Karahayan ni Jehova sa “Huring Kabtang kan mga Aldaw”

“Madia kamo, banwaan, asin magtukad kita sa bukid ni Jehova.”—ISAIAS 2:3.

1, 2. (a) Anong grabeng peligro an nagbabanta ngonyan sa katawohan? (b) Ano an sinasabi kan mga lider kan kinaban dapit sa Armagedon?

“AN HURING KABTANG KAN MGA ALDAW.” Taano ta ginamit na paoro-otro sa hula kan Biblia an ekspresyon na ini? Nangangahulogan daw ini na an mga aldaw nin katawohan nabibilang na asin sa kahurihurihi an satong daga asin an gabos na nabubuhay dian malalaglag sa pan-globong pagkarumpag? An mga lider kan kinaban parateng nagtataram na may pagkatakot sa siring na posibilidad. Halimbawa, sa sarong intrebista sa telebisyon kan Enero 13, 1985, an ministrong panluwas kan Moscow na si Andrei Gromyko nagpatanid sa mga tawo kan Union Sobyet na “sarong grabeng peligro, grabeng banta na nagsasalikop sa bilog na katawohan.” Dagdag pa nia: “Dapat gibohon an lambang bagay na posible tanganing haleon an bantang iyan, tanganing an Armagedon na kinatatakotan nin mga tawo sa laog nin mga siglo dai mangyari.”

² Sa magkapirang okasyon, si Presidente Ronald Reagan kan Estados Unidos nagtaram man dapit sa Armagedon. An The New York Daily News kan Oktubre 30, 1983, nagkutar saiya sa pagsabi: “Nagigirumdoman ko an saindong suanoy na mga propeta sa Lumang Tipan asin an mga tanda na nagpapatanid nin Armagedon, pinapag-isip ako kun—kun kita an henerasyon na makakaheling kaiyan na mangyari.” Dai pa sana nahahaloy kan Pebrero 8, 1985, an The Wall Street Journal nagreport: “Si Presidente Reagan nagsasabi na sia nag-iisip asin nagtataram dapit sa Armagedon, . . . alagad dai sia nagpaplano para kaiyan.”

3. (a) Ano talaga an Armagedon? (b) Ano an boot sabihon kan “huring kabtang kan mga aldaw”?

³ Iyo, an mga lider kan kinaban nagsasabi dapit sa Armagedon. Alagad nasasabotan daw ninda an kahulogan kan tataramon na ini sa Biblia? Mangyaring dai, huli ta an Armagedon bakong gibong tawong pagkatunaw. Iyan pan-unibersal na iriwal nin Dios na sia asin an saiyang kaibang Hade, si Jesu-Cristo, maghohokom sa mga maraot na mga nasyon asin maraot na tawo. Maabot iyan sa pinakaultimo kan “huring kabtang kan mga aldaw.” (Daniel 10:14; Kapahayagan 16:14, 16) Asin ano an pakasabot niato sa “an huring kabtang kan mga aldaw”? An ibang mga salin ginamit an ekspresyon na ini bilang “ultimong parte kan mga aldaw,” “an nahuhuring poro kan mga aldaw.” (Rotherham, Young) An Hebreong mga tataramon na isinalin iyo an ’a·charithʹ hay·ya·mimʹ. Oyon sa Theological Dictionary of the Old Testament, parateng boot nindang sabihon na “An Katapusan na Panahon,” nagpapaheling bako sanang an ngapit kundi “kun paano magtatapos an kasaysayan, sa siring an kaaabtan.”

4. Paano an “Panahon na Katapusan” magpapadagos sa saiyang kulminasyon, asin ano an kaaabtan?

⁴ Mga 70 taon na, an katawohan nabubuhay na sa “katapusan kan sistema nin mga bagay,” na ihinula ni Jesus sa Mateo 24:3 25:46. An peryodong ini, nagpoon kan 1914, iyo an “Katapusan na Panahon” na dian kaiyan an mga pangyayari paoswag nang paoswag na nag-aabante sa saindang kulminasyon. Iyan iyo an “dakulang kahorasaan” kun an gabos na maraot na organisasyon ni Satanas laglagon na. (Mateo 24:21, 22) An pinakadakulang kaaabtan iyo an pagbindikar kan banal na ngaran ni Jehova.—Ezequiel 38:16, 23.

