Manindogan nin Marigon Tumang sa mga Pakana ni Satanas!

“Isolog an bilog na pangalasag na itinatao nin Dios, tanganing kamo marigon na makapanindogan tumang sa mga pakana kan diablo.”​—EFESO 6:11.

1. Ano an kamugtakan nin mga Kristiano na nag-ootob sa saindang mga pribilehiyo?

AN NAGDUSAY na mga saksi ni Jehova na nag-ootob sa saindang mga pribilehiyo nasa espirituwal na paraiso. Makahulang ilinaladawan an saindang presenteng kamugtakan, an propeta nin Dios na si Isaias nagsurat: “Sa kapatagan siertong mag-eerok an hustisya, asin sa tatamnan mag-iistar mismo an katanosan. Asin an gibohon kan tunay na katanosan kaipuhan na magin katoninongan; asin an paglilingkod kan tunay na katanosan, katrangkilohan asin katiwasayan sagkod sa panahon na daing sagkod.”​—Isaias 32:​16, 17.

2. Taano ta kaipuhan kitang perming nagbabantay?

² Tanganing mapagdanay an maogmang kamugtakan na ini, kaipuhan na kita perming magbantay, ta si Satanas na Diablo nauuri sa satong maogma asin asensadong espirituwal na daga. Bilang Gog nin Magog madali na niang ponan an todo-todong pagsalakay tumang sa banwaan ni Jehova. (Ezequiel 38:​8-12) Pero sia bakong daing ginigibo ngonyan. Sa katunayan, sa pakaaram na halipot na sana an panahon na natatada saiya, sia mas anggot sa mga lingkod ni Jehova ngonyan ki sa kasuarin pa man.​—Kapahayagan 12:​12, 17.

3. Taano si Satanas ta naaanggot sa mga lingkod ni Jehova?

³ Kontrolado ni Satanas an kinaban na ini nin maraot na mga tawo. (Efeso 2:​1, 2; 1 Juan 5:19) An gabos na ini kakampi nia sa dakulang isyu nin unibersal na soberaniya. Sinda nagtatao nin positibong simbag sa pagpalataw ni Satanas nin pagduda sa kun baga kaya nin siisay man na tawo na magdanay sa saindang integridad ki Jehova Dios. (Talinhaga 27:11) Ikinakaanggot nia na may pirang Kristiano na nagpapatunay na an Diablo daing kamanungdanan na hambugero asin maraot na putikon. Kaya ginagamit nia an gabos na pakana, an gabos na tusong taktika, na magagamit nia tanganing madaog an maimbod na mga lingkod na ini ni Jehova. Kaya, “kita nakikipaglaban . . . tumang sa maraot na espiritung mga puwersa sa langitnon na mga lugar.”​—Efeso 6:12.

4. Taano kita ta kaipuhan na maghingoang gayo na mahale an satong mga kaluyahan?

⁴ Kun siring, marahay na ihapot nindo sa saindong sadiri, ‘Paano daw ako makakapanindogan nin marigon tumang sa makapangyarihan na Kaiwal na ini?’ Siring sa aram na niato, ginagamit nia an mga kaluyahan kan makasalan na laman tanganing siodon an mga Kristiano. Tibaad kita personalmenteng mayo kan kaluyahan na kahugakan, pero tibaad kita maabhaw. Tibaad kita dai nagpapangana kun dapit sa pisikal na mga pag-aling-aling, pero tibaad kita paslo sa materyal na pakinabang. Kaya kaipuhan na maghingoang gayo kita na mahale an satong mga kaluyahan, na tinutumang an Diablo tangani siang dumulag sa sato.​—Santiago 4:7.

An Satong Espirituwal na Pangalasag

5. Sa anong dahelan na kaipuhan niatong isolog an bilog na pangalasag hale sa Dios?

⁵ Paorootrong ginagamit kan satong Kaiwal an pareho man sanang mga pakana. Kaya paagi sa pag-adal sa Tataramon nin Dios mapapatanidan kita dapit sa mga pakana na ginagamit ni Satanas poon pa kan mga panahon kan Biblia, asin makakanood kita kun paano marigon na maninindogan tumang sa saiya. Si apostol Pablo nagsurat: “Isolog an bilog na pangalasag hale sa Dios tanganing kamo marigon na makapanindogan kontra sa mga pakana kan Diablo.” Sia nagsadol man: “Gamita nindo an bilog na pangalasag hale sa Dios, tanganing makapanumang kamo sa maraot na aldaw asin, pakagiboha nindo nin lubos kan gabos na bagay, marigon na tumindog.” Mangnoha na idinodoon ni Pablo an pagsolog kan “bilog na pangalasag hale sa Dios.” Peligroso na magkulang nin minsan saro sanang pidaso kan pangalasag na ini na itinao nin Dios, ta iyan maririsa ni Satanas asin puwedeng sumalakay sa maluyang parteng iyan. Ini puwedeng ikagadan niato sa espirituwal.​—Efeso 6:​11, 13.

