Pagpasirang nin Liwanag sa Tahaw kan Kadikloman sa Daga

“Uya! an kadikloman mismo makakalakop sa daga, asin an mahibog na kaduloman sa mga nasyon; alagad sa saimo si Jehova masirang, asin sa saimo an saiyang kamurawayan maheheling.”—ISAIAS 60:2.

1. Anong positibong simbag an ikakatao sa mga hapot na pinalalataw digdi?

TUNAY na ini maogmahon na mga aldaw na kita mabuhay! ‘Maogmahon na mga aldaw?’ tibaad may maghapot. ‘Paano nindo masasabi iyan, mantang an bilog na kinaban dai maaraman an gigibohon huli sa politikal, ekonomiko, asin relihiyosong pagkabaranga, sa tahaw kan kadikloman na nakapalibot sa mga nasyon sa panahon nuklear na ini?’ Alagad ta ini maogmahon na mga aldaw nanggad—huli sa maogmang bareta na ibinabalangibog ngonyan sa bilog na daga, na nagtatao nin liwanag sa nagugutom sa katotoohan na mga tawo manongod sa kahulogan kan satong mga panahon asin sa maogmang paglaom sa orog pang maogmang mga aldaw na puwede nindang maheling!

2. (a) Anong mga tataramon nin pagpakosog an itinatao ni Jehova sa Isaias kapitulo 45 asin 60? (b) Siisay an “babae” nin Dios?

² An Burabod kan satong makangangalas na paglaom daing iba kundi an Soberanong Kagurangnan na Jehova, an dakulang Kaglalang sa langit asin daga. (Isaias 45:12, 18) Sia an nagtatao kan pagboot na nasusurat sa Isaias kapitulo 60, bersikulo 1: “Tumindog ka, O babae, pasiranga an liwanag, huli ta an saimong liwanag nagdatong asin sa saimo an mismong kamurawayan ni Jehova suminirang.” Siisay an “babaeng” ini? Sia bakong sarong daing buhay na Statue of Liberty; ni sia man tawong babae na nagkakampanya para sa libertad nin mga babae. Imbes, sia an dinamiko, nag-aabante, langitnon na organisasyon ni Jehova Dios, an saiyang maimbod na katabang na kompuwesto nin riniboribong maimbod na mga anghel asin ngonyan kabilang an binuhay liwat na “mga banal”—idtong mga napatunayan an saindang sadiri na maimbod minsan sagkod sa kagadanan bilang linahidan na mga Kristiano digdi sa daga.—Kapahayagan 11:18; 2:10.

3. Paano an babae nin Dios (a) ‘nagtindog,’ asin (b) ‘pinasirang an liwanag’?

³ “Tumindog ka, O babae,” an pagboot ni Jehova. An langitnon na organisasyon nin Dios makinuyog na tuminindog gikan sa dakol na siglong pagkabawas, pagkadaing laog pasiring sa kamugtakan nin mabungang aktibidad. Kan 1914 ipinangaki nia an Mesiyanikong Kahadean. (Kapahayagan 12:1-5) Poon kan 1919 saiyang dinara an natatada sa saiyang mga linahidan na aki sa daga sa sarong “daga,” o kamugtakan, nin mamuraway na espirituwal na prosperidad. (Isaias 66:8) Dugang pa, an langitnon na organisasyon nin Dios ‘pinasirang an liwanag’ sa makangangalas na mga hula sa Kahadean. An saiyang dakol na mga aki ‘tinotokdoan ni Jehova.’—Isaias 54:1, 13.

Liwanag sa Tahaw nin Kaduloman

4. Si Jehova nagtataram manongod sa anong pagkakalaen kan banwaan nin Dios asin kan mga nasyon sa daga?

⁴ “An saimong liwanag nagdatong,” an sabi ni Jehova. Totoo nanggad, “an mismong kamurawayan ni Jehova suminirang” sa saiyang langitnon na organisasyon, asin ini ipinaheling sa makangangalas na paagi kan nakabalik na banwaan ni Jehova sa daga. Minsan siring, an sumunod na isinabi ni Jehova sarong pagkakalaen, na an sabi: “Uya! an kadikloman mismo makakalakop sa daga, asin an mahibog na kaduloman sa mga nasyon.” (Isaias 60:2) Bako daw na iyan naglaladawan na gayo sa mga kamugtakan sa daga poon kan 1914?

