“Dai Togotan an Siisay Man na Haleon sa Saindo an Premyo”
“Dai nindo pagtogotan an siisay man na haleon sa saindo an premyo na nawiwili sa sagin kapakumbabaan . . . [asin] nagpapaabhaw na mayo man nin tamang dahelan huli sa saiyang kaisipan na sono sa laman.”—COLOSAS 2:18.
1, 2. Paano na an dakol naghiro tumang sa daing sagkod na kapakinabangan kan kapuwa mga tawo, asin puwede daw na magsambit kamo nin dagdag na mga halimbawa kaini hale sa Biblia?
AN ENOT na tawong parakasala, si Eva, giniyahan sa kagadanan kan sarong tuso, mas halangkaw sa tawo na espiritung linalang. An ikaduwang parakasala, si Adan, naguyod kan saiyang agom—sarong tawo sana.—1 Timoteo 2:14; Genesis 3:17.
2 Si Eva iyo an enot sa prosesyon nin mga indibiduwal na an mga pakiolay, kun sunodon, maghahaman tumang sa daing sagkod na kapakinabangan kan kapuwa mga tawo. Hinanyogon mantang an saindang mga tataramon nag-aaningal sa bilog na Biblia! An agom ni Potifar ki Jose: “Dorogan mo ako.” (Genesis 39:7) An agom ni Job: “Sumpaa an Dios asin magadan ka!” (Job 2:9) An mga Israelitas ki Aaron: “Tumindog ka, gibohan kami nin mga dios na mangengenot sa samuya.” (Exodo 32:1) Si Pedro ki Cristo Jesus: “Maherak ka sa saimong sadiri, Kagurangnan; dai nin mangyayari sa saimo.”—Mateo 16:22.
3. Anong patanid an itinao ni Pablo sa Colosas 2:18, asin anong mga hapot an minalataw bilang resulta?
3 Gabos siring man parate na an siring na mga pakiolay nangyayari sa ikakaraot nin saro kan mga lingkod ni Jehova. Kaya mantang totoo na an mga Kristiano “nakikipaglaban . . . tumang sa maraot na espiritung mga puwersa,” parate nanggad na kapuwa mga tawo an nagbubugtak kan tolos na peligro. (Efeso 6:12) Si apostol Pablo kun siring nagpatanid: “Dai nindo pagtogotan an siisay man na haleon sa saindo an premyo.” (Colosas 2:18) Ano an premyong ini? Asin taano an nagkapirang mga lingkod ni Jehova ta nawara iyan paagi sa pagsuki sa impluwensia kan bakong sangkap na mga tawo? Bilang simbag, siyasaton niato an mga kamugtakan sa Colosas na nagpahiro ki Pablo na magtao kaining patanid.
4, 5. (a) Anong relihiyosong mga impluwensia an nag-eksistir sa Colosas? (b) Ano an Gnostisismo, asin anong peligrosong epekto an tibaad ibunga kan impluwensia kaiyan?
4 An Colosas sarong lugar na an relihiyon nagsasaralak. An mga propyong taga-Frigia mga emosyonal na tawo na subsob sa espiritismo asin idolatrosong superstisyon. Dangan yaon man an mga Judiong kahimanwa sa siudad, na danay pang nagagapos sa Judaismo. An kaharanihan kan Colosas sa mayor na ruta nin negosyo nagresulta sa danay na pagkaigwa nin bolos nin mga bisita. Siring na an mga estranyong ini namomoot na gamiton an saindang oras nin pag-aling-aling sa pagsabi o paghinanyog sa mga bagong bagay. (Ikomparar an Gibo 17:21.) Ini naggiya sa paglakop nin bagong mga pilosopiya, saro kaiyan iyo an luwayluway na nakakagamot na Gnostisismo. Sabi ni iskolar na R. E. O. White: “An gnostisismo sarong klema nin kaisipan na siring kalakop kan teoriya nin ebolusyon ngonyan. Puwede ser na nabantog iyan sa enot na siglo o mas amay pa asin nakaabot kan saiyang alitoktok sa ikaduwa. Iyan kombinasyon nin espikulasyon nin pilosopiya, superstisyon, semi-mahikong mga rituwal, asin kun beses panatiko asin malaswang pagsamba.”
