Kagayagayahan sa Tahaw kan Banwaan nin Dios
AN MGA tataramon ni Hadeng David, na nasusurat sa Salmo 68, bersikulo 2-4, may kaibang mainit na pangagda sa gabos na namomoot sa tunay na katalingkasan: “Mag-awit kamo sa Dios, gumibo kamo nin mga kanta sa saiyang ngaran; kumanta kamo nin sarong awit sa Saro na nag-aagi sa disyertong mga kaplanodohan bilang si Jah, na iyo an saiyang ngaran; asin maggayagaya kamo sa atubangan nia.” Ano pa an maorog sa pribilehiyo na maggayagaya sa atubangan kan satong Dios? (Isaias 12:2, 3) Sa bilog na taon nin 1986, tinabangan ni Jehova sa makangangalas na paagi an saiyang mga saksi mantang sinda padagos na nagbabalangibog nin katalingkasan sa mga tawo sa daga.
An minasunod na mga pahina nagtatao nin sumaryo sa aktibidad kan mga Saksi ni Jehova sa bilog na kinaban kan 1986. Kanigoan kadakulang dahelan sa paggayagaya! Arog kan ipinaheheling kan mga kabilangan, an pinakahalangkaw na bilang nin aktibong mga Saksi sa nagreport na 208 kadagaan nagin 3,229,022, 6.8-porsientong pag-oswag sa laog kan taon. An nabautismohan 225,868.
Paggirumdom sa Kagadanan ni Jesus
An nag-atender sa pangenot na pagtiripon kan taon, an Memorial kan kagadanan ni Jesus, luminangkaw sagkod sa kisuerra 8,160,597, minsan ngani an ibang report dai naresibi huli sa naggagrabeng kamugtakan kan kinaban. An kabilangan kan mga nakikakabtang sa mga emblema kan Memorial buminaba sa 8,927 mantang natatapos kan gurang nang mga linahidan an saindang paglilingkod digdi sa daga.—Kapahayagan 2:10.
An dakol sa mga nagtiripon sa pagkuyog sa pagboot ni Jesus nagpaheling nin pambihirang kapusoan. (1 Corinto 11:23-26; Juan 16:33) Sa sarong daga sa Aprika na prohibido an gibohon ni Jehova, an kongregasyon nagtiripon sa harong nin sarong tugang na babae sa pagselebrar kan Memorial. Walong minuto pa sana an pahayag, nag-abot an lokal na mga autoridad sa pag-arestar sa mga tugang. Pinagbotan ninda sinda na pondohon an pagtiripon. An mga tugang maboot pero marigon na nag-insister na kaipuhan na igalang ninda an Memorial na ini sa kagadanan ni Jesus bilang atang. Pakatapos na mangatanosan asin makiolay sa pulis, tinogotan sindang magpadagos na nadadangog kan mga pulis. An pagtiripon tinapos nin matoninong, dangan inarestar an gabos. Pakatapos nin imbestigasyon, lima an ibinilanggo. Nabilanggo sinda nin kadikit na panahon pero pinaluwas man giraray, na naoogma na nakapagselebrar sinda kan Pamanggihan kan Kagurangnan!—1 Juan 5:3, 4.
An Nigeria, na an kabilangan nin mga Saksi luminangkaw sagkod sa 128,461, may 394,370 nag-atender sa Memorial—an kaharohalangkawe. An sarong pagtiripon sa Memorial ginibo sa lugar na tinotogdokan kan bagong Bethel sa Igieduma, asin labing 700—haros an bilog na baryo—an yaon duman!
Hale sa Mejico an report na ini: “Saen man kami magduman sa nasyon, an mga parahayag talagang nagsusulwak an entusiasmo, asin an bilog na nasyon garo naglalaad sa katotoohan. An katotoohan lubos na nakaiimpluwensia sa mga tugang, asin an saindang buhay nasisentro sa katotoohan. Bilog na mga pamilya an minalaog sa katotoohan. An kadaklan sa mga nag-aadal minapoon man na mag-atender sa mga pagtiripon kadungan kaiyan. Ini nakatatabang sainda na marikas na umoswag.” An Mejico nagreport nin 838,467 nag-atender sa Memorial. Kan Agosto an 198,003 na parahayag kan Kahadean sa nasyon na iyan may ginigibong 327,664 pag-adal sa Biblia sa harong kan mga tawo. Kanigoan kadakula kan potensial ninda para sa padagos na pag-oswag!