6. Ano an hinahagad sato kan ‘paghagkos sa satong habayan nin katotoohan’?

⁶ An apostol nagpoon paagi sa pagsadol sa sato: “Kaya, manindogan kamo nin marigon, na an saindong habayan nahahagkosan nin katotoohan.” (Efeso 6:14) An militar na hagkos kan suanoy na mga panahon sarong pahang anit na ibinubugkos sa habayan o piad. Parate na iyan tinatakodan nin saradit na metal, na nagtatao nin dugang na proteksion. Iyan nagserbi man na bugtakan kan minasbad o daga kan soldado. Ano an boot sabihon para sa Kristiano na an saiyang habayan hagkosan nin katotoohan? An pagigin nahahagkosan kan katotoohan kan Tataramon nin Dios nangangahulogan nin higot na pagkakapot dian, kaya nagagamit niato an Kasuratan sa pagresolber sa mga hapot. Kun paanong an militar na hagkos nagserbing proteksion, an katotoohan magtatao man sato nin kompiansa na pasanon an satong mga problema asin maprotehir sa sato. Kaya tunay nanggad na an pagpapadanay na an satong isip okupado sa mga katotoohan nin Dios matabang sato na marigon na makapanindogan tumang ki Satanas.

7. Ano an boot sabihon kan pagsolot kan “takop sa daghan na katanosan”?

⁷ Sunod sinasabi sato kan apostol na ‘isolot an takop sa daghan na katanosan.’ (Efeso 6:14) Kan mga panahon kan Biblia an takop sa daghan gibo sa korteng kiskis, mga kadena o solidong metal asin proteksion partikularmente sa puso. Tanganing ikasolot an takop sa daghan na ini nin katanosan kita kaipuhan na, orog sa gabos, ‘ingatan an satong puso.’ (Talinhaga 4:23) Paagi sana kaiyan na kita marigon na makakapanindogan tumang ki Satanas huling namomotibar na maglingkod ki Jehova asin mamuhay nin malinig na maolang man sato na magin impluwensiang nakararaot sa moral sa tahaw kan banwaan ni Jehova.​—1 Pedro 1:​14-16.

8. Ano an kalabot sa pagpangyari na an satong mga “bitis nasasapinan kan kasangkapan kan maogmang bareta nin katoninongan”?

⁸ Dangan isinabi ni Pablo na kaipuhan na an satong “bitis nasasapinan kan kasangkapan kan maogmang bareta nin katoninongan.” (Efeso 6:15) Ano an ipinasesentido digdi? Na kita magdanay na aktibong gayo sa paghuhulit kan mensahe kan Kahadean sa matoninong na paagi, arog kan itinaong instruksion ni Jesus sa 70 paraebanghelyo: “Saen man kamo magsakat sa sarong harong magsabi nguna kamo, ‘Magkaigwa logod nin katoninongan an harong na ini.” (Lucas 10:5) Dai kita nagduduman tanganing makipagdiskutiran. Imbes, minaduman kita tanganing darahan sinda nin karangahan, kagayagayahan, katoninongan sa isip asin paglaom. Hihingohaon ni Satanas na pukawon sa ibang nagdadangog an pagtumang asin pakikipagdebate tangani na kita mapasimbag man nin kapareho kaiyan. Kun siring, tanganing makapanindogan nin marigon tumang sa mga pakana ni Satanas, kaipuhan na kita magin mataktika asin mapasensia, na nagigin “gabos na bagay sa gabos na klase nin tawo.”​—1 Corinto 9:​19-23.

9. Ano an itsura nin suanoy na mga kalasag asin naglalaad na bosog?

⁹ Sa pagpapadagos, an apostol nagsadol: “Gamiton an dakulang kalasag nin pagtubod, na huli kaiyan masisigbo nindo an gabos na naglalaad na bosog kan maraot.” (Efeso 6:16) An Griegong termino na isinalin digding “dakulang kalasag” nangangahulogan nin saro na dakula tanganing makaprotehir sa haros bilog na hawak. Kun dapit sa “naglalaad na bosog,” an mga Romano kaidto may beses na naggigibo nin mga panapana na gibo sa mga doot na labot sa laog na may saradit na bugtakan na pano nin naglalaad na nafta. Tibaad an naglalaad na mga pana-panang iyan an boot sabihon ni Pablo.

