Inaatraso Daw nin Dios an Saiyang Paghokom?

IMAHINARON na kamo naghahalat nin bisitang taga ibang lugar na sinabi saindo an aldaw nin saiyang pag-abot alagad bako an oras. Mantang naglilihis an oras, asin dai pa nanggad sia minaabot, nagpopoon na kamong mag-isip kun baga sia naatraso. Ini daw talaga an aldaw na sinabi niang sia maabot? Nagkaigwa kaya nin dai pagkasinabotan? Halat, an ano man sa enot na dai pakapaghalat nasasalidahan nin bagay na nakakaistorbo nin orog, an inaapod na pagduda.

Kabaing nanggad kaini an namamatean nin ibang tawo dapit sa ipinanugang pag-abot kan oras na isasagibo nin Dios an paghokom tumang sa karatan. An totoo, an saiyang mga parasamba haloy nang naghahalat para kaiyan. Bilang halimbawa, an maimbod na si Hadeng David. Labing 3,000 taon na an nakaagi sia nagsabi: “Si Jehova mismo sa saimong too paparasaon an mga hade sa saiyang kaanggotan. Sia maghokom sa mga nasyon.” Kaya puwede daw na basolon an siisay man ngonyan sa pagisip na, Noarin daw?—Salmo 110:5, 6.

Sa pagkomparar kan mga kamugtakan sa kinaban sa mga hula kan Biblia asin sa pagkuwenta kan kronolohiya sa Biblia, an mga seryosong mga estudyante nin Biblia nagtubod na an aldaw kan paghokom nin Dios talagang harani na. Alagad bako daw na an dakol sa tawo kan enot nakamate man nin siring, sanang nadiskubre ninda sa huri na sinda nasala? Igwa daw nin siertong paagi na madeterminaran kun noarin eksaktong isasagibo an paghokom nin Dios?

Sa “Itinalaan na Panahon” nin Dios

Ipinaheling ni Jesus na an paghokom mangyayari sa sarong depinidong panahon. Alagad sa pagpatanid sa saiyang mga parasonod, sia nagsabi: “Magpuka kamo, huli ta dai nindo aram kun noarin an itinalaan na panahon.”—Marcos 13:33.

Patienot nin anom na siglo, kan si Habakuk pagbotan nin Dios na magsurat dapit sa pagsagibo nin banal na pahokom, nagsabi man na iyan mangyayari “sa itinalaan na panahon.” Asin bilang patanid tumang sa dai pakapaghalat, o tibaad mapagduda, sa paggiya nin Dios sia nanuga: “Dai iyan magpuputik. Minsan pa iyan maatraso, padagos iyan na halaton; huli ta sierto nanggad na iyan maootob. Dai iyan mahuhuri.”—Habakuk 2:2, 3.

Alagad kun an paghokom nin Dios “para sa itinalaan na panahon” asin kun “dai iyan mahuhuri,” taano ta sinabi ni Habakuk na “minsan pa iyan maatraso”? Malinaw na ipinapaheling na an nagkapira sa banwaan nin Dios naglalaom na mahahaloy pa iyan imbes kan aktuwal na pagabot kaiyan. Taano? Huli ta an eksaktong oras kan pagdatong kaiyan magdadanay na dai naaraman ninda.

Minsan si Jesus, kan yaon digdi sa daga dai nakaaram kan eksaktong oras, huli ta sia nagsabi: “Mapadapit sa aldaw na iyan o sa oras mayo nin siisay man na nakakaisi, ni an mga anghel sa langit ni an Aki, kundi an Ama sana.” (Marcos 13:32) Minsan siring, an aram nia iyo an peryodo nin panahon na diyan kaiyan mangyayari an paghokom. Kaya, sa pakiolay kan saiyang mga dispulo, nagtao sia nin tanda na magpapamidbid sa sainda kun an peryodo nin panahon na ini nagpoon na. An enot na patotoo kaiyan, sinabi ni Jesus, magigin “siring sa enot na kolog nin pangaki.” Ngonyan, siyempre, an bados na babae na madali na sa pangaki dai nakakaaram kan eksaktong oras na mamumundag an saiyang aki. Minsan siring, aram nia, na an pagkamundag kaiyan madale nang mangyari.—Mateo 24:3-8, Today’s English Version.

“An Kapagarakian na Ini Dai Noarin Man Makakalihis”

Apuwera sa pakaaram kun noarin maabot an peryodo nin panahon para sa banal na paghokom, naginibo ni Jesus na bugtakan nin limite an lawig kaiyan. Sa ilustrasyon kan kahoy nin higuera, sia nagsabi: “Oras na an bagong sanga kaiyan magsuli asin magdahon aram nindo na an tig-initan harani na. Siring man kamo, kun maheling na nindo an gabos na bagay na ini, aramon nindo na sia harani na sa mga tata. Sa katotoohan sinasabi ko saindo na an kapagarakian na ini dai noarin man makakalihis sagkod na an gabos na bagay na ini mangyari.”—Mateo 24:32-34.

