‘Dumalagan sa Paagi na Kamtan Nindo an Premyo’
Dai kamo nakakaaram na sa gabos na nagdadalagan sa paorombasan, saro sana an minaako kan premyo? Dumalagan kamo sa paagi na kamtan nindo iyan.”—1 CORINTO 9:24.
1, 2. (a) Ano an magigin dakulang trahedya para sa mga Kristiano ngonyan? (b) Anong sadol an itinao ni Pablo sa 1 Corinto 9:24, asin paano iyan nag-aplikar sa mga Kristiano sa Corinto?
IYO na idto kutana an pinaka-kapangganahan nin 12 taon na mapagal na pag-aandam. Alagad labi pa sanang kabangaan kan paorombasan, an hoben na parakawat biglang napukan, biglang natapos an saiyang pangatorogan sa sarong medalyang bulawan sa Olimpiyada. An prensa inapod an saiyang pagkapukan na “trahedya.”
2 Minsan siring, orog pang makamomondo, iyo an pagkasudya nin sarong saksi ni Jehova na matapos an paorombasan pasiring sa buhay, lalo na sa ipinanugang Bagong Areglo na haranihon na! (2 Pedro 3:13) Angay nanggad na, si Pablo nagsabi: “Dai kamo nakakaaram na sa gabos na nagdadalagan sa paorombasan, saro sana an minaako kan premyo? Dumalagan kamo sa paagi na kamtan nindo iyan.” (1 Corinto 9:24) An nagkapira sa suanoy na Corinto namemeligro sa pagkadaog huli ta may pagkamakasadiring nagpapaoyon, maski nabubugtak sa peligro an ‘pagkalugad kan konsensiya’ nin iba. (1 Corinto 8:1-4, 10-12) An kapangganhan sa paorombasan, minsan siring, minaimbuwelto nin sakripisyo, huli ta si Pablo nagsabi: “An lambang nakikipagdaogan sa karawat mapagpogol sa sadiri . . . Huli ta linalanog ko an sakong hawak asin inooripon iyan, tanganing, pagkatapos na ako makapaghulit sa iba, ako mismo dai isikwal minsan sa ano man na paagi.”—1 Corinto 9:25-27.
3. (a) Anong mga kamugtakan an naglataw sa Colosas na puwedeng nagpogol sa mga Kristiano duman na matapos an paorombasan? (b) Kaipuhan daw para sa mga Kristiano sa Colosas na mag-adal nin pilosopiya asin mistisismo?
3 Dangan, sa pagsurat sa mga taga-Colosas, si Pablo nagpatanid nin saro pang posibleng peligro—an siisay man na ‘haleon sa saindo an premyo’ nin buhay. (Colosas 2:18) Kaya paano daw an mga Kristiano ‘madalagan sa paagi na makamtan iyan’? Nagsuhirir daw an apostol na sinda mag-adal nin pilosopiya asin mistisismo tanganing makipagdebate nin may kapangganahan sa palsong mga paratokdo? Dai, huli ta an mga Kristiano nagadan dapit sa mga ‘enot na mga katokdoan nin kinaban’ asin biyo nang binayaan an mga pilosopiya asin an mga tradisyon kaiyan.—Colosas 2:20.
4. Paano an pagkua nin “tamang kaaraman” matabang sa mga Kristiano sa Colosas?
4 Kun siring, si Pablo, dinagka an saiyang kapuwa mga nagtutubod na itorohok an saindang mga paghihingoa sa pagigin “pano nin tamang kaaraman [nin Dios] na sa gabos na kadonongan asin espirituwal na pakasabot.” Iyo, “an tamang kaaraman”—bakong daing kamugtakan na mga espikulasyon—na matabang sainda “na maglakaw nin angay ki Jehova sagkod sa katapusan na biyong nakakapaoyon sa saiya.” (Colosas 1:9, 10; helingon man an Colosas 3:10.) Totoo, kadaklan sa mga Kristiano sa Colosas tibaad kayang isaysay an pangenot na mga katokdoan sa Kasuratan. Alagad paagi sa pag-aadal asin paghorophorop, kaipuhan pa nindang lumihis sa mga enot na bagay asin magin posog na “marigon sa pundasyon” kan Cristo. (Colosas 1:23; 1 Corinto 3:11) Pakakua kan siring na kararoman, ‘dai nin siisay man na makakadaya saindo sa mga tataramon na makakabihag.’ (Colosas 2:4) Paagi sa ekspertong paggamit kan Tataramon nin Dios, epektibong masisimbag ninda an mga paghingako nin siisay man na parasamba sa anghel o Judaista.—Deuteronomeo 6:13; Jeremias 31:31-34.
