Sararo sa Pagpahayag kan Tataramon ni Jehova

“Kamo magkaigwa kan kaisipan na pareho kan ki Cristo Jesus, na paagi sa sarong ngoso kamo oroyon na magpamuraway sa Dios asin Ama kan satong Kagurangnan na Jesu-Cristo.”​—ROMA 15:​5, 6.

1. (a) Ano an areglo ni Jehova para sa pagsararo sa saiyang banwaan? (b) Ano an ipinaririsa kan Kasuratan kun dapit sa pagkasunodsunod kan pagsararong ini?

TINIRIPON ni Jehova an saiyang mga saksi sa napakahalagang pagkasararo sa bilog na globo. Ini kaoyon sa areglo sa pamilya nin Dios na ilinaladawan ni apostol Pablo sa Efeso 1:10: “Sarong administrasyon sa katapusan kan itinalaan kan itinalaan na mga panahon, na iyo, an tiponon giraray an gabos dian ki Cristo, an mga bagay sa kalangitan asin an mga bagay sa daga.” An enot na titiponon iyo an kairiba sa “sadangotan na aripompon’ nin linahidan na mga Kristianong palangit dangan an mga kaiba sa “dakulang kadaklan . . . hale sa gabos na nasyon” na naglalaom na makaligtas pasiring sa matanos na “bagong daga” na ipinanuga nin Dios.​—Lucas 12:32; Kapahayagan 7:​3, 4, 9, 13-17; 21:​1, 5.

2. Ano an nagpapangyari sa mga Saksi ni Jehova na magtaram nin “oroyon”?

² “Oroyon”​—iyan an paagi na ipinahahayag kan mga saksing ini ni Jehova an saiyang mensahe sa Kahadean. Taano ta nagigibo ninda ini? Huli ta, sa bilog na globo, ipinaheheling ninda an “kaisipan na pareho kan ki Cristo Jesus” kan sia yaon sa daga. Sia kaidto bakong kabtang kan maabhaw na kinaban na ini. Imbes, sia nagpakumbaba sa paggibo sa kabotan nin Dios asin sa pagtogdok nin mainit, mamomoton sa pagkasararo sa tahaw kan saiyang mga disipulo. Ini an kapinonan nin panglobong pagkasararo na nagpamidbid sa tunay na mga Kristiano sa suminunod na mga siglo.​—Filipos 2:​5-8; Juan 13:​34, 35; 17:14.

3. (a) Anong dakulang pagkakalaen an maheheling sa daga ngonyan? (b) Paano nakatatabang an Kasuratan na mamidbid an panglobong sosyedad ka tunay na mga Kristiano?

³ An pagkasararong ini sa organisasyon nakaabot sa pinakamakangangalas na kapahayagan kaiyan sa “huring mga aldaw” na ini, na laen na gayo sa pagkabaranga na tinitios kan palakaw nin mga bagay ni Satanas, na dian lakop an pagkaongis asin katampalasanan. (2 Timoteo 3:​1-5, 13; Mateo 24:​3, 12) Kasuarin man dai pa nangyari sa kasaysayan nin katawohan na magkaigwa sa bilog na daga, sa 203 na kadagaan, nin sarong organisasyon sa biyong oroyon sa pagtubod, katuyohan asin aktibidad. An panglobong sosyedad na ini kan mga disipulo ni Jesus mamimidbid paagi sa bunga kaiyan.​—Juan 15:8; Hebreo 13:15; Galacia 5:​22, 23.

Pagkasararo sa Paghiro

4. (a) Anong isyu an naglataw sa kongregasyon kan enot na siglo? (b) Sono sa Gibo 15:​1-6, anong teokratikong paghiro an pinonan?

