Introduksion na Nakapupukaw nin Interes

AN INTRODUKSION importanteng kabtang nin arin man na pahayag. Kun talagang napukaw nindo an interes kan mga nagdadangog sa saindo, mas gaganahan sindang maghinanyog nin odok sa minasunod. Sa ministeryo sa langtad, kun an introduksion nindo dai makapukaw nin interes, tibaad dai nindo ikapadagos an saindong pag-atubang. Kun kamo nagpapahayag sa Kingdom Hall, dai kamo babayaan kan mga nagdadangog, alagad tibaad magpoon nang mapasa ibang bagay an isip nin mga indibiduwal kun dai nindo nakua an saindang interes.

Kun inaandam an saindong introduksion, isaisip an minasunod na obheto: (1) pakakua kan atension kan mga nagdadangog sa saindo, (2) malinaw na pagsabi kun ano an saindong tema, asin (3) pagpaheling kun taano ta importante an tema sa mga nagdadangog sa saindo. Sa nagkapirang pangyayari, an tolong obhetong ini maootob nin haros durungan. Minsan siring, kun beses iyan puedeng separadong tawan nin atension, asin puedeng magkalaenlaen an pagkasunodsunod.

Kun Paano Makukua an Atension kan mga Nagdadangog sa Saindo. An bagay na nagtiripon an mga tawo sa pagdangog nin diskurso dai nangangahulogan na andam na sindang tawan kan bilog nindang atension an tema. Taano ta dai? An buhay ninda pano nin dakol na bagay na nag-aaragawan sa saindang atension. Tibaad nahahadit sinda sa sarong problema sa harong o sa iba pang kahaditan sa buhay. An kadepisilan na napapaatubang sa saindo bilang nagpapahayag makua asin mapagdanay an atension kan mga nagdadangog. Bako sanang saro an paagi na iyan magigibo nindo.

An saro sa pinakabantog na diskursong itinao kasuarin man iyo an Sermon sa Bukid. Paano iyan pinonan? Segun sa salaysay ni Lucas, sinabi ni Jesus: “Maogma kamong mga dukha, . . . maogma kamong nagugutom ngonyan, . . . maogma kamong nagtatangis ngonyan, . . . maogma kamo kun ikinakaongis kamo nin mga tawo.” (Luc. 6:20-22) Taano iyan ta nakapukaw nin interes? Sa pira sanang tataramon, rinekonoser ni Jesus an nagkapira sa magagabat na problema na kaipuhan na atubangon kan mga nagdadangog sa saiya. Dangan, imbes na tokaron nin halawig an mga problema, ipinaheling nia na an mga tawo na may siring na mga problema puede pa man giraray na magin maogma, asin ginibo nia iyan sa paagi na gusto pang magdangog nin orog an mga naghihinanyog sa saiya.

An mga hapot magagamit nin epektibo sa pagpukaw nin interes, alagad dapat na iyan an tamang klase. Kun ipinaririsa kan mga hapot nindo na an sasabihon sana nindo mga bagay na nadangog na kaidto kan mga nagdadangog, tibaad madaling mawara an interes. Dai maghapot nin mga makakapasupog sa mga nagdadangog sa saindo o pinapaluwas sindang maraot. Imbes, hingoahon na isabi an mga hapot nindo sa paagi na mapukaw sa pag-iisip. Pumondo nguna nin kadikit pakatapos kan balang hapot tangani na may panahon an mga naghihinanyog sa saindo na makabilog nin simbag sa isip ninda. Kun namamatean ninda na sinda nakikipag-olay sa saindo paagi sa saindang isip, nakua nindo an atension ninda.

An paggamit nin totoong eksperyensia saro pang marahay na paagi na makua an atension. Alagad an pag-estorya sana tibaad dai makaotob sa katuyohan nindo kun an eksperyensia nakakapasupog sa saro sa mga nagdadangog sa saindo. Kun nagigirumdoman an estorya nindo alagad nalingawan an leksion na kaiba kaiyan, luminawos kamo. Kun ginagamit sa introduksion an sarong eksperyensia, iyan maninigong magbugtak kan pundasyon para sa sarong makahulogan na aspekto kan mayor na parte kan saindong pahayag. Minsan ngani tibaad kaipuhan an nagkapirang detalye tangani na mabuhay an estorya, mag-ingat na dai pakalawigon an mga eksperyensia.

May mga nagpapahayag na minapoon paagi sa sarong bago pa sanang bareta, kotasyon hale sa lokal na diaryo, o sinabi nin sarong minimidbid na autoridad. An mga ini puede man na magin epektibo kun iyan talagang tama sa tema asin angay sa mga nagdadangog.