5. Taano an falsong relihiyon ta dai nakakakua nin solusyon sa mga problema sa panahon nuklear?

⁵ An Kakristianohan sa partikular nagsikwal sa makahulang ‘tanda kan presensia ni Jesus asin kan pagtatapos kan palakaw nin mga bagay.’ Kaya, sia nagrurupaydupay sa nag-oorog na espirituwal na kadikloman. Ipinarisa kan mga relihiyon nin Kakristianohan na sinda kabtang kan pankinaban na imperyo nin falsong relihiyon, an Dakulang Babilonya—na harayoon sa liwanag kan katotoohan. (Mateo 24:3-14; Kapahayagan 17:3-6) An kinabanon na mga relihiyon daing itinataong solusyon sa mga problema kan panahon nuklear na ini, ni kaya man kaiyan na haleon an kadikloman, an grabeng kadaihan nin paglaom, kan katawohan. An pakikilabot kan falsong relihiyon sa mga ginigibo kan politikal na mga nasyon madara sa saiya sa sadiri niang pagkatunaw.—Kapahayagan 17:16, 17.

6, 7. (a) Paano an kamurawayan ni Jehova “suminirang” sa mga taon 1919-31? (b) Ano an nagin kulminasyon kaini kan 1931?

⁶ Kabaliktaran, si Jehova nagpapadagos sa pagsabi manongod sa saiyang langitnon na organisasyon: “Sa saimo si Jehova masirang, asin sa saimo an saiyang kamurawayan maheheling.” (Isaias 60:2) An kamurawayan na ini naririsa sa linahidan na mga Kristiano digdi sa daga, tangani na sinda man ‘makapagpaliwanag kan saindang ilaw sa atubang nin mga tawo.’ (Mateo 5:16) An mga taon 1919 sagkod 1931 mamuraway na mga taon para sa pagsirang kan liwanag kan Kahadean, na an banwaan nin Dios biyong hinale an natatadang mga kadena kan Babilonikong doktrina, kaisipan, asin mga kostumbre. Sa mga taon na idto, an kadikit na natatada sa tunay na mga Kristiano nagpoon na tumao nin positibong simbag sa hapot na “WHO WILL HONOR JEHOVAH?”—na iyo an titulo kan artikulong pag-aadalan sa luwas na Enero 1, 1926 kan The Watch Tower.

⁷ Dangan, kan 1931, an kamurawayan ni Jehova orog na naheling sa saiyang “lingkod,” kan akoon ninda an ngaran na itinao nia mismo sa sainda—MGA SAKSI NI JEHOVA. (Isaias 43:10, 12) Sa laog kan 12 mabunga, pano nin paghirong mga taon sagkod 1931, an mga parabalangibog kan Kahadean nagdakol poon sa nagkapira asin nagin manampulong ribo nin mahigos na mga saksi.

Orog Pang ‘Pagsirang’

8, 9. (a) Kan 1931, ano pang ibang grupo an tinawan nin atension kan The Watch Tower? (b) Sono sa Kasuratan, paano an mga ini ‘binugtakan nin tanda’?

