“Nainaan Na an Panahon na Natatada”
1. Taano ta pinaghohona nin iba na nauubos na an panahon para sa katawohan?
NAUUBOS na an panahon para sa palakaw na ini nin mga bagay. An sarong dahelan na dakol an nakaabot sa konklusyon na ini iyo an bagay na namemeligro an mismong pagkabuhay nin katawohan. Tara, garo baga haranihon na ngonyan an nuklear na pagkatunaw kaya sinasabi na iyan “tolong minuto na sana bago an matangang banggi”!
2. Ano an isinabi nin sarong peryodista manongod sa peligro nuklear?
2 Sa pagsurat sa temang “The Shadow of the Bomb,” an peryodistang Australiano na si Nick Brash nagsabi: “An sarong gelignite na an gabat kabangang kilo igo na tanganing paputokon an sarong tawo. Pero an natatambak na nuklear na armas katimbang ngonyan nin apat na tonelada nin gelignite para sa lambang lalaki, babae asin aki sa daga. Labing $500 bilyones an inubos sa mga armas nuklear asin labing $40 bilyones an gagastuson sa mga armas sa bilog na kinaban ngonyan na taon [1983]. Iyan sobra-sobra nanggad na paggadan. Katimbang nin pagbomba sa sarong namok nin 10 lata nin [pangadan sa namok na] Mortein.”—The Sun Weekend Magazine (Melbourne, Australia), Abril 23, 1983.
3. Ano an masasabi manongod sa posibleng magin epekto nin ralaban nuklear?
3 Masakit imahinaron an posibleng magin mga epekto nin guerra nuklear. Apuwera sa kagadanan nin ginatos na milyon, lakop sa globong oran na radyoaktibo, epekto sa ekolohiya asin iba pa, magkakaigwa nin dai mapaniwalaan na pagkadistorbo sa sosyal, politikal asin ekonomikong bagay-bagay sa bilog na daga. An totoo, si Dr. Brian Martin, sarong pisiko asin parasiyasat sa Australian National University, nag-admitir: “Bako nanggad na bastante an naaaraman niato tanganing ikasabi na may kasarigan an gabos na magigin epekto sa globo kan guerra nuklear.”
4. (a) Taano ta makasisierto kita na an katawohan dai paparaon an sadiri sa sarong nuklear na pagkatunaw? (b) Paano niato naaaraman na nauubos na an panahon para sa presenteng palakaw nin mga bagay?
4 Garo baga talagang makatatakot an ngapit. Alagad kamong mga namomoot sa Dios, magmapuso kamo! Minsan ngani nauubos na an panahon para sa presenteng palakaw nin mga bagay, dai lalaglagon nin katawohan an sadiri sa sarong maribok na nuklear na pagkatunaw. Iyan maseseguro niato, huli ta si Jehova, “an Kagporma asin Kaggibo” kan daga, “dai iyan linalang na baralanggo, pinorma nia iyan tanganing pag-istaran.” (Isaias 45:18, Byington) Siyempre, tanganing ikaligtas an katawohan sa pagkatunaw, kaipuhan an mas halangkaw sa tawong paghiro tolos tanganing tapuson an palakaw na ini, saka an nuklear na karungawan kaiyan. Makaoogma, madali nang laglagon kan Kaglalang kan planetang Daga asin katawohan an maraot, naghuhugot na palakaw na ini. Halipot na sana an panahon kaiyan huli ta “an dakulang aldaw ni Jehova” harani na! (Sofonias 1:14-18) Pero, nakakaranga nanggad na maaraman na sa panahon kan marikas na nagdadangadang na aldaw na iyan nin paniningil, ‘babantayan ni Jehova an gabos na namomoot sa saiya, alagad an gabos na maraot saiyang paparaon’!—Salmo 145:20.
Gurano Pang Panahon an Natatada?
5. Sono sa Kapahayagan 6:9, 10, an mga linahidan na parasunod ni Jesus interesadong maaraman an ano?
5 Daing duwa-duwa na an Dios mahiro tumang sa saiyang mga kaiwal. Alagad gurano pa kahaloy bago nia tapuson an maraot na palakaw na ini nin mga bagay asin ponan an saiyang Bagong Areglo nin katoninongan asin katanosan? Tibaad kamo sarong saksi ni Jehova na boot na maaraman an simbag sa hapot na iyan. Sa bagay na ini, an saboot nindo kaparehong gayo kan sa ginadan na mga linahidan na Kristiano na sinasabi sa Kapahayagan na nagkukururahaw: “Sagkod noarin, Soberanong Kagurangnan na banal asin totoo, na dai mo hohokoman asin sisingilon an samong dugo sa mga nag-eerok sa daga?” (Kapahayagan 6:9, 10) Iyo, sa piguratibong paagi boot na maaraman kan mga linahidan na idto kun noarin sisingilon nin Dios an saindang dugo. Bakong makangangalas na an gabos na Saksi ni Jehova ngonyan naghahalat na gayo sa “ralaban nin dakulang aldaw nin Dios na Makakamhan sa gabos” sa Har–Magedon!—Kapahayagan 16:14-16.
