Kristianong mga Saksi Para sa Soberaniya nin Dios
“‘Ipahayag nindo an mga kamurawayan’ kan saro na nag-apod sa saindo hale sa kadikloman pasiring sa saiyang makangangalas na liwanag.”—1 PEDRO 2:9.
1. Anong epektibong patotoo an ikinatao manongod ki Jehova bago kan mga panahon na Kristiano?
BAGO kan mga panahon na Kristiano, sarong halabang lista nin mga saksi an mapusong nagpatunay na si Jehova an iyo sanang tunay na Dios. (Hebreo 11:4–12:1) Makosog sa saindang pagtubod, sinda daing takot na nagkuyog sa mga pagboot ni Jehova asin habong makikompromiso sa mga bagay na manongod sa pagtubod. Sinda nagtao nin mapuersang patotoo sa unibersal na soberaniya ni Jehova.—Salmo 18:21-23; 47:1, 2.
2. (a) Siisay an pinakadakulang Saksi ni Jehova? (b) Siisay an suminalida sa nasyon nin Israel bilang saksi ni Jehova? Paano niato naaaraman?
2 An ultimo asin pinakadakulang saksi bago kan panahon na Kristiano iyo si Juan Bautista. (Mateo 11:11) Nagkapribilehio siang ipaisi an pagdatong kan Saro na Pinili, asin ipinamidbid nia si Jesus bilang an ipinanugang Mesiyas. (Juan 1:29-34) Si Jesus an pinakadakulang Saksi ni Jehova, “an maimbod asin totoong saksi.” (Kapahayagan 3:14) Huling si Jesus isinikwal kan Israel sa laman, isinikwal sinda ni Jehova asin nagnombra sia nin sarong bagong nasyon, an espirituwal na Israel nin Dios, na magin saiyang saksi. (Isaias 42:8-12; Juan 1:11, 12; Galacia 6:16) Nagkotar si Pedro nin sarong hula manongod sa Israel asin ipinaheling nia na iyan aplikado sa “Israel nin Dios,” an Kristianong kongregasyon, kan sia magsabi: “Kamo ‘rasang pinili, sarong makahadeng pagkasaserdote, banal na nasyon, banwaan para sa espesyal na pagkasadiri, tanganing ipahayag nindo an mga kamurawayan’ kan saro na nag-apod sa saindo hale sa kadikloman pasiring sa saiyang makangangalas na liwanag.”—1 Pedro 2:9; Exodo 19:5, 6; Isaias 43:21; 60:2.
3. Ano an pangenot na paninimbagan kan Israel nin Dios asin kan “dakulang kadaklan”?
3 Ipinaheheling kan mga tataramon ni Pedro na an pangenot na paninimbagan kan Israel nin Dios magpatotoo sa publiko manongod sa kamurawayan ni Jehova. Sa satong kaaldawan an espirituwal na nasyon na ini iniibanan nin “sarong dakulang kadaklan” nin mga saksi na nagpapamuraway man sa Dios sa publiko. Nagkukurahaw sinda sa makosog na tingog tanganing madangog kan gabos: “Utang niato an kaligtasan sa satong Dios, na nagtutukaw sa trono, asin sa Kordero.” (Kapahayagan 7:9, 10; Isaias 60:8-10) Paano magigibo kan Israel nin Dios asin kan kairiba kaiyan an saindang pagpatotoo? Paagi sa saindang pagtubod asin pagkuyog.
