Epektibo an Pagkaintrodusir kan mga Teksto

AN Kasuratan iyo an pundasyon kan pagtotokdo sa satong mga pagtiripon kan kongregasyon. An mga teksto sa Biblia iyo man an pinakasentro kan satong sinasabi sa ministeryo sa langtad. Minsan siring, kun gurano an ikakokontribwir kan mga ini sa satong orolay sa sarong kabtang depende sa kun gurano kaepektibo kan pagkaintrodusir kan mga iyan.

An kaipuhan bako sanang pagsambit sa teksto asin pag-agda sa saro na basahon iyan kaiba nindo. Kun iiniintrodusir an sarong teksto, hingoahon na magibo an duwang obheto: (1) Pukawon an pag-antisipar, asin (2) isentro an atension sa dahelan kan paggamit kan teksto. An mga obhetong ini magigibo sa manlaenlaen na paagi.

Maghapot. Ini pinakaepektibo kun an simbag dai pa sayod na sayod sa mga nagdadangog sa saindo. Hingoahon na isabi an hapot sa paagi na pinapaisip an mga tawo. Ginibo ini ni Jesus. Kan dolokon sia kan mga Fariseo sa templo asin binalo sa publiko an pakasabot nia sa Kasuratan, hinapot sinda ni Jesus: “Ano an paghona nindo sa Cristo? Kiisay siang aki?” Sinda nagsimbag: “Ki David.” Dangan naghapot si Jesus: “Kun siring, taano ta paagi sa pasabong inaapod sia ni David na ‘Kagurangnan’?” Dangan kinotar nia an Salmo 110:1. Dai nakagirong an mga Fariseo. Minsan siring, an kadaklan nasiraman sa paghinanyog ki Jesus.​—Mat. 22:41-46.

Sa ministeryo sa langtad, puede kamong gumamit nin pan-introdusir na mga hapot arog kan minasunod: “Kamo asin ako may personal na ngaran. An Dios daw may personal na ngaran? Manonompongan niato an simbag sa Salmo 83:18.” “Magkakaigwa pa daw nin sarong gobyerno para sa bilog na katawohan? Helinga kun paano ini sinisimbag sa Daniel 2:44.” “Talaga daw na an Biblia nagtatao nin atension sa mga kamugtakan na yaon sa satong kaaldawan? Ikomparar an sinasabi sa 2 Timoteo 3:1-5 sa mga kamugtakan na pamilyar sa saindo.” “Matatapos pa daw an pagdusa asin kagadanan? An simbag kan Biblia makukua sa Kapahayagan 21:4, 5.”

Sa sarong diskurso, an maingat na paggamit nin mga hapot sa pag-introdusir nin mga teksto puedeng makamotibar sa mga nagdadangog sa saindo na magkaigwa nin bagong interes sa mga teksto, dawa sa mga pamilyar na sa sainda. Alagad mangyayari daw iyan sa sainda? Iyan tibaad magdepende sa kun baga an mga hapot na palalatawon nindo tunay na may labot sa sainda o mayo. Dawa kun interesado an mga nagdadangog sa tema, tibaad maparayo an isip ninda kun binabasa nindo an mga teksto na dakol na beses na nindang nadangog. Tangani na dai iyan mangyari, kaipuhan na isip-isipon nindo nin igo an bagay na iyan tangani na magibong nakaaakit an saindong pag-atubang.

Mag-atubang nin Problema. Puede kamong mag-atubang nin problema dangan darahon an atension sa sarong teksto na konektado sa solusyon. Dai paasahon an mga nagdadangog nin labi sa makukua ninda. Parate na kabtang sana kan solusyon an itinatao nin sarong teksto. Minsan siring, puede nindong hagadon sa mga nagdadangog na isip-isipon, mantang binabasa nindo an teksto, kun anong paggiya an itinatao kaiyan sa pag-atubang sa situwasyon.

Sa kaagid na paagi, puede nindong isabi an sarong prinsipyo nin diosnon na gawe-gawe dangan gumamit nin sarong salaysay sa Biblia tanganing iilustrar an kadonongan sa pagsunod dian. Kun an teksto may duwa (o tibaad labi pa) na espesipikong punto na konektado sa pinag-oolayan, may mga nagpapahayag na hinahagad sa mga nagdadangog na hanapon an mga ini. Kun garo baga depisilon an sarong problema para sa sarong partikular na grupo nin mga nagdadangog, puede nindong pukawon an isip paagi sa pag-atubang nin nagkapirang posibilidad dangan pabayaan na an teksto asin an aplikasyon kaiyan an sumimbag.