Kun siring an paghokom isasagibo ano man na oras sa panahon na nabubuhay pa an mga tawong nakaheling kan enot na ebidensiya kan peryodo nin panahon na binanggit ni Jesus. An kapinonan kaining peryodo nin panahon magtatanda kan kapinonan kan katapusan para sa kinaban ni Satanas, na tumang diyan an bagong patindogon na Kahadean nin Dios sa langit magsasagibo nin banal na paghokom. An kronolohiya sa Biblia asin an kaotoban kan mga hula sa Biblia nagtatao nin supisyenteng patotoo na ining peryodo nin panahon nagpoon kan 1914.a

Kaya bago totalmenteng mawara an kapagarakian kan 1914, an paghokom nin Dios kaipuhan isagibo na. Dakol pa an bilang kan buhay kan kapagarakian na ini. Halimbawa, kan 1980 igwa pa giraray nin 1,597,700 mga personang buhay sa Republika Pederal nin Alemania na namundag kan 1900 o antes. An bilang magigin mas dakula kun dai an minilyon kan mga siudadano kaiyan nag-agi nin dai pa sa panahon na pagkagadan durante kan duwang guerra mundial.

Kan manuga na “an kapagarakian na ini dai noarin man makakalihis,” ginamit ni Jesus an duwang Griegong negatibo ou asin me. An The Companion Bible nagpapaliwanag kan paggamit kaini nin siring: “An duwang negatibo kun pagsaroon nahahalean kan saindang sadiring mga kahulogan, asin nakakaporma kan pinakamakosog asin nagdodoon nin nangongorog na patotoo [pagsierto].” Ngonyan sana, an panahon na naglataw na an kapagarakian puwedeng lumihis antes na maotob an gabos, na an mga tataramon ni Jesus na “dai noarin man” nagkaigwa nin tunay na kahulogan.

Sarong Pagbalo sa Pagtubod

An nagpapatanid na mga tataramon ni Habakuk nagpapaheling na magkakaigwa nin naririsang pagkaatraso sa paghokom ni Jehova, na nagseserbing pagbalo sa pagtubod. Igwang rason na an pagbalong ini dai malataw sagkod sa poro kan kapagarakian na sinasabi ni Jesus. Konektado sa halimbawang binanggit sa kapinonan kan artikulong ini, horophoropa ini: Noarin kamo seryosong mapoon na magduda na an saindong bisita maabot? Sigurado bako sa alas nuwebe nin aga, ni sa odto, tibaad bako ngani sa hapon. Alagad talagang mababalo an saindong pagtubod kun an banggi mag-abot na. Minsan siring, girumdomon na minsan sa 11:30 n.b. an saindong bisita igwa pa nin igong panahon na dumatong sa pagotob kan saiyang panuga!

Dai nin rason na maghadit na an tataramon nin Dios dai maootob. Dai pa iyan noarin man nasudya. An mga tataramon ni Josue sa mga Israelitas labi nang 3,000 taon an nakaagi siring katotoo ngonyan: “Ni sarong tataramon sa gabos na marahay na tataramon na isinabi saindo ni Jehova na saindong Dios an nasudya. Iyan gabos naotob sa saindo. Mayo ni sarong tataramon sa mga iyan an nasudya.”—Josue 23:14.

“Mapadapit sa kaotoban kan hula puwede ser na magigin natural para sa sato, asin para sa gabos na katawohan, na malangkag asin na maglaom na mahaman an mga bagay na mas marikas kisa dating pag-agi kaiyan.” Kaya sinabi kan The Watch Tower sa luwas kaiyan na Mayo 1, 1910, nagdagdag: “Ini sarong pagkaatraso kun mapadapit sa satuyang mga linalaoman alagad makakasierto kita na mayo nin pagkaatraso sa bagay na ini mapadapit sa banal na mga intension . . . Mayo kitang duda na an mga resulta makakamtan sa katamaan nin panahon—an panahon nin Dios.”

Sa pagturotimbang kan nakaagi, an maimbod na mga Kristianong nabubuhay ngonyan makakaheling nin marahay na mga rason kun taano ta an paghokom nin Dios dai pa isinasagibo. An totoo, nag-oogma sinda na iyan dai nangyari. An sunod na artikulo nagpapaliwanag kun taano.

[Nota sa Ibaba]

[Ritrato sa pahina 4]

Kadakol sa kapagarakian kan 1914 naglalaom na maheling na “mangyari ining gabos na bagay”