Kun Taano ta Dai Pa nin Dios Isinasagibo an Saiyang Paghokom

HAROS duwang siglo pagkagadan ni Jesus, naghalat na an nagkapirang mga Kristiano ki Jehova na “dumatong” sa paghokom. Nagpahiro ini ki apostol Pablo na magsurat sainda, nagsabi: “An aldaw ni Jehova . . . dai maabot kun dai ngona mangyari an apostasya asin mahayag an tawo nin katampalasanan, an aki nin kalaglagan.” Minsan ngani inako ni Pablo na “an misteryo kaining katampalasanan naghihiro na” sa saiyang kaaldawan, risang gayo na bako talagang kinakaipuhan, tanganing an banal na paghokom dumatong—2 Tesalonica 2:2, 3, 7, 8.

Sarong Dobleng Pagtipon

An apostasya, minsan ngani siertong maabot, dai makakaolang sa katuyohan nin Dios na magpili nin 144,000 na maimbod na mga Kristianong magigin kaibang mga hade kan saiyang Aki, si Jesus, sa langit. (Helingon an Kapahayagan 14:1-5.) Solamente makompleto na an saindang bilang asin matatakan na nin Dios kaya sana an paghokom ni Jehova mangyayari. An Kapahayagan 7:2, 3 nagpapaliwanag: “Sa apat na anghel [nagsabi]: ‘Dai nindo pagratakan an daga o an dagat o an kahoy [sa pagdara kan mapanlaglag na hangin kan paghokom nin Dios tumang sa mga nasyon], sagkod na dai pa niamo natatatakan an mga oripon kan satong Dios sa saindang angog.’” Aram niato ngonyan, na an trabahong ini dai nagtapos kan an Kahadean patindogon kan 1914.

Kaya, an paghokom nin Dios dai puwedeng dumatong kaidto, minsan ngani an iba naglaom. An Enero 1, 1914, na luwas kan The WatchTower nagpaliwanag dapit sa mga pangyayaring ini, nagsasabi na minsan ngani “an Taon 1914 iyo an ultimo sa sinasabi kan Biblia na ‘Panahon nin mga Hentil’. . . dai noarin man kita nagsasarig na ining taon, 1914, makakapagtestigo nin siring karadikal asin karikas na mga pagbabago nin areglo nin mga bagay siring sa mga linalaoman niato.” Kaya, mantang an artikulo nagpapaliwanag, nagpasalamat an mga Kristiano na an kronolohiya kan Biblia nakapukaw sainda sa nagdadangadang na banal na paghokom. Iyan nagsabi: “Naniniwala kita na an kronolohiya sarong bendisyon. Kun ini nagpukaw sato nin mas amay nin pirang minuto o pirang oras sa pagkaaga kisa dating pagmata niato, bentahe asin marahay! An mga puka iyo an nakakakua kan bendisyon.”

Kairiba man sa mga makakakua nin bendisyon iyo an inaapod kan Biblia na “sarong dakulang kadaklan, na daing siisay man na makakabilang, hale sa gabos na nasyon asin tribo asin banwaan patin tataramon.” Sagkod na dai nag-abot an 1935, biyong nasabotan na ining “dakulang kadaklan” bibilogon nin mga tawo “na nagluwas sa dakulang kahorasaan,” boot sabihon an mga nagbaya sa organisasyon ni Satanas asin kuminampi sa lado nin Dios, tanganing maligtas sa paghokom nin Dios. Mga limang siglo na ngonyan, an trabahong pagtitipon kaining “dakulang kadaklan” nagpapadagos na kaoyon sa katuyohan ni Jehova. Makakapagogma kita na an banal na paghokom dai isasagibo sagkod na an nagliligtas buhay na gibohon na ini mahaman.—Kapahayagan 7:9, 14.

Politikal na mga Pangyayari

An nagkapirang politikal na mga pangyayari ihinula man na malataw bago an pagsagibo kan paghokom nin Dios. Sarong kaotoban sa hula ni Daniel dapit sa “duwang hade” (kapitulo 11) malinaw ngonyan na naheheling na nagdadangadang sa pakahaman.a Sa kulminasyon kan kaotoban kaini, an Dios magsasagibo nin paghokom.—Ikomparar an Daniel 2:44.

Minsan ngani nagkokontrahan, an mapupuwersang ini asin an saindang mga bloke—“an hade nin timogan” asin “an hade nin amihanan”—pareho igwang representante sa panglobong politikal na organisasyon na ngonyan nagpapangyari sa mga tawo na “maypagkaara na magngangalas.” Sarong angay na pagkaapod kan tapos-Guerra Mundial I Liga de Naciones asin an saiyang tapos-Guerra Mundial II na kasalida, an organisasyon nin Naciones Unidas.—Daniel 11:40; Kapahayagan 17:8.

Nababanga sa ideolohiya asin politika, asin padagos pa man giraray na “nagkakasaro,” an “duwang hadeng” ini kadakol an mga plano sa pagpadanay kan pankinaban na “katoninongan asin katiwasayan.” Ini man, maririsa, huli ta an hula kan Biblia nagsasabi na “sa panahon na sinda nagsasarabi: ‘Katoninongan asin katiwasayan!’ dangan an biglang pagkalaglag madaling maabot sainda.” Sagkod noarin an “duwang hadeng” ini, magkakasuhay asin konektado sa organisasyon nin Naciones Unidas, makakaresolber sa pankinaban na politikal, ekonomikal, kapalibotan, asin sosyal na mga problema tanganing makamate na tama an saindang pagkurahaw, sa ngonyan dai niato aram.—1 Tesalonica 5:2, 3.