Sitaron an Biblia Bilang an Autoridad. Kun napukaw na nindo an interes sa saindong tema asin nasabi na an saro o labi pang punto de vista manongod sa sarong aspekto kaiyan, puede nindong iintrodusir an sarong teksto paagi sa pagsabi sana: “Helinga an sinasabi kan Tataramon nin Dios sa puntong ini.” Ipinaheheling kaini kun taano ta masasarigan an babasahon nindo.

Ginamit ni Jehova an mga tawo na arog ni Juan, Lucas, Pablo, asin Pedro sa pagsurat nin mga kabtang kan Biblia. Alagad sinda mga parasurat sana; si Jehova an Autor. Nangorogna kun an kaolay mga tawo na bakong mga estudyante kan Banal na Kasuratan, an pag-introdusir nin teksto paagi sa pagsabing “isinurat ni Pedro” o “sinabi ni Pablo” tibaad bakong arog kamapuersa kan introduksion na nagsasabi na an teksto tataramon nin Dios. Mahalagang mangnohon na sa nagkapirang pangyayari, ininstruksionan ni Jehova si Jeremias na iintrodusir an mga proklamasyon paagi sa pagsabi: “Dangoga nindo an tataramon ni Jehova.” (Jer. 7:2; 17:20; 19:3; 22:2) Baga man ginagamit niato an ngaran ni Jehova sa pag-introdusir nin mga teksto o dai, bago niato taposon an satong pakikipag-olay, maninigo na hingoahon niato na sabihon na an nasa Biblia tataramon nia.

Konsideraron an Konteksto. Maninigo na aram nindo an konteksto kun nagdedesisyon kun paano iiintrodusir an sarong teksto. Sa nagkapirang kaso direkta nindong sasabihon an konteksto; minsan siring, puede man na makaimpluwensia an konteksto sa sasabihon nindo sa ibang mga paagi. Halimbawa, iiintrodusir daw nindo an mga tataramon kan matatakton sa Dios na si Job pareho sa pag-introdusir nindo kan sinabi kan saro sa falso niang mga pararanga? An librong Mga Gibo isinurat ni Lucas, alagad kinokotar nia, kabilang sa iba pa, si Santiago, Pedro, Pablo, Felipe, Esteban, asin an mga anghel, saka si Gamaliel asin iba pang Judio na bakong mga Kristiano. Kiisay nindo iaatribwir an tekstong kinotar nindo? Halimbawa, girumdoma na bakong gabos na salmo kinomponer ni David asin bakong bilog na librong Mga Talinhaga isinurat ni Salomon. Kapakipakinabang man na maaraman kun siisay an sinusuratan kan parasurat kan Biblia asin kun anong pankagabsan na tema an pinag-oolayan.

Gumamit nin Impormasyon sa Likod. Ini nangorognang epektibo kun ikapaheheling nindo na an mga kamugtakan na yaon sa panahon kan salaysay kan Biblia kaagid kan ipinaliliwanag nindo. Sa ibang kaso kaipuhan an impormasyon sa likod tangani na masabotan an sarong partikular na teksto. Halimbawa, kun gagamiton nindo an Hebreo 9:12, 24 sa sarong pahayag manongod sa pantubos, tibaad maheling nindong kaipuhan na iintrodusir an pagbasa nindo kan teksto paagi sa halipot na eksplikasyon kan kalaoglaoging kuarto kan tabernakulo na ipinaririsa kan teksto na naglaladawan sa lugar na linaogan ni Jesus kan sia sumakat sa langit. Alagad dai pakadakolon an impormasyon sa likod na natatahoban na logod an teksto na saindong iiniintrodusir.

Tanganing mapakarhay an pag-introdusir nindo nin mga teksto, analisaron an ginigibo nin mga eksperyensiadong magpahayag. Obserbari an laen-laen na paaging ginagamit ninda. Analisaron an pagkaepektibo kan mga paaging ini. Sa pag-andam kan sadiri nindong pahayag, aramon kun arin an mayor na mga teksto, asin tawan nin espesyal na pag-isip-isip kun ano an maninigong magibo kan kada teksto. Maingat na iplano an introduksion kan kada saro tangani na iyan magamit nin pinakaepektibo. Pagkatapos, iiba an gabos na tekstong gagamiton nindo. Mantang nag-ooswag an aspektong ini kan saindong pag-atubang, isesentro nindo an mas dakulang atension sa Tataramon nin Dios.