10. Ano an ginagamit ni Satanas bilang “naglalaad na bosog”?

¹⁰ Laen-laen na klase nin “naglalaad na bosog” an pinatatama ni Satanas sa mga Kristiano. Kabilang sa mga “bosog” na ini an pag-olog-olog, pagtuya asin pagpakaraot na pinatatama sa banwaan nin Dios kan saindang mga kaiwal. An mga “bosog” na ini puwede man na mga paghihingoa nin iba na papanluyahon an boot nin mga Kristiano huli sa kadikit daang resulta kan saindang gibohon sa ministeryo o dai pag-oswag sa paghale sa mga kaluyahan sa laman. Kabale man an makolog na mga tataramon, insulto asin salang mga tataramon. Kun beses, nalugadan ni Satanas an mga Kristiano paagi sa pagpukaw sa saindang pag-usyoso sa kinabanon na kadonongan may koneksion sa okultismo o pamimilosopo sa ginikanan asin kaaabtan nin tawo. Maninigo na likayan nindo an siring na “hararom na mga bagay ni Satanas.” Ginigibo daw nindo iyan?​—Kapahayagan 2:24.

11. Sa ano depende an kadakulaan asin pagkaepektibo kan satong espirituwal na kalasag?

¹¹ Tanganing maingatan an satong puso tumang sa mga “naglalaad na bosog” ni Satanas, kaipuhan niato an dakula, makosog na pangalasag na pagtubod. Depende sato kun magigin gurano iyan kadakula asin dai malalagbas. Magkakaigwa kita kan kinakaipuhan na proteksion sagkod na tinutubos niato an panahon para sa personal na pag-adal sa Biblia, paghorophorop sa Tataramon nin Dios asin pakikiasosyar sa mga kapwa saksi ni Jehova. Siyempre, kaipuhan na iaplikar niato an satong nanonodan, huli ta “an pagtubod na daing gibo gadan.” (Santiago 2:26) Kaya, an saro sa pinakamarahay na paagi na mapadakula asin mapakosog an satong pagtubod, asin sa siring makapanindogan nin marigon, iyo an odok na paghihingoa na makultibar an pagtubod sa iba.

12. Ano an satong espirituwal na takop sa payo, asin ano an halaga kaiyan para sa sato?

¹² Si Pablo nagpadagos: “Siring man, akoa nindo an takop sa payo na kaligtasan.” (Efeso 6:17) Kan suanoy na mga panahon, an ibang takop sa payo gibo sa hoyo, an iba gibo sa may pahibog na lino o anit asin an iba pa gibo sa metal. (1 Samuel 17:38) Alagad gibo sa ano an satong espirituwal na takop sa payo? Sinabihan ni Pablo an mga Kristiano sa Tesalonica: “Papagdanayon niato an toltol na pag-iisip asin isolog . . . bilang takop sa payo an paglaom sa kaligtasan.” (1 Tesalonica 5:8) Iyo, an paglaom talagang makakaprotehir sato tumang sa mga buno asin taga ni Satanas asin kan saiyang mga ahente. An masarig, basado sa Biblia na “paglaom dai nagdadara nin kamondoan.” (Roma 5:5) An siring na paglaom maprotehir sato tumang sa materyalistikong propaganda, ta iyan mamotibar sato na hanapon nguna an Kahadean nin Dios.​—Mateo 6:33; Lucas 12:31.

13. Ano “an minasbad kan espiritu,” asin ano an halaga kaiyan?

¹³ Ultimo, nag-abot kita sa sasarong pidaso kan satong pangalasag na pansalakay, “an minasbad kan espiritu, na iyo, an tataramon nin Dios.” (Efeso 6:17) An Griegong termino na isinalin digding “minasbad” nangangahulogan nin halipot na minasbad na nakakaagid sa daga, na nagsusuherir nin haranihan na labanan. Paagi sa tamang kaaraman sa Tataramon nin Dios, kaya niatong lagbason asin takrason an falsong mga katokdoan, na ibinubuyagyag an kadaihan nin lohika kaiyan, asin, partikularmente, an pagigin kontra kaiyan sa Banal na Kasuratan. (2 Corinto 10:4) Ini ginigibo niato bakong huli sa kapalangkawan kundi huli sa kapakumbabaan asin pagkamoot sa Dios, sa katotoohan asin sa satong kapwa. Nakaoogma, sa tabang nin tunay na mga Kristianong publikasyon, kita ‘marigon na nakakapangapot sa tataramon nin buhay.’​—Filipos 2:16.