Falsong mga Saksi
4. Taano ta falsong mga saksi an mga Judio kan kaaldawan ni Jesus?
4 Kalabot sa pagtubod asin pagkuyog an pamumuhay sono sa diosnon na mga prinsipyo. An halaga kaini maheheling sa sinabi ni Jesus manongod sa Judiong mga namomoon sa relihion kan saiyang kaaldawan. An mga ini “nagturukaw sa tukawan ni Moises” bilang mga paratokdo kan Pagboot. Nagsugo pa ngani sinda nin mga misyonero tanganing kombertiron an mga daing pagtubod. Pero, sinabihan sinda ni Jesus: “Binabalyo nindo an dagat asin an marang daga tanganing gumibo nin sarong proselito, asin kun sia iyo na ginigibo sia nindong para sa Gehenna nin makaduwa kisa sa saindo man sana.” An mga relihionistang ini falsong mga saksi—arogante, mapagsaginsagin, asin daing pagkamoot. (Mateo 23:1-12, 15) Sa sarong pangyayari sinabihan ni Jesus an nagkapirang Judio: “Gikan kamo sa saindong ama na Diablo, asin boot nindo na gibohon an mga horot kan saindong ama.” Taano ta siring an sasabihon nia sa mga miembro kan piniling banwaan nin Dios? Huli ta dai ninda hinihimate an mga tataramon kan pinakadakulang Saksi ni Jehova.—Juan 8:41, 44, 47.
5. Paano niato naaaraman na an Kakristianohan nagtao nin falsong patotoo manongod sa Dios?
5 Sa kaagid na paagi, durante kan mga siglo poon kan panahon ni Jesus, ginatos na milyon sa Kakristianohan an naghingako na mga disipulo nia. Minsan siring, dai ninda nagibo an kabotan nin Dios kaya dai sinda minidbid ni Jesus. (Mateo 7:21-23; 1 Corinto 13:1-3) An Kakristianohan nagsugo nin mga misyonero, na an dakol siertong sinsero. Pero, tinokdoan ninda an mga tawo na sumamba sa sarong Trinitaryong dios na nanonolo nin mga parakasala sa kalayo nin impierno, asin an kadaklan sa saindang mga nakombertir nagpapaheling nin kakadikit na ebidensia nin pagigin Kristiano. Halimbawa, an nasyon sa Aprika na Rwanda nagin matubang na langtad para sa mga misyonerong Katoliko Romano. Pero, an mga Katoliko sa Rwanda bilog na pusong uminiba sa dai pa sana nahahaloy na ralaban nin mga tribo sa nasyon na iyan. An mga bunga sa langtad na iyan nin pagmimisyonero nagpapaheling na iyan dai nag-ako nin tunay na Kristianong patotoo gikan sa Kakristianohan.—Mateo 7:15-20.
Pamumuhay Sono sa Diosnon na mga Prinsipyo
6. Sa anong mga paagi na mahalagang kabtang nin pagpapatotoo an tamang paggawe?
6 An salang paggawe kan mga naghihingakong Kristiano nagdadara nin langhad sa “dalan kan katotoohan.” (2 Pedro 2:2) An sarong tunay na Kristiano namumuhay sono sa diosnon na mga prinsipyo. Sia dai naghahabon, nagpuputik, nandadaya, o naggigibo nin inmoralidad. (Roma 2:22) Siertong dai nia ginagadan an saiyang kataed. An Kristianong mga agom na lalaki mamomoton na nangangataman sa saindang pamilya. An mga agom na babae magalang na sinusuportaran an pangangataman na iyan. An mga aki sinasanay kan saindang mga magurang asin sa siring inaandam na magin responsableng Kristianong mga adulto. (Efeso 5:21–6:4) Totoo, kita gabos bakong sangkap asin nasasala. Alagad iginagalang nin sarong tunay na Kristiano an mga pamantayan sa Biblia asin tunay na naghihingoa na iaplikar iyan. Naririsa ini kan iba asin nagtatao nin marahay na patotoo. May beses na an mga dating kontra sa katotoohan nakamasid sa tamang paggawe nin sarong Kristiano asin nadara.—1 Pedro 2:12, 15; 3:1.
7. Gurano kahalaga na an mga Kristiano magkaminorootmootan?
7 Ipinaheling ni Jesus an sarong mahalagang kabtang nin Kristianong gawe kan sia magsabi: “Paagi kaini an gabos makaaaram na kamo an sakong mga disipulo, kun kamo nagkakaminorootmootan.” (Juan 13:35) An kinaban ni Satanas midbid sa “karaksotan, karatan, kaaraan, kabikoan, pagigin pano nin kaurihan, paggadan, iriwal, kadayaan, kaisipan na mapagmawot nin maraot sa kapwa, pagigin mga parahinghing, paralibak, naoongis sa Dios, daing galang, maabhaw, mapalangkaw, mga paratugdas nin karatan, sumbikalan sa mga magurang.” (Roma 1:29, 30) Sa siring na kamugtakan, an sarong pambilog na kinaban na organisasyon na midbid sa pagkamoot magigin mapuersang ebidensia kan naghihirong espiritu nin Dios—sarong epektibong patotoo. Arog kaiyan na organisasyon an Mga Saksi ni Jehova.—1 Pedro 2:17.