Orog Pang Pag-oswag sa Bilog na Kinaban
Naghahale man sa sentro nin Kakristianohan an kaagid na mga report nin pag-oswag. An Italia nakaabot sa bagong pinakahalangkaw na bilang na 139,570 parahayag kan Agosto, asin 301,009 an presente para sa pagselebrar kan Pamanggihan kan Kagurangnan. An mga Saksi ni Jehova tunay na ‘nagpapaliwanag kan saindang ilaw sa atubang nin mga tawo.’ (Mateo 5:16) Halimbawa: “An sarong tugang na babae naghoholog nin kuwarta sa makinang tiketan sa sarong awto kan an sarong kamidbid magsabi saiya na dai na kaipuhan na bumakal nin tiket ta haranihon man sana an biyahe. Ipinaliwanag kan tugang na tama na bumakal nin tiket, dawa kun an distansia sa masunod sanang lugsadan. Pakalihis kaiyan, nagbaba na sa awto an saiyang katood. Dangan, an drayber kan awto nagsalingoy saiya asin nagsabi: ‘Saksi ka ni Jehova?’ ‘Iyo,’ an simbag kan tugang, ‘taano ta naghahapot ka?’ ‘Nadangog ko an orolay nindo manongod sa pagbakal nin tiket sa awto, asin aram ko na an mga Saksi ni Jehova kabilang sa pipira sana na naggigibo kaiyan asin sadiosan sa gabos na bagay.’ Pakalihis nin pirang bulan, an sarong lalaki nagdolok sa tugang sa sarong pagtiripon asin nagsabi, ‘Midbid mo ako? Ako an drayber sa awto na nakipag-olay saimo manongod sa pagbakal nin tiket. Kan mamasdan ko an saimong iginawe, nagdesisyon ako na mag-adal kan Biblia sa mga Saksi ni Jehova.’”
An Britania nagkaigwa kan pinakahalangkaw na bilang na 107,767 parahayag sa Kahadean, kaiba an bagong mabautismohan na tugang na ini: “Si George 84 anyos na. Pakalihis nin 50 taon bilang bakong klerigong parahulit sa lokal na simbahan, nakaaram sia kan katotoohan. Kan primero, pagkatapos kan saiyang pag-adal sa Biblia, naghihidale sia pasiring sa sarong kuwarto tanganing makasigarilyo. Sia regular na parasigarilyo sa laog nin 70 taon. Alagad kan mapag-adalan an kapitulo 26 kan librong You Can Live Forever in Paradise on Earth, dai na sia noarin man nagsigarilyo. Si George labi nang sarong taon ngonyan na nabautismohan asin mahigoson sa paglilingkod sa langtad, na sinasabihan an iba manongod sa mga bendisyon na itatao ni Jehova sa Saiyang bagong palakaw nin mga bagay.”
An Republika Pederal nin Alemania nagreport nin pinakahalangkaw na bilang na 118,645 parahayag. Igwa man nin rinibong maimbod na mga Saksi na ‘nagpapaliwanag kan saindang ilaw’ sa kataed na Aleman na Republika Demokratika. Duman sa Alemania an maimbod na mga gurangan na habong ibaba “an minasbad kan espiritu.” (Efeso 6:16, 17) An sarong kongregasyon nagbabareta: “Igwa kami nin tugang na babae na 103 anyos na asin sagkod ngonyan nagsosolo sa harong. Iinareglo kan kamagurangan na an sarong grupo nin pito sagkod walong tugang na babae magsarusalida sa pag-ataman sa saiya kada semana. Ini tolo sagkod apat na taon na nindang ginigibo. An mga social worker, na sinisuweldohan kan komunidad, nagduduman tanganing asikasohon an pagkarigos asin pagbulos saiya. Pero kun sinda may helang o bakasyon, an satong mga tugang an minasalida. An patotoong ini nin Kristianong pagkamoot asin pagsasakripisyo nagserbing marahay na patotoo sa mga tagaluwas. An satong 103 anyos na tugang alisto pa an isip asin ibinibilang na ‘teritoryo’ nia an mga social worker. Sia maigot na naghuhulit sa sainda mantang sia kinakarigosan ninda asin tinatawan sinda nin babasahon.” Totoo nanggad, “an pagkaigwa nin uban korona nin kagayonan kun iyan nakukua sa dalan nin katanosan.”—Tal. 16:31.
