‘Pinaririkas Iyan’ ni Jehova

“Ako mismo, si Jehova, maparikas kaiyan sa kapanahonan kaiyan.”—ISAIAS 60:22.

1. Paano an paglaom kan banwaan ni Jehova napapalaen sa paglaom kan kinaban ni Satanas, asin taano?

NGONYAN, an pag-ogma asin paggayagaya manonompongan bako sanang sa langitnon na organisasyon ni Jehova kundi pati sa bilog na organisasyon kan mga Saksi ni Jehova digdi sa daga. An satong kaogmahan napapalaen na gayo sa kadikloman na nakapano sa kinaban ni Satanas. (Salmo 144:15) Kita igwa nin abundang espirituwal na kakanon asin inomon, kaya kita ‘nagkukururahaw sa kaogmahan huli sa marahay na kamugtakan kan puso.’ (Isaias 65:13-19) Bako kitang ignorante kun dapit sa dahelan kan presenteng krisis sa kinaban. An satong paglaom sa amay na kaligtasan paagi sa Kahadean nin Dios orog na minarigon mantang naheheling niato na naootob an mga hula kan Biblia sa dai mapogolan na pagbilang pasiring sa Armagedon. Aram niato na an “ralaban kan dakulang aldaw nin Dios na Makakamhan sa gabos” na ini maabot nin eksakto sa “itinalaan na panahon,” huli ta an bisyon “padagos na maghihidale sagkod sa katapusan, asin dai iyan magpuputik.”—Kapahayagan 16:14, 16; Habacuc 2:3.

2. Anong mga kamugtakan an nasa organisasyon ni Jehova, na naggigiya sa anong hapot?

² Kapareho sa langit, digdi man sa daga permanente an teokratikong organisasyon ni Jehova. Saro pa, mantang si Jehova an Burabod nin dinamikong kosog, saiyang ‘pinadadakol an bilog na puwersa sa mga naglalaom sa saiya.’ (Isaias 40:29-31) An saiyang organisasyon buhay sa aktibidad asin perming nag-aabante. (Ikomparar an Ezequiel 1:15-21.) An 47,869 kongregasyon kan mga Saksi ni Jehova sa 203 na kadagaan sa bilog na daga organisadong gayo tanganing umabante nin maigot sa gibohon kan Kahadean. (Mateo 24:14) Paano ipinangaki an dinamikong panglobong organisasyon na ini?

3. (a) Paano an Isaias 60:17 naotob sa modernong mga panahon? (b) Anong kaagid na mga areglo an nagtao nin prosperidad kan mga panahon kan Biblia?

³ An “Organization” iyo an titulo kan mga artikulong pag-aadalan sa The Watchtower kan Hunyo 1 asin 15, 1938. Ini nagtao nin halawig na paliwanag sa Isaias 60:17, na dian kinakaolay ni Jehova an saiyang langitnon na organisasyon, na an sabi: “Kasalihid kan kalongkaki dadarahon ko digdi an bulawan, asin kasalihid kan batbat dadarahon ko digdi an pirak, asin kasalihid kan kahoy, kalongkaki, asin kasalihid kan mga gapo, batbat; asin nonombrahan ko an katoninongan bilang saimong mga paraataman asin an katanosan bilang saimong mga namamahala.” Sa pagparisa kan mas marahay na kamugtakan na ini, an organisasyon ni Jehova sa daga kuminosog giraray. Kun paanong an bulawan mas mamahalon ki sa kalongkaki (asin iyo man manongod sa ibang materyales na nasambitan digdi), an teokratikong areglo na ipinaliwanag kan Watch Tower Society sa mga kongregasyon kan banwaan nin Dios kan 1938—asin bilog na puso nindang inako—mas marahay nanggad ki sa dating demokratikong mga paagi. Iyan sono sa Kasuratan. Iyan nagreresulta sa marahay na organisasyon sa pagkahaman kan gibohon nin Dios, kun paanong an kaagid na mga areglo nagtao nin prosperidad kan panahon ni Moises asin sa enot na mga aldaw kan Kristianong kongregasyon.—Exodo 18:25; Gibo 6:3-7; Tito 1:5; 1 Pedro 5:1-3.

