Pag-enkaminar na Gamiton an Biblia

AN MAWOT niato darahon an atension nin gabos sa Tataramon nin Dios, an Biblia. An sagradong librong iyan iyo an basehan kan mensahe na satong ihinuhulit, asin boot niato na marealisar nin mga tawo na an satong sinasabi, bakong hale sa sato, kundi hale sa Dios. Kaipuhan na an mga tawo magkaigwa nin kompiansa sa Biblia.

Sa Ministeryo sa Langtad. Kun nag-aandam para sa ministeryo sa langtad, pirmeng pumili nin saro o labi pang teksto na ipapaabot sa mga tawo na gustong maghinanyog. Dawa kun an plano nindo medyo halipot sana an gigibohon na pag-atubang nin literatura sa Biblia, parate na kapakipakinabang na bumasa nin angay na teksto sa Biblia. Mas mapuersa an Biblia sa paggiya sa mga arog-karnero kisa ano man na personal niatong masasabi. Kun dai puedeng aktuwal na basahon an Biblia, tibaad booton nindong magkotar dian. Kan enot na siglo, an kadaklan mayong kopya kan mga balumbon kan Kasuratan. Pero, si Jesus asin an saiyang mga apostol pirmeng nagkotar sa Kasuratan. Maninigo man kitang maghingoa na tuomon an mga teksto asin gamiton ini nin angay sa satong ministeryo, na kun beses kinokotar sana an mga iyan.

Kun puede nindong basahon an Biblia, kapotan iyan sa paagi na masusubaybayan kan kagharong an saindong pagbasa. Kun an kagharong nagsusubaybay sa sadiri niang kopya kan Biblia, tibaad mas paborable pa ngani an reaksion nia sa saiyang nabasa.

Minsan siring, dapat na marealisar nindo na may mga paratradusir kan Biblia na pinagbotan an Tataramon nin Dios. An traduksion ninda tibaad dai komporme sa gabos na bagay sa kun ano an yaon sa orihinal na mga lenguahe kan Biblia. An dakol na traduksion sa presenteng panahon hinale an personal na ngaran nin Dios, pinalibog an sinasabi kan teksto sa orihinal na lenguahe mapadapit sa kamugtakan kan mga gadan, asin itinago an sinasabi kan Biblia manongod sa katuyohan nin Dios para sa daga. Tangani na ikapaheling sa sarong tawo kun ano an ginibo, tibaad kaipuhan na pagkompararon nindo an mayor na mga teksto hale sa laen-laen na Biblia o hale sa mas naenot na mga traduksion sa iyo man sanang lenguahe. Sa dakol na tema, an Reasoning From the Scriptures nagtatao nin komparasyon kan mga pagkatradusir nin manlaenlaen na traduksion sa mayor na mga tataramon sa mga bersikulo na parateng ginagamit. An siisay man na namomoot sa katotoohan magpapasalamat na maaraman an mga katotoohan na ini.

Sa mga Pagtiripon kan Kongregasyon. An gabos maninigong enkaminaron na gamiton an saindang Biblia sa mga pagtiripon kan kongregasyon. Marahay an nagigibo kaini sa dakol na paagi. Nakatatabang iyan na mapagdanay an atension kan mga nagdadangog sa pinag-oolayan. Dinudugangan kaiyan nin bisual na puersa an berbal na pagtotokdo kan nagpapahayag. Asin itinutudok kaiyan sa isip nin mga bagong interesado na an Biblia talagang iyo an ginigikanan kan satong mga tinutubod.

Kun baga talagang susubaybayan kan mga nagdadangog sa saindo an pagbasa nindo nin mga teksto sa Kasuratan sa sainda mismong Biblia madependeng gayo sa pag-enkaminar na itatao nindo. An direktang pag-agda saro sa pinakamarahay na paagi.

Nasa saindo na nagpapahayag an pagdesisyon kun arin na mga teksto an gusto nindong idoon paagi sa pagpahanap kaiyan sa mga nagdadangog. Pinakamarahay na basahon an mga teksto na makatatabang sa saindo na linawon an prinsipal na mga punto nindo. Dangan, sagkod na itinotogot kan oras, idugang an nagkapira pa na nagsusuportar sa saindong argumento.

Siempre, an pagsitar sana sa teksto o pag-agda sa mga nagdadangog na hanapon an sarong teksto parate na bakong igo. Kun babasahon nindo an sarong teksto dangan maduman na naman kamo sa saro bago nagkapanahon an mga nagdadangog sa saindo na hanapon an enot, dai mahahaloy mawawaran sinda nin gana asin mapondo na sa paghihingoa na makasubaybay sa Biblia. Magin mapagmasid. Kun an teksto nakua na kan kadaklan, basahon na iyan.

Isipon antes pa. Sitaron an teksto nindo na may igong panahon bago iyan basahon. Mababawasan kaini an nawawarang oras huli sa paghalat na makua kan mga nagdadangog an teksto. Minsan mas kadikit na materyales an matatratar kun tatawan nindo nin panahon an mga nagdadangog na hanapon an mga teksto, magigin kapakipakinabang man iyan.