan kan manlaenlaen na aspekto na sinasabi sa mga bersikulong iyan: pagtubod, birtud, kaaraman, pagpopogol sa sadiri, pakatagal, diosnon na debosyon, kapadangatan sa tugang, asin pagkamoot. Kun ginagamit sa iyo man sanang konteksto an mga tataramon na nagkakaagid sa kahulogan, an pagpaliwanag nindo kan kahulogan kaiyan makatatabang na ikapaheling an kalaenan kan lambang saro. Totoo iyan sa mga termino na arog kan kadonongan, kaaraman, pakamansay, asin pakasabot, na ginagamit sa Talinhaga 2:1-6.

Tibaad magin nakapagtotokdo para sa mga nagdadangog sa saindo kun magrason sana kamo sa teksto. Napapangalas an dakol kun sa kaenot-enote marealisar ninda na sa Genesis 2:7 sa nagkapirang traduksion kan Biblia, si Adan sinasabing buhay na kalag asin na segun sa Ezequiel 18:4, an kalag nagagadan. Sarong beses, binigla ni Jesus an mga Saduceo paagi sa pagsambit kan Exodo 3:6, na hinihingako ninda na pinaniniwalaan ninda, dangan pag-aplikar kaiyan sa pagkabuhay liwat kan mga gadan.​—Luc. 20:37, 38.

Kun beses nakatatao nin kaliwanagan an pagsabi kan konteksto nin sarong teksto, kan mga kamugtakan na nakapalibot sa pagsurat, asin kun siisay an nagsabi o an naghihinanyog. Aram na marhay kan mga Fariseo an Salmo 110. Pero, dinara ni Jesus an atension ninda sa sarong importanteng detalye na yaon sa enot na bersikulo. Naghapot sia: “ ‘Ano an paghona nindo sa Cristo? Kiisay siang aki?’ Sinda nagsarabi sa saiya: ‘Ki David.’ Sia nagsabi sa sainda: ‘Kun siring, taano ta paagi sa pasabong inaapod sia ni David na “Kagurangnan,” na nagsasabi, “Si Jehova nagsabi sa sakong Kagurangnan: ‘Tumukaw ka sa too ko sagkod na ibugtak ko an saimong mga kaiwal sa irarom kan saimong mga bitis’ ”? Kun siring, kun inaapod sia ni David na “Kagurangnan,” paano na sia aki nia?’ ” (Mat. 22:41-45) Kun kamo marason sa Kasuratan arog kan ginibo ni Jesus, matatabangan nindo an mga tawo na mas maingat na basahon an Tataramon nin Dios.

Kun sinasabi kan nagpapahayag kun kasuarin isinurat an sarong libro sa Biblia o kun kasuarin nangyari an sarong bagay, maninigo na iladawan man nia an mga kamugtakan na lakop kan panahon na iyan. Sa paaging iyan, mas malinaw na masasabotan kan mga nagdadangog an importansia kan libro o kan pangyayari.

An mga pagkokomparar makatatabang na magin mas nakapagtotokdo an saindong sinasabi. Puede nindong ipaheling an kalaenan nin sarong popular na opinyon sa sinasabi kan Biblia sa iyo man sanang punto. O puede nindong pagkompararon an duwang magkaagid na salaysay sa Biblia. May mga pagkakalaen daw? Taano? Ano an nanonodan niato dian? An paggibo nindo kaini makatatao sa mga naghihinanyog sa saindo nin bagong punto de vista manongod sa temang iyan.

Kun naasignaran kamong tokaron an sarong aspekto kan Kristianong ministeryo, madudugangan nindo nin kualidad an saindong pag-atubang kun poponan nindo sa pagsumaryo. Tokaron kun ano an dapat na gibohon, kun taano iyan ta kaipuhan na gibohon, asin kun paano iyan konektado sa kabilogan na mga pasohan niato bilang Mga Saksi ni Jehova. Dangan ieksplikar kun saen, noarin, asin paano iyan gigibohon.

Paano kun hinahagad kan pahayag nindo na tokaron nindo an nagkapira sa “hararom na mga bagay nin Dios”? (1 Cor. 2:10) Kun poponan nindo sa pagsabi asin pag-eksplikar kan nagkapirang mayor na elemento kan tema, mas madaling masasabotan an mga detalye. Asin kun tataposon nindo sa halipot pero malaman na sumaryo kan saindong materyales, posibleng marhay na an mga nagdadangog sa saindo magkakaigwa kan nakakokontentong pagmate na talagang may nanodan sinda.

Hatol Manongod sa Kristianong Pamumuhay. Nangorognang makikinabang an mga nagdadangog sa saindo kun tatabangan nindo sindang masabotan kun paano aplikado sa saindang buhay an impormasyon sa pahayag nindo. Mantang sinisiyasat nindo an mga teksto sa materyales na iinasignar sa saindo, ihapot sa sadiri, ‘Taano daw ta iningatan an impormasyon na ini sa Kasuratan sagkod sa satong kaaldawan?’ (Roma 15:4; 1 Cor. 10:11) Isip-isipon an mga situwasyon sa buhay na inaatubang kan mga nagdadangog sa saindo. Estudyaran mismo an mga situwasyon na kinokonsiderar an hatol asin mga prinsipyo sa Kasuratan. Sa pahayag nindo, magrason sa Kasuratan tanganing ipaheling kun paano iyan makatatabang sa saro na madonong na maatubang an siring na mga situwasyon. Likayan an pagtaram nin mga indepinido. Tokaron an espesipikong mga aktitud asin gibo.

Bilang kapinonan, iaplikar an saro o duwa sa nasambitan na mga suhestion sa sarong pahayag na saindong inaandam. Mantang kamo nagkakaeksperyensia, iaplikar an mas dakol pa. Pag-abot nin panahon maheheling nindo na aantisiparon na kan mga nagdadangog an saindong mga pahayag, na kompiado na may madadangog sinda na talagang pakikinabangan ninda.