4. (a) Paano an mga Saksi ni Jehova pinarigon para sa mga pagbalo kan 1939-45? (b) Ano an nagpatunay na an bendisyon ni Jehova nasa teokratikong areglong idto?

⁴ Kaya, kan 1938, sarong taon bago pumutok an Guerra Mundial II, an “mga paraataman” asin “mga namamahala” sa gabos na kongregasyon nagin an “katoninongan” asin “katanosan.” An makosog, sararong organisasyonal na areglo nag-abante na may mabungang pag-oswag. Binendisyonan ni Jehova an saiyang nagkakasararong mga saksi. An kabilangan ninda haros nadoble, poon sa 71,509 sagkod sa 141,606 sa pag-oltanan kan 1939 asin 1945, sa ibong kan mga problema asin paglamag sa mga taon na idto kan guerra.

‘Mayo Na nin Kadahasan’

5. Kun dapit sa “katoninongan,” paano an banwaan ni Jehova napapalaen sa kinaban?

⁵ Minsan siring, kumusta man an panahon pagkatapos kan Guerra Mundial II? Dai nagkaigwa nin katoninongan sa tahaw kan mga nasyon sa daga. Sa katunayan, ibinareta na labing 30,000,000 katawo an nagadan sa “saradit” na guerra na pinaglabanan poon kan 1945. Sagkod sa 40 “saradit na guerra” an pinaglalabanan sa bilog na kinaban nin durungan. Kaya kanigoan an kaogmahan niato na maglingkod kaiba nin sarong organisasyon na nagsikwal na sa kadahasan! (Isaias 2:4; Talinhaga 20:22) Dugang pa, bilang panglobong organisasyon, kita may katoninongan sa tahaw niato. Paagi sa paglakaw kaiba kan “Dios nin katoninongan,” nakamtan niato “an katoninongan nin Dios na minalampas sa gabos na kaisipan.”—Filipos 4:7-9.

6, 7. (a) Ano an nagpapalaen sa banwaan nin Dios? (b) Paano an Isaias 60:18 naotob sa sato? (c) Sa anong pambihirang paagi na kita napapalaen sa falsong mga relihiyonista?

⁶ Mantang an “katoninongan” asin “katanosan” lakop sa banwaan ni Jehova, kita napapalaen sa kinaban ni Satanas. Sa pakarisa kaini, an iba sa satong pagtaraed nagsarabi, ‘Hanga kami sa saindo, pero habo mi an saindong relihiyon.’ Minsan siring, bako daw na an satong relihiyon an guminibo sa sato na magin arog kaini? Mayo kita nin interes sa magkakatumang na mga ideolohiya asin pagkainongisan na nakababanga sa mga nasyon. Imbes, an duwa niatong interes iyo an (1) tokdoan an mga mahoyo sa dalan nin kaligtasan paagi sa Kahadean ni Cristo asin (2) omawon si Jehova, na dinadara an saiyang ngaran sa gabos na nasyon bilang patotoo. Kita “bakong kabtang kan kinaban.”—Juan 17:14, 16.

⁷ Kaya, nagkaigwa kita nin kabtang sa kaotoban kan panuga ni Jehova: “Dai na madadangog sa saimong daga an kadahasan, pagraot o kagabaan sa laog kan saimong mga kasagkodan. Asin aapodon mo an saimong sadiring mga lanob na Kaligtasan asin an saimong mga tata Kaomawan.” (Isaias 60:18) Itao an gabos na kaomawan sa satong Dios na si Jehova! An relihiyosong mga namomoon sa Kakristianohan (asin an gabos nindang apostatang kairiba) naglalanghad sa ngaran na iyan—sagkod ngani sa may pagsaginsagin na paghihingoa na haleon iyan sa mga traduksion kan Biblia. “Alagad, kun para sa sato, kita maglalakaw sa ngaran ni Jehova na satong Dios sagkod sa panahon na daing katapusan, minsan sagkod lamang.”—Miqueas 4:5.