6, 7. (a) Dapit sa panahon, ano an isinabi ni Pablo sa 1 Corinto 7:29? (b) Anong tataramon ni Pedro an nagdodoon kan bagay na an palakaw na ini magkakaigwa nin kapahapahamak na katapusan?
6 An linahidan na mga saksing idto na an dugo pinabolos huli sa saindang kaimbodan ki Jehova may hinahalat na balos, huli ta sinasabi kan tala sa Biblia: “May itinaong maputing gubing sa lambang saro sa sainda; asin sinabihan sinda na magpahingalo pa nin kadikit na panahon, sagkod na makompleto man an kabilangan kan saindang mga kapwa oripon asin kan saindang mga tugang na gagaradanon man siring sa sainda.” (Kapahayagan 6:11) Makaseseguro kita na an Dios mahiro sa saiyang itinalaan na panahon. Sa katunayan, an mga tataramon ni apostol Pablo sa 1 Corinto 7:29 tamang-tama. Malinaw na sinabihan nia an saiyang mga kapagtubod: “Nainaan na an panahon na natatada.”
7 An mga tataramon ni Pablo bako sanang nagpapakosog sa mga lingkod ni Jehova sa modernong aldaw kundi nagpaparisa man na an buhay nin mga Kristiano maninigong isentro sa mahalagang gibohon na itinao sa sainda nin Dios. Sa kaparehong tema, si apostol Pedro nagsurat: “Harani na an katapusan kan gabos na bagay.” (1 Pedro 4:7) Aram ni Pedro na an palakaw na ini nakatagama sa kalaglagan. Iyan an kaaabtan kaiyan!
8. An bagay na harani na an katapusan kan palakaw na ini maninigong magkaigwa nin anong epekto sa banwaan ni Jehova?
8 Si Pablo asin Pedro pareho nagdoon kan bagay na an palakaw na ini nin mga bagay nakatalagang malaglag. Ini bagay na dai noarin man maninigong lingawan nin tunay na mga Kristiano. An katapusan maabot sa satong aldaw, asin an gabos na ebidensia nagpaparisa na iyan haranihon na nanggad. Kun siring, aroaldaw an satong pamumuhay maninigong magparisa kan pagtubod na iyan. Dugang pa, an bagay na harayoon na an naabot niato sa huring mga aldaw kan palakaw na ini maninigong makapano sato nin determinasyon na gibohon an bilog niatong makakaya sa marahay asin apretadong gayong gibohon na pagpahayag kan maogmang bareta bilang nalinigan asin mahigos na mga saksi ni Jehova.—Tito 2:13, 14.
Harayo Na an Naabot sa “Panahon nin Katapusan”
9. An kadaklan na tawo ngonyan sibot-sibot sa ano, asin ini daw nangyari na kaidto?
9 Ihinula ni Jesu-Cristo na sa panahon kan saiyang dai naheheling na presensia an mga tawo magigin sibot-sibot sa mga gibo-gibo sa buhay. Sinda mababangkag sa ibang bagay, kapareho kan mga tawo kaidtong kaaldawan ni Noe asin Lot. “Siring man an mangyayari sa aldaw na iyan na ihahayag an Aki nin tawo,” sabi ni Jesus, na an boot sabihon an panahon kan saiyang dai naheheling na presensia, na lalaglagon an maraot na palakaw na ini.—Lucas 17:26-30.
10, 11. Ano an itinataong ebidensia digdi tanganing ipaheling na harani na an katapusan kan palakaw na ini?
10 Helingon man an mga hula na nasusurat sa Mateo 24, Marcos 13 asin Lucas 21. Ihinula ni Jesus an mga bagay na mayo nanggad sa kontrol nin tawo—mga bagay na arog nin mga peste asin makokosog na linog. Dugang pa, nagkaigwa nin “pag-orog nin katampalasanan” poon kan 1914. An mga bareta ngonyan, nangorogna sa darakulang siudad, parate na daing iba kundi mga bareta na sana nin krimen asin karatan. Ini bako sanang naglalangkaw na estadistika nin krimen, huli ta lakop ngonyan an espiritu nin dai pag-intindi sa mga legal na pangangalad, asin an pagkamoot nin dakol talagang naglilipot.—Mateo 24:12.