5 Sa siring na kamugtakan, an relihiyon sa Colosas garo baga sarong klase nin nagpapadagos na eksperimento—sarong mestisong pinagsalak na Judaismo, Griegong pilosopiya, asin paganong mistisismo. Siring man, an Kristianidad daw, mapapamugtak sa parehong pagsaralak?
‘Halean kan Premyo’—Paano?
6. (a) Paanong an mga tataramon ni Pablo nakaolang sa impluwensia kan mga paganong pilosopiya asin Judaismo? (b) Taano ta igwa nin pangangaipo para sa mga Kristiano na “mag-ingat”?
6 An mapuwersang surat ni Pablo sa mga taga-Colosas makakaolang sa impluwensia nin siisay man na tibaad nagmamawot na isalak an Judaismo asin paganong pilosopiya sa Kristianidad. Sa pag-otro, tinawan niang atension an Cristo. Si Pablo nagsurat: “Maingat na natatago sa saiya [Cristo, bakong sa ano man na Judaista o paganong pilosopo] an gabos na kayamanan nin kadonongan asin kaaraman.” An mga taga-Colosas dinagka na “padagos na maglakaw sa pakisumaro sa saiya [Cristo], mga nakagamot asin nakatogdok sa saiya asin marigon sa pagtubod.” O kun dai, sinda madadara parayo. Kaya si Pablo nagpatanid: “Mag-ingat kamo: tibaad may siisay man na bumihag saindo paagi sa pilosopiya asin basang na daya sono sa tradisyon nin mga tawo, sono sa enot na mga katokdoan kan kinaban asin bakong sono ki Cristo.”—Colosas 2:3, 6-8.
7. (a) Ano an puwedeng nakadagka sa nagkapirang mga Kristiano sa mga katokdoan kan paganong mga pilosopo asin Judaista? (b) Taano an saindang mga katokdoan ta tunay na “mga basang na daya”?
7 Tibaad an nagkapirang mga parasunod ni Cristo Jesus nalikayan an paghanga sa mistisismo o sa pagdagka nin pilosopiya. An nagkapirang Judiong mga Kristiano puwede ser na nagkaigwang kawilihan para sa mga lumang tradisyon nin Judaismo. An mga tokdo kan paganong pilosopo asin mga Judaista malinaw na nagkaigwa nin kawilihan sa siring na mga indibiduwal. Pero, gurano man kanakakakombinsir o kaeksperto an mga palsong paratokdong ini, solamente an ikinakatao ninda iyo an “palsong mga daya.” Imbes na ipaliwanag an purong tataramon nin Dios, sinda basta na sana nag-oolit-olit kan “enot na katokdoan kan kinaban”—daing serbing mga pilosopiya, mga honahona, asin mga pagtubod. An pag-ako kan salang mga ideyang ini mangangahulogan nin kalaglagan para sa sarong Kristiano. Kaya, si Pablo nagsabi: “Dai nindo pagtogotan an siisay man na haleon sa saindo an premyo.”—Colosas 2:18.
8. (a) Ano an “premyo,” asin anong mga kasuratan an nagpapatunay kan saindong simbag? (b) Paano puwedeng an linahidan na mga Kristiano mahalean kan “premyo”?
8 “An premyo” iyo an imortal na buhay sa langit. Iyan iinarog sa balos na itinao sa mapangganang paradalagan pakatapos nin sarong mapagal na paorombasan. (1 Corinto 9:24-27; Filipos 3:14; 2 Timoteo 4:7, 8; Kapahayagan 2:7) Bilang ultimo, solamente si Jehova Dios paagi ki Cristo Jesus makakapaghale sa siisay man sa paorombasan para sa buhay. (Juan 5:22, 23) Daing duwaduwa, kun an sarong palsong paratokdo iyo an maggiya sa sarong Kristiano, magkakaigwa ini nin epekto na haleon saiya an premyo. An nadaya puwedeng sumuki parayo sa katotoohan na tibaad dai nia matapos an paorombasan!
Pagkatawo kan Palsong mga Paratokdo
9. Anong apat na mga bagay an maheheling sa palsong mga paratokdo sa mga taga-Colosas?
9 Igwa daw nin paagi, kun siring, na mamidbid an sarong tawo na may katuyohan sa ‘paghale sa Kristiano kan premyo’? Iyo, huli ta itinao ni Pablo an ladawan kan personalidad kan palsong mga paratokdo sa Colosas. An siring na tawo (1) “nawiwili sa sagin kapakumbabaan asin sa porma nin pagsamba kan mga anghel”; (2) “‘na naninindogan’ sa mga bagay na saiyang naheling”; (3) “na nagpapaabhaw na mayo man nin tamang dahelan huli sa saiyang kaisipan na sono sa laman”; mantang (4) “dai man sia nangangapot nin marigon sa payo,” si Cristo Jesus.—Colosas 2:18, 19.