8. (a) Anong pagpakosog an itinatao ni Jehova sa saiyang banwaan sa Isaias 60:19-21? (b) Anong ‘pagsupang’ an nagpapagayon ki Jehova, asin paano?

⁸ Pinakokosog kita ni Jehova na lumakaw sa saiyang ngaran. Sa Isaias 60:19-21, ipinanunuga nia sa saiyang langitnon na organisasyon na sia magigin saiyang “daing sagkod na ilaw,” na nalalabihan pa ngani an kaliwanagan kan aldaw asin bulan. Sa espirituwal na paagi, sia an nagigin kagayonan kan saiyang langitnon na organisasyon, na inootob man an saiyang panuga sa banwaan kaini: “Sinda gabos magigin matanos; sagkod sa panahon na daing sagkod panonondon ninda an daga, an supang kan sakuyang tinanom, an ginibo kan sakuyang mga kamot, sa pagpamuraway sa sakuya.” Tunay na pinayaman ni Jehova an “daga,” o lugar nin aktibidad, kan saiyang mga saksi. Padakol nang padakol, iyan ‘nagsusupang’ nin pagkamabunga mantang an dakol na mga bagohan tinitipon sa lado kan Kahadean asin tinatabangan na magsolog kan Kristianong pagkatawo. (Colosas 3:10, 12-14) Ini ‘nagpapamuraway’ ki Jehova, na nagtatao nin kaomawan sa saiyang mahalagang ngaran.

9. (a) Paano binibendisyonan ni Jehova an saiyang mga saksi sa Mejico, asin taano? (b) Ano an isinabi nin sarong peryodiko sa pakarisa sa saindang integridad?

⁹ An sarong bagong halimbawa iyo an Mejico. Sa nakaaging duwang taon, an pinakahalangkaw na bilang nin mga parahayag sa dagang iyan nagdakol poon sa 113,823 asin nagin 151,807—sarong marahayon na 33 porsiento! (An selebrasyon ninda kan 1984 sa Memorial kan kagadanan ni Jesus inatenderan nin 695,369.) An satong mga tugang na Mejicano mahigoson nanggad sa saindang aktibidad sa langtad. Narisa man kan sarong peryodiko sa Monterrey kasuarin pa sana an saindang integridad sa pag-atubang sa isyu nin neutralidad, na sinasabi kabilang sa iba pang bagay: “Kanigoan kararom na paggalang an pinupukaw sa sato kan saindang karigonan asin kapusoan sa pagtubod. Dawa ngani an saindang mga aki pinahahale sa eskuwelahan ginugusto nindang magdanay na maimbod sa saindang pagtubod, sa saindang paniniwala. Ano daw an mangyayari kun kita gabos na Kristiano arog kaiyan, na daing pagkakalaen sa grupo asin denominasyon? An Mejico iyo an magigin sangang opisina nin langit.”

10. (a) Ano an nagpapaheling na an mga Saksi ni Jehova mabunga minsan sa irarom nin prohibisyon? (b) Ano an hapot na itinatao digdi?

¹⁰ An mga Saksi ni Jehova padagos na nagpapaluwas kan bungang ini nin pag-omaw, minsan sa mga daga na daing ontok an paglamag. Makaoogma nanggad na marisa sa 1984 Taonan na Report sa Paglilingkod na sa 28 kadagaan na igwa nin mga pagprohibir o iba pang restriksion an gobyerno an kabilangan nin mga parahayag nagdakol nin 3.1 porsiento, na nagin labing un-kuwarto nin sarong milyon, asin an mga payunir nagdakol nin 23 porsiento! Maiimahinar daw nindo kun paano an pagpapayunir sa siring na mga kamugtakan? An promedyong 6,905 kan satong mga tugang na lalaki asin babae sa mga kadagaan na ini ginigibo iyan bulan-bulan! Kun kamo may libertad sa saindong iniistaran, puwede daw kamong magregular payunir, o kisuerra mag-auxiliary payunir?—Ikomparar an Lucas 17:5, 6.

‘Pagigin Sangribo’

11, 12. (a) Ano an enot na kabtang kan panuga na itinatao ngonyan ni Jehova? (b) Ano an nagkapirang halimbawa sa ‘pagigin sangribo nin sadit’? (c) Taano ta nagkaigwa nin siring karikas na pagtalubo?