⁴ An pagkasararo sa paghiro sa organisasyon ni Jehova ipinag-iilustrar sato sa Mga Gibo kapitulo 15. Imahinara nindo an katiriponan nin maygurang na mga saksi ni Jehova​—an 12 apostol, iba pang kamagurangan na lalaki sa kongregasyon nin Jerusalem saka si Pablo asin Bernabe, mga magurang hale sa kongregasyon nin Antioquia. Duman sa Antioquia, saka sa Jerusalem, may mga nakombertir na Judio na nag-iinsister na an mga hale sa mga nasyon dapat na turion asin mag-otob sa Pagboot ni Moises tanganing makaligtas. Kay an mga apostol asin kamagurangan na lalaki “nagtiripon sa pag-orolay dapit kan bagay na ini.”​—Gibo 15:​1-6.

5-7. (a) Sa anong sentido nagkaigwa nin “halawig na pasuruhay”? (b) Anong patotoo an iinatubang? (c) Paano ginamit an Kasuratan sa bagay? (d) Anong maygurang na desisyon an ginibo ni Santiago, na naggiya sa anong ultimong desisyon? (e) Ano an suminunod na ginibo?

⁵ Nagkaigwa nin bukas-an-isip na orolay sa problema, na ipinahahayag kan debotadong mga lalaking idto an gabos na argumento apabor asin kontra sa bagay. An saindang isip bakong dating haman pa. Andam sindang siyasaton an bagay sa gabos na anggulo. Nagkaigwa nin “halawig na pasuruhay,” pero malinaw na napagdanay ninda an areglo asin magalang na naghihinanyog sa opinyon kan lambang saro. Si apostol Pedro nagpatotoo sa bagay na an Dios nagtao nin banal na espiritu sa dai tinuring mga taganasyon​—seguradong makosog na patotoo na an pisikal na pagturi bako nang kahagadan para sa mga ililigtas. Dinugangan ni Bernabe asin Pablo an patotoong ini, na isinasaysay an kadakol na makangangalas na bagay na ginibo nin Dios paagi sa saindang ministeryo sa mga nasyon.​—Gibo 15:​7-12.

⁶ Dangan, si Santiago nagkotar sa Kasuratan bilang suportasyon sa itinatao pa sanang argumento. Ipinaliwanag nia na an Amos 9:​11, 12 nagtotokdo sa pagbabalik kan pagoyon nin Dios sa pagsakop kan Orog Kadakulang David, si Jesu-Cristo, asin sa pagtatao ni Jehova nin dai na kutana maninigong pagkaherak sa “gabos na nasyon na sa sainda inapod an [saiyang] ngaran.” Mayo nin naheheling na pangangaipo si Santiago na pagabatan pa an mga nakombertir na mga taganasyon paagi sa pag-insister na sinda turion asin mag-otob sa gabos na reglamento na yaon sa Pagboot ni Moises. Minsan siring, kaipuhan an pirang bagay: Kaipuhan na sinda lumikay sa pagsamba sa ladawan, sa pagkakan nin dugo sa ano man na porma asin sa seksuwal na inmoralidad.​—Gibo 15:​13-21.

⁷ An namamahalang grupo sa Jerusalem nakaabot sa desisyon na biyong pinagkaoroyonan. Iyan nagsugo nin mga mensahero sa kongregasyon nin Antioquia na may darang surat na tinatapos sa pagpakosog na ini: “Kun maingat kamong maglikay sa mga bagay na ini, mapapakarhay kamo. Magin logod marahay an saindong salud!”​—Gibo 15:​22-29.

Teokratikong Paagi

8. (a) Paano an modernong Namamahalang Grupo ginigiyahan sa paggibo nin mga desisyon? (b) Ano an pirang bagay na bago pa sanang liwanagon?

⁸ Sa modernong mga panahon, an Namamahalang Grupo kan mga Saksi ni Jehova, na nagrerepresentar sa daga kan “maimbod asin madonong na oripon” kan Kagurangnan, nag-aarog sa halimbawang itinao kan mga apostol. (Mateo 24:​45-47) Kaya, an Kristianong kabatidan, paggiya sa hale sa Biblia, asin paggiya kan espiritu ni Jehova nagdadara sa grupong ini nin linahidan na mga Saksi sa teokratikong mga konklusyon dapit sa mga bagay na napakahalaga sa kongregasyon. Halimbawa, sa nakakaagi pa sanang mga taon an Namamahalang Grupo nagsunod sa Makakasuratan na paagi sa pagklaripikar sa mga bagay na arog kan punto-de-vista kan Biblia sa “ministro,” konsensia na itinao nin Dios, pagdara nin nakagagadan na mga armas, asin kun gurano aplikado sa maabot na Paraiso sa daga an mga kabtang kan hula ni Isaias.​—Ikomparar an Juan 14:26; 1 Corinto 2:10.