5. (a) Magtao nin nagkapirang halimbawa nin “hararom na mga bagay” na an sarong maygurang na Kristiano kaipuhan maaraman asin masabotan. (b) Paanong an sarong eksperiyensia nin tugang na babae nagpapaheling kan peligro nin dai pagkua nin “tamang kaaraman”?
5 Kamo daw, nakalihis na “sa elementaryang mga doktrina” asin nakarorop na sa “hararom na mga bagay nin Dios”? (Hebreo 6:1; 1 Corinto 2:10) Halimbawa, ikakapaliwanag daw nindo an mabangis na mga hayop kan Kapahayagan o ikakapaliwanag kun ano an espirituwal na templo? (Kapahayagan, kapitulo 13; Hebreo 9:11) Ikakapaliwanag na daw nindo an Makakasuratan na basihan para sa modernong aldaw na organisasyon kan mga Saksi ni Jehova? Posog daw kamong nakagamot sa mga doktrina kan Biblia? An sarong Kristianong babae nanompongan na depisil sa saiya na ipagdepensa an saiyang mga pagtubod mantang nakipag-olay sia sa sarong babae dapit sa Trinidad. Dangan, an babae tinawan an satong tugang na babae nin babasahon na nagpapakaraot sa organisasyon ni Jehova. “Napaluya ako nanggad sa espirituwal,” sabi kan Saksing ini. Alagad may kaogmahan na an sarong magurang ipinahayag an palsong mga paghihingako kan paratumang na ini asin naibalik an pagtubod kan tugang na babae. (Judas 22, 23) “Ngonyan nasasabotan ko na,” sabi nia, “kun taano ta an Sosyedad danay na nagsasabing mamibi, mag-adal, asin maghorophorop.”
“Pagtakig sa mga Tawo”
6. (a) Ano an napatunayan na singkogan nin nagkapirang mga lingkod nin Dios? Magtao nin nagkapirang mga halimbawa sa Biblia. (b) Ano an parateng dahelan nin pagkatakot sa tawo?
6 “An Pagtakig sa tawo sarong siod,” patanid kan sarong madonong. (Talinhaga 29:25) Asin kun beses an grabeng “pagkatakot sa kagadanan” o an dai maninigong pagmawot na akoon nin iba nagtutulod sa sarong tawo sa siod na ini. (Hebreo 2:14, 15) Si Elias, na nagsosolo, daing takot na tinumang an mga parasamba ki Baal. Alagad kan ipagboot ni Reyna Jezebel an saiyang kagadanan, “sia natakot . . . asin naghimo sa pagligtas kan saiyang buhay asin uminabot sa Ber-seeba.” (1 Hade 19:1-3) Kan bangging dakopon si Jesus, si apostol Pedro siring man nagpaheling nin siring na pagkatakot sa tawo. Maski si Pedro nangahas, “Kagurangnan, ako andam sa pagdamay saimo sa bilanggoan asin sa kagadanan,” kan itokdo sia bilang saro kan mga disipulo ni Cristo, “nagpoon sia na magmuda asin na magsumpa: ‘Dai ko namimidbid an tawong iyan!’”—Lucas 22:33; Mateo 26:74.
7. (a) Kapareho nanggad, ano an tunay na rason kun taano an nagkapira sa Colosas ta pinagsalak an Kristianidad sa Judaismo? (b) Siisay ngonyan an minalataw na napapahiro nin siring?
7 An grabeng pagmawot na akoon parateng iyo an nagin pinakarason kun taano an nagkapira ta naghingoang pagsalakon an Kristianidad sa Judaismo. Kan an mga Judaista maglataw sa Galacia, ibinuyagyag ni Pablo an saindang pagsaginsagin, sa pagsabi: “An gabos na nagmamawot na makapaheling nin marahay na itsura sa laman sinda an nagpipirit saindo na magpaturi kamo, tangani sanang dai sinda paglamagon.” (Galacia 6:12) Puwede daw an siring na pagmawot tanganing akoon nin kadaklan an nagpahiro man sa nagkapira na sa dai pa sana nahahaloy nagbaya sa organisasyon ni Jehova?