¹¹ Sa saiyang mahalagang ngaran, si Jehova ngonyan nagtatao nin may tolong kabtang na panuga. (Isaias 60:22) Primero sinasabi nia sato: “An sadit mismo magigin sangribo.” Mantang binabasa nindo an kada Yearbook of Jehovah’s Witnesses, narisa daw nindo kun paanong ginibo an pagpopoon nin saro sanang parahayag kan Kahadean, o nin nagkapira, sa mga kadagaan na ngonyan igwa na nin rinibo? Halimbawa, an tugang na payunir na iyo an enot na naghulit sa Chile nag-arkila nin sarong apartment asin nangimbitar sa sarong pagtiripon sa Domingo. Sa katapustapusi uminabot an sarong tawong interesado. An tawong ini naghapot, ‘An iba man, noarin sinda maabot?’ Sinierto sa saiya kan payunir: “Maabot sinda.” Asin talagang nag-arabot sinda. Pakalihis nin mga 50 taon, an sarong sadit na iyan nagin 23,985.

¹² Sa Italia, an mga Saksi ni Jehova mapait na pinaglamag kan fasistang gobyerno ni Mussolini. Kan taon pakaguerra na 1946, 120 sana sa sainda an nagrereport nin paglilingkod. Alagad girumdoma na mga 120 sana an yaon sa Pentecostes kan taon 33 C.E. Asin isip-isipa an naponan kan panahon na idto! (Gibo 1:15; 2:1-4, 41) Ngonyan, sa saro pang paagi, an espiritu ni Jehova ibinubo sa Italia. Sa laog nin 38 taon an mga parahayag nagdakol sagkod sa pinakahalangkaw na bilang nin 119,408, sa pinakahuring report, na haranihon na sa sangribong dobleng pag-oswag. Kapareho sa dakol pang ibang Katolikong mga nasyon sa daga, an mga Saksi ni Jehova sa Italia nagkakamit nin pambihirang pag-oswag.—Ikomparar an Salmo 69:9; Isaias 63:14.

“Makosog na Nasyon”

13, 14. (a) Paano naotob an ikaduwang kabtang kan panuga ni Jehova? (b) Sa bagay na ini, paano an 1 Pedro 2:9 asin Isaias 59:21 minaaplikar? (c) Ano an nagtao nin orog na puwersa sa satong paghuhulit?

¹³ An ikaduwa sa may tolong kabtang na panuga ni Jehova iyo ini: “An sadangoton magigin makosog na nasyon.” Tunay na sarong “sadangoton,” sarong nagkawararak na natatada sa mga linahidan, an ibinalik sa “daga” nin pag-oyon ni Jehova kan 1919. Alagad ta iyan nagdakol, sagkod na an bilog na espirituwal na Israel nakalaog na—an bilog na kabilangan nin 144,000 na mga paramana kan Kahadean. (Roma 11:25, 26) Tunay na bilang kabtang kan “banal na nasyon” nin Dios, an linahidan na natatada sa daga inapod hale sa kadikloman pasiring sa saiyang makangangalas na liwanag. Sinda nag-ogma na ipahayag an mga kamurawayan kan saindang Dios, si Jehova. (1 Pedro 2:9) Minsan ngani pipira sana sa kabilangan, sinda nagin makosog paagi sa espiritu nin Dios. “‘Kun manongod sa sako, ini an sakong tipan sa sainda,’ sabi ni Jehova. ‘An sakuyang espiritu na yaon sa saimo asin an sakuyang mga tataramon na ibinugtak ko sa saimong ngoso—iyan dai hahaleon sa saimong ngoso o sa ngoso kan saimong aki o sa ngoso kan aki kan saimong aki,’ sabi ni Jehova, ‘poon ngonyan sagkod sa panahon na daing katapusan.’”—Isaias 59:21.