9. Anong paagi an kaipuhan na sunodon nin kamagurangan sa pagkapot sa mga problema ngonyan?

⁹ An paagi na nasa Mga Gibo kapitulo 15 dapat na sunudon man kan kamagurangan sa kongregasyon sa pagkapot sa mga problema ngonyan. Enot, malinaw na ipasabi an problema asin konektadong mga bagay. Ikaduwa, pabayaan na an masasarigan na mga saksi tumao nin malinaw, totoong ebidensia dapit sa bagay. Siyasaton an Kasuratan tanganing maaraman an punto-de-vista ni Jehova, na ginagamit man an tabang na tibaad makukua sa mga publikasyon kan Watch Tower Society. Mapagngayongayong magtarabangan na makaabot sa pinagkakaoroyonan na solusyon, kaoyon sa katokdoan kan Tataramon ni Jehova, na magtatao nin pakinabang sa kongregasyon.​—Isaias 48:17; 1 Corinto 14:33.

Pag-ogma​—Kaidto Asin Ngonyan

10. (a) Arog kaidto sa kongregasyon kan enot na siglo, ano an maninigong magin epekto sa sato ngonyan kan teokratikong mga desisyon? (b) Paano an modernong mga pangyayari nagbunga kan pagpakosog asin pagdakol kan banwaan nin Dios?

¹⁰ Kan madangog ninda an desisyon kan namamahalang grupo, an mga miembro kan kongregasyon sa Antioquia “nag-ogma huli sa pagpakosog.” Siring man ngonyan, an mga Saksi ni Jehova naoogmang maaraman an organisasyonal na mga desisyon asin paliwanag sa doktrina na nagpaparahay sa espirituwal na salud kan banwaan nin Dios asin sa pag-oswag kan gibohon ni Jehova. (Ikomparar an Tito 2:1.) Pero an Namamahalang Grupo dai na kaipuhan na gumibo nin mga surat nin instruksion paagi sa kamot asin ipadara ini sa mga mensahero na nagbabaklay. An modernong mga paagi nin komunikasyon asin imprentahan a labing 30 sanga kan Watch Tower sa bilog na daga nagpangyari na ipaabot “an maogmang bareta kan tataramon ni Jehova” sa minilyon sa banwaan nin Dios sa pinakahalipot na panahon. Ini pangenot na ginigibo paagi sa magasin na Torrengbantayan. Kaya, an mga kongregasyon sa bilog na kinaban padagos na ‘napakokosog sa pagtubod asin nagdadakol an bilang aroaldaw.’​—Gibo 15:30–16:5.

11. Paano ginamit ni Jehova an Torrengbantayan sa pag-otob sa Isaias 30:​18-21?

¹¹ An mga nagbabasa sa Torrengbantayan sa laog nin dakol nang taon naogma man na maheling an nagdadakol na sirkulasyon kaiyan. Sa 105 taon nin pagpublikar kan Ingles na edisyon, ini nagdakol poon sa 6,000 na kopya sa Ingles bulan-bulan sagkod sa 11,150,000 na kopya sa 102 na lenguahe, na duwa kada bulan an luwas kan gabos na mayor na edisyon. Daing duwa-duwa, an Torrengbantayan ginamit sa makakamhan na paagi kan satong Kaharohalangkaweng Paratokdo, si Jehova Dios, sa pag-otob sa panuga na: “Maogma an gabos na naghahalat sa saiya. . . . An saimong mga talinga makakadangog nin tataramon sa likod mo na nagsasabi: ‘Iyo ini an dalan. Maglakaw dian, kamo banwaan,’ kun baga kamo banwaan maninigong magpatoo o magpawala.”​—Isaias 30:​18-21.