An Karahayan ni Jehova

5. Anong nagpapakosog na mga tataramon an makukua sa Osias 3:5?

⁵ Si Jehova sarong Dios nin pagdagka. Kanigoan kamakangangalas na nagpapakosog na mga ekspresyon an itinaltag nia sa bilog niang Tataramon, an Banal na Biblia! An saro kan mga tataramon na iyan makukua sa Osias 3:5, na mababasa: “Pakatapos an mga aki ni Israel mabaralik asin hahanapon si Jehova na saindang Dios, asin si David na saindang hade; asin sinda madorolok na may pagtakig ki Jehova asin sa saiyang karahayan sa huring kabtang kan mga aldaw.”

6. Paano napapalaen an espirituwal na Israel sa mga sekta nin Kakristianohan?

⁶ An natada kan Israel nagbalik hale sa pagkabihag sa Babilonya kan 537 B.C.E. tanganing ibalik an pagsamba ki Jehova sa Jerusalem. Kapareho sa modernong panahon, kan 1919 an linahidan na natada kan espirituwal na Israel ‘nagbalik hale’ sa pagkabihag sa organisasyon ni Satanas, na disididong ‘naghahanap sa saindang Dios na si Jehova.’ Talagang nalalaen sa apostatang sekta nin Kakristianohan! Mayo sa mga ini an nagmawot na midbidon si Jehova bilang “saindang Dios.” Imbes na “hanapon si Jehova,” linikayan ninda an ano man na paggamit kan saiyang ngaran.

7. Paano naoonra kan banwaan ni Jehova an saiyang ngaran?

⁷ Amay pa kan “huring kabtang kan mga aldaw,” an Enero 1, 1926, na luwas kan The Watch Tower nagpublikar kan mapan-angat na artikulo na “Who Will Honor Jehovah?” An tinipon giraray na mga natada kan espirituwal na Israel may kaimbodan na nagsimbag kan pangapodan, asin kan 1931 nag-ogma sindang akoon an ngaran na mga Saksi ni Jehova. (Isaias 43:10, 12) Sagkod sa aldaw na ini padagos nindang pinangangaptan an ngaran ni Jehova na may pagkabantog sa mga nag-eerok sa daga. Taano ta, kan 1984 nagpublikar sinda, paagi sa minilyon na mga kopya sa kadakol na mga tataramon, an nakakadagkang de kolor na brosyur na may titulong The Divine Name That Will Endure Forever.

8, 9. (a) Ano an boot sabihon kan ‘hanapon si David na saindang hade’? (b) Kasuarin asin saen an hade pinatindog? (c) Paano nasabotan kan banwaan ni Jehova an bagay na ini?

⁸ Minsan siring, si Osias naghula man na ining espirituwal na mga aki “mabuwelta asin siertong hahanapon . . . si David na saindang hade.” An makalaman na Israel nawaran nin hade poon kan agawon an Davidikong dinastiya kan 607 B.C.E. Dian nagpoon an 2,520 taon nin daing dios na pagsakop—“an itinalaan na mga panahon kan mga nasyon,” o Panahon nin mga Hentil. (Lucas 21:24; Daniel 4:16) Alagad kan 1914, mantang “an huring kabtang kan mga aldaw” nagpoon, ipinatindog nin Dios an Saro na ilinadawan ni David—si Jesu-Cristo—bilang Hade kan Sion, an “langitnon na Jerusalem.”—Hebreo 12:22; Salmo 2:6.

⁹ An banwaan nin Dios digdi sa daga dai tolos-tolos nasabotan an gabos na ini. Minsan siring, an saindang paghanap ki ‘David na satong hade’ nakua kan an The Watch Tower kan Marso 1, 1925, nagpublikar kan artikulong “Birth of the Nation.” Ini nagtao nin konklusibong pruweba, basado sa Kapahayagan kapitulo 12, na an Mesiyanikong Kahadean nin Dios namundag na sa kalangitan kan 1914 asin na an Cristo ngonyan ‘naghahade na sa tahaw kan saiyang mga kaiwal.’—Salmo 110:1, 2, King James Version; 2:1-6.

10. (a) Siisay an “nagdolok na nagtatakig ki Jehova,” asin paano? (b) Taano ta “an pagkatakot ki Jehova” importanteng gayo ngonyan?

¹⁰ An linahidan na natatada, asin siyempre an gabos na naggibo nin dedikasyon ki Jehova, biyong maingat sa saindang mga kasalan kan enot na panahon. May kapakumbabaan, sinda “nagdorolok na may pagtakig ki Jehova,” na naghahagad nin kapatawadan para sa saindang mga nakaaging kasalan. Asin ngonyan bilang “an huring kabtang kan mga aldaw” nagpapadagos sa saiyang kulminasyon, an mga namomoot ki Jehova may pag-ingat na nagbababntay nin orog na dai sinda makalapas tumang ki Jehova asin sa saiyang matanos na mga pagboot. Magpadagos kitang “dumolok na may pagtakig ki Jehova,” na linalanog an satong mga hawak, tanganing makua niato an kaligtasan pasiring sa Bagong Areglo nin Dios. (1 Corinto 9:27) Danay niatong girumdomon na “an pagkatakot ki Jehova iyo an kapinonan nin kadonongan.”—Salmo 111:10.

