An Pagpatotoo Nagbubunga nin Pag-oswag kan Kahadean
“Si Jehova . . . pakadakolon logod kamo nin makasangribong doble sa saindo, asin bendisyonan nia logod kamo siring sa itinuga nia sa saindo.”—DEUTERONOMIO 1:11.
1, 2. (a) Ano an ipinanuga ni Jehova sa Israel? (b) Paano nia inotob an saiyang mga panuga, alagad depende sa ano?
SANGRIBONG DOBLENG PAG-OSWAG! Iyan an inarang ni Moises para sa “banal na nasyon” ni Jehova, an Israel. Si Jehova nanuga nin darakulang bagay para sa nasyon na iyan. (Exodo 19:5, 6; helingon man an Genesis 12:2, 3.) Inotob daw nia an mga panugang idto?
2 Bueno, mga 500 na taon pakataraman ni Moises kan mga tataramon na idto, sinabi: “Kadakoldakol kan Juda asin Israel, siring kadakol kan mga baybay na yaon sa gilid nin dagat, na nagkakarakan asin nag-iirinom patin nag-oorogma.” An reyna sa Seba, na harayo an pinaghalean tanganing helingon an kamurawayan kan kahadean na iyan, nagsabi ki Salomon: ‘Uya! Mayo pa sa kabanga an isinaysay sa sako. Nalihisan mo sa kadonongan asin prosperidad an mga nabareta na nadangog ko. . . . Pag-omawon logod si Jehova na saimong Dios . . . huli ta namomotan ni Jehova an Israel sagkod lamang.” (1 Hade 4:20; 10:7-9) Sagkod na an banwaan na idto maimbod na naglilingkod bilang mga saksi ni Jehova, tunay na sinda pinayaman asin pinadakol nia.
3. (a) Ano an pinatotoohan ni Pedro kun dapit sa “banwaan para sa saiyang ngaran”? (b) Taano an ngaran na mga Saksi ni Jehova ta tamang-tama sa banwaan na iyan?
3 Pakalihis nin labing sangribong taon poon kan aldaw ni Salomon, si apostol Pedro, kan nagpapatotoo sa atubangan kan Kristianong namamahalang grupo duman sa Jerusalem, “nagsaysay nin lubos kun paanong an Dios sa enot na pangyayari nagtao kan saiyang atension sa mga nasyon tanganing kumua hale sa sainda nin sarong banwaan para sa saiyang ngaran.” (Gibo 15:14) An mga Israelitas banwaan kaidto para sa ngaran nin Dios. Alagad ngonyan an Dios nagtitipon giraray nin “sarong banwaan para sa saiyang ngaran”—an Kristianong kongregasyon, espirituwal na Israel—na magpapatotoo man para ki Jehova, na ipinahahayag an saiyang mga katuyohan sa Kahadean. (Galacia 6:16) Tamang-tama, an banwaan na ini namimidbid ngonyan sa bilog na daga paagi sa ngaran na itinampok mismo ni Jehova sa Isaias 43:10-12, ‘mga Saksi ni Jehova.’ Ano an kalabot sa saindang pagigin banwaan para sa ngaran ni Jehova?
“Mga Saksi Ko”
4. (a) Taano an mga Saksi ni Jehova ta kaipuhan na magin man ‘mga saksi ni Jesus’? (b) Sono sa Kasuratan, ano an itinao sa satong halimbawa ni Jesus sa pagpatotoo para ki Jehova?
4 Si Jesus mismo an nagsugo sa banwaan na ini, na an sabi: “Kamo magigin mga saksi ko . . . sagkod sa kaporoporohi nin daga.” (Gibo 1:8) “Mga saksi ko”—an mga tataramon daw na ini ni Jesus nangangahulogan na mapadapit sana ki Jesus, asin bakong ki Jehova, na kaipuhan na itao an patotoo? Dai nanggad! Sa delikadong panahon na idto, kan an pag-oyon ni Jehova ibinabalyo hale sa makalaman pasiring sa espirituwal na Israel, kaipuhan na tumao nin lubos na patotoo manongod ki Cristo na napapasikadan kan bagong areglong ini. Minsan siring, si Jesus nagdadanay na sakop kan saiyang Ama. Sia an nagtao sato nin halimbawa sa pagpatotoo manongod sa ngaran asin Kahadean ni Jehova.—Juan 5:30; 6:38; 17:6, 26; 18:37.
