Pagigin Simple

Kun Ano an Ginibo ni Jesus

VIDEO: Iinilustrar ni Jesus an Pag-ataman sa Sato kan Satong Ama

1. Hilingon an VIDEO, o basahon an Mateo 6:​25-27. Dangan pag-isipan an minasunod na mga hapot:

1. Paano ni Jesus iinilustrar an pag-ataman sa sato ni Jehova?

2. Dawa ngani dakulon nin aram si Jesus manungod sa mga gamgam, sa anong simpleng detalye sana siya nagpokus? Taano ta epektibong paagi iyan nin pagtutukdo?

Ano an Manunudan Ta ki Jesus?

2. Pag simple an paagi ta nin pagtutukdo, matatandaan kan mga tawo an itinukdo ta sa sainda asin matataros niyato an puso ninda.

Arugon si Jesus

3. Dai magparataram. Imbes na sabihon an gabos na aram mo manungod sa tema, magpokus sa materyal na pinag-aadalan. Pagkatapos na maghapot, mapasensiyang halaton an simbag kan tinutukduan mo. Kun dai niya aram an simbag o kun an opinyon niya bakong kauyon kan itinutukdo kan Bibliya, gumamit nin dagdag na mga hapot para tabangan siyang makua an tamang simbag. Pag naintindihan na kan tinutukduan mo an panginot na punto, magbalyo na sa sunod.

4. Tabangan an tinutukduan na maikonektar niya an bagong mga katukduan sa mga dati na niyang aram. Halimbawa, bago punan an leksiyon manungod sa pagkabuhay liwat, puwede mong repasuhon sa halipot sa tinutukduan mo an pinag-adalan nindo manungod sa kamugtakan kan gadan.

5. Magin maingat sa paggamit nin ilustrasyon. Bago gumamit nin sarong ilustrasyon, haputon an sadiri:

1. ‘Simple daw an ilustrasyon?’

2. ‘Masasabutan daw iyan tulos kan tinutukduan ko?’

3. ‘Makakatabang daw iyan sa tinutukduan ko na matandaan an panginot na punto—bako lang an ilustrasyon?’