12. (a) Taano ta may dugang kitang dahelan na mag-ogma ngonyan? (b) Paano kita maninigong makinabang sa bagong areglong ini?

¹² Ngonyan igwa nin orog pang dahelan na mag-ogma. Poon sa taon 1985, an Ingles na Torrengbantayan ipinupublikar nin durungan, kun dapit sa laog, sa 23 na lenguahe!a An gabos na edisyon na ini parareho an retrato sa tutob. Parareho an serye ninda nin pambukas na mga artikulo asin parareho an mga artikulong pag-aadalan. Ini nagtataong lugar sa durungan na programa nin “pagpakakan” na mabogkos sa banwaan ni Jehova sa espirituwal na pagtalubo “sagkod na kita gabos makaabot sa pagkasararo sa pagtubod.” Iyan maninigong orog na makaanimar sa sato, tanganing ‘paagi sa sarong ngoso kita oroyon na magpamuraway sa Dios asin Ama kan satong Kagurangan na Jesu-Cristo.’​—Efeso 4:13; Roma 15:6.

13. (a) Gurano kahiwas kan programang ini? (b) Kaya anong pag-aplikar kan 1 Corinto 1:10 an puwedeng gibohon?

¹³ Kun kapot nindo an magasin na ini sa semanal na pag-adal kan kongregasyon sa Torrengbantayan, dai daw kamo naoogmang maaraman na an kadaklan sa saindong mga tugang sa bilog na kinaban sararo sa pagkakan sa parehong espirituwal na kakanon sa parehong aldaw? Iyo, ini mangyayari sa bilog na North asin South America, sa kadaklan na parte nin Europa, sa Hapon asin sa dakol na lugar sa parteng timog nin Aprika! Kinakarkulo na sa ngonyan labi nang 90 porsiento sa mga nag-aatender sa pag-adal kan Torrengbantayan sa bilog na daga​—mga 2,500,000 katawo kada semana​—an nakikikabtang sa areglong ini nin durungan na “pagpapakan.” Iriba, an mga ini ginigibong “magkasararo sa saro sanang pag-isip asin sa sarong sanang paghonahona.” (1 Corinto 1:10) Sono sa itinotogot kan mga kamugtakan, idadagdag an iba pang lenguahe.

14. Paano makikinabang an mga pamilya?

¹⁴ Sagkod ngonyan, huli sa pagkakalaen nin lenguahe, an mga miembro nin sarong pamilya tibaad dakol na bulan an distansia sa pag-adal sa sarong artikulo sa Torrengbantayan. Pero ngonyan puwede na sindang magin saro sa bagay na ini. Halimbawa, an dayong mga magurang na mas tatao nin ibang lenguahe puwede nang tumukaw kaiba kan saindang mga aking nagtataram nin Ingles tanganing magkairibang andamon an parehong leksion sa Torrengbantayan sa parehong lenguahe. Sa mga pamilyang duwa an ginagamit na lenguahe, an mga magurang magigin mas kuwalipikado ngonyan na otobon an instruksion sa Efeso 6:4 asin 2 Timoteo 3:​14, 15.

15. (a) Sa satong ministeryo sa publiko, ano an magigibo na niato ngonyan kaoyon sa Isaias 52:​8, 9? (b) Ano an nahimo kaidtong pagpopoon nin 1985, asin ano an mahihimo sa ngapit?

¹⁵ Horophoropa man an ministeryo niato sa publiko paagi sa mga magasin. Sa dugang na paaging ini, an mga parahayag kan Kahadean sa bilog na globo puwede na ngonyan na “magkururahaw sa kaogmahan na durungan” mantang sinda durungan na nag-aatubang nin parehong impormasyon sa publiko. (Isaias 52:​8, 9) Sa pagwaras nin magasin sa mga tinampo sa mga lugar na may laen-laen na lenguahe, ikakapaheling nin mga parahayag an mga magasin na may pararehong tema sa tutob sa duwa o labi pang lenguahe. Isip-isipa iyan! Kan pagpopoon nin 1985, an mga parahayag kan Kahadean sa bilog na daga nakatao nin nakakapukaw, sararong patotoo manongod sa Armagedon! Pag-abot nin panahon, tibaad giyahan ni Jehova an saiyang banwaan na tumao nin iba pang mapuwersa, sararong kapahayagan sa bilog na kinaban mantang sinda naglilingkod nin “daramay . . . para sa pagtubod sa maogmang bareta.” (Filipos 1:27) An siring na mga kapahayagan papangyayarihon kan durungan na pagpublikar kan Torrengbantayan sa dakol na lenguahe.​—Ikomparar an Daniel 11:44.