Estudyante sa Biblia an mga Saksi
8, 9. (a) Paano napakosog an salmista kan saiyang pag-adal sa Pagboot nin Dios asin paghorophorop dian? (b) Sa anong mga paagi na an pag-adal asin paghorophorop sa Biblia makapakokosog sa sato na magpadagos sa pagpapatotoo?
8 Tanganing magin mapanggana sa pagtao nin marahay na patotoo, dapat na aram asin namomotan nin sarong Kristiano an matanos na mga prinsipyo ni Jehova asin tunay na ikinaoongis an karatan kan kinaban. (Salmo 97:10) An kinaban matibay mangombensir sa pagpalakop kan sadiring kaisipan kaiyan, asin an espiritu kaiyan puedeng depisil tumangon. (Efeso 2:1-3; 1 Juan 2:15, 16) Ano an makatatabang sa sato na mapagdanay an tamang kaisipan? An regular asin makahulogan na pag-adal sa Biblia. An kagsurat kan Salmo 119 dakol na beses na inotro an saiyang pagkamoot sa Pagboot ni Jehova. Binasa nia iyan asin naghorophorop sia dian nin dayaday, “sa bilog na aldaw.” (Salmo 119:92, 93, 97-105) Bilang resulta, ikinasurat nia: “Ikinaongis ko an kaputikan, asin iyan padagos kong ikinababalde. An saimong pagboot sakuyang namotan.” Saro pa, an saiyang hararom na pagkamoot nagpuersa sa saiya na humiro. Sabi nia: “Makapito sa laog kan aldaw inomaw taka huli sa saimong matanos na mga paghokom.”—Salmo 119:163, 164.
9 Sa kaagid na paagi, an satong regular na pag-adal sa Tataramon nin Dios asin paghorophorop dian matudok sa satong puso asin mapahiro sa sato na ‘omawon sia’—magpatotoo manongod ki Jehova—sa parate, “makapito [pa ngani] sa laog kan aldaw.” (Roma 10:10) Kaoyon kaini, sinasabi kan kagsurat kan enot na salmo na an saro na regular na naghohorophorop sa mga tataramon ni Jehova “magigin [nanggad] siring sa kahoy na itinanom sa kataed nin mga sapa, na namumunga sa kapanahonan kaiyan asin dai naaalang an mga dahon kaiyan, asin an gabos niang ginigibo mapakakarhay.” (Salmo 1:3) Ipinaheling man ni apostol Pablo an kapangyarihan kan Tataramon nin Dios kan sia sumurat: “An gabos na Kasuratan ipinasabong nin Dios asin kapakipakinabang para sa pagtokdo, sa pagsagwe, sa paghusay kan mga bagay, sa pagdisiplina sa katanosan, tanganing an tawo nin Dios magin lubos na may kakayahan, andam nanggad para sa lambang marahay na gibo.”—2 Timoteo 3:16, 17.
10. Ano an malinaw manongod sa banwaan ni Jehova sa huring mga aldaw na ini?
10 An marikas na pagdakol kan tunay na mga parasamba sa ika-20 siglong ini nagpaparisa kan bendisyon ni Jehova. Daing duwa-duwa, bilang sarong grupo, an mga saksing ini sa modernong aldaw para sa soberaniya nin Dios nakapatalubo sa saindang puso nin pagkamoot sa pagboot ni Jehova. Arog kan salmista, napahiro sindang kumuyog sa Saiyang pagboot asin maimbod na magpatotoo “aldaw asin banggi” manongod sa kamurawayan ni Jehova.—Kapahayagan 7:15.
An Mapangyaring mga Gibo ni Jehova
11, 12. Ano an nahaman kan mga milagro na ginibo ni Jesus asin kan saiyang mga parasunod?