Minsan siring, an pag-agda na omawon si Jehova itinatao sa gabos na edad—“kamong mga soltero asin kamo man na mga daraga, kamong mga gurang kaibanan nin mga aki.” An dakol na hobenes ‘ginigirumdom an saindang Dakulang Kaglalang sa mga aldaw kan saindang pagkabarobata.’ (Salmo 148:12; Eclesiastes 12:1) Sa Brazil, na nagkaigwa nin makangangalas na bagong pinakahalangkaw na bilang na 196,948 parahayag, an Watch Tower Society nakaresibi nin surat hale sa sarong puwerang banwaan na duman naghulit nin pirang bulan an duwang hoben na tugang. Iyan nagsasabi sa sarong kabtang: “Boot kong komendaran kamo huli sa marahay na mga hobenes na nasa saindong relihiyon. Ako maestro asin nagtotokdo sa mga hobenes, asin aram ko na sinda bako nang arog kan dati. An saindong mga hobenes talagang arogan. Iginagalang ninda an mga gurang, marahay an ugale asin mabini sa paggubing. Asin tatao sinda sa Biblia! Iyan an relihiyon! Sayang na sinda naghale.” An mga pamilya kan satong mga tugang nagbabalyo na ngonyan nin permanente sa iba sa hararayong lugar na ini tanganing atamanon an interes.
Ano an nagigin pag-oswag kan katotoohan sa mga lugar na bakong Kristiano? An The Wall Street Journal kan Hulyo 9, 1986, nagpublikar nin halabang artikulo sa temang “Dagang Daing Bunga—An mga Misyonerong Kristiano Nagsasabwag nin Banhi sa Hapon Alagad ta Kakadikit kan Nagtutubo.” An misyonero kan United Church of Christ nabaretang nagsabi, “Mayo nin paglaom na an Kristianismo talagang makagamot sa Hapon,” asin an saro man na pading Franciscano na nagsasabi, “Tapos na an aldaw kan dayong misyonero sa Hapon.” An duwa pareho nagpagal nin daing kamanungdanan sa laog nin labing 30 taon. Sabi kan artikulo: “Mayo pang 1% kan populasyon an Kristiano, asin sa ibong kan gabos na trabaho kan mga misyonero, nagbababa an porsiento.” Suko na an mga relihiyon kan Kakristianohan! Alagad kumusta man an mga Saksi ni Jehova, na nagtotokdo kan purong Kristianismo sa dagang iyan? Sa nakaaging sunod-sunod na 92 na bulan, naglangkaw an kabilangan kan saindang aktibong mga ministro sagkod sa pinakahalangkaw na bilang na 113,062 (kaiba na an promedyong 46,390 payunir kada bulan). Sa Hapon 146,316 na pag-adal sa Biblia an ginigibo kaiba an mga bagong interesado. Tunay na ini tanda nin orog pang pag-oswag. Digdi, naheheling niato an buhay na kaotoban kan Isaias 65:13, 14.
An Langtad nin Pagpapayunir
Kumusta man an sentro kan gabos na dinamikong aktibidad na ini—an Estados Unidos nin Amerika? Duman, 744,919 parahayag kan Kahadean an nasa langtad bilang pinakahalangkaw na bilang. Alagad talaga daw na kaipuhan an siring na ‘mga misyonero sa sadiring lugar’? Iyo nanggad, ta an krimen, droga, inmoralidad, helang, asin karatan naggagrabe nin orog kisa kadaklan na pagano daang kadagaan. An mga tawo na nagmamawot nin mas marahay na mga bagay nagkakaipo nin pagranga asin paglaom, asin an mga Saksi ni Jehova igwa kan siring na mensahe. (Isaias 61:1, 2; Mateo 24:14) Sa Estados Unidos, kan 1986, an mga ministrong ini nagdusay nin 146,673,490 oras sa pagpahayag kan maogmang bareta kan Kahadean. Iyan 12.6-porsientong pag-oswag, o 16,449,229 oras an kalabihan kisa nakaaging taon. An panahon na iyan ginamit sa kapakipakinabang na paagi, ta 6,138,938 libro an ikinawaras, na 23.2-porsientong pag-oswag kisa nakaaging taon. Kaidto sanang Abril, an total labing 1,000,000 na libro na nagpapaliwanag kan tunay na paglaom sa katoninongan asin katiwasayan.
An saro sa pinakamaogmang kabtang kan report kan Estados Unidos iyo an pag-oswag sa pagpapayunir. Kan Abril igwa nin pinakahalangkaw na bilang na 45,786 na regular payunir, 23-porsientong pag-oswag kisa nakaaging taon. Kun isasalak mo an kabilangan na iyan sa promedyong 43,369 auxiliary payunir asin sa promedyong 279 espesyal payunir, iyan nangangahulogan na bulan-bulan haros 90,000 an nagpapahayag kan Kahadean nin Dios sa gibong pagpapayunir. Sinda mga hobenes patin mga gurang na madonong na ginagamit an saindang panahon sa pag-omaw ki Jehova.