11. (a) Sa anong mga lado si Jehova marahay? (b) Taano ta dapat na ‘dumulok kitang nagtatakig sa karahayan ni Jehova’?

¹¹ Sa siring, paano, kita “madolok na may pagtakig . . . sa saiyang karahayan”? Si Jehova sa gabos na bagay marahay. Sia iyo an kabilogan kan moral na ekselensiya. Kompleto sia sa pagtao kan lambang pangangaipo niato. Kaya, may pagtiwala na makakapagsabi kita siring ki David: “Si Jehova an sakuyang Pastor. Dai ako magkukulang nin ano man . . . Sierto na an karahayan asin pagkaherak magdadanay sa sako sa gabos na aldaw nin sakuyamg pagkabuhay.” (Salmo 23:1-6) Ngonyan, asin sagkod sa katapusan kan “huring kabtang kan mga aldaw,” kita dapat ‘dumolok na may pagtakig sa karahayan ni Jehova,’ may pagsarig na an satong mga kasalan matatahoban kan mahalagang atang kan saiyang Aki, si Jesus. (1 Juan 2:1, 2) May pagpasalamat, magpahayag kita: “O Jehova, . . . kanigoan kadakula kan saimong karahayan na inandam mo sa mga natatakot sa saimo!”—Salmo 31:17, 19.

12. (a) Paano niato aarogon an karahayan ni Jehova? (b) Taano ta importante na gibohon niato an siring?

¹² Mantang an kinaban ni Satanas pairarom nang pairarom sa laboy nin karatan, arogon logod niato an karahayan ni Jehova paagi sa pagrukyaw sa satuyang mga kataraed kan maogmang bareta nin Kahadean asin pagpaheling nin diosnon na mga kuwalidad sa sadiri niatong mga buhay. Tunay logod na kultibaron an mga bunga kan espiritu, kaiba an karahayan, sa gabos niatong mga kairiba—sa satong mga pamilya, sa satong mga kongregasyon, asin sa gabos na nanonompongan niatong mga tawo sa kinaban. (Galacia 5:22, 23; Salmo 119:65-68) An paggibo kaini importante kun boot niatong maligtas na buhay “sa huring kabtang kan mga aldaw.”

Sadol nin Patriarka

13. (a) Siisay ngonyan an puwedeng makinabang sa paghorophorop kan hula ni Jacob sa higdaan nin kagadanan? (b) Anong sadol an linalaman kan hulang iyan?

¹³ Haros 3,700 nang taon an nakaagi, an patriarkang si Jacob (inapod man Israel) nagtao nin hula kan madale na siang magadan. Kinaolay an saiyang 12 mga aki, an mga payo kan tribo ni Israel, sia nagsabi: “Pagtiripon kamo nin sararo tanganing ikasabi ko saindo kun ano an mangyayari sa saindo sa huring kabtang kan mga aldaw.” An saiyang mga tataramon minaaplikar ngonyan sa mga natatada kan espirituwal na Israel asin sa paghiras sa saindang mga kairiba, an “ibang mga karnero.” Mayo sa mga ini an igwa nin libertad na basangbasangon an moral na mga pamantayan ni Jehova, siring sa ginibo ni Ruben, ni na tawan nin lugar para sa maringis na paghiro siring kan ki Simeon asin Levi. Imbes, dapat nindang kultibaron an mga kuwalidad siring kan kapusoan, pagsarig ki Jehova, asin pagkamabunga, siring sa ipinaheling kan ibang mga aki ni Israel.—Genesis 49:1, 3-7, 9, 18, 22; Juan 10:16; ikomparar an 2 Pedro 1:8-11.a

14. Anong duwang magkaagid na mga hula sa “Katapusan na Panahon” na nagtatao nin sadol partikularmente para sa “ibang mga karnero”?

¹⁴ Minsan siring, an partikular na sadol itinao para sa “ibang mga karnero” na igwa kan paglaom na maligtas na buhay sa “Katapusan na Panahon.” Maheheling niato ining sinabi, siring sa pagdodoon, sa duwang magka-agid na mga hula sa Biblia, sa Isaias 2:2-5 asin Miqueas 4:1-5.