¹⁴ Paagi sa mga tataramon na ini siniseguro sa sato ni Jehova na an satong pagbalangibog kan “maogmang bareta nin marahay na mga bagay” seguradong magkakaigwa nin kapangganahan, asin ini odok niatong ipinamimibi sa ‘aldaw ni Jehova’ na ini. An satong paghuhulit nagkaigwa nin puwersa mantang an piguratibong “aki” kan linahidan na natatada, an “dakulang kadaklan,” saka an saindang “aki” man (mga bagohan na saindang giniyahan pasiring sa organisasyon nin Dios) ibinugtak an mensaheng ini nin kaligtasan sa saindang ngoso, na ipinahahayag iyan sa publiko. Bilang resulta, an gabos na kongregasyon padagos na nag-ooswag sa espirituwalidad, saka sa kabilangan.—Roma 10:10, 15; Salmo 118:24, 25; 1 Tesalonica 3:12.

15. Gurano kadakol kan populasyon kan piguratibong “nasyon” nin Dios, asin taano iyan ta maogma?

¹⁵ Sa nakakaagi pa sanang mga panahon, nag-oswag nanggad sa makangangalas na paagi an bunga kan Kahadean! Huli sa nakadugang na dakol na kabilangan kan “dakulang kadaklan,” an piguratibong nasyon nin Dios ngonyan may kabilangan na 2,842,531 aktibong Saksi bilang pinakahalangkaw na bilang. An “nasyon” na ini mas dakol an populasyon ki sa mga 92 na nasyon asin dibisyon kan kinaban sono sa geograpiya asin politika. Maogma niatong inootro an mga tataramon kan magayon na paraawit: “An kahatolan ni Jehova magdadanay sagkod sa panahon na daing katapusan; an mga paghonahona kan saiyang puso sagkod sa sunod-sunod na kapag-arakian. Maogma an nasyon na an Dios iyo si Jehova, an banwaan na saiyang pinili bilang saiyang mana.”—Sal. 33:11, 12.

‘Pagparikas Kaiyan’

16, 17. (a) Ano an nagpaparisa na an ikatolong kabtang kan panuga ni Jehova naootob ngonyan? (b) Paano ikinapaheling an pagkamoot sa Dios asin ki Cristo? (c) Anong maogmang aktibidad asin espiritu an nakatabang na ‘maparikas iyan’? (d) Paano an Mateo 9:35-38 minaaplikar ngonyan?

¹⁶ Idinugang ni Jehova an ikatolong kabtang kan saiyang panuga: “Ako mismo, si Jehova, maparikas kaiyan sa kapanahonan kaiyan.” Mantang nasa gati na kita kan “dakulang kahorasaan,” an panahon para kaini NGONYAN NA! (Marcos 13:10, 18, 19) Ini pinatutunayan kan marikas na pag-oswag kan gibong pan-Kahadean sa nakaaging duwang taon. An ‘pagrikas’ na ini mamamasdan sa bilog na daga, dawa sa kadagaan na an mga Saksi ni Jehova kaipuhan na magpaheling kan saindang pagkamoot ki Jehova Dios asin ki Jesu-Cristo paagi sa paghuhulit sa atubang nin mga paglamag o iba pang mga kamugtakan na nagsasapeligro kan sainda mismong buhay. Mantang padagos na nagdadakol an mga parahayag na pambilog na panahon, nangengenot an mga payunir. Asin kanigoan na kaogmahan an nanonompongan ninda sa paglilingkod ki Jehova!—Talinhaga 10:22.

¹⁷ An maogmang espiritung ini sa pagpapayunir nakapakosog sa mga kongregasyon sa gabos na lugar na ‘parikason’ an saindang kabtang sa ultimong pagtipon. Dawa may dakulang pag-oswag, masasabi niato na “an anihon mahiwas, alagad an mga paraani kakadikit.” Sa daing paglaom na kinaban ngonyan, makakamate kita nin pagkaherak sa mga tawo, arog ki Jesus kan nasa daga, ta tunay na sinda “maniwang asin nagkakaralagalag siring sa mga karnero na mayong pastor.” Kaya kita ‘nakikimaherak sa Kagurangnan kan anihon na magsugo nin mga paraani sa saiyang anihon,’ asin naoogma kita na maheling na sinisimbag sa makangangalas na paagi an satong mga pamibi.—Mateo 9:35-38.