11 Kan enot na siglo, an banal na espiritu nagtao nin kapangyarihan sa maimbod na Kristianong mga saksi na gumibo nin mga milagro, na nagtao nin makosog na prueba na tunay an saindang patotoo. Kan nasa bilanggoan si Juan Bautista, nagsugo sia nin mga disipulo tanganing hapoton si Jesus: “Ano ika na an Sarong Madatong, o maghahalat pa kami nin iba?” Si Jesus dai nagsimbag nin iyo o dai. Imbes, sia nagsabi: “Paduman kamo asin ibareta nindo ki Juan an saindong nadadangog asin naheheling: An mga buta nakaheheling na liwat, asin an mga pilay naglalakaw, an mga daoton nalilinigan asin an mga bongog nakadadangog, asin an mga gadan binubuhay liwat, asin an mga dukha pinapahayagan kan maogmang bareta; asin maogma an dai nakanonompong nin singkogan sa sako.” (Mateo 11:3-6) An makapangyarihan na mga gibong ini nagserbing patotoo ki Juan na si Jesus talagang iyo an “Sarong Madatong.”—Gibo 2:22.
12 Sa kaagid na paagi, an ibang parasunod ni Jesus nagpaomay sa mga may helang asin nagbuhay pa ngani nin mga gadan. (Gibo 5:15, 16; 20:9-12) An mga milagrong ini garo man sana patotoo gikan mismo sa Dios para sa sainda. (Hebreo 2:4) Asin an siring na mga gibo nagpaheling kan makakamhan sa gabos na kapangyarihan ni Jehova. Halimbawa, totoo na si Satanas, “an namamahala sa kinaban,” kayang magcausa nin kagadanan. (Juan 14:30; Hebreo 2:14) Alagad kan buhayon liwat ni Pedro an maimbod na babaeng si Dorcas, nagibo sana nia iyan paagi sa kapangyarihan ni Jehova, huling Sia sana an may kakayahan na ibalik an buhay.—Salmo 16:10; 36:9; Gibo 2:25-27; 9:36-43.
13. (a) Sa anong paagi na an mga milagro sa Biblia nagpapatunay pa sagkod ngonyan sa kapangyarihan ni Jehova? (b) Paanong may mahalagang kabtang an kaotoban nin hula sa pagpatunay sa pagka-Dios ni Jehova?
13 Ngonyan, dai na nangyayari an milagrosong mga gibong idto. Naotob na an katuyohan kaiyan. (1 Corinto 13:8) Minsan siring, yaon pa sa sato an rekord kaiyan sa Biblia, na pinatunayan nin dakol na nakaheling. Kun itinotokdo kan mga Kristiano ngonyan an makasaysayan na mga talang ini, an mga gibong idto nagtatao pa sagkod ngonyan nin epektibong patotoo sa kapangyarihan ni Jehova. (1 Corinto 15:3-6) Dugang pa, kaidtong kaaldawan ni Isaias, itinokdo ni Jehova an eksaktong hula bilang pambihirang prueba na Sia an tunay na Dios. (Isaias 46:8-11) An dakol na hula sa Biblia na ipinasabong nin Dios naootob na ngonyan—an nagkapira kaiyan sa Kristianong kongregasyon. (Isaias 60:8-10; Daniel 12:6-12; Malaquias 3:17, 18; Mateo 24:9; Kapahayagan 11:1-13) Apuera sa pagtokdo na kita nabubuhay na sa “huring mga aldaw,” an kaotoban kan mga hulang ini ibinibindikar si Jehova bilang an iyo sanang tunay na Dios.—2 Timoteo 3:1.
14. Sa anong mga paagi na an kasaysayan kan Mga Saksi ni Jehova sa modernong aldaw sarong mapuersang patotoo na si Jehova iyo an Soberanong Kagurangnan?