5. (a) Kaipuhan kitang magpatotoo mapadapit sa anong mga bagay may koneksion ki Jesus? (b) Sa bagay na ini, paano niato sinusundan an mga lakad ni Jesus?
5 Si Jesu-Cristo an Nangongoltanan sa bagong tipan asin an linahidan na mga Kristiano dian inapod na magmana kan Kahadean. Sia “an Pangenot na Ahente nin buhay” na ginagamit ni Jehova sa pagbalukat sa katawohan hale sa kagadanan. Si Jesus “kaipuhan na maghade” sagkod na an gabos na kaiwal nin Dios asin tawo madaog asin ikabalik sa dagang ini an mamuraway na paraiso. Sia “an Aki nin Dios” na maapod sa mga gadan hale sa saindang lolobngan sa pagkabuhay liwat. (Hebreo 9:15; Gibo 3:15; Salmo 110:1, 2, 5; 1 Corinto 15:25-28; Lucas 23:42, 43; Juan 5:25-29) Kaya, bilang mga Saksi ni Jehova, kita nagpapatotoo man manongod sa nangongorog na kabtang kan Aki sa pagbindikar sa ngaran ni Jehova. Digdi, kita nagsusunod sa lakad kan satong Kagurangnan, na iyo mismo an kaharohalangkaweng saksi para ki Jehova—“an Maimbod na Saksi.”—Kapahayagan 1:5; 3:14; Juan 18:37; 1 Pedro 2:21.
Siisay an Nagpapatotoo?
6. (a) Siisay sana ngonyan an nagtatao kan patotoo sa Kahadean? (b) Taano ta masasabi na an mga ini naggigibo nin ‘orog pang mga gibo’?
6 Ngonyan, may sararong banwaan na nagpapatotoo “sagkod sa kaporoporohi nin daga.” An banwaan na sinasabi ni apostol Pedro—an ‘banwaan para sa ngaran nin Dios’—iyo an nagpapatotoo manongod ki Jehova asin sa saiyang Kahadean paagi ki Cristo Jesus. Mapadapit digdi, si Jesus mismo nagsabi sa saiyang mga disipulo: “An minatubod sa sako, an saro man na iyan makakagibo sa mga gibo na ginibo ko; asin magibo sia nin mga gibo na orog pa kaini, huli ta ako maduman sa Ama.” (Juan 14:12) Hale sa too kan saiyang Ama sa kalangitan, si Hadeng Jesu-Cristo nagdidirehir ngonyan sa pinakamahiwas na pagpatotoo na ginibo digdi sa daga. Arog kan ihinula ni Jesus, kun “an maogmang baretang ini kan kahadean” ikahulit na “sa bilog na ineerokan na daga para sa pagpatotoo sa gabos na nasyon; dangan madatong an katapusan.”—Mateo 24:14.
7. (a) Taano an mga sekta nin Kakristianohan ta dai nakapagpatotoo? (b) Kabaliktaran, taano an mga Saksi ni Jehova ta maigot na gayo sa saindang paglilingkod?
7 “An maogmang baretang ini kan kahadean” iyo an pinakamaogmang bareta na ikinapahayag sa mga tawo. Iyan an mamuraway na maogmang bareta na dapit dian daing girong an relihiyosong mga sekta nin Kakristianohan. Mayo sinda nin paglaom sa kahadean para sa ngapit. Bakong makangangalas na sinda dai nakakapagpatotoo! Dai ninda naaraman an pinakamaogmang okasyon sa bilog na kasaysayan—an pagdatong na may kamurawayan sa Kahadean kan Aki nin tawo tanganing tumukaw sa saiyang mamuraway na trono asin maghokom sa mga nasyon asin banwaan sa daga. Iyan bagay na dapat na mapatotoohan! Kaya, sa paggiya nin anghel, an mga saksi ni Jehova asin kan saiyang Cristo nagpapahayag ngonyan nin “daing katapusan na maogmang bareta na ipahahayag sa mga nag-eerok sa daga, asin sa lambang nasyon asin tribo asin tataramon patin banwaan.” Kamo daw mahigos na nakikikabtang sa pagpatotoong ini?—Kapahayagan 14:6, 7; Mateo 25:31-33.