⁸ Minsan siring, si Jehova daw “masirang” sana para sa mga linahidan kan ‘sadangoton na aripompon nin mga paramana kan Kahadean’? (Lucas 12:32) Bako, huli ta an mga taon 1931 sagkod 1938 nagin makangangalas na panahon nin orog pang kaliwanagan, kan an The Watch Tower magpoon na magtao nin mas maliwanag na atension sa saro pang grupo. An artikulong pag-aadalan sa luwas kaiyan na Setyembre 1, 1931, may titulong “MAN WITH THE WRITER’S INKHORN,” na basado sa Ezequiel 9:1-11. Pakapamidbidan na an ‘parasurat’ iyo an linahidan na natatada, an The Watch Tower nagtao kan komentong ini:

⁹ “An pagboot itinao na ‘bugtakan nin tanda an angog kan mga tawo na nag-aaragagha, asin nag-aaragrangay, huli sa gabos na nakakabaldeng bagay na ginigibo sa tahaw’ kan Kakristianohan. . . . An Kagurangnan nagtataram manongod sa sarong grupo nin mga tawo na saiyang ‘ililigtas sa panahon nin kasakitan asin papagdadanayon na buhay asin bebendisyonan digdi sa daga.’ (Sal. 41:1, 2) Segurado na ini an grupo nin mga tawo na parateng inaapod na ‘an minilyon na nabubuhay ngonyan na dai na noarin man magagadan’.” Ngonyan, makaoogmang maheling nin aktuwal an minilyon sa mga ini na binubugtakan nin tanda para sa kaligtasan, mantang sinda nagsosolog kan tunay na Kristianong pagkatawo, sa nagdusay na relasyon ki Jehova paagi ki Cristo Jesus.—Genesis 22:15-18; Sofonias 2:1-3; Efeso 4:24.

10, 11. (a) Paano si Jehu nagladawan ki Jesus? (b) Isabi kun siisay an modernong “Jonadab.”

¹⁰ Nangorognang mahalaga an mga artikulong pag-aadalan sa mga luwas kan Watchtower na Hulyo 1 sagkod Agosto 1, 1932. Sa paggamit kan Ikaduwang Hade kapitulo 9 asin 10, ipinaheling kan mga ini kun paanong si Hadeng Jehu nagladawan sa Parakastigo ni Jehova, si Hadeng Jesu-Cristo, na ipinagrerepresentar sa daga kan linahidan na natatada, na nagtatao nin patanid sa iba manongod sa nagdadangadang na paghokom ni Jehova. Alagad ta siisay an ipinagladawan kan kaibanan ni Jehu, si Jonadab? An The Watchtower minasimbag:

¹¹ “Si Jonadab nagrepresentar o nagladawan sa grupo nin mga tawo na yaon sa daga ngonyan sa laog kan panahon na ginigibo an gibohon ni Jehu na . . . dai oyon sa organisasyon ni Satanas, na naninindogan sa lado nin katanosan, asin iyo an mga ililigtas kan Kagurangnan sa panahon kan Armagedon, isasalbar sa kariribokan na iyan, asin tatawan nin buhay na daing katapusan digdi sa daga.” Sumunod na ipinaliwanag kan The Watchtower na an mga ini iyo an ‘binendisyonan kan Ama’ sa parabola ni Jesus manongod sa ‘mga karnero asin mga kanding.’ (Mateo 25:31-46) Iyan nagsabi: “An mga ini an minakompuwesto sa grupong ‘mga karnero’ na nagtatao nin pabor sa linahidan na banwaan nin Dios, huli ta aram ninda na an mga linahidan kan Kagurangnan naggigibo kan gibohon kan Kagurangnan.”

12. Anong nakaoogmang kapahayagan nin banal na katotoohan an itinao kan 1935?

¹² An mga pagsirang na ini kan makahulang liwanag nag-andam para sa makasaysayan na pahayag na “An Dakulang Kaburonyogan,” na itinao kan Mayo 31, 1935, kan presidente kan Watch Tower Society, si J. F. Rutherford, duman sa kombension kan mga Saksi ni Jehova sa Washington, D.C. Idto makangangalas nanggad na kapahayagan kan banal na katotoohan! Itinao kaidto an nakakokombensir na pruweba na nagpapamidbid na an “dakulang kadaklan” kan Kapahayagan 7:9 iyo man sana an “ibang karnero” kan Kagurangnan sa Juan 10:16, an grupong Jonadab, an mga binugtakan nin tanda sa angog para sa kaligtasan, an minilyon na nabubuhay ngonyan na dai na noarin man magagadan, asin an “mga karnero” na ibinulag sa “mga kanding” asin magmamana nin buhay na daing katapusan sa daganon na sakop kan Kahadean nin Dios. Ini gabos ipinaliwanag sa The Watchtower, Agosto 1 asin 15, 1935.