10. Paanong an mga palsong paratokdo ‘nawiwili sa sagin kapakumbabaan’?
10 Kanigoan kadonong na pandadaya! Mantang iniignorar an pagkondenar ni Jesus sa mapagsaginsagin na pag-ayuno, an palsong paratokdo nagpapaheling nin maooyonan na lalauogon nin kapakumbabaan. (Mateo 6:16) Tunay na, an palsong paratokdo ‘naoogma’ sa pagsagibo nin sagin na pag-ayuno asin ibang porma nin relihiyosong pagsakripisyo sa sadiri. (Colosas 2:20-23) An saiyang mamondong lalaougon maingat na tinuyo tanganing magpaheling nin palsong pagkarelihiyoso. Totoo, an palsong paratokdo ‘naggigibo kan saiyang kabanalan sa atubang kan mga tawo tanganing maheling ninda.’ (Mateo 6:1) Alagad gabos ini pagsaginsagin, “sarong makasosopog na kapakumbabaan.” Siring kan ipinaheling kan The Expositor’s Bible: “An tawong nakakaaram na sia mapakumbaba, asin kontento sa sadiri dapit kaiyan na nagpapatingraw sa kapalibotan kan saiyang mamomdong mga mata sa arin man na salming na puwede niang maheling an saiyang sadiri bako noarin man mapakumbaba.”—Italiko sato.
11. (a) Ano an pagsamba sa mga anghel? (b) Anong makukuang ebidensia na an pagsamba sa mga anghel nagdanay sa Colosas?
11 Minsan siring, ining pagsaginsagin nagdadagdag nin hinohonang kredibilidad sa daing kahulogan na gibo—an “pagsamba sa mga anghel.” Dai eksaktong ipinaliwanag ni Pablo kun paano an pagsambang ini isinasagibo. Minsan siring, an ebidensia, may sarong porma nin palsong pagsamba na nagdanay sa lugar na idto nin Colosas sa laog nin mga siglo. An ikaapat na siglong konseho na harani sa Laodicia kinaipuhan na magdeklara: “An mga Kristiano dai dapat pagpabayaan an Iglesia nin Dios, asin . . . mag-apod sa ngaran nin mga anghel . . . Kun siring, kun igwa nin siisay man manompongan na magsasagibo sa saiya man sana nin pribadong pagsamba sa ladawan, sia isusumpa.” Misan siring, an ikalimang siglong teologo asin iskolar na si Theodoret nagpapaheling na “ining bisyo” nin pagsamba sa anghel nag-eksistir pa sa saiyang aldaw. Sagkod sa aldaw na ini, an Simbahan Katoliko “nagdadagka sa mga maimbod na mamoot, igalang, asin pagngayongayoan an mga anghel,” na nagdadagka nin “mga Misa asin Banal na Katongdan sa pag-omaw kan mga anghel de la guwardiya.”—New Catholic Encyclopedia, tomo I, pahina 515.
12. Paano ipinapaliwanag kan mga palsong paratokdo na an pagsamba sa mga anghel maaako?
12 Sa paggamit nin kaparehong pagrason kan Katolikong mga teologo, an palsong mga paratokdo puwedeng nakapagsabi: ‘Kanigoan kamakangangalas na pribilehiyo nagkaigwa an mga anghel! Bako daw na an Mosaikong Pagboot ipinadara paagi sa sainda? Bako daw na sinda dayupot sa Dios sa langit? Siertong kaipuhan tawan niato nin maninigong onra an mga makokosog na ini! Dai daw ini magpapaheling nin tunay na kapakumbabaan sa satong kabtang? Katapustapusi an Dios halangkawon nanggad asin kitang mga tawo hababaon! Kun siring, an mga anghel kaya, na maglingkod bilang satong tagapag-oltanan sa pagdolok sa Dios.’
13. (a) Maaako daw an pagsamba sa mga anghel? (b) Paano an palsong paratokdo ‘“naninindogan” sa mga bagay na saiyang naheling’?