Dakulang Patotoo kan 1984
8. (a) Taano ta maninigo niatong ikaogma an 1984 Service Year Report? (b) Ano an nakaeengganyar sa bagong mga disipulo?
8 An 1984 Service Year Report of Jehovah’s Witnesses Worldwide, na nasa pahina 20-23 kan The Watchtower na Enero 1, 1985, nagpapaheling kun gurano kaabunda kan bendisyon kan satong Dios, si Jehova, sa mga paghihingoa kan saiyang mapakumbabang mga saksi. Sa kagabsan, 203 na kadagaan an may representasyon. Digdi, 172 na kadagaan an nagreport nin pag-oswag sa parahayag. Asin nakaoogma, an mga parabalangibog na ini kan Kahadean nagtataram man sa kun paanong ‘pinatalubo sinda kan Kagurangnan, iyo, pinapagsopay sinda, sa pagkamoot sa lambang saro asin sa gabos.’ (1 Tesalonica 3:12) An mamomoton na pagkasararo kan banwaan ni Jehova, kaiba an pagpatotoo sa Kahadean, nakaeengganyar sa kadakol na bagong disipulo. Sa sainda sinasabi ni Jesus: “Mamimidbid nindo an katotoohan, asin bubutasan kamo kan katotoohan.”—Juan 8:31, 32.
9. (a) Paano kamo tibaad nagkapribilehiyo na magkaigwa nin kabtang sa paggibo sa report na ini? (b) Ano an ipinaririsa kan mga kabilangan kun dapit ki Jehova asin sa saiyang banwaan?
9 Paano nagibo an makangangalas na report na ini sa paglilingkod? Iyan ginibo gikan sa mga report sa paglilingkod sa langtad na maimbod na itinao nindo—an indibiduwal na parahayag kan Kahadean—kada bulan. Dai daw kamo naoogma na kamo nagkaigwa nin sadit na kabtang sa makangangalas na report na ini? Ipinaheheling kan mga kabilangan na ini kun paano si Jehova makangangalas na ‘nag-ula nin bendisyon’ sa saiyang mga Saksi—sa “banwaan para sa saiyang ngaran”—na pinagsararo nia sa panglobong kasararoan nin mamomoton na paglilingkod.—Malaquias 3:10; Salmo 56:10, 11; Colosas 3:14.
10. (a) Ano an nagdodoon na an mga saksi kaipuhan na magin mapagsakripisyo? (b) Ano an sinasabi kan Kasuratan manongod sa mga nagdadanay sa integridad asin sa saindang balos?
10 An kadaklan sa pagpatotoong ini ginibo sa irarom nin paglamag o kasakitan asin dakulang pagsasakripisyo sa sadiri. Ini maninigong laoman, ta an terminong “pagpatotoo” siring sa pagkagamit digdi sarong traduksion kan Griegong martýs o martyr, na pinagkuanan man kan terminong “martir,” na nangangahulogan saro na nagpapatotoo paagi sa saiyang kagadanan. Ini nagdodoon na kita, bilang mga Saksi ni Jehova, maninigong magin mapagsakripisyo, na perming determinado na gamiton an satong sadiri asin magdanay sa integridad sa irarom nin gabos na kamugtakan, dawa sagkod sa kagadanan kun kaipuhan.—Lucas 9:23; ikomparar an Job 2:3; 27:5; 31:6; Gibo 22:20; Kapahayagan 2:10.
Benendisyonan an mga Nagdadanay sa Integridad
11, 12. (a) Si Jehova nagtatao sato nin anong nakapagpapakosog na mga garantiya? (b) Paano an saiyang banwaan nakapanggana sa totalitaryong mga pan-aapi?