13. Anong dugang pang suhestion an itinao kan 1938?

¹³ Sa mga taon na suminunod, an organisasyon nin Dios nagtao nin dakulang atension sa “dakulang kadaklan” asin sa saindang makangangalas na paglaom na makaligtas pasiring sa ibinalik na Paraiso sa daga. Kan Setyembre 9-11, 1938, an mga Saksi ni Jehova nagtiripon sa kombension duman sa Londres, Inglaterra, na an duwang pangenot na pahayag ipinaabot paagi sa direktang koneksion sa telepono sa iba pang mga kombension sa bilog na kinaban. Basado sa dating mga pagboot na itinao sa mga tawo, an saro sa mga diskursong ini, na may titulong “Panoon an Daga,” nagsuherir na an mga “Jonadab” na makaliligtas sa dakulang kahorasaan posible na, kisuerra sa kadikit na panahon, mag-aragom asin mangaki sa Bagong Areglo pakalihis kan Armagedon.—Genesis 1:28; 9:1, 7; helingon an The Watchtower, Oktubre 15 asin Nobyembre 1, 1938.

14. Paano tinawan nin prosperidad ni Jehova an saiyang mga banwaan kan mga taon na idto?

¹⁴ Kan mga taon na idto, “an Kagurangnan kan anihon,” si Jehova Dios, nagtipon asin nagsugo nin dakol pang trabahador. Kaya an mga parahayag sa langtad nagdakol sagkod na magin mga 50,000 kan 1938.—Mateo 9:37, 38.

“Mga Hade” Asin “Mga Nasyon”

15, 16. Paano an “mga hade” may kabtang sa kaotoban kan Isaias 60:3-10 (a) kan suanoy na mga panahon, asin (b) sa modernong mga panahon? (c) Paano an “mga tagaibang daga” naglilingkod ngonyan kaiba kan “mga hade”?

¹⁵ An pagtitipon na ini magayonon na ilinaladawan sa Isaias kapitulo 60, bersikulo 3 sagkod 10. Dian si Jehova nagtataram manongod sa “mga hade” na malataw may koneksion sa “pagsirang” kan Sion asin maglilingkod sa garo-agom na organisasyon na iyan. Kan an banwaan nin Dios kan suanoy na mga panahon magpuli hale sa pagkabihag sa Babilonya, si Hadeng Dario nin Media asin si Hadeng Ciro nin Persia nangenot sa pagtao nin mga kinakaipuhan para sa pakabalik kan pagsamba ki Jehova sa Jerusalem. (Daniel 5:30, 31; 9:1; Esdras 1:1-3) Digdi, sinda tamang-tamang naglaladawan sa Makakamhan sa gabos na Hade, si Jehova, asin sa saiyang katabang na Hade, si Jesus, na iyo an nagpalakaw sa pagbabalik kan tunay na pagsamba sa tahaw kan banwaan ni Jehova sa modernong panahon. (Kapahayagan 11:15, 17) Dugang pa, an linahidan na natatada sa tunay na mga parasamba—na magigin “mga hade,” “kaibang paramana ni Cristo”—nangenot sa gibong pagpatotoo sa modernong aldaw. Naglilingkod kaiba ninda an “mga tagaibang daga”—idtong mga bakong kabilang sa espirituwal na Israel, alagad ta magigin daganon na mga sakop kan Kahadean asin minsan ngonyan nakikipagtabangan sa pagpaoswag sa teokratikong aktibidad sa bilog na daga.—Roma 8:17; ikomparar an Isaias 61:5, 6.