13 An pagsamba sa mga anghel sa ano man na porma, sala. (1 Timoteo 2:5; Kapahayagan 19:10; 22:8, 9) Alagad an palsong paratokdo hihingoahon na iapuwera an katuyohan na ini paagi sa ‘“panindogan nia sa” mga bagay na saiyang naheling.’ Oyon sa The Vocabulary of the Greek Testament, an mga ekspresyon na ini ginamit “sa misteryo nin mga relihiyon tanganing ipaheling an alitoktok nin pagpatood, kun an mystês [bagohan] ‘minatongtong sa pinto’ pasiring sa bagong buhay na duman sia makikiiba sa dios.” Paagi sa mga paggamit kan mga tataramon kan mga paganong mga tapatero, si Pablo tinuya an paagi kan palsong mga paratokdo na naghahambog kan saindang sadiri na igwa nin espesyal na pakasabot—tibaad naghihingako pa na igwa nin orog sa natural na pakamansay.
14. Paano an mga palsong paratokdo ‘nagpapaabhaw huli sa saiyang kaisipan na sono sa laman’?
14 Minsan ngani naghihingako na mga espirituwal, minsan siring, an palsong paratokdo tunay na mapaabhaw na mayo man nin tamang dahelan huli sa saiyang kaisipan na sono sa laman. An makasalan na laman nadigtaan an saiyang pagmansay asin mga motibo. Nagpapaabaw-abaw na igwa nin kapalangkawan asin pagka-arogante, an saiyang isip “yaon sa mga gibo na maraot.” (Colosas 1:21) An grabe pa, dai sia nangangapot sa payo, an Cristo, huli ta sia nagtatao nin orog na gabat sa espikulasyon nin mga nasa kinaban imbes na sa mga katokdoan ni Jesus.
Peligro Pa Giraray?
15. (a) Anong mga saboot an maririsa ngonyan sa tahaw kan mga Kristiano? (b) Saen daw naggikan an siring na mga saboot, asin paano ninda ikinokomparar an sadol kan Biblia?
15 An premyo nin buhay na daing sagkod—magin man iyan sa langit o sa paraisong daga—iyan binuksan sa mga lingkod nin Dios. Totoo, an mga Gnostiko asin mga Judaista haloy nang nawara. Alagad igwa nin mga indibiduwal ngonyan na tibaad olangon an sarong Kristiano sa pagkamit kaining premyo. Tibaad dai man ninda gibohon na tuyo. Minsan siring, huli ta tinogotan ninda an saindang sadiri na biyong maapektaran kaining “pilosopiya asin basang na daya,” kan palakaw na ini sinda puwedeng magsabi:
‘Hinihingoa kong magin sadiosan, alagad depisil iyan kun ika nagnenegosyo. Ini sarong makompitensiang kinaban asin kun beses kaipuhan kang magkompromiso.’ (Ikomparar an pagmansay na ini sa Talinhaga 11:1; Hebreo 13:18.)
‘Boot mong sabihon saro ka pa giraray na agom na babaeng yaon sa harong? Nagbago na an panahon! Taano ta dai maghanap nin trabaho asin gumibo nin sarong bagay para sa saimong buhay!’ (Ikomparar an Talinhaga 31:10-31.)
‘Aram ko na an sakong trabaho nahahalean ako nin panahon sa pagtiripon asin sa paglilingkod sa langtad. Alagad kaipuhan an dakulang kuwarta tanganing masuportaran an samuyang estilo nin pamumuhay. Asin anong maraot kun igwa ka nin nagkapirang mararahay na bagay?’ (Itumbas an rason na ini sa Lucas 21:34, 35; 1 Timoteo 6:6-8.)
‘Pagal na akong marahay kadadangog sa kamagurangan na perming nagsasabi dapit sa paglilingkod sa langtad! Nagtatrabaho ako sa bilog na semana asin kaipuhan na magrelaks kun Sabado asin Domingo.’ (Ikomparar an Lucas 13:24; Marcos 12:30.)
‘Bakong para sa gabos an pagpayunir. Apuwera kaiyan, sa kamugtakan kan ekonomiya ngonyan kaipuhan mo nin sarong edukasyon sa unibersidad kun boot mong mapakarahay.’ (Itumbas ini sa Mateo 6:33; 1 Corinto 1:19, 20; 1 Timoteo 6:9-11.)