Pagtanaw sa Enotan

16. (a) Ano an sinasabi sato kan Enero 1, 1985 na Watchtower sa pahina 8 asin 9 asin kan magasin na ini sa pahina 20 manongod sa pagwaras nin magasin? (b) Taano ta kaipuhan nin mga tawo ngonyan an satong mga magasin?

¹⁶ Kan taon 1984, iwinaras nin mahiwas kan mga Saksi ni Jehova an magkapadis na magasin na Torrengbantayan asin Magmata! An aktibidad na ini binendisyonan na gayo ni Jehova, arog kan maheheling sa estadistika na nasa pahina 8 asin 9 kan Enero 1, 1985 na The Watchtower asin sa pahina 20 kan magasin na ini. Sa bilog na kinaban, an pagwaras sa langtad kan satong mga magasin kan 1984 luminangkaw nin 11.1 porsiento sa kagabsan na total na 287,358,064, mantang an pakakua nin suskripsion sa magasin luminangkaw nin 3.2 porsiento sa 1,812,221. Daing duwa-duwa na padakol nang padakol na mga tawo an gustong makaaram kun taano ta nahahandal an mga nasyon, “na dai naaaraman an gigibohon.” (Lucas 21:​25, 26) An mga magurang nagmamawot nin maogmang ngapit para sa saindang mga aki​—mas marahay nanggad ki sa daga na tinotong nin guerra nuklear. An satong mga magasin nagtatao nin buhay na paglaom!​—Mateo 12:​18, 21; Roma 15:4.

17. Paano an satong mga magasin makatatabang sato na paglabanan an Diablo?

¹⁷ Ano man ngonyan na 1985? An mensahe na nasa An Torrengbantayan asin Magmata! nagigin mas direkta. Ini dapat na laoman mantang nauubos an huring mga aldaw kan kinaban ni Satanas. (Kapahayagan 12:12) Dai kamo masala! Boot kan Diablo na papanluyahon kita tanganing dai na regular na makikabtang sa paglilingkod ki Jehova. Iyo, boot ni Satanas na isuhay kita sa banwaan nin Dios asin sa aktibidad kaiyan, sa siring masiba kita. (1 Pedro 5:8) Pero puwede niato siang paglabanan paagi sa regular na pagtiripontipon tanganing mag-ako nin tamang kaaraman, asin paggamit sa nadugangan na kaaraman na ini sa paglilingkod ki Jehova.​—Efeso 6:​11, 14-16; Colosas 1:​9-11.

18. (a) Gurano kadakula kan saindong paninimbagan bilang parahayag kan Kahadean? (b) Paano niato ikakaaplikar an hatol sa Roma 12:​10, 11 asin 15:​5, 6?

¹⁸ Kamo daw parahayag kan Kahadean? Kun iyo, kapot nindo an pundamental na katongdan sa modernong teokratikong sosyedad. Bilang nagdusay na Kristiano, tibaad may iba pa kamong paninimbagan sa kongregasyon. Pero, sa paggawe oyon sa ngaran ni Jehova, kaipuhan na kamo magin mahigos na ministro sa langtad. Sararo sa pagkamoot nin sa magturugang asin sa pagkaigwa nin pagpadangat sa lambang saro, kita logod gabos magpadagos na malaad sa espiritu mantang kita ‘naglilingkod ki Jehova.’ (Roma 12:​10, 11) Ano man an pangigipit na agihan niato hale ki Satanas asin sa saiyang kinaban, kaipuhan na kita magpadagos bilang sarong grupo, iyo, ‘oroyon asin paagi sa sarong ngoso,’ na nagpapamuraway ki Jehova paagi sa pagpahayag kan saiyang mga katuyohan sa Kahadean.

