Pinatutunayan kan mga Ministro nin Dios an Saindang Kuwalipikasyon
“Asin siisay an kuwalipikado nin igo?”—2 CORINTO 2:16.
1. Sa baranga sa relihiyon na kinaban ngonyan, anong hapot an puwedeng ihapot sa bilog na pagkasinsero?
SA BARANGA sa relihiyon na kinaban ngonyan, an hapot na ini puwedeng ihapot sa bilog na pagkasinsero: Siisay man nanggad an autorisadong ministro nin Dios? Kaagid kaiyan, si apostol Pablo naghapot: “Siisay an kuwalipikado nin igo para sa mga bagay na ini?” Kan angaton, si Pablo asin an saiyang mga katabang nakapagsabi, “Kami”! (2 Corinto 2:16, 17) Alagad ngonyan, siisay an igwa nin marigon na basihan, kan diretso, asin kan kapusoan na magsimbag nin “Kami”?
2. Ano an kahulogan kan mga tataramon ni Pablo sa 2 Corinto 2:14-17?
2 Bago simbagon an hapot na iyan, horophoropon niato an mga tataramon na ini ni Pablo sa mga Kristiano sa Corinto: “Alagad ta salamat sa Dios! Huli ta . . . saen man kami magduman ginagamit nia kami sa pagsabi sa iba manongod sa Kagurangnan asin sa pagpalakop kan Ebanghelyo siring sa mahamot na olor. Kun para sa Dios igwa nin mahamot, marahay na parong sa samong buhay. Iyan an parong ni Cristo sa laog mi, amyo para sa mga naligtas asin sa mga dai naligtas sa palibot niamo. Sa mga dai naliligtas, kami garo makatatakot na parong nin kagadanan asin kapahamakan, mantang sa mga nakakamidbid ki Cristo kami sarong olor na nagtatao nin buhay. Alagad ta siisay an kuwalipikado para sa arog kaining gibohon? Idto sanang, arog mi, mga tawo na may integridad, isinugo nin Dios, nagtataram na igwa kan kapangyarihan ni Cristo, na nasa samo an mga mata nin Dios. Bako kaming arog kan mga paratinda—asin kadakol kan arog ninda—na an kaisipan sa pagpalakop kan Ebanghelyo makakua nin hanapbuhay dian.”—2 Corinto 2:14-17, The Living Bible; helingon an The Watchtower, Mayo 1, 1944, pahina 133-4.
3. (a) Ano an maninigong magin reaksion niato sa kaisipan na itinda an Tataramon nin Dios para sa paslong pakinabang? (b) Ano an ginibo ni Pablo tanganing malikayan an pagigin pinansial na pagabat sa saiyang mga hinuhulitan?
3 Itinda an Tataramon nin Dios para sa paslong pakinabang—makababalde nanggad an siring na kaisipan! Si Pablo dai naghanap nin pinansial na ganansia paagi sa paghuhulit kan Tataramon na iyan tanganing magkaigwa nin trangkilong buhay, na sa huri magretiro sa ministeryo asin magpasiramsiram sa natatada pa kan saiyang mga aldaw. Andam siang gumibo nin mga tolda bilang segundang trabaho tanganing may paragastos sia asin matabangan an saiyang kairiba sa paglilingkod ki Jehova. (Gibo 18:1-4) Si Pablo dai nagin pinansial na pagabat sa saiyang mga hinulitan kan maogmang bareta. Kaya ikinahapot nia sa mga Kristiano sa Corinto: “Nagkasala daw ako sa pagpakumbaba tanganing kamo ikalangkaw, huli ta ako maogmang nagpahayag kan maogmang bareta nin Dios sa saindo na dai nin bayad?” (2 Corinto 11:7) An hapot na iyan kaipuhan na simbagon nin makosog na dai!