8, 9. (a) Paano puwedeng an sarong Kristiano ngonyan magpaheling nin pagkatakot sa tawo? (b) Paano madadaog an pagkatakot na ini?
8 Kaipuhan hingoahon na daogon an siring na mga pagkatakot nin mga Kristiano. Kun negatibo kamo na maghulit sa mga teritoryo na harani sa saindong harong, o minaatras kamo sa pagpatotoo sa saindong mga paryentes, mga katrabaho, o mga kaeskuwela, girumdomon an hapot na ihinapot ni Jehova sa Isaias 51:12: “Siisay ka tanganing magkaigwa ka nin katakotan sa tawo na magagadanon, asin sa aki nin tawo na ibibilang sana sa berdeng doot?” (Ikomparar an Mateo 10:28.) Paggirumdomon an saindong sadiri na “an siisay man na nanarig ki Jehova iingatan.” (Talinhaga 29:25) Si Pedro nadaog an saiyang takot sa tawo, na kaidto nagadan bilang sarong martir. (Juan 21:18, 19) Asin kadakol na mga tugang ngonyan an nagpapaheling nin siring na kaisogan.
9 An sarong misionaryo na naglilingkod sa sarong nasyon na ipinagbabawal an paghuhulit nagsabi: “Kaipuhan an pagtubod tanganing mag-atender sa pagtiripon o sa paglilingkod, sa pakaaram na posibleng dakopon ka nin pulis.” Alagad arog kan salmista an mga tugang nagsabi: “Si Jehova nasa kampi ko; dai ako matatakot. Ano an magigibo sako nin daganon na tawo?” (Salmo 118:6) Asin an trabaho sa nasyon na iyan nagsopay, dai pa sana nahaloy nakakua nin legal na pagmidbid. An regular na pakikabtang sa paglilingkod sa langtad siguradong matabang saindo na mahaman an parehong pagsarig ki Jehova.
Bogkos nin Pamilya
10. (a) Anong emosyonal na pangangaipo an pankagabsan, asin paano iyan naootob? (b) Magtao nin mga halimbawa sa Biblia nin mga tawo na an pagkadayupot sa saindang mga agom nagin mas makosog sa saindang relasyon ki Jehova.
10 Sarong libro na may titulong The Individual, Marriage, and the Family nagsasabi: “Sarong pankagabsan na pangangaipo nin indibiduwal sa gabos na sosyedad asin sa gabos na kadugtong nin sosyedad iyo an pangangaipo na ‘mapabilang’ asin magkaigwa nin sarong importanteng tawo na ‘mapapabilang’ saiya.” An pangangaipong ini parate na naootob paagi sa areglo nin pagpamilya, sarong institusyon ni Jehova. (Efeso 3:14, 15) Minsan ngani, si Satanas, inaabuso an bogkos na namamatean niato sa mga miembro kan pamilya. An makosog na pagkamoot ni Adan sa saiyang agom risang nagpahiro sa saiya na dai mangnohon an mga pangyayari asin inibanan sia sa saiyang rebelyon. (1 Timoteo 2:14) Asin kumusta naman si Salomon? Sa ibong kan saiyang midbid na kadonongan, “kan panahon na si Salomon gumurang, an saiyang mga agom mismo pinakiling an saiyang puso tanganing sumonod sa ibang mga dios; asin an saiyang puso dai nagin sangkap ki Jehova na saiyang Dios . . . Asin si Salomon guminibo kan maraot sa mga mata ni Jehova.”—1 Hade 11:4-6.
11. Paano si Eli ‘guminalang sa saiyang mga aki nin orog kisa ki Jehova’?
11 Nagigirumdoman daw nindo an gurang nang si Eli, sarong halangkaw na saserdote kan Israel? An saiyang mga aking lalaki na si Opni asin Pinehas “mga daing kamanungadanan na mga lalaki” na “dai nag-ako ki Jehova.” Nagpaheling sinda nin mapangahas na dai pagpahalaga para sa mga dolot ki Jehova asin nagsagibo nin seksuwal na inmoralidad “sa mga babae na naglilingkod sa pintoan kan tolda nin tiriponan.” Alagad si Eli nagsagwe paagi kan pinakamaboot na tataramon (Taano ta ginigibo nindo an mga bagay na ini?”), mantang mayo nin ginibong paghihingoa na haleon sinda sa saindang pribilehiyong namumugtakan. Bilang epekto, sia ‘nagagalang sa saiyang mga aki nin orog ki Jehova,’ na nagbunga kan saiyang—asin kan saindang—kagadanan!—1 Samuel 2:12-17, 22, 23, 29-34; 4:18.