11 Dugang pa, an “kahandalan nin mga nasyon” ngonyan risang gayo huli ta dai aram nin mga tawo kun ano an solusyon sa saindang nagdadakol na mga problema. (Lucas 21:25, 26) Saro pa, naiinaan an kabilangan kan mga kaiba sa “kapag-arakian na ini” nin 1914, na dai malihis bago maotob an gabos na ihinula ni Jesus para sa satong panahon. (Mateo 24:34) Ini saro pang malinaw na tanda na harani na an katapusan kan palakaw na ini.
12. Ano an siertong pinakadakulang pruweba na kita harayo na an naabot sa “panahon nin katapusan”?
12 May dakol pang ebidensia na ikakatao tanganing patunayan na kita harayo na an naabot sa “panahon nin katapusan.” (Daniel 12:4) Alagad daing duwa-duwa na an kadarudakulaing pruweba na kita harani na sa katapusan kan palakaw na ini iyo an paghuhulit kan Kahadean sa bilog na kinaban na ginigibo kan mga Saksi ni Jehova. Dai pa kasuarin man nangyari an siring na bagay. Tunay nanggad, sa 203 na kadagaan sa bilog na globo labing 2,840,000 na mga saksi ni Jehova an maigot na nag-ootob kan marahay na gibohon nin pagpalakop kan nakaoogmang mensahe na si Cristo naghahade na sa Kahadean poon kan 1914. Asin sinabi ni Jesus na kun an maogmang baretang ini kan Kahadean ikinahulit na sa bilog na ineerokan na daga, dangan “madatong an katapusan.”—Mateo 24:14.
Mamuhay Kaoyon sa Hatol kan Biblia
13. Ano an maninigong magin punto-de-vista niato sa isinabi ni Pablo na ‘an mga igwa nin agom maninigo na magin siring sa mayo’?
13 Mantang malinaw na nainaan na an natatadang panahon asin harani na an katapusan, an banwaan ni Jehova kaipuhan na mamuhay kaoyon sa hatol kan Biblia, arog kan isinabi ni apostol Pablo sa 1 Corinto 7:29-31. Pakapagsabi na “nainaan na an panahon na natatada,” sia nagsurat: “Kaya magpoon ngonyan an mga igwa nin agom magin siring sa mayo.” Digdi dai boot sabihon kan apostol na an Kristianong agom na lalaki dapat na dai intindihon an saiyang agom. Dai, kundi mantang maimbod na pinangangatamanan nin lalaki an saiyang mga paninimbagan sa agom, maninigo na an enot na nasa saiyang puso asin isip iyo an saiyang relasyon sa Dios, na sinisierto na an saiyang pag-agom nakakokontribuwir digdi.
14. Sono sa 1 Corinto 7:30, ano an maninigong magin punto-de-vista nin mga parabalangibog kan Kahadean sa personal na mga problema, asin iba pa?
14 Sa bersikulo 30, si Pablo nagpadagos sa pagsabi: “Patin an mga nagtatangis magin siring sa mga dai nagtatangis, asin an mga nag-oogma siring sa mga dai nag-oogma, asin an mga nagbabakal siring sa mga dai nin rogaring.” Ano an boot sabihon kaiyan? An ipinasabong na mga tataramon na ini nagdodoon kan bagay na an personal na mga bagay, baga man iyan may kalabot sa mga rogaring, mga kamondoan o kaogmahan, bakong iyo an mahahalaga para sa mga ministro kan Kahadean. “An panahon asin pagkanorongod” nangyayari sa sato gabos asin puwedeng bigla na sanang liwaton an satong mga kamugtakan. (Eclesiastes 9:11; Santiago 4:14) Kaya bakong madonong na magin sibot-sibot sa mga kamondoan, kasakitan asin laen-laen na personal na problema sagkod na an mga bagay na ini makaolang na sa satong ministeryo, sa satong mahalagang gibohon na paghuhulit kan maogmang bareta kan Kahadean.
15. Taano ta magigin labi-labing karungawan para sa Kristiano na magin sibot-sibot sa personal na mga bagay may koneksion sa materyal na mga rogaring, asin iba pa?