4. Paano inaarog kan mga Saksi ni Jehova an halimbawa ni Pablo mapadapit sa Tataramon nin Dios?
4 Ngonyan inaarog kan mga Saksi ni Jehova an marahay na halimbawa kan apostol sa dai pagpabakal kan daing kaagid sa halagang Tataramon nin Dios kundi sa pagdara kaiyan sa gabos. Dai ninda ipinagnenegosyo an siring kabanal na bagay. Kaya mayo sinda nin suweldohan na klero, an saindang mga parapahayag sa publiko dai nagpapabayad para sa mga pahayag, asin an sarong platong pangolekta noarin man dai ilinilibot sa saindang mga pagtiripon. Kun may siisay man na boot na magdonar nin kuwarta para sa gibohon, puwede siang magholog nin ano man na kantidad, minsan an kapareho sa “duwang saradit na sinsilyo na kadikit an halaga” na ihinolog kan balo, sa sarong kahon nin kontribusyon sa Kingdom Hall o saen pa man. (Lucas 21:1-4) An boluntad na mga donasyon na iyan ginagamit sa pagbayad sa mga gastuson asin bakong sa pagpayaman sa siisay man na tawo. Minsan an pribadong mga harong gikan sa boot na binubukasan para sa mga pagtiripon kan mga Saksi ni Jehova.—Filemon 1, 2.
“Kuwalipikado nin Igo”
5. Siisay an nagkuwalipikar sa mga Saksi ni Jehova para sa banal na paglilingkod?
5 Alagad siisay ngonyan an nagkuwalipikar sa mga Saksi ni Jehova na umarog sa Makakasuratan na arogan na iyan sa ibong kan gabos na paglamag asin pagtumang na permi nindang inaagihan? Mayo nin siisay man na makakapanimbag digdi kundi an Saro na nagkuwalipikar nin igo ki Pablo asin sa saiyang kairiba para sa banal na paglilingkod. Tabi mangnohon an pagigin puro kan motibo ni Pablo, bakong arog kan motibo nin sarong relihiyosong paratinda, arog kan saiyang ipinaliwanag: “Bilang gikan sa sinseridad, iyo, bilang isinugo nin Dios, na naheheling nin Dios, kaiba ni Cristo, kami nagtataram.” (2 Corinto 2:17) Arog kaini an pagtaram ngonyan kan mga Saksi ni Jehova. Alagad ta irenerekomendar daw niato an satong sadiri bilang mga ministro? Kaipuhan daw kitang magpublikar nin mga surat nin rekomendasyon hale sa iba?
6. (a) Taano ta naghohona an klero nin Kakristianohan na sinda “kuwalipikado nin igo”? (b) Alagad ano an basihan para sa pagkaigwa nin saro nin igong kuwalipikasyon para sa tunay na Kristianong ministeryo?
6 Si Pablo nagnigar na an kuwalipikasyon para sa saiyang ministeryo bagay na saiyang pinatalubo. Sia nagsabi: “An samong pagigin kuwalipikado naghahale sa Dios, na talagang nagpagin kuwalipikado sa samo na magin mga ministro nin sarong bagong tipan.” (2 Corinto 3:4-6) Bakong arog ni Pablo, an klero nin Kakristianohan nagsasabi na sinda “kuwalipikado nin igo” huli sa paggraduwar ninda sa mga seminaryo teolohiko. Kaya sinda nagdedehar na an mga dai naggraduwar sa seminaryo kuwalipikadong mga ministro na may autoridad na magtokdo. Alagad ta an espesyal na pag-eskuwela ni Pablo sa Judaismo dai nagkuwalipikar sa saiya para sa Kristianong ministeryo na manongod sa bagong tipan. Ni nagpatindog man si Jesus nin seminaryo teolohiko tanganing laogan kan saiyang 12 apostol o nin siisay pa man. Siring man ngonyan, an pagigin kuwalipikado nin igo nin saro para sa tunay na Kristianong ministeryo kaipuhan na gumikan ki Jehova, an kadarudakulaing Paratokdo. Siyempre, an ministrong iyan kaipuhan na magtao nin pruweba na dai mapagdududahan.
“Siisay an Nagtao Saimo kan Kapangyarihan na Ini?”
7. Sa anong paagi napalaen ki Nicodemo an mga namomoon nin relihiyon sa saindang punto-de-vista sa kapangyarihan ni Jesus?