Kristianong mga Kuwalidad Bilang Pantabang

14. (a) Taano ta mayo kita nin dahelan na magpalangkaw? (b) Taano ka kaipuhan kitang magpakumbaba tanganing marigon na makapanindogan tumang ki Satanas?

¹⁴ Apuwera sa satong espirituwal na pangalasag, an Kristianong mga kuwalidad makakatabang man sato na marigon na manindogan tumang sa Diablo. Mantang pinupukaw ni Satanas an kapalangkawan, an pagkaigwa niato nin kapakumbabaan asin nin espiritu nin marahay na kaisipan matabang sato sa satong pakikilaban sa saiya. Totoo nanggad, mayo nin Kristiano na maninigong “mag-isip dapit sa saiyang sadiri nin orog ki sa maninigong isipon.” Kun nagibo na niato an gabos na ipinapagibo sa sato, maninigong makapagsabi kita: “Kami mga oripon na daing kamanungdanan. An ginibo niamo iyo an katongdan niamong gibohon.” Apuwera kaiyan, kaipuhan niato an dai na kutana maninigong pagkaherak nin Dios tanganing makapanindogan nin marigon tumang ki Satanas asin tanganing kamtan iyan kaipuhan na kita magin mapagpakumbaba, huli ta “an Dios minatumang sa mga maabhaw, alagad sia minatao nin dai na kutana maninigong pagkaherak sa mga mapakumbaba.”​—Roma 12:3; Lucas 17:10; Santiago 4:6.

15. Sa paninindogan nin marigon, ano an halaga kan pagpopogol sa sadiri?

¹⁵ An pagpopogol sa sadiri saro pang Kristianong kuwalidad na matabang sato na makapanindogan nin marigon tumang ki Satanas. An dai pakapogol sa satong emosyon, arog kan kaanggotan, o pagpangana sa pagkakan, inomon o sekso magbubugtak sato sa peligro na salakayon asin maniobrahon kan Diablo. Kan kita kaidto “namuhay sono sa mga horot kan satong laman,” sa katotoohan kita naglalakaw “sono sa palakaw nin mga bagay kan kinaban na ini, sono sa poon [Satanas na Diablo] kan autoridad kan doros, an espiritu na naghihiro ngonyan sa mga aki nin kasumbikalan.” (Efeso 2:​1-3) Kun kita padadaog sa paslo, marigsok na mga kaisipan asin saboot, nasa peligro kitang masiod kan Diablo para sa pag-otob sa saiyang kabotan. (2 Timoteo 2:26) Tanganing marigon na makapanindogan tumang sa saiya, kaipuhan na marigon niatong pogolan an satong mga kaisipan asin emosyon saka an satong mga tataramon asin hiro. Kaipuhan na disiplinahon niato an satong isip na maghorophorop kan mga bagay na marahay, matanos, malinig asin kawiliwili.​—Filipos 4:8.

16. Taano an daing kapasloan na pagkamoot ta makatatabang sato na manindogan nin marigon?

¹⁶ An daing kapasloan na pagkamoot partikularmenteng makakatabang sato na marigon na manindogan tumang ki Satanas na Diablo. Listo siang kasangkapanon an ano man na paslong ugale na tibaad marisa nia sa sato. Sagkod na an daing kapasloan na pagkamoot nagpapadanay sato na sibot sa paglilingkod asin pagsamba ki Jehova, sagkod man dian na kita dai tatamaan kan mga pagsalakay ni Satanas. Ano an makukua nia sa sato kun namomotan niato si Jehova sa bilog niatong puso, kalag, isip asin kosog? An pagkamoot ginigibo man kitang may pagmakolog sa kaligtasan nin iba, asin ini matabang sato na maseguro an satong kaligtasan. (Marcos 12:​30, 31; 1 Timoteo 4:16) Sagkod na ipinaheheling niato an pagkamoot sa laenlaen na kapahayagan kaiyan, si Satanas man o an siisay man sa saiyang mga ahente, naheheling o dai naheheling, dai makakahimong paluyahon an satong paninindogan tumang sa sainda.​—1 Corinto 13:​4-8.