¹⁶ Si Jehova mismo nag-aagda sa sato: “Tingkalagan an saimong mga mata sa palibot asin helinga!” An tinipon na mga paramana kan Kahadean na iyan iniibanan kan “dakulang kadaklan . . . hale sa gabos na nasyon”! (Kapahayagan 7:9; Zacarias 8:23; Isaias 2:2, 3) ‘Ipinahahayag ninda an mga pag-omaw ki Jehova,’ sa maigot na ministeryo. Idinudusay man ninda an saindang sadiri sa mga proyekto na arog baga kan pagtogdok nin mga Kingdom Hall para sa pagsamba—na an nagkapira digdi itinogdok sa laog sana nin duwang aldaw. Sinda “naglilingkod,” sa bilog na pusong pagsuportar sa panglobong pagpaoswag sa intereses kan Kahadean.—Isaias 60:4-7.

17, 18. (a) Makaoogma, anong ‘paglupad’ an nangyayari ngonyan? (b) Paano an may panahon na nangyayari sa Palestina angay na nag-iilustrar kan ‘paglupad’ na ini?

¹⁷ Dangan ihinapot ni Jehova an angay na hapot na ini: “Sairisay ining nagrurulupad na garo panganoron, asin garo mga salampati sa mga gaha kan saindang harong-harong?” An enot na nagdorolok sa organisasyon nin Dios iyo an saiyang “mga aking lalaki hale sa harayo,” na biyong suminiblag sa gabos na sa-Babilonyang relihiyon. An mga linahidan na ini nagdadara nin mahahalagang bagay, na idinudusay an bilog nindang pagkatawo “sa ngaran ni Jehova,” an saindang Dios. Bilang “an Banal kan Israel,” ibinugtak nia an saiyang ngaran sa sainda asin pinagayon sinda kan pribilehiyo na maglingkod sa saiya bilang saiyang mga saksi. Sinda nangengenot sa pag-omaw sa ngaran kan saindang Soberanong Kagurangnan, si Jehova, bilang an pinakadakula, an pinakabantog, an pinakamamuraway na ngaran sa bilog na uniberso.—Isaias 60:8, 9.

¹⁸ Nakaoogma, an linahidan na natatada dai nasosolo digdi. Magigin masakit kun iyo! An naggugurang na grupong ini nagkakadikit, mantang saro-saro sindang nakatatapos sa saindang daganon na buhay sa integridad. Mga 9,000 an natatada ngonyan. Alagad an iba, na may kabilangan nang minilyon, nag-aarabot na siring sa mga salampati pasiring sa “mga gaha kan saindang harong-harong,” o “mga harong-harong nin salampati,” na nagpapaili sa organisasyon nin Dios. (NW; The New English Bible) Sinda garo an mga pugro nin salampati na may panahon na naheheling sa Palestina—na naglalayog na garo panganoron, kadakoldakol kaya minadiklom sa sainda an langit.

‘Bukas na mga Tata’

19. Taano an “mga tata” kan organisasyon ni Jehova ta nagdadanay na bukas, asin ano an reaksion kan “mga hade” asin “mga tagaibang daga”?

¹⁹ Huli sa pagkaherak, binukasan ni Jehova an mga tata kan saiyang organisasyon, na saiyang kinakaolay ngonyan sa mga tataramon na ini: “An saimong mga tata papagdadanayon na perming bukas; iyan dai pipintoan dawa sa aldaw o sa banggi, tanganing darahon sa saimo an mga kayamanan kan mga nasyon.” Iyan an nangyayari ngonyan na an mga mamomoton sa katoninongan na “dakulang kadaklan” padagos na nagdadakol. Makaoogma, an “mga tagaibang daga” na ini ikinokontribuwir an saindang mga kayamanan na panahon, kosog, asin kuwarta sa “banal na paglilingkod aldaw asin banggi.” Inaaprobetsaran ninda an “dakulang tata na pasiring sa gibohon” asin minaiba sa magigin mga hade sa pagtao nin magayon na pag-omaw sa ngaran ni Jehova.—Isaias 60:10, 11; Kapahayagan 7:4, 9, 15; 1 Corinto 16:9.