Pagtao nin Lubos na Patotoo
Sa pagtotokdo sa publiko asin sa harong-harong, si apostol Pablo ‘lubos na nagpatotoo’ sa maogmang bareta. (Gibo 20:20, 21) Itinatao man sa dakol na teritoryo ngonyan an kaagid na patotoo. Halimbawa, an report na ini hale sa Guadeloupe: “Sa katapusan kan taon nin paglilingkod, igwa na kami nin sarong parahayag sa kada 72 katawo. Siyempre, kami talagang midbid sa bilog na nasyon! An totoo, sa dakol na lugar, dinudumanan mi an iyo man sanang teritoryo kada semana. An iba makapagsasabi na talagang nasusumo na an mga tawo na maheling kami, o na nakapaluluya nin boot na magduman sa iyo man sanang teritoryo kada semana. Alagad al kontraryo, mientras na orog niamong tinatrabaho an teritoryo, orog man an interes na napupukaw. Asin an pruweba? Bueno, iyan an pinakahalangkaw na bilang kan Abril na 7,136 na pag-adal sa Biblia na ginibo kan samong 4,558 parahayag! Bago pa sana may sarong magasin na igwa kan bareta na: ‘Mga Saksi ni Jehova—Mga Hade sa Pagharongharong’! Ibinibilang ming onra iyan. Sa laog kan taon nin paglilingkod, 458 bagong tugang na lalaki asin babae an nabautismohan.” An karigonan asin kagayagayahan na ipinaheheling sa pagtrabaho sa satong teritoryo nin paorootro, an pakikimidbidan asin pakikikatood sa mga tawo, an mamomoton na paghale sa saindang mga salang paghona—ini puwedeng magbunga nin pakanompong sa dakol na arog-karnero.
Mayaman na binibendisyonan ni Jehova an saiyang mga lingkod sa sarong nasyon sa Aprika na duman prohibido an gibohon asin mainit an guerra sibil. Sa nasyon na iyan an dakol niatong tugang nagdudusa sa mga bilanggoan, asin may mga hoben na Saksi na ginadan. Pero, an Abril may pambihirang report, na may sampulong kaharohalangkaweng bilang. An bagong kabilangan nin parahayag 29 porsientong pag-oswag kisa nakaaging taon. Kanigoan kadakulang kaigotan an ipinaheheling kan namomotan na mga tugang na ini! An promedyong oras kan Abril labing 18 kada parahayag, asin an pag-adal sa Biblia 2.6 kada parahayag.
An may natatagong kahulogan na mensahe na naresibi kan sangang opisina na nangangataman sa teritoryong ini igo nang magtao nin ideya sa nag-eeksister na mga kamugtakan. Iyan nagsasabi: “Padagos kaming nagtitios nin init. An paghihingoang kinakaipuhan tanganing makahiro asin songkoon an saro pruweba na kami nasa kainitan. Pero aram niamo na kami linalang sa paagi na makaadaptar sa ano man na temperatura asin ano man na kamugtakan. Sa ibong kan gabos, kami nagmamaigot asin naglalaom na makaligtas.” Kanigoan kadakulang integridad!
An indibiduwal na mga nagdadanay sa integridad minakompuwesto sa sarong organisasyon na nagdadanay sa integridad. An lakop sa globong organisasyon nin 3,229,022 na saksi ni Jehova arog nanggad kaiyan! Sinda naglalaom na makaligtas sa nagdadangadang na “dakulang kahorasaan” asin sa pakikikabtang, na sakop kan Kahadean ni Cristo, sa dakulang trabaho na gibohon na paraiso an daga. (Kapahayagan 7:14; 21:3, 4; Isaias 65:17, 21-23, 25) Ipinaggagayagaya ninda an pagbendisyon ni Jehova ngonyan pa sa saindang maigot na gibohon, baga man sinda naghuhulit kan tataramon “sa marahay na panahon” o “sa masakit na panahon.” (2 Timoteo 4:2) Kinuyog ninda an tema kan saindang teksto sa taon 1986: “Lumakaw ka . . . , magbalangibog ka kan kahadean nin Dios.”—Lucas 9:60.
[Kahon/Ritrato sa pahina 7]
Nagkapirang Kabtang kan Panglobong Report kan mga Saksi ni Jehova
Pag-oswag:
Pinakahalangkaw na bilang nin mga parahayag: 3,229,022 6.8%
Bulanan na promedyo nin mga payunir: 391,294 21.2%
Total na oras sa paghuhulit: 680,837,042 15.3%
Promedyong bulanan na inaadalan sa Biblia: 2,726,252 14.6%
Total na bilang nin nabautismohan kan 1986: 225,86 19 %