12. (a) Anong patanid an itinao ni Jesus dapit sa bogkos nin pamilya? (b) Anong makakinaban na pagrason an tibaad dagoson nin nagkapira kun dapit sa mga paryentes, alagad iyan daw tama sa Kasuratan?
12 An bako tamang mga kaimbodan puwede, kun siring, makaolang sa saindong pagdalagan pasiring sa buhay. Sinabihan ni Jesus an saiyang mga disipulo: “An namomoot sa ama o ina nin orog kisa sako bakong maninigo sa sako; asin an namomoot sa aking lalaki o aking babae nin orog kisa sako bakong maninigo sa sako.” (Mateo 10:37; Lucas 14:26) Alagad ano kun an sarong namomootan sa buhay nagbaya sa katotoohan o natiwalag? Makikiiba daw kamo sa kasabihan kan kinaban na “an dugo mas magabat kisa tubig” asin sunodon an paryentes na iyan sa kalaglagan? O kamo daw magsasarig sa mga tataramon kan Salmo 27:10: “Kun bayaan ako kan sakuyang ama asin kan sakong ina, si Jehova mismo an maampon sa sako”?
13. Paano pinatunayan kan mga aki ni Kore an saindang kaimbodan ki Jehova, asin paano sinda binendisyonan para kaini?
13 An mga aki ni Kore nagkaigwa kan siring na pagtubod. An saindang ama nangenot sa rebelyon tumang sa mga autoridad ni Moises asin Aaron. Minsan siring, si Jehova, dramatikong pinatunayan na tinatabangan nia si Moises asin Aaron paagi sa paggadan nia ki Kore asin an mga kaibang nagtumang. Alagad “an mga aki ni Kore dai nagadan.” (Bilang 16:1-3, 28-32; 26:9-11) Maheheling na nagsayuma sindang makiiba sa rebelyon kan saindang ama, asin binendisyonan sinda ni Jehova paagi sa pagpadanay sa saindang buhay. An mga gikan ninda kan huri nagkapribilehiyo na magsurat sa kabtang kan Biblia!—Helingon an mga superskripsyon kan Salmo 42, 44-49, 84, 85, 87, 88.
14. Anong eksperiyensia an naglaladawan kan bendisyon na bunga sa pagbugtak nin enot sa kaimbodan ki Jehova nin pangenot sa kaimbodan sa mga paryentes?
14 Siring man an kaimbodan ngonyan magbubunga nin mga bendisyon. Nagigirumdoman nin sarong Saksi an saiyang panindogan asin an saiyang mga tugang na lalaki kan an saindang ina, haloy nang inaktibo bilang sarong Kristiano, nakipagsambayan. “Isinumbong niamo an mga bagay-bagay sa kamagurangan,” sia nagsabi, “asin mantang dai sia nag-iistar sa harong, nagdesisyon kami na limitaran an paki-asosyar sa saiya sagkod na an kamagurangan dai asikasohon an mga bagay-bagay. Iyo iyan an pinakamagabat na bagay na kaipuhan niamong gibohon.” An ina nagprotesta, “Mas mahalaga pa sa saindo an buhay na daing sagkod kisa sako?” Digdi sinda nagsimbag, “An samong relasyon ki Jehova orog kahalaga sa ano pa man.” An babae nabigla sagkod na sia nagpaheling nin sinserong pagsolsol, espirituwal na nakabalik, asin naglilingkod giraray ngonyan bilang aktibong parahayag kan maogmang bareta.
15. (a) Paano tinogotan nin nagkapirang mga magurang an saindang sadiring mga aki na magin singkogan? (b) Paano puwedeng matabangan nin magurang an saiya man sana asin an saiyang mga aki na magkamit nin buhay?