7 Inangat kan mga namomoon sa relihiyon an diretso pati kan Aki nin Dios sa paghuhulit kan maogmang bareta asin sa paggibo nin mga ngangalasan. Sa templo, “an mga poon nin mga saserdote asin an kamagurangan na lalaki kan banwaan nagdorolok sa saiya kan sia nagtotokdo asin nagsarabi: ‘Sa anong kapangyarihan mo ginigibo an mga bagay na ini? Asin siisay an nagtao sa saimo kan kapangyarihan na ini?’” (Mateo 21:23) Habo nindang isipon an nagin konklusyon kan namomoon sa mga Judio na si Nicodemo kan sabihan nia si Jesus: “Rabbi, aram niamo na ika bilang paratokdo naggikan sa Dios; huli ta mayo nin makakagibo kan mga tandang ini na saimong ginigibo apuwera sana kun an Dios nasa saiya.”—Juan 3:1, 2.
8. Pakalihis nin labing tolong taon kan ministeryo ni Jesus, ano an nagin reaksion kan mga namomoon na Judio sa pruweba sa saiyang pagkatawo asin kapangyarihan?
8 Puwede kutanang sabihon ni Jesus sa mga nag-aangat sa saiya, ‘An mga gibo ko na sana an magtaram para sa saindang sadiri!’ Pakalihis nin labing tolong taon kan saiyang karera sa publiko, an mga poon nin mga saserdote asin an kamagurangan na lalaki igwa nin dakol na tanda na pagbabasaran nin tamang konklusyon dapit sa kun siisay si Jesus asin sa diretso nia na gumibo nin mga ngangalasan asin magtokdo kan katotoohan manongod sa Kahadean nin Dios. Matagason sana an saindang liog tanganing akoon an gabos na ebidensia na itinatao ni Jehova tanganing patunayan na si Jesus an ipinanugang Mesiyas.
9, 10. (a) Taano ta dai maninigong ipagngalas nin mga Saksi ni Jehova na an saindang kuwalipikasyon bilang mga ministro pinagdududahan ngonyan? (b) Paano inatubang ni Jesus an mga namomoon sa relihiyon na nag-angat sa saiyang kapangyarihan, asin ano an nagin epekto kaini?
9 Huli sa nangyari sa kaso ni Jesus, dai ipinagngangalas kan mga Saksi ni Jehova na an saindang kuwalipikasyon bilang autorisadong mga ministro kan saiyang Ama pinagdududahan nin mga namomoon sa relihiyon ngonyan. Mantang an mga nag-angat sa kapangyarihan ni Jesus dai inintindi an saiyang dakol na mga ngangalasan na ginibo, sia nagtao nin hapot na nagbugtak sa sainda sa masakit na kamugtakan. Asin puwede man na gibohon kan saiyang mga disipulo sa presente an kapareho kaini kun para sa mga tuyong dai nag-iintindi sa mga ginigibo kan mga disipulong iyan.
10 Kan an mga poon nin mga saserdote asin an kamagurangan na lalaki maghapot ki Jesus, “Siisay an nagtao saimo kan kapangyarihan na ini?” sia dai nagtao nin hapot na depisil saboton kundi nagsabi: “Ako man mahapot sa saindo nin sarong bagay. Kun iyan isabi nindo sa sako, isasabi ko man saindo kun sa anong kapangyarihan ko ginigibo an mga bagay na ini: An bautismo ni Juan, saen guminikan? Sa langit o sa mga tawo?” Sinasabi pa kan rekord: “Alagad ta sinda naghorophorop sa sainda man sana na an sabi: ‘Kun kita magsabing, “Sa langit,” sia masabi sa sato, “Kun siring, tadaw ta dai kamo nagturubod sa saiya?” Alagad kun kita magsabi, “Sa mga tawo,” nanganganib kita sa mga kadaklan, huli ta sinda gabos ibinibilang si Juan na propeta.’ Kaya sa pagsimbag ki Jesus sinda nagsabi: ‘Dai mi aram.’ Sia nagsabi man sainda: ‘Dai ko man isasabi saindo kun sa anong kapangyarihan ko ginigibo an mga bagay na ini.’” (Mateo 21:23-27) Ngonyan, puwedeng hapoton kan mga