19. (a) Paano niato mapangganang maatubang an mga paglamag asin iba pang problema? (b) Ano an hatol na itinatao sato sa Sofonias 3:​8, 9?

¹⁹ An dakol sa sato kaipuhan na umatubang sa paglamag o sa mga teritoryo na dai nag-aako kan satong paghuhulit. Minsan siring, padagos niatong ipaheling an kaisipan na kapareho kan ki Cristo Jesus. (Juan 16:33; 1 Pedro 4:​1, 2) Bilang sararong grupo ipaheling niato an tunay na kapusoan​—an panlaog na espirituwal na kosog na nagtatagal asin dai natutupas kun nagigipit. (Salmo 27:14; Filipos 1:14) Dai kita noarin man maghinugak sa paghanap sa mga arog-karnero. Permi kitang “maghalat” ki Jehova asin sa saiyang aldaw nin paniningil, na pinaglilingkodan sia nin daramay mantang kita nag-aapod sa saiyang ngaran asin nagtataram kan “malinig na tataramon” nin katotoohan.​—Sofonias 3:​8, 9.

20. (a) Paano kita makakanompong nin tunay na kaogmahan? (b) An Isaias 11:​6-9 nagkaigwa nin anong makangangalas na kaotoban?

²⁰ Sararo, an gabos logod na nagpapamuraway sa Dios “magsolog kan bagong pagkatawo na linalang oyon sa kabotan nin Dios sa tunay na katanosan asin kaimbodan.” (Efeso 4:24) Ini nagbubunga nin tunay na kaogmahan. Iyan ipinag-iilustrar sa Isaias 11:​6-9, na nagtataram manongod sa espirituwal na paraiso na yaon ngonyan sa tahaw kan nakabalik na banwaan ni Jehova. Kanigoan na katoninongan asin pagkaoroyon! Dai na natanggad nin paslo, nakakadanyar na mga ugale! Bilang konklusyon sa paglaladawan na ini sa paraiso, maheheling niato an mga tataramon na ini: “Dai sinda magibo nin maraot o manraraot sa bilog na sakuyang banal na bukid: huli ta an daga mapapano kan kaaraman dapit ki Jehova kun paanong an tubig nakakatahob sa mismong kadagatan.” An “banal na bukid” kan sararong pagsamba ki Jehova marigon na napapatindog ngonyan sa bilog na daga. Taano? Huli ta pinahiro ni Jehova an saiyang mga saksi na pamurawayon an saiyang ngaran nin ‘oroyon asin paagi sa sarong ngoso.’ Sa siring “an daga,” an espirituwal na istada kan Saiyang banwaan, napano kan “kaaraman dapit ki Jehova.”

21. Taano ta maninigo niatong iwaras an satong mga magasin sa pinakamahiwas na mahihimo?

²¹ Sa kosog na itinatao ni Jehova, iwaras logod niato sa pinakamahiwas na mahihimo an Torrengbantayan asin an kapadis na magasin kaiyan na Magmata! Asin gibohon logod niato iyan sa paglaom na an gabos na kasagkodan kag daga asin an gabos na pamilya kan mga nasyon, sa paaging ipinagrerepresentar, “magpapakagirumdom asin mabuwelta ki Jehova.”​—Salmo 22:27; Kapahayagan 15:4.

[Nota sa Ibaba]

Sa Pagrepaso sa Artikulong Ini​—

◻ Paano nagpunsionar an kongregasyon kan enot na siglo?

◻ Anong mga pakinabang an ibubunga kan durungan na pagpublikar kan Ingles na edisyon kan Torrengbantayan?

◻ Anong marahay na paghihingoa sa magasin an ginibo kan 1984?

◻ Paano kita maoswag sa espirituwal, minsan sa mga panahon nin pagbalo?