11 Sa mga panahon nin paglamag, an ‘banwaan para sa ngaran’ ni Jehova nagkaipo nin “kapangyarihan na lihis sa ordinaryo” tanganing mapangganahan an madahas na mga pagsalakay ni Satanas asin an saiyang demonyong mga hukbo. Si Jehova an nagtatao kan kapangyarihan na iyan asin iliniligtas saka pinaooswag an saiyang maimbod na mga saksi. (2 Corinto 4:7-9; Isaias 54:17; Jeremias 1:19) Halimbawa an nangyari sa mga kapangyarihan na Axis kan Guerra Mundial II, na pinangenotan kan Alemania, Italia, asin Hapon. Sa paggamit sa maringis na mga gobyernong diktatoryal, an Diablo ‘puminaluwas sa saiyang ngoso nin sarong salog’ nin paglamag, tanganing ianod an gibong pagpatotoo na an nagpapaagi iyo an langitnon na garobabaeng organisasyon nin Dios. Alagad nagin mapanggana daw digdi si Satanas? Dai nanggad! Minaniobra ni Jehova an mga pangyayari tanganing halonon kan demokratikong mga nasyon sa daga an bahang idto. ‘An mga maraot pinara’ asin an maimbod na mga saksi ni Jehova makangangalas an pag-oswag ngonyan sa mga kadagaan na iyan.—Kapahayagan 12:15, 16; Salmo 37:28, 29.
12 Kasuarin pa sana, sa tolong nasyon na iyan, an Watch Tower Society kinaipuhan na magtogdok asin sangkapan an darakulang pabrika tanganing magpaluwas nin laen na baha—an minilyon na mga Biblia asin konektadong mga publikasyon na pan-Kahadean para sa pagpakosog sa mga Saksi ni Jehova asin iba pang mga tawo na nagugutom sa katotoohan. Sa Alemania, Italia, asin Hapon, ngonyan labing 300,000 na parahayag kan Kahadean an nagdadara kan patotoo sa harong nin mga tawo. Asin sa bilog na kinaban benebendisyonan ni Jehova nin pag-oswag an saiyang banwaan na nagdadanay sa integridad!—Ikomparar an Salmo 115:12-15.
13. (a) Ano sa Year Report an nagpapaheling na inotob kan maimbod na mga saksi an teksto kan 1984? (b) Paano ini maninigong makaengganyar sa sato?
13 Minsan siring, an Diablo, sa pakaaram na halipot na an saiyang panahon, padagos na kinakalaban an mga “nagkukuyog sa mga pagboot nin Dios asin igwa ka gibohon nin pagpatotoo ki Jesus.” (Kapahayagan 12:12, 17) An pagtumang ni Satanas nangorognang maringis sa kadagaan na nalilista sa report bilang “28 Other Countries.” An mga Saksi sa mga teritoryong ini maimbod na nag-otob sa satong teksto para sa 1984, “nagpapaheling nin orog pang kapusoan na itaram an tataramon nin Dios na dai nin takot.” (Filipos 1:14) Marahayon nanggad an pag-oswag ninda sa parahayag na 3.1 porsiento. Naeengganyar kan saindang halimbawa, kita logod gabos maigot na magpadagos na “magdolot sa Dios nin atang nin pag-omaw, na iyo, an bunga nin mga ngabil na nagpapahayag sa publiko kan saiyang ngaran.”—Hebreo 13:15.
14. (a) Ano an puwedeng magbunga para sa sato “nin patototoo”? (b) Sa ibong nin anong mga kamugtakan na kita maninigong magpadagos na magpatotoo na may kapusoan, asin taano?
14 Mantang naggagrabe an kamugtakan kan kinaban, an iba sa sato daing duwaduwa na paglalamagon, dadarahon sa mga hokoman asin ibibilanggo. Isinabi ni Jesus an siring na mga eksperyensia kabilang sa mga bagay na “mangyayari” bago an katapusan, asin idinugang: “Iyan magbubunga sa saindo nin patotoo.” Kaya sa gabos na situwasyon an mga Saksi ni Jehova dapat na magpadagos na magpatotoo manongod sa Dios asin ki Cristo. Dakol an padagos na ginigibo ini sa ibong nin mapait na pagtumang kan pamilya, pagtuya nin mga katrabaho o kaeskwela, asin mga pag-olog-olog sa sainda sa saindang teritoryong hinuhulitan. Kamo daw mapusong nagpapatotoo sa ibong nin masakit na mga kamugtakan? Kun siring saro kamo sa mga sinabi ni Jesus: “Huli sa saindong pakatagal makakamtan nindo an saindong kalag.”—Lucas 21:7, 9-19.
Pag-oswag kan Kahadean!