Kun an pahayag nindo kabtang nin sarong simposium o nin Pagtiripon sa Paglilingkod, parate na pinakamarahay na gibohon na halipot asin tunggo-tunggo an saindong introduksion. Kun kamo nagtatao nin pampublikong pahayag, maingat na otobon an itinaong oras para sa introduksion. An mayor na parte kan pahayag iyo an mapaabot kan impormasyon na pinakamahalaga para sa mga nagdadangog sa saindo.

May beses na tibaad kamo magpahayag sa mga nagdadangog na mapagduda o antipatiko pa ngani. Paano daw nindo makukua an saindang atension? Si Esteban, sarong Kristiano kan enot na sinasabing “pano nin espiritu asin kadonongan,” puersahan na iinatubang sa Judiong Sanhedrin. Duman nagtao sia nin magayonon an pagkasabing depensa sa Kristianismo. Paano sia nagpoon? Sa magalang na paagi asin may kaibang pagsambit sa sarong bagay na rekonosido kan gabos. “Mga lalaki, mga tugang asin mga ama, pagdangog kamo. An Dios nin kamurawayan nagpaheling sa satong apoon na si Abraham.” (Gibo 6:3; 7:2) Sa Areopago duman sa Atenas, ibinagay ni apostol Pablo an introduksion nia sa laen na marhay na mga nagdadangog, na sinasabi: “Mga lalaki nin Atenas, naririsa ko na sa gabos na bagay garo kamo orog na natatakot sa mga dios kisa iba.” (Gibo 17:22) Bilang resulta nin epektibong mga introduksion, pareho nagustong magdangog pa an duwang grupong ini.

Kun kamo yaon sa paglilingkod sa langtad, kaipuhan man na makua nindo an atension nin mga tawo. Kun dai man napagkaoyonan antes pa an pagsongko nindo, tibaad sibot sa ibang bagay an kagharong. Sa nagkapirang parte kan kinaban, an mga nagsongkong dai imbitado inaasahan na listong dumeretso sa punto. Sa ibang lugar, hinahagad nin kostumbre na otobon nguna an pirang pormalidad bago nindo sabihon an dahelan kan saindong pagsongko.​—Luc. 10:5.

Arin man digdi, makatatabang an tunay na pagkamainamigo tangani na magkaigwa nin kamugtakan na nakatatabang sa pag-oolay. Parate na kapakipakinabang na pumoon sa sarong bagay na direktamenteng konektado sa nasa isip kan tawo. Paano nindo madedeterminaran kun ano an gagamiton? Bueno, kan an tawo dolokon nindo, may ginigibo daw sia? Tibaad sia nag-ooma, inaasikaso an saiyang laguerta, naghihirahay nin kotse, nagluluto, naglalaba, o nag-aasikaso sa mga aki. May pinagheheling daw sia​—an diaryo o an nangyayari sa tinampo? Ipinababanaag daw kan palibot nia an espesyal na interes sa paninira, isport, musika, pagbiahe, komputer, o iba pa? An mga tawo parateng interesado sa bago pa sana nindang nadangog sa radyo o nadalan sa telebisyon. An hapot o halipot na komento manongod sa arin man sa siring na mga bagay tibaad magbunga nin makikatood na orolay.

An pangyayari kan kaolayon ni Jesus an sarong Samaritana sa may bobon harani sa Sicar marahayon na halimbawa kun paano poponan an pakikipag-olay sa katuyohan na magpatotoo.​—Juan 4:5-26.

Kaipuhan na maingat nindong andamon an saindong introduksion, nangorogna kun parateng nagigibo kan saindong kongregasyon an teritoryo kaiyan. Ta kun dai, tibaad dai kamo makapagpatotoo.

Isabi Kun Ano an Tema Nindo. Sa Kristianong kongregasyon, an tsirman o saro na sinusundan nindo sa programa parate na iaanunsiar an titulo kan saindong pahayag asin iiintrodusir kamo. Minsan siring, puedeng magin kapakipakinabang na ipagirumdom nindo sa mga nagdadangog sa saindo an tema nindo durante kan pan-introdusir na mga komento nindo. Ini puede, alagad dai man kaipuhan, na pormal na pagsabi kan pinakatema. Maski paano, maninigo na luway-luway na mahayag an pinakatema mantang nagpapadagos an pahayag. Sa introduksion, maninigo na ikasentro nindo an atension sa saindong tema.