17. Taano an pamibi ta napakahalaga sa satong marigon na paninindogan?

¹⁷ Tanganing makapanindogan nin marigon tumang sa mga pakana ni Satanas, kaipuhan na lubos man niatong gamiton an pamibi. Taano? Huli ta dai nanggad kita manggagana sa sadiri niatong kosog. Kaipuhan niato an tabang hale sa itaas. Pagkatapos na iladawan an espirituwal na pangalasag, sinadol ni Pablo an mga kapagtubod na gamiton ‘an gabos na porma nin pamibi asin pagngayongayo, na namimibi sa gabos na panahon sa espiritu.’ Sa katuyohan na iyan sinda dapat na “danay na magpuka sa bilog na panahon asin may pagngayongayo para sa gabos na banal,” kaiba na an apostol.​—Efeso 6:​18, 19.

18, 19. (a) Paano makatatabang sato an pag-omaw asin pagpasalamat? (b) Ano an halaga nin kahagadan asin pagngayongayo?

¹⁸ Ano an kaiba sa “gabos na porma nin pamibi”? An sarong porma nin pamibi iyo an pag-omaw. Tunay na huli sa tunay na personalidad ni Jehova, sa saiyang mga kuwalidad asin posisyon sa uniberso, sia maninigo niatong omawon. (Salmo 33:1) An saro pang porma nin pamibi iyo an pagpasalamat. Asin kadakol kan satong dahelan na magpasalamat sa Paratao kan “lambang marahay na balaog asin lambang sangkap na regalo”! (Santiago 1:17) Angay na gayo, kita hinahatolan na “magpasalamat ki Jehova para sa saiyang mamomoton na kabootan asin sa saiyang makangangalas na mga gibo para sa mga aki nin mga tawo.” (Salmo 107:31) An pagkaigwa niato nin mapagpahalagang puso asin isip tunay na matabang sato na marigon na manindogan tumang ki Satanas.

¹⁹ An kahagadan saro pang porma nin pamibi. Tama na kita humagad nin mga bagay na arog kan kadonongan (Santiago 1:5), banal na espiritu (Lucas 11:13), kapatawadan sa mga kasalan (1 Juan 1:9; 2:​1, 2) asin bendisyon nin Dios sa satong mga paghihingoa (Salmo 90:17). Yaon man an pagngayongayo. Iyan nangangahulogan nin odok na pakimaherak ki Jehova Dios, arog kun sa mga panahon nin labi-labing kagipitan o peligro. Kaya kan si Pablo nabibilanggo sia nakiolay na ipagngayongayo sia. (Efeso 6:​18-20) An mga pormang ini nin pamibi seguradong matabang sato na marigon na makapanindogan tumang ki Satanas.

Magin Determinado na Marigon na Manindogan

20, 21. Paano kita biyong manggagana?

²⁰ Ngonyan an banwaan ni Jehova bilang sarong grupo tunay na nagkakamit kan mga bendisyon nin sarong espirituwal na paraiso. Alagad tanganing kita bilang indibiduwal padagos na makapakikabtang sa mga bendisyon na ini dai niato iyan puwedeng pabayaan. Kaipuhan na kita perming nagbabantay, na marigon na naninindogan tumang sa satong Kaiwal, si Satanas na Diablo.​—1 Pedro 5:​8, 9.

²¹ An Diablo kadakol kan pakana, siring sa naheling niato, asin an saiyang plano raoton an satong integridad asin papondohon kita sa paglilingkod ki Jehova Dios. Alagad ta dai kita madadaya ni Satanas kun permi niatong isolog an satong espirituwal na pangalasag hale sa Dios, padagos na kultibaron an mga bunga kan saiyang espiritu na arog kan pagkamoot asin pagpopogol sa sadiri, asin magmaigot sa pamibi. Sa siring, paagi sa mamomoton na tabang kan satong Dios, si Jehova, kita biyong masasangkapan na manindogan nin marigon tumang sa mga pakana ni Satanas.

Nagigirumdoman daw Nindo

◻ Taano si Satanas ta naaanggot tumang sa mga lingkod ni Jehova?

◻ Ano an minakompuwesto sa espirituwal na pangalasag kan Kristiano?

◻ Ano an pira sa mga “naglalaad na bosog” ni Satanas, alagad ano an proteksion niato tumang dian?

◻ Taano ka kaipuhan kitang magpakumbaba tanganing makapanindogan nin marigon tumang sa Diablo?

◻ Sa satong paninindogan nin marigon, taano ta napakahalaga kan pamibi?