18, 19. Ano an nagkapirang report na nagpapaheling na an oma kan kinaban “hinog na tanganing anihon”?

¹⁸ Helingon niato an saro sana sa dakol na nakakapakosog na mga halimbawa: Kan Abril nin 1984, an Ecuador nagreport nin 1,048 auxiliary payunir sa langtad, 106 porsientong mas dakol ki sa nakaaging Abril. Pag-abot nin Hunyo an nasyon na ini nagrereport nin 12,238 pag-adal sa Biblia, 24-porsientong pag-oswag para sa taon, asin 8,044 parahayag, 17-porsientong pag-oswag. An nag-atender sa Memorial nagin 40,728, na may proporsion na labing 5 para sa kada parahayag. An kaparehong mga report nadadangog hale sa bilog na globo, asin an bilang nin nag-atender sa bilog na kinaban na 7,416,974 sa selebrasyon kan Memorial kan Abril 15, 1984, nagpapaheling na an mga oma “hinog na tanganing anihon” an mga tinitipon “para sa buhay na daing katapusan.”—Juan 4:35, 36.

¹⁹ Parate na ‘pinaririkas iyan’ ni Jehova sa pambihirang mga paagi. An sarong nagbibiyaheng paraataman isinurat ini hale sa mga kadlagan kan parteng amihanan nin Papua New Guinea: “An sarong tawo na nakaolay nin sarong espesyal payunir nagpuli sa saiyang harayong harong sa sarong baryo sa bukid. Pakalihis nin pirang taon, sia naglataw giraray sa sarong pansirkitong asamblea—na may pakiolay. An dai pa nababautismohan na tawong ini nagpatotoo sa saiyang baryo asin sa nasa palibot na ‘kakadlaganan’ nin epektibong gayo kaya gusto ngonyan kan kamagurangan kan baryo na an mga Saksi ni Jehova paduman asin atamanon an espirituwalidad kan bilog na lugar.” Oras na ikatanom an banhi, an Dios an ‘nagpapatubo kaiyan.’—1 Corinto 3:6.

20. Paano an mga sanga kan Watch Tower pinahiwas tanganing maasikaso an pag-oswag?

²⁰ Sa dakol na paagi, inandam ni Jehova an saiyang banwaan para sa dakulang pag-oswag na ngonyan nangyayari na. Ikinaoogma niato na, sa nakakaagi pa sanang mga taon, makangangalas na inataman ni Jehova an pagpahiwas sa mga pasilidad kan mga sanga kan Watch Tower. Ngonyan, an mga sangang ini nasangkapan na makatabang sa dakulang mga pugro nin “mga salampati.”

21. Paano kita padagos na makakapakikabtang sa ‘pagparikas kaiyan’?

²¹ Kun siring, kita gabos makikabtang sa pagpasirang kan liwanag kan maogmang bareta kan Kahadean sa minilyon pa! Itokdo niato an gabos na “salampati” pasiring sa dalan nin “kaligtasan” sa laog kan nagpoprotehir na lanob kan organisasyon ni Jehova asin dugangan an “pag-omaw” sa saiya sa mga tata kaiyan. Ipamibi logod niato na an Soberanong Kagurangnan na Jehova asin an payo kan Kristianong kongregasyon, an satong namomotan na si Hadeng Jesu-Cristo, padagos na ‘parikason iyan’ mantang an pagbalangibog kan Kahadean nag-aabante pasiring sa kulminasyon kaiyan!

Sa Pagrepaso sa Pag-adal na Ini:

◻ Anong risang kaotoban kan Isaias 60:17 an nangyari kan 1938?

◻ Kaoyon sa Isaias 60:18, ano an mga interes niato?

◻ Paano an mga report hale sa langtad ‘nagpapagayon’ ki Jehova?

◻ Paano an may tolong kabtang na panuga sa Isaias 60:22 nag-aabante pasiring sa kulminasyon?

[Ritrato sa pahina 20]

An mga tutob kan Watchtower kan mga taon nin 1930 nagpaheling kan bisyon ni Ezequiel sa dinamikong organisasyon ni Jehova