15. Ano an pira sa pambihirang mga punto sa tsart na nasa pahinang ini?
15 “Pag-oswag kan Kahadean”—ini tamang-tama nanggad na tema para sa satong mga pandistritong kombension kan 1984! Huli ta an taon na idto man nanggad an pinakamarahay na taon niato nin pag-oswag. Helinga na sana an tsart na nasa pahinang ini! Ini tinipon hale sa mga report kan 95 sanga kan Watch Tower Society na nangengenot sa gibong pagpatotoo sa 203 na kadagaan.
16. Sumitar nin pirang tipiko, may kagayagayahan na mga kapahayagan hale sa bilog na kinaban.
16 Mayo kita nin lugar na ikapublikar an gabos na nasusurat na kapahayagan nin kaogmahan na inako hale sa mga sangang opisina kaiba kan saindang taonan na report, pero uya an pirang halimbawa hale sa bilog na kinaban:
Alaska: An bilog na baryo nin Metlakatla nagmiron sa pagtogdok kan 230 Saksi ni Jehova nin magayon na Kingdom Hall sa laog nin 32 na oras; iyan idinedikar kan Domingo man sanang idto.
Honduras: An 3,663 na parahayag iyo an kaharohalangkawe ming bilang; mantang 17,005 an mag-atender sa Memorial kadakol pa kan gibohon.
Brazil: An bagong mga peak suminagkod sa 160,927 parahayag, na 474,450 an nag-atender sa Memorial.
Thailand: Buhay an espiritu nin pagpapayunir, na 22 porsiento kan gabos na parahayag an nasa paglilingkod na ini kan Abril.
Papua New Guinea: 91 porsiento an ilinangkaw kan peak sa auxiliary payunir; labing 1,000 an ilinangkaw kan nag-atender sa Memorial—nagin 7,704.
Austria: Nabubuhay na an espiritu sa pagpapayunir, asin nagkaigwa kami nin limang sunodsunod na peak sa langtad na iyan; nagkaigwa kami nin pitong peak sa parahayag, na an pinakahuri 15,618.
Zambia: Inabot mi an kaharohalangkaweng peak na 58,925 parahayag: 393,431 an nag-atender sa Memorial—110,447 an kalabihan ki sa kan sarong taon.
17. (a) Paano nag-ooswag an langtad nin pagpapayunir? (b) Anong praktikal na mga pasohan an irenerekomendar, asin kiisay? (c) Ano an bagong peak sa parahayag, asin ano an posibleng nakakontribuwir digdi?
17 Ipinaheheling nin mga report na an maimbod na mga misyonero asin payunir padagos na nangengenot sa pagdara kan patotoo sa mga teritoryong bago asin dati. Nakakapakosog nanggad na maheling an pagdakol nin mga payunir. An total na nagreport na auxiliary payunir kan Abril nakaabot sa kaharohalangkaweng peak na 323,644 para sa 49-porsientong pag-oswag. An dakol sa mga ini naheling an pribilehiyo ninda na umoswag sa pagkaregular payunir. Saro pa, dakol sa satong mga hoben na parahayag ka Kahadean an ibinubugtak an pagpapayunir bilang saindang pasohan asin naggigibo nin praktikal na mga pag-andam para sa katuyohan na ini sa saindang huring mga taon sa haiskul. An kagabsan na resulta ipinaheheling kan makangangalas na pag-oswag nin payunir. Ini nakatabang man na makultibar an espiritu nin kaigotan sa satong mga kongregasyon na siertong nakakontribuwir sa bagong peak sa bilog na kinaban na 2,842,531 parahayag, 7.2-porsiento an ilinangkaw ki sa peak kan 1983. Dai daw kamo naoogma na may kabtang kamo sa ulakbong ini paabante?
18. (a) Ano pa an ibang dakulang pag-oswag kan 1984? (b) An report sa Memorial nagpaparisa nin anong potensial para sa pag-oswag, asin ano an puwedeng magin reaksion kan mga parabasa?
