Hapot
◼ Taano ta kapakipakinabang para sa mga nagdadangog na hanapon an mga teksto kun ipinahahanap kan espiker durante kan saiyang pahayag?
An mga kokonsideraron na arog baga kan tema na tinatratar asin kun baga kaibanan sa pahayag an bersikulo por bersikulong pag-estudyar kan sarong kabtang kan Tataramon nin Dios an madeterminar kan kadakolan nin teksto na puedeng ipahanap sa mga nagdadangog.
Importanteng girumdomon na an sarong dahelan sa paghanap kan mga teksto iyo na patunayan na an sinasabi hale sa Biblia. (Gibo 17:11) An saro pang obheto iyo na siyasaton an ebidensia sa Kasuratan bilang suporta sa ipinakikipag-olay tanganing an pagtubod kan gabos mapakosog. An pagheling sa talagang sinasabi kan Biblia mientras na binabasa an pangenot na teksto makatutudok nin doble sa isip. Dugang pa sa paghanap kan mga teksto, kapakipakinabang man an pagkua nin mga nota asin pagsubaybay sa dalagan nin mga ideya na ipinahahayag.
Minsan ngani an oultine kan Sosyedad puedeng magsitar nin kadakol na teksto sa Kasuratan sa pagbilog nin sarong tema, itinatao ini para sa kapakinabangan kan espiker, tangani na matabangan sia sa saiyang pag-andam. Ini puedeng magtao nin basehan na impormasyon asin matabang pa ngani sa saiya na biyong mamansayan an pundamental na mga prinsipyo sa Kasuratan asin masabotan an pagkabilog kan tema. Dedeterminaron kan espiker kun arin na mga teksto an mahalagang marhay sa pagbilog kan pahayag asin iimbitaran an mga nagdadangog na sundan sia mantang binabasa asin ipinaliliwanag an mga tekstong iyan. An iba pang teksto na nagpapatunay sa materyal puedeng sambiton asin tawan nin pagpakahulogan sa ibang pananaram, alagad sa siring na mga kamugtakan dai man kaipuhan na hanapon iyan kan mga nagdadangog.
Kun binabasa kan espiker an piniling mga teksto, binabasa nia iyan nin direkta sa Biblia, bakong sa inimprenta kan komputer. Kun iniimbitaran kan espiker an mga nagdadangog na sundan an pagbasa, sasabihon nia nin malinaw an libro kan Biblia, an kapitulo, asin an (mga) bersikulo. Paagi sa pagpondo nin kadikit tangani na magpalataw nin hapot o magkomento nin halipot kun taano ta babasahon an teksto, tinotogotan nia an mga nagdadangog na magkaigwa nin panahon na makua an teksto. An pag-otro kan sitasyon makatatabang man sa mga nagdadangog na magirumdoman an teksto. Minsan siring, dai irinerekomendar na sambiton an numero kan pahina, huling nagkakalaenlaen ini depende sa partikular na edisyon kan Biblia na ginagamit kan mga indibiduwal na nagdadangog. An paghanap kan mga teksto kun ipinahahanap nakatatabang sa mga nagdadangog na makinabang sa kapangyarihan kan Tataramon nin Dios mantang iyan ipinaliliwanag durante kan pahayag.—Heb. 4:12.