20. (a) Siisay an “matutunaw”? (b) Anong maogmang pagkakalaen an maririsa niato digdi?

²⁰ Sumunod, kinakaolay ni Jehova an saiyang organisasyon, na an sabi: “An arin man na nasyon asin an arin man na kahadean na dai maglilingkod sa saimo mapapara; asin an mga nasyon dai nin pagkasudyang matutunaw.” An gabos na mapaabhaw na kinabanon na mga nasyon asin iba pang mga paratumang mapapasopog sa Armagedon. Kabaliktaran, pinagagayon ni Jehova an saiyang santuaryo sa pagsamba. Saiyang ‘pinamumuraway an namumugtakan kan saiyang mga bitis,’ an daganon na patyo kan saiyang dakulang espirituwal na templo sa pagsamba, mantang tinitipon nia duman an nagdadakol na dakulang kadaklan. Paagi sa saro pang propeta, si Jehova nagsabi: “Yuyugyugon ko an gabos na nasyon, asin an mga kawiliwiling bagay kan gabos na nasyon dapat na maglaog; asin papanoon ko nin kamurawayan an harong na ini.” (Haggeo 2:7) Alagad an mga paralamag, mga apostata, asin iba pang daing galang na mga paratumang mapipiritan na ‘lumuhod’—na minimidbid na may pagkasopog na an mga Saksi ni Jehova talagang nagrerepresentar sa organisasyon nin Dios—“an siudad ni Jehova, Sion kan Banal kan Israel.”—Isaias 60:12-14.

21, 22. (a) Anong pagpakosog sa boot an itinatao digdi ni Jehova? (b) Paano, sa piguratibong paagi, an saiyang banwaan ‘sinususo an gatas kan mga nasyon’? (c) Ano pang makaoogmang pag-adal an naghahalat sato?

²¹ Dai noarin man pababayaan ni Jehova an saiyang garo-agom na katabang minsan pa gurano an pagtuya kan mga paratumang sa saiyang ‘mga aking lalaki asin babae’ digdi sa daga. Imbes, sinasabihan nia an saiyang maimbod na organisasyon: “Ibubugtak ta ka na bagay na ikakapag-orgolyo sagkod lamang, sarong kagayagayahan sa sunod-sunod na kapag-arakian. Asin sususuhon mo an gatas kan mga nasyon.” Sa piguratibong paagi an daganon na mga representante kan organisasyon nin Dios ginagamit an gabos na mga kayamanan na yaon sa pagpaoswag sa tunay na pagsamba. Ginagamit ninda sa praktikal an modernong mga pasilidad nin komunikasyon, transportasyon, asin pag-imprenta tanganing ikahulit an maogmang bareta. An pangataman asin paggiya ni Jehova nasa mga Saksi ni Jehova sa gibohon na ini. An mga ini man, sa paglilingkod para sa langitnon na organisasyon ni Jehova, nag-oogma sa kaotoban kan saiyang panuga: “Mamimidbid mo na ako, si Jehova, an saimong Paraligtas, asin an Makapangyarihan na Saro ni Jacob iyo an saimong Paratubos.”—Isaias 60:15, 16.

²² Ano pang orog na pagpakosog an itinatao sato ni Jehova sa Isaias 60:17-22? Iyan an makaoogmang tema kan satong masunod na pag-aadalan.

Mga Hapot Bilang Sumaryo

◻ Anong pagkakalaen kan liwanag asin kadikloman an naririsa ngonyan?

◻ Anong progresibong ‘pagsirang’ an nangyari kan 1919-38?

◻ Paano an Isaias 60:8 naootob sa modernong mga panahon?

◻ Paano an “mga hade” asin “mga tagaibang daga” minalaog sa ‘bukas na mga tata’?