18 An maogmang patotoo na itinao kan 1984 maririsa man sa nagdakol na ikinawaras na magasin asin iba pang literatura, sa pinakahalangkaw na bilang nin irineport na oras sa paglilingkod sa langtad, sa pambihirang paglangkaw kan pagdalaw liwat sa mga interesado asin pag-adal sa Biblia na ginigibo sa kaibanan kan mga ini. Hinahalat na gayo niato an dugang pang mga bunga kan maigot na paglilingkod na ini! Asin igwa nin dakulang potensial para sa mas dakula pang pagtitipon! Ini ipinaheheling kan pambihirang bilang nin mga nag-atender sa Pamanggihan kan Kagurangnan kan Abril 15, 1984. Sa mga kongregasyon nin mga Saksi ni Jehova sa bilog na daga, 7,416,974 gabos an nag-atender, na 9,081 dian an nagparisa na sinda kabilang sa “sadangoton na aripompon” kan Kagurangnan paagi sa pakikikabtang sa tinapay asin arak. An gabos logod na parabasa padagos na magtalubo sa espirituwal, tanganing magtao nin lugar sa pakikikabtang sa dakulang pagpatotoo asin pagtitipon na nasa enotan pa.—Ikomparar an Efeso 4:15; Filipos 1:9-11.
19. Ano an ikakapasalamat niato ki Jehova, asin ano an ipinamimibi niato manongod sa ngapit?
19 Tunay na puwede niatong otrohon an mga tataramon ni Moises sa pagsabi manongod sa mga Saksi ni Jehova, an “banwaan para sa saiyang ngaran” sa modernong aldaw; “Si Jehova na saindong Dios pinakadakol kamo, asin uya ngonyan kamo garo an mga bitoon sa kalangitan sa kadakolan.” (Deuteronomio 1:10) Ipinamimibi niato na padagos na paoswagon kan satong Soberanong Kagurangnan, si Jehova, an pagpatotoo sa Kahadean asin dugangan pa an pag-oswag!
Ano an Sasabihon Nindo?
◻ Taano an mga Saksi ni Jehova ta kaipuhan man na magin ‘mga saksi ni Jesus’?
◻ Anong dakulang patotoo an ikinatao kan 1984?
◻ Ano an nagpapaheling na binibendisyonan ni Jehova an maimbod na mga saksi?
◻ Sa anong mga paagi maninigong makaengganyar sa sato an report kan 1984?
[Kahon sa pahina 21]
‘Magayagaya, Maogma, Nagpapasalamat’
An report ini hale sa sarong nasyon na labi nang 40 taon na prohibido an gibohon kan mga Saksi ni Jehova: “An pinakadakulang kaogmahan [mi] iyo an nag-oswag na paghuhulit asin pagtotokdo sa langtad. Dakol an naglilingkod bilang auxiliary payunir. An saro sa sainda ipinahahayag an saiyang saboot sa mga tataramon na ini: ‘Pano ako nin kagayagayahan asin kaogmahan, asin nin hararom na satispaksion.’ An saro pang auxiliary payunir nagsabi: ‘Ogmahon ako na ginigibo ko an nakakapaogma ki Jehova. Nakapoon ako nin limang bagong pag-adal sa Biblia.’ Idinugang nin saro pa: ‘Nagpapasalamat ako ki Jehova na nagtabang sako na mapatalubo an pagkamoot na kaipuhan tanganing makatabang sa ibang tawo.’ Sa sarong kongregasyon nin 61 parahayag 38 an naglingkod bilang auxiliary payunir sa laog nin sarong bulan. Bilang resulta, 66 na bagong pag-adal sa Biblia an naponan.”
[Tsart sa pahina 20]
Pagkokomparar kan Report sa Kinaban
1984 1983 Pag-oswag
Mga Sanga kan Watch Tower 95 94
Kadagaan na Nagreport 203 205
Peak sa Parahayag 2,842,531 2,652,323 7.2%
Promedyong Parahayag 2,680,274 2,501,722 7.1%
Promedyong Payunir 258,936 206,098 25.6%
Auxiliary Payunir (Abril) 323,644 217,860 48.6%
Total na Oras sa Langtad 505,588,037 436,720,991 15.8%
Ikinapasakamot na Literatura 36,639,925 36,039,400 1.7%
Ikinapasakamot na Suskripsion 1,812,221 1,756,153 3.2
Ikinapasakamot na Magasin 287,358,064 258,698,636 11.1%
Pagdalaw Liwat 195,819,093 174,687,309 12.1%
Pro. Pag-adal sa Biblia 2,047,113 1,797,112 13.9%
Nag-atender sa Memorial 7,416,974 6,767,707 9.6%
Nakikabtang sa Memorial 9,081 9,292