14 Sa katapustapusi, si Jehova naggigibo pa sagkod ngonyan nin darakulang bagay, makangangalas na mga bagay, para sa saiyang banwaan. An nag-oorog na liwanag dapit sa katotoohan sa Biblia ginigiyahan kan espiritu ni Jehova. (Salmo 86:10; Kapahayagan 4:5, 6) An pambihirang mga pag-oswag na irinereport sa bilog na kinaban ebidensia na si Jehova ‘pinaririkas iyan sa kapanahonan kaiyan.’ (Isaias 60:22) Kun nangyayari an mapait na paglamag sa sunod-sunod na nasyon durante kan huring mga aldaw, nagigin posible an mapusong pakatagal kan banwaan ni Jehova huli sa nakapakokosog na pagsuportar kan banal na espiritu. (Salmo 18:1, 2, 17, 18; 2 Corinto 1:8-10) Iyo, an mismong kasaysayan kan Mga Saksi ni Jehova sa modernong aldaw mapuersang patotoo na si Jehova iyo an Soberanong Kagurangnan.—Zacarias 4:6.
An Ihuhulit na Maogmang Bareta
15. Anong pinahiwas na pagpatotoo an itatao kan Kristianong kongregasyon?
15 Ninombrahan ni Jehova an Israel bilang saiyang saksi sa mga nasyon. (Isaias 43:10) Minsan siring, pipira sanang Israelita an pinagbotan nin Dios na dumuman asin maghulit sa bakong mga Israelita, asin ini sa parate tanganing ipaisi an mga paghokom ni Jehova. (Jeremias 1:5; Jonas 1:1, 2) Minsan siring, ipinaririsa kan mga hula sa Hebreong Kasuratan na sarong aldaw si Jehova matao kan saiyang atension sa mga nasyon sa mahiwas na sokol, asin ini ginibo na nia paagi sa espirituwal na Israel nin Dios. (Isaias 2:2-4; 62:2) Bago nagsakat sa langit, pinagbotan ni Jesus an saiyang mga parasunod: “Kaya paduman kamo asin gumibo kamo nin mga disipulo sa mga tawo kan gabos na nasyon.” (Mateo 28:19) Mantang si Jesus nagkonsentrar sa “lagalag na mga karnero kan harong ni Israel,” an saiyang mga parasunod isinugo sa “gabos na nasyon,” “sagkod sa kaporoporohi nin daga.” (Mateo 15:24; Gibo 1:8) An Kristianong pagpatotoo madadangog kan bilog na katawohan.
16. Anong sugo an inotob kan Kristianong kongregasyon kan enot na siglo, asin gurano kahiwas?
16 Ipinaheling ni Pablo na nasasabotan niang gayo ini. Kan taon 61 C.E., puede na niang sabihon na an maogmang bareta “nagbubunga asin nagtatalubo sa bilog na kinaban.” An maogmang bareta bako sanang para sa sarong nasyon o sarong sekta, arog baga kan naggigibo nin “pagsamba kan mga anghel.” Imbes, iyan hayag na “ikinahulit sa gabos na linalang sa sirong nin langit.” (Colosas 1:6, 23; 2:13, 14, 16-18) Sa siring, inotob kan Israel nin Dios kan enot na siglo an sugo dian na “‘ipahayag . . . an mga kamurawayan’ kan saro na nag-apod sa [sainda] hale sa kadikloman pasiring sa saiyang makangangalas na liwanag.”
17. Paano an Mateo 24:14 padagos na naootob sa mahiwas na sokol?
17 Pero, an paghuhulit na iyan kan enot na siglo panamit sana kan mahahaman durante kan huring mga aldaw. Nagtatanaw nangorogna sa satong panahon, si Jesus nagsabi: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.” (Mateo 24:14; Marcos 13:10) Naotob na daw an hulang ini? Iyo na nanggad. Poon sa sadit na kapinonan kan 1919, an paghuhulit kan maogmang bareta ikinapaaabot na ngonyan sa labing 230 nasyon. An pagpatotoo nadadangog sa nagniniebeng Amihanan asin sa mainit na mga nasyon sa tropiko. Hinuhulitan an darakulang kontinente, asin hinahanap an puerang mga isla tanganing an mga habitante kaiyan makaako nin patotoo. Maski sa tahaw nin grabeng kariribokan, arog kan guerra sa Bosnia asin Herzegovina, an maogmang bareta padagos na ihinuhulit. Siring kan enot na siglo, an pagpatotoo nagbubunga “sa bilog na kinaban.” An maogmang bareta hayag na ipinaiisi “sa gabos na linalang sa sirong nin langit.” An resulta? Enot, an mga nawawalat kan Israel nin Dios natipon “hale sa lambang tribo asin tataramon asin banwaan patin nasyon.” Ikaduwa, an minilyon kan “dakulang kadaklan” nagpoon na ilaog hale sa “gabos na nasyon asin tribo asin banwaan patin tataramon.” (Kapahayagan 5:9; 7:9) An Mateo 24:14 padagos na naootob sa mahiwas na sokol.