Kan isinusugo an saiyang mga disipulo na maghulit, malinaw na sinabi ni Jesus kun ano an mensahe na ipapahayag ninda. “Sa pagduman nindo, maghulit kamo, na nagsasabi, ‘An kahadean kan kalangitan harani na.’ ” (Mat. 10:7) Mapadapit sa satong kaaldawan, sinabi ni Jesus: “An maogmang baretang ini kan kahadean ihuhulit.” (Mat. 24:14) Sinasadol kita na “ihulit mo an tataramon,” an boot sabihon, magdanay sa Biblia kun nagpapatotoo. (2 Tim. 4:2) Pero, bago buksan an Biblia o darahon an atension sa Kahadean, parate na kaipuhan na sabihon an sarong bagay na ikinapupurisaw sa presente. Puede nindong komentohan an krimen, kadaihan nin trabaho, inhustisya, guerra, kun paano tatabangan an mga hoben, helang, o kagadanan. Alagad dai maghaloy sa negatibong mga bagay; an mensahe nindo positibo. Hingoahon na darahon an orolay sa Tataramon nin Dios asin sa paglaom sa Kahadean.

Ipaheling Kun Taano ta Importante an Tema sa mga Nagdadangog sa Saindo. Kun mapahayag kamo sa kongregasyon, medyo makasisierto na kamo na sa pankagabsan an mga magdadangog sa saindo magigin interesado sa saindong totokaron. Alagad maghihinanyog daw sinda arog kan paghinanyog nin saro kun sia may nanonodan na talagang may labot sa saiya? Matao daw sinda nin atension ta aram ninda na an saindang nadadangog tamang-tama sa situwasyon ninda sa buhay asin huli ta pinupukaw nindo sa sainda an kamawotan na may gibohon manongod dian? Iyan magigin totoo sana kun maingat nindong kinonsiderar an mga nagdadangog sa saindo​—an saindang mga kamugtakan, an saindang mga kapurisawan, an saindang aktitud​—kan inaandam an saindong pahayag. Kun iyan ginibo nindo, kun siring iiba sa introduksion nindo an magpaparisa kaiyan.

Baga man kamo nagpapahayag sa plataporma o nagpapatotoo sa sarong indibiduwal, an saro sa pinakamarahay na paagi na mapukaw an interes sa sarong tema ilabot an mga nagdadangog sa saindo. Ipaheling kun paano na an saindang mga problema, an saindang mga pangangaipo, o an mga hapot na yaon sa isip ninda konektado sa temang tinotokar nindo. Kun lilinawon nindo na an totokaron nindo bako sanang an pankagabsan kundi pati an espesipikong mga aspekto kaiyan, mas odok pa sindang maghihinanyog. Tanganing magibo iyan, dapat na kamo mag-andam na marhay.

Kun Paano Nindo Iyan Iaatubang. May pangenot na halaga kun ano an sinasabi nindo sa saindong introduksion, alagad makapupukaw man nin interes kun paano nindo iyan sinasabi. Sa dahelan na ini dapat na kaiba sa pag-andam nindo bako sanang kun ano an sasabihon nindo kundi kun paano man nindo iyan sasabihon.

Importante an paggamit kan tamang mga tataramon sa pag-otob sa obheto nindo, kaya tibaad marahay para sa saindo na medyo maingat na andamon an enot na duwa o tolong sentence. Parateng pinakamarahay an haralipot, simpleng sentence. Para sa pahayag sa kongregasyon, tibaad gusto nindong isurat iyan sa saindong mga nota, o tibaad pilion nindo na tuomon iyan tangani na magkaigwa kan gabos na puersang maninigo dian an enot nindong mga tataramon. An pagtao nin epektibong introduksion sa paaging dai naghihidali makatatabang sa saindo na magkaigwa kan pagkakalmado na kaipuhan sa pagpadagos kan saindong pahayag.

Kun Noarin Iyan Aandamon. Laen-laen an opinyon sa bagay na ini. May mga eksperyensiadong magpahayag na naniniwala na an pag-andam nin pahayag maninigong pumoon sa introduksion. An iba man na nag-adal nin pampublikong pagpahayag may opinyon na an introduksion maninigong andamon pagkatapos kan mayor na parte kan pahayag.

Kaipuhan nanggad na maaraman nindo kun ano an tema nindo asin kun anong prinsipal na mga punto an plano nindong ipaliwanag bago nindo magibo an mga detalye nin sarong angay na introduksion. Alagad ano kun ginigibo nindo an saindong pahayag gikan sa napublikar na outline? Pakabasaha kan outline, kun may ideya na kamo para sa introduksion, mayo man nin maraot na isurat iyan. Girumdomon man na tanganing magin epektibo an introduksion nindo, dapat na konsideraron nindo an mga magdadangog sa saindo saka an materyales sa outline.