An materyalistiko asin makalaman na pagrason kabtang asin parte kan “enot na mga katokdoan kan kinaban”—an pundamental na mga honahona asin pagtubod nin mga kinabanon! An pagsunod dian magigin causa nin dai na maiirahay pang espirituwal na danyos.
16. Paano an nagkapira ngonyan puwedeng magin mapagsaginsagin na mga hokom?
16 An nagsadiring mga hokom asin mga paratokdo saro pang peligro. Siring kan yaon sa Colosas, naggigibo sinda nin mga isyu sa personal na mga bagay. Iyan parateng iniibanan nin “sagin na kapakumbabaan.” (Colosas 2:16-18) An saindang mas-banal-kisa-saimo na mga saboot nagdadaya nin salang motibo—an pagmawot na ilangkaw an saindang sadiri sa iba. Sinda parateng “sobra kamatanos,” madaling lumihis sa sinasabi o ipinupublikar kan ‘maimbod na oripon’. Kaya sinda puwedeng maggatong nin korontrahan sa mga bagay dapit sa pag-aling-aling, pag-ataman sa salud, estilo nin bado asin pagsulot, o an paggamit nin inomon na de alkohol. (Parahulit 7:16; Mateo 24:45-47) An atension kun siring pinapasuki hale sa espirituwal na mga bagay pasiring sa makalaman na mga mawot.—Ikomparar an 1 Timoteo 6:3-5.
17, 18. (a) Paano an nagkapira ‘naninindogan’ sa personal na mga pagmansay, asin taano ini ta peligroso? (b) Ano an pag-oolayan sa masunod niatong leksion?
17 Ngonyan, an nagkapira nakakaabot na sagkod sa ‘manindogan sa saindang’ personal na mga pagmansay sa Kasuratan, o naghihingako na igwa sinda nin espesyal na pakamansay. Sarong babae na nabautismohan nin sarong taon pa sana, naghingako na saro sa mga linahidan asin nag-isip na ini nagtao nin gabat sa saiyang mga opinyon. Kaya nagpaheling sia nin makosog na pagmawot na “magtokdo asin magpakosog sa iba” bilang nangengenot. (Alagad helingon an 1 Timoteo 2:12.) Mantang si Jehova ikinakaongis an “pagpaabaw-abaw sa sadiri asin kapalangkawan,” an mga Kristiano kaipuhan magkaigwa nin mabining pagmansay sa saindang sadiring mga opinyon. (Talinhaga 8:13) Linilikayan ninda an pakana nin pagigin “mapagpaabhaw na mayo man nin tamang dahelan huli kan [saindang] kaisipan na sono sa laman.” (Colosas 2:18) An siisay man na iginigiit an saindang personal na mga ideya asin ibinubugtak an konseho kan linahidan na ‘maimbod na oripon’ ni Cristo sa hababang kamugtakan dai nangangapot sa payo. Sigurado na, an maimbod na saksi ni Jehova kaipuhan magbantay tumang sa bakong makadios na mga impluwensia na puwedeng mag-agaw sainda kan premyo nin buhay.
18 Ginagamit pa giraray ni Satanas an kapuwa tawo tanganing dai magkamit nin buhay. Ano pa an ibang mga paagi na ginagamit kan Diablo sa saiyang mga estratehiya? Asin paano na an sarong saksi ni Jehova mahigpit na makapangapot sa premyo?
Nagigirumdoman Daw Nindo?
◻ Anong relihiyosong mga impluwensia an nagsapeligro kan mga Kristiano sa suanoy na Colosas?
◻ Ano an mga midbidan kan mga maagaw sa mga Kristiano kan “premyo”?
◻ Paano ipinapaheling kan nagkapirang Kristiano ngonyan na sinda naimpluwensiahan kan “enot na mga katokdoan kan kinaban”?
◻ Paano puwedeng an palsong mga paratokdo mapahiro an mga Kristiano sa salang kurso?
[Ritrato sa pahina 15]
An ‘pagsamba sa mga anghel’ nagbugtak sa peligro kan Kristianong kongregasyon sa Colosas. An kaparehong pagsamba sa ladawan nagdadanay sa tahaw kan mga naghihingakong Kristiano ngonyan
[Ritrato sa pahina 17]
Mag-ingat sa mga nag-iimpluwensia saindo sa kaisipan kan kinaban!