18. Ano an nagkapirang nahahaman kan pambilog na kinaban na paghuhulit kan maogmang bareta?
18 An pambilog na kinaban na paghuhulit kan maogmang bareta nakatatabang na patunayan na an makahadeng presensia ni Jesus nagpoon na. (Mateo 24:3) Dugang pa, iyan an pangenot na paagi nin pag-ani sa “anihon kan daga,” mantang itinotokdo kaiyan an mga tawo sa solamenteng tunay na paglaom para sa katawohan, an Kahadean ni Jehova. (Kapahayagan 14:15, 16) Mantang solamente an tunay na mga Kristiano an nakikakabtang sa paghuhulit kan maogmang bareta, an mahalagang gibohon na ini nakatatabang na ilaen an tunay na mga Kristiano sa mga falso. (Malaquias 3:18) Sa paaging ini, nagbubunga iyan nin kaligtasan kan mga naghuhulit siring man kan mga naghihimate. (1 Timoteo 4:16) An pinakamahalaga, an paghuhulit kan maogmang bareta nagtatao nin kaomawan asin onra ki Jehova Dios, an saro na nagboot na gibohon iyan, nagsusuportar sa mga naggigibo kaiyan, asin nagpapangyari kaiyan na magin mabunga.—2 Corinto 4:7.
19. Pinakokosog an gabos na Kristiano na magkaigwa nin anong determinasyon mantang palaog sinda sa bagong taon nin paglilingkod?
19 Bakong makangangalas na si apostol Pablo napahirong magsabi: “Herak man sa sako kun dai ako maghulit kan maogmang bareta!” (1 Corinto 9:16) Siring man kaiyan an namamatean kan mga Kristiano ngonyan. Dakulang pribilehio asin paninimbagan na magin “mga katabang nin Dios,” na nagpapasirang kan liwanag nin katotoohan sa madiklom na kinaban na ini. (1 Corinto 3:9; Isaias 60:2, 3) An gibohon na sadit an kapinonan kan 1919 nakaabot na ngonyan sa makangangalas na mga sokol. Haros limang milyon na Kristiano an nagpapatotoo para sa soberaniya nin Dios mantang naggagamit sinda nin labing sarong bilyon na oras kada taon sa pagpaabot sa iba kan mensahe nin kaligtasan. Kanigoan na kagayagayahan na magkaigwa nin kabtang sa gibohon na ini na pagpakangbanal sa ngaran ni Jehova! Mantang palaog na kita sa 1996 na taon nin paglilingkod, magin determinado kita na dai lumuway. Imbes, orog niatong hihimateon kisa kasuarin pa man an mga tataramon ni Pablo ki Timoteo: “Ihulit mo an tataramon, gibohon iyan na may pagkasibot.” (2 Timoteo 4:2) Mantang ginigibo niato iyan, namimibi kita sa bilog niatong puso na logod padagos na bendisyonan ni Jehova an satong mga paghihingoa.
Nagigirumdoman daw Nindo?
◻ Siisay an suminalida sa Israel bilang “saksi” ni Jehova sa mga nasyon?
◻ Paano an Kristianong paggawe nakakokontribwir sa pagpatotoo?
◻ Taano an pag-adal sa Biblia asin paghorophorop dian ta mahalaga para sa Kristianong Saksi?
◻ Sa anong paagi na an kasaysayan kan Mga Saksi ni Jehova sa modernong aldaw nagseserbing ebidensia na si Jehova iyo an tunay na Dios?
◻ Ano an nahahaman kan paghuhulit kan maogmang bareta?
[Mga retrato sa pahina 15]
Imbes na nababawalan, an maogmang bareta ikinapahahayag na ngonyan “sa gabos na linalang sa sirong nin langit”