15 An nagkapira tinogotan an saindang sadiring mga aki na magin mga singkogan. Napabayaan na midbidon na “an kakablasan nagagakot sa puso nin” mga hagbayon, an nagkapirang mga magurang pinabayaan an saindang mga aki na makiasosyar nin dayupot sa mga kinabanon, mag-atender nin dai maninigong sosyal na mga pagtiripon, asin makipag-date mantang dai pa maninigo sa pag-agom. (Talinhaga 22:15) Ano an parateng mamondong mga pangyayari nin siring na pagkakonsintidor? Espirituwal na pagkalaglag. (1 Timoteo 1:19) An nagkapira orog pa nganing pinapadakula an sala paagi sa salang pagtahob kan mga salang ginibo kan saindang mga aki! (Talinhaga 3:32; 28:13) Minsan siring, paagi sa maimbod na pangapot sa prinsipyo kan Biblia, an sarong magurang minatabang kapuwa sa saiya mismo asin sa saiyang mga aki na kamtan an premyo nin buhay.—1 Timoteo 4:16.
An Saindong mga Kaamigo—“Madonong” o “Mangmang”?
16. (a) Paano puwedeng an satong mga kaamigo magin makosog na impluwensia? (b) Siisay partikularmente an malumoy sa impluwensia nin mga kaamigo, asin taano?
16 An librong Sociology: Human Society nagsasabi: “An pagmawot na pahalagahan kan dayupot na mga kaamigo nagbubugtak nin makosog na pagtulod para sa pagkompromiso kan saindang mga pamantayan.” An librong Adolescence nagpapaheling na an mga hobenes partikularmente malomoy sa siring na mga puwersa. Iyan nagsasabi: “[Ini huli] kan mga pagbabago na saindang inaagihan sa saindang mga hawak, an mga paghonahona sa sadiri, asin pakipag-ibahan sa saindang mga pamilya. Bilang resulta, an mga tin-edyer parateng nagpopoon na gamiton an dakol na panahon kaiba kan saindang mga amigo asin dikit sa saindang mga pamilya.”
17. (a) Iilustrar an katunayan kan mga tataramon sa Talinhaga 13:20. (b) Anong klaseng mga kaamigo an ikakabilang na “madonong”? (c) Paano puwedeng an mga hobenes ngonyan masusunod an halimbawa kan hoben na si Samuel?
17 Dai dapat kalingawan an mga tataramon kan Talinhaga 13:20: “Sia na naglalakaw na kaiba nin mga madonong magigin madonong, alagad sia na nakikiiba sa mga mangmang maraot an aabotan.” Sarong Kristianong daragita an nagsabi: “An gabos na pag-iriba sa sakong eskuwelahan tunay na minapoon nang nakakaapektar sako. Mapapataram ako nin muda sa eskuwelahan ngonyan . . . haros nasabi ko na iyan, alagad dai.” Makamomondo, an nagkapirang Kristianong hobenes nadara sa mga seryosong salang gawe kan inaapod na mga amigo. Alagad kun ika sarong hoben na nagmamawot na kamtan an premyo, humanap nin madonong na mga kaamigo—an mga mapag-isip sa espirituwal, tanos sa saindang gawe, nakakapagpakosog sa saindang pananaram. Girumdomon, an hoben na si Samuel dai nakiiba sa maraot na mga aki ni Eli. Nagdanay siang sibot, na “naglilingkod ki Jehova,” kun siring nagdanay na dai nadigtaan kan saindang karatan.—1 Samuel 3:1.
Kamtan an Premyo!
18. (a) Paano puwedeng an nagkapirang mga tugang, tibaad bakong mataktika, na olangon kita sa satong pagdalagan para sa buhay? (b) Ano an makakapagprotihir sato sa siring na dai nakapagpapakosog na mga impluwensia?