Maturukad sa Harong nin Dios

15. (a) Paano an Isaias 2:2 naotob? (b) Anong pagkakalaen an naheheling ngonyan kan mga mahoyo, asin paano sinda minasimbag?

¹⁵ An Isaias 2:2 mababasa: “Asin mangyayari sa huring kabtang kan mga aldaw na an bukid kan harong ni Jehova magigin marigon sa ibabaw kan alitoktok kan kabukidan, asin iyan ilalangkaw nanggad sa ibabaw kan mga bolod; asin an gabos na mga nasyon maturukad pasiring dian.” Sa laog nin labing 50 taon, poon 1935, ining mga “makawiliwiling mga bagay kan gabos na nasyon” tinitiripon na sa harong ni Jehova nin pagsamba, ‘pinapano an harong na iyan nin kamurawayan.’ An ‘pagbolos’ na ini minalataw na nagoorog mantang “an huring kabtang kan mga aldaw” parani nang parani sa saiyang kulminasyon. An simbolikong bukid ni Jehova nin tunay na pagsamba magigin orog kaprominente, tanganing an mga matanos makaheling kun paano nalalaen sa mga sektaryanong “mga bolod” asin “mga bukid” kan konsintidor na kinaban ni Satanas. Sinda “minaluwas” sa palsong relihiyon asin minadulag pasiring sa nagdadakol na bukid ni Jehova nin pagsamba.—Hageo 2:7; Kapahayagan 18:2, 4, 5; Salmo 37:10, 11.

16. (a) Ano ngonyan an ikakasimbag kan mga mahoyo? (b) Paano inootob ni Jehova an saiyang panuga na “parikason iyan”?

¹⁶ Nagsimbag an mga mahoyong ini sa pangapodan kan Isaias 2:3: “‘Madia kamo, banwaan, asin magtukad kita sa bukid ni Jehova, sa harong kan Dios ni Jacob; asin totokdoan nia kita dapit sa saiyang mga dalan, asin kita maglalakaw sa saiyang mga dana.’ Huli ta hale sa Sion maluwas an pagboot, asin an tataramon ni Jehova hale sa Jerusalem.” Iyo na, inootob na ni Jehova an saiyang panuga na “parikason iyan sa mismong kapanahonan kaiyan.” (Isaias 60:22) An nagdadakol na “dakulang kadaklan . . . hale sa gabos na mga nasyon” nagtitiripon sa pagsamba ki Jehova. Sa mga ini 138,540 an nabautismohan kan 1982; 161,896 kan 1983; asin 179,421 kan 1984. Boot nindang maligtas sa “huring kabtang kan mga aldaw.”—Kapahayagan 7:9, 14.

17. (a) Paano puwedeng ipaheling nin mga bagong Saksi an saindang apresasyon para sa karahayan ni Jehova? (b) Anong positibong mga pagboot an kaipuhan na sunodon niato gabos?

¹⁷ An mga bagong Saksi na ini nag-aapresyar sa karahayan ni Jehova sa pagdara sainda sa liwanag kan katotoohan, asin sinda disididong nagmamawot na ipaheling an karahayan sa iba. Bukas-palad na inaako ninda an mga instruksyon na itinatao ni Jehova paagi sa saiyang Tataramon asin saiyang organisasyon. An Pagboot ni Moises na naglaman kan kadakol na ‘mga dai gibohon,’ asin kaipuhan maingat na sundon ini kan Israel. (Helingon an Exodo 20:3-17.) Alagad an duwang darakulang mga togon para sa mga Kristiano, siring sa sinabi ni Jesus, mga positibong togon na ‘mamotan si Jehova na satong Dios sa bilog niatong puso, kalag, isip, asin kosog, asin an satong mga kataed siring sa sato man sana.’ (Marcos 12:29-31) May pagkasararo, an mga Saksi ni Jehova ngonyan nagsosonod kan “pagboot” na ipinadara ni Jehova hale sa “langitnon na Jerusalem,” na inaaplikar an matanos na mga prinsipyo kaiyan.

18. (a) Anong klaseng mga kapagbotan an kaipuhan niatong otobon? (b) Anong bentaha igwa sa pagsonod nin marahay na mga pagboot?