Minsan siring, an aram niato na sa pagsakop kaiyan, an organisasyon nin Naciones Unidas, kagrupo kan mga miembrong nasyon kaiyan—kaibang pinakaprominente an “duwang hadeng” ini—magtitios kan paghokom nin Dios asin ‘mahoholog sa kalaglagan.’ Aram niatong padagos na an kapagarakian kan 1914 nasa kabanggihon na kan saiyang pag-eksistir, kaya naghahalat na sana nin kadikit na panahon tanganing maotob an hulang ini. Alagad aram man niato—para digdi igwa kita kan panuga ni Jesus—na “an kapagarakian na ini dai naorin man makakalihis sagkod na mangyari an gabos na bagay na ini.”—Kapahayagan 17:11; Marcos 13:30.

Dai si Jehova Mag-aatraso—Kamo Daw?

Kun kamo nag-aadal kan Biblia asin nakakanood dapit sa mga katuyohan ni Jehova, dai mag-atrasong dumulag pasiring sa simbolikong lugar nin proteksyon nin Dios. “Hanapa nindo an katanosan, hanapa nindo an kahoyoan,” tanganing “tibaad kamo matago sa aldaw kan kaanggotan ni Jehova.”—Sofonias 2:1-3.

Girumdoma an enot na siglong mga Kristiano na nagdulag sa Jerusalem kan 66 C.E. pagkarisa kan tanda na itinao ni Jesus dapit sa nagdadangadang na paghokom kaiyan. An siisay man na nag-atraso sa saindang pagdulag—sa ano man na dahelan—puwede ser na nayoyok sa palsong pagmate nin seguridad kan an mga Romano, na nagpalibot sa siudad asin sa dai linalaoman nagsibog, dai na nagbuwelta. Nag-agi an mga semana. An mga semana nagin mga bulan. An mga bulan nagin mga taon. Tibaad an iba nag-isip na si Jehova nag-atraso sa pagsagibo kan saiyang paghokom. Alagad biglang nagbalik an mga Romano kan 70 C.E. Para sa mga nasa laog kan siudad, mayo na nin dudulagan.—Lucas 21:20-22.

Sa ibong na kampi, an mga tawo ngonyan, na nagdedikar na kan saindang buhay sa paggibo kan kapagbotan nin Dios asin nagdulag pasiring sa lugar nin pailihan, dai na dapat mag-anton sa pag-otob kan saindang Kristianong obligasyon. Dai sinda dapat magtawad sa paghuhulit kan mensahe kan paghokom ni Jehova siring sa ginibo ni Jonas kan sia pinagbotan na magpatanid sa mga taga-Ninive dapit sa banal na paghokom. Ni na sinda sumibog pasiring sa pagka-inaktibo na nakatunganga, siring sa ginibo nia, huli ta an mga bagay dai nangyari siring sa hinahalat o na siring karikas kan saindang linalaoman.—Jonas 1:1, 2; 4:2, 5, 10, 11; 2 Pedro 3:15.

Angay nanggad an The Watch Tower kan Hunyo 1, 1906, nagsabi dapit sa pagsagibo kan paghokom nin Dios: “Panahon an lubos na magpapahayag kan diosnon na kadonongan na hinohona kan halipot sa pagtanaw na katawohan na garo daing herak na pag-atraso . . . maboot na dinara kita nin Dios sa saiyang punto-de-vista asin inalok kita sa mamuraway na ngapit . . . asin sokol sa kaya niatong saboton asin tubodon iyan, kita makakahingalo asin makakapagogma dian kaiyan. Alagad mientras tanto, may pagkaherak na rinerepresko kan nagpapaogmang paglaom, may pagtiyaga na maghalat kita kan katapusan, gurano man kapagal an panahon nin paghalat.”

Asin maghahalat kita, na igwa kaining makosog na pagtubod: “Na iyan sierto nanggad na maootob. Dai iyan mahuhuri.”—Habakuk 2:3.

[Nota sa Ibaba]

[Kahon sa pahina 6]

ANO AN MAEENOT SA PAGSAGIBO NIN PAGHOKOM

An apostasya—2 TESALONICA 2:2, 3

An pagtatak kan 144,000—KAPAHAYAGAN 7:2, 3

An pagtipon kan “dakulang kadaklan” para sa kaligtasan—KAPAHAYAGAN 7:14

An paglataw kan Liga de Naciones asin dangan an Naciones Unidas—KAPAHAYAGAN 17:8

An pinal na paghampangan kan duwang darakulang bloke nin mga nasyon—DANIEL 11:40, 44, 45

An pan-globong pagkurahaw nin “Katoninongan asin katiwasayan”—1 TESALONICA 5:2, 3

[Ritrato sa pahina 7]

Ibinilang ni Pedro na kaligtasan an pagpasensya nin Dios, mantang si Jonas nagreklamo. Kiisay na halimbawa an saindong susonodon?