15 Sa 1 Corinto 7:31, si apostol Pablo nagsabi: “An mga minagamit kan kinaban [magin] siring sa mga dai nakikinabang kaiyan nin lubos.” Huli ta an mga tawo sa kinaban mayo nin paglaom na basado sa Biblia, sinda daing ibang iniisip kundi an saindang mga pangangaipo sa aroaldaw asin mga ambisyon. Parate na minamawot nindang pahangaon an iba paagi sa materyal na mga rogaring. Alagad, arog kan liniwanag ni apostol Juan, “an pagpaabaw-abaw kan kaya sa buhay” sarong kapahayagan kan “gabos na nasa kinaban” na “bakong gikan sa Ama, kundi gikan sa kinaban.” Asin siniseguro sato ni Juan na “an kinaban maagi sana asin an horot kaiyan, alagad an naggigibo kan kabotan nin Dios magdadanay sagkod lamang.” (1 Juan 2:16, 17) Kun siring, magigin labi-labing karungawan para sa siisay man na Kristiano, na may paglaom sa ngapit na daing sagkod, na magin sibot-sibot sa personal na mga bagay kaya mayo na sia nin natatadang panahon para sa intereses kan Kahadean. (Mateo 6:25-32; ikomparar an Filipos 2:19-22; 2 Timoteo 4:10.) Minsan ngani bako man na sala na magkamit nin kapakipakinabang na materyal na mga rogaring asin magkaigwa nin tamang mga pag-aling-aling, dai niato noarin man dapat na togotan an mga bagay na ini na magin an pinakamahalaga sa satong buhay.—Lucas 12:15.
16. Ano an parateng kaisipan asin patolodan nin mga kinabanon, alagad ano an maninigong magin pinakamahalaga sa mga lingkod ni Jehova?
16 Bakong pambihira para sa mga kinabanon, o idtong mga mayo nin tunay na espirituwalidad, na magreklamo dapit sa kamugtakan ninda sa buhay. (Ikomparar an Judas 16.) Kun sinda hirilangon, tibaad sinda permi na sanang nagrereklamo dapit sa dai ninda pagigin mabagsik. Siring man, an dukha tibaad magreklamo huli ta bako sindang mayaman. Tara, an mga bagay na siring kan marahay na salud asin dakulang kayamanan tibaad magin nababangkagan na mga pasohan sa saindang buhay! Sinda naghihingoa na kamtan iyan, asin an pagkasudya tibaad magtao sainda nin labi-labing kamondoan. Alagad para sa nagdusay na banwaan ni Jehova an “banal na paglilingkod” iyo an pinakamahalaga. (Roma 12:1, 2) Totoo, minsan ngani kita mga lingkod ni Jehova, may mga problema kita. Alagad dai kita kaini ginigibo na magin mga paragumodgumod, parareklamo dapit sa satong kamugtakan sa buhay. Igwa kita nin trabaho na itinao nin Dios, asin an mahalagang aktibidad na ini an tinatawan niato nin pinakadakulang atension. An totoo, kita maogma huli ta inienot niato sa buhay an mga intereses kan Kahadean.—Mateo 6:33.
17. Kun dapit sa posibleng magin mga distorbo, ano an dai dapat na togotan kan banwaan ni Jehova?
17 Kun siring, ano an madonong na gibohon nin mga lingkod ni Jehova? Bueno, puwede niatong gamiton an pirang bagay asin serbisyo na itinatao kan kinaban, alagad dai niato noarin man pagtogotan an mga distorbo na ikarayo kita sa paglilingkod sa Dios. (Lucas 21:34-36) Girumdomon na mayo nin ano man sa presenteng palakaw na permanente. An mismong pagliwatliwat kaiyan puwedeng magin distorbo. Iyo, arog kan sabi ni Pablo, “An kamugtakan kan kinaban na ini nagbabago.” (1 Corinto 7:31) Alagad dai niato togotan ini na makadistorbo sato sa paglilingkod ki Jehova.
Maigot na Hamanon an Gibohon kan Kagurangnan
18. (a) Mantang nasa “panahon nin katapusan” na kita poon kan 1914, anong gibohon an maninigong enoton niato sa satong buhay? (b) Kun kita magmamasibot sa gibohon kan Kagurangnan, ano an posibleng mangyari sa mga problema sa buhay?
18 Mantang igwa nin espirituwal na pagmansay, minimidbid niato an kadakoldakol na ebidensia na kita yaon na sa “panahon nin katapusan” poon kan 1914. Kun siring, tunay na habo niatong gamiton nin lubos an kinaban na garo baga may mawawara sa sato kun dai niato gibohon iyan. Imbes, panoon niato an satong buhay kan “gibohon kan Kagurangnan.” Maninigo kitang magkaigwa nin ‘dakol na gigibohon sa gibohon kan Kagurangnan, sa pakaaram na an satong pagpapagal bakong daing kapakanan dian sa Kagurangnan.’ (1 Corinto 15:58) Kaya magin maigot sa paghuhulit asin pagtotokdo kan mga katotoohan kan Kahadean. Dangan ano an posibleng mangyari sa mga problema sa buhay? Tara, iyan garo baga mapapagilid asin magigin bako nang gayong importante, bako nang gayong magabat!