¹⁸ Minsan siring, dai ini nangangahulogan, na an banwaan ni Jehova dai na kaipuhan na sumonod sa ano man na pagboot. An apostol Pablo nagpagirumdom sato: “Mangyari logod na an gabos na bagay na may pagkadisente asin oyon sa areglo.” (1 Corinto 14:40, NW Ref. Bi., footnote) An nagkapirang mga pagboot tibaad kaipuhan sa satong mga Kingdom Hall, halimbawa, tanganing maka-ekonomiya sa koryente o likayan na an mga saradit na aki gamiton an harong nin Dios nin pagsamba bilang lugar nin kawatan pakatapos nin pagtiripon. An mga ama nin pamilya tibaad kaipuhan gumibo nin mga areglo, siring kan pagkaigwa nin regular na pagkonsiderar kan pan-aroaldaw na teksto sa Biblia sa harong. Sa mga pamilyang Bethel igwa nin mga pagboot, siring kan kahagadan na an lambang miembro kan pamilya irepresentar an maogmang bareta paagi sa mabining gubing asin pagsulot. (1 Timoteo 2:9) An “mga balumbon” na bubuksan sa sangribong taon na pagsakop ni Jesus mayong duda na maglalaman nin mga pagboot na pakikinabangan nin katawohan. Marahay kun ngonyan magin tood na sa pagsonod sa nagpapakosog na mga pagboot na ginibo tanganing magin areglado asin magin makonsiderasyon sa iba.—Kapahayagan 20:12; 1 Corinto 10:24; Filipos 2:3, 4.

Digdi sa Kinaban nin Kadahasan

19, 20. (a) Paano naghiro an banwaan ni Jehova sa prinsipyo kan Miqueas 4:3? (b) Paano ini panakikinabangan ninda “sa huring kabtang kan mga aldaw”?

¹⁹ Marikas kitang nagdadangadang sa panahon na an kamot nin lambang saro “matindog na tumang sa kamot kan saiyang kataed.” (Zacarias 14:13) Mantang an kinaban orog na nagigin madahas asin dai masakopan, paano daw minahiro an banwaan ni Jehova? Sinda minahiro na kaoyon kan Miqueas 4:3, na nagsasabi: “Asin dadaragopdopon ninda an saindang mga minasbad na magin mga tarom nin mga arado asin an saindang mga budyak na magin mga sanggot.” Pinapaindahan kan mga Saksi ni Jehova an lambang porma nin kadahasan. “Ni na mag-aadal pa man sinda sa pakilaban.” Mayong duadua, ini magpapadagos na gibohon sa saindang ikakarahay sagkod sa “huring kabtang kan mga aldaw.” Pinakinabangan na ini.

²⁰ Halimbawa, kan an Hulyo 15, 1983, an magasin na Watchtower nagsabi na an mga badil bakong para sa mga Kristiano, an mga Saksi ni Jehova sa New Caledonia hinale an saindang mga armas. Dai naghaloy an lokal na grupo nin politika naglibot na naghalungkat sa sarong banwaan, sinosolo an mga harong na nakukuahan nin mga armas. Alagad mayong harong nin Saksi an linaglag. An pagigin midbid sa pagka-neutral parate iyo sana an pinakamarahay na depensa siring sa napatunayan sa Northern Ireland, Lebanon, Zimbabwe, asin iba pang mga daga.

21. (a) Anong pangapodan an kaipuhan niatong simbagon, asin anong desisyon an dapat niatong gibohon kun boot niatong tunay na magin maogma? (b) Paano kita sisiseguro sa pakikabtang sa karahayan ni Jehova?

²¹ Maogma kita kun simbagon niato an pangapodan kan Isaias 2:5: “Madia kamo asin ta malakaw kita sa liwanag ni Jehova”! Maogma, an gabos sa sato, na nakiiba sa posog na panindogan kan propetang si Miqueas na, pakatapos na sabihon an arog-paraisong siguridad asin katoninongan na yaon sa tahaw kan banwaan nin Dios, nagpadagos na magsabi: “An gabos na banwaan, sa sainda man sana, maglalakaw an lambang saro sa ngaran kan saiyang dios; alagad kita, sa satong kabtang, maglalakaw sa ngaran ni Jehova na satuyang Dios sagkod noarin pa man, nin daing sagkod.” Sierto an karahayan ni Jehova ipapamate sato gabos na nagpapadagos na sararo na may katoninongan sa tunay na pagsamba, para sa pagkaligtas para sa “huring kabtang kan mga aldaw.”

[Nota sa Ibaba]

Mga Hapot Bilang Sumaryo

◻ Ano an boot sabihon kan “huring kabtang kan mga aldaw”?

◻ Paano kita ‘madolok na nagtatakig ki Jehova asin sa saiyang karahayan’?

◻ Anong itinataong giya kan hula ni Juda sa saiyang higdaan nin kagadanan?

◻ Anong positibong mga lakdang an susundon niato bilang kaoyon sa Isaias 2:2-5 asin Miqueas 4:1-5?