18 Mag-ingat, kun siring, kun an siisay man haleon saindo an premyo nin buhay. Digdi, siyempre, dai boot sabihon na pagsususpetsahan nindo an saindong mga tugang. Kun beses, minsan ngani bakong mataktika, an nagkapirang mga tugang tibaad makapagsabi nin mga bagay na nakakapagpaluya sa saindo. (‘Taano ta iginigiit mo an saimong sadiri? Sa paghona mo ika sana daw an magkakamit nin buhay?’) Tibaad pa ngani may kapaitan na husgaran an saimong sinserong mga paghihingoa. (‘Aber kun paano ka makakapagpayunir na igwa nin pamilya. Herak man kan saimong mga aki.’) Minsan siring, girumdomon na isinikwal ni Jesus an pagsadol ni Pedro na ‘dai magin disidido.’ (Mateo 16:22, 23) Gamiton an saindong pinatood nin Biblia na mga talinga na “baloon an mga tataramon,” asin dai maimpluwensiyahan kan mga bakong tama. (Job 12:11) Girumdomon na si Pablo nagsabi: “Kun an siisay man na nakikipagdaogan sa karawat, dai sia kinokoronahan kun dai sia nakipagdaogan nin sono sa mga pagsosondon.” (2 Timoteo 2:5) Iyo, an Dios “nagsasakop”—sa makakasuratan na mga opinyon—kaipuhan maggiya sa saindong kaisipan.—Ikomparar an 1 Corinto 4:3, 4.
19, 20. (a) Paano an mga tugang ni Jose huminiro sa ikakaraot nia, asin paano si Jose nagsimbag sa saindang karingisan? (b) Paano niato malilikayan an pagkasingkog sa bakong sangkap na mga tawo? (c) Ano an dapat niatong magin desisyon dapit sa premyo, asin taano?
19 Totoo, kun beses an kapuwa Kristiano tibaad ‘malugadan’ kamo nin nagkapirang daing kahulogan na mga tataramon. (Talinhaga 12:18) Dai nindo togotan ini na papondohon kamo sa paorombasan para sa buhay! Girumdomon si Jose. An saiyang sadiring mga tugang nagplano na gadanon sia, asin maski ngani dai nadagos, ipinabakal sia ninda sa maringis na pagkaoripon. Minsan siring, si Jose, dai ini tinogotan na magpapait sa saiya o ‘magpanggot saiya tumang ki Jehova.’ (Talinhaga 19:3) Imbes na magbalos, sa huri tinogotan nia sinda na magpaheling kan oportunidad nin pagbabago. Asin sa pakaheling kan saindang pagbago, “hinadukan nia an gabos niang mga tugang asin nakipagtangis kaiba ninda.” Siring sa sinabi sa huri ni Jacob, “an mga parapana [an maimon na mga tugang ni Jose] kinorolog sia asin pinana sia asin nagkaigwa sinda nin kapaitan tumang saiya.” Alagad binalosan ni Jose nin karahayan an saindang pagkaongis. Imbes na mapaluya kan saiyang agi-agi, “an kosog kan saiyang kamot oyon-oyon.”—Genesis 37:18-28; 44:15 45:15; 49:23, 24.
20 Kaya imbes na masingkog sa bakong sangkap na mga tawo magpadagos sa ‘pagdalagan sa paagi na kamtan’ an premyo! Arog ki Jose, togotan an mapagbalong mga kamugtakan na magpakosog imbes na magpaluya saindo. (Ikomparar an Santiago 1:2, 3.) Logod na an saindong pagkamoot sa Dios magpatunay na magin makosog nanggad na mayo nin siisay man na tawo an puwedeng magin singkogan saindo. (Salmo 119:165) Girumdomon na danay ni Jehova na inaandam an premyong buhay na daing sagkod—sarong premyo na dai kayang iladawan, dai kayang hona-honaon. Dai togotan an siisay man na halean kamo kaiyan!
Nagigirumdoman Daw Nindo?
◻ Taano an tamang kaaraman ta siring kahalaga para sa mga Kristiano?
◻ Paano mo madadaog an pagkatakot sa tawo na sa nagkapira nakaolang na kamtan an buhay?
◻ Paano puwedeng an sadiring pamilya magin sarong tunay na singkogan?
◻ Paano dapat an Kristiano masimbag sa nagpapadisganar o minsan ngani nakakakolog na mga tataramon hale sa kapuwa mga Kristiano?
[Ritrato sa pahina 19]
Paagi sa paglaog sa satong mga isip asin puso kan tamang kaaraman, inaandam niato an satong sadiri na simbagon an salang mga ideya
[Ritrato sa pahina 21]
Pinaindahan ni Pedro si Jesus huli sa takot sa tawo. Dangan, an apostol napangganahan an siring na takot. Siring man kaipuhan nin gabos na tunay na mga Kristiano