19. Ano an boot sabihon kan ‘pagtagal sagkod sa katapusan’?
19 Kan itinatao an saiyang dakulang hula manongod sa huring mga aldaw kan palakaw na ini, sinabi ni Jesus na an saiyang mga parasunod “ikakaongis nin gabos” huli sa saiyang ngaran. “Alagad,” idinugang nia, “an makatagal sagkod sa katapusan iyo an maliligtas.” (Marcos 13:10-13) Para sa sato bilang mga indibiduwal na nagdusay ki Jehova, “an katapusan” puwedeng magsalang “an pagtatapos kan palakaw nin mga bagay” o an sato mismong kagadanan, tibaad pakapagtios sa kamot nin mga paralamag. (Mateo 24:3) Arin man digdi, limitado an satong panahon na hamanon an gibohon kan Kagurangnan. Kun siring, dai daw kita maninigong magin mahigos asin maigot sa pagbalangibog kan mensahe kan Kahadean? Daing duwa-duwa, maninigo!
Panahon Nang Humiro!
20. Paano an mga Israelitas na nakabutas sa pagkabihag sa Babilonya nakapagpaheling kan saindang pagmakolog sa pagsamba ki Jehova?
20 Kan an mga desterradong Judio makabutas sa pagkabihag sa Babilonya kan ikaanom na siglo B.C.E., kaipuhan sindang magdesisyon. Sinda daw mabuwelta sa saindang daga asin ibabalik an pagsamba ki Jehova duman, o magdadanay daw sinda sa Babilonya? An mga Israelitas na nagdanay sa siudad na idto bako man na maraot, ta an gurang nang si Daniel saro sa sainda. Puwede sindang magtao sa mapuling mga natada nin materyal asin moral na tabang asin puwede man na magpadara nin “gikan sa boot na dolot” para sa harong ni Jehova sa Jerusalem. (Esdras 1:2-4) Sa siring makatatabang sinda na paoswagon an tunay na pagsamba. Ogmahon nanggad an gabos na parasamba ki Jehova kan an natatada humale na papuli sa saindang daga, na dara an banal na mga kasangkapan na gagamiton sa templo ni Jehova! Asin an mga paradara sa mga kasangkapan sa santuaryo kinaipuhan na seguradohon na hinale na ninda sa saindang sadiri an gabos na digta kan relihiyoso asin moral na karigsokan nin Babilonya.—Isaias 52:11.
21. (a) Anong mga hapot an itinatao tanganing horophoropon nindo? (b) Mantang “nainaan na an panahon na natatada,” ano an totoo dapit sa mga oportunidad na ilakop an maogmang bareta?
21 Kamo daw may pagmakolog sa tunay na pagsamba na kapareho kan sa nakabutas na mga Israelitas na idto kan 25 siglo na an nakaagi? Ibinibilang daw nindo na sarong maogmang pribilehiyo an magtao nin banal na paglilingkod ki Jehova bilang kabtang nin sarong nalinigan asin mahigos na organisasyon na nagtatao nin kaomawan sa saiyang banal na ngaran? Namamansayan daw nindo an dakol na ebidensia na kita haloy nang nabubuhay sa “panahon nin katapusan”? Kun an simbag nindo iyo sa mga hapot na ini, seguradohon na kamo naggigibo nin positibong paghiro ngonyan. Magkonsentrar sa pag-enot sa saindong buhay kan mga intereses kan Kahadean. Mantang “nainaan na an panahon na natatada,” an mga oportunidad niato ngonyan na ilakop an maogmang bareta nagigin orog na mahalaga. Mapalad an gabos na isinisentro an saindang buhay sa Kahadean bilang maimbod na mga saksi ni Jehova na dakol an gigibohon sa paghuhulit kan maogmang bareta mantang may panahon pa!
Ano an Isisimbag Nindo?
◻ Taano ta nauubos na an panahon para sa palakaw na ini nin mga bagay?
◻ Paano niato naaaraman na harayo na an naabot niato sa “panahon nin katapusan”?
◻ Kun kita magmasibot sa gibohon kan Kagurangnan, ano an posibleng mangyari sa satong mga problema
◻ Mantang harani na an katapusan, sa ano niato maninigong isentro an satong buhay?
[Ritrato sa pahina 24]
An mga problema logod sa buhay dai makadistorbo sa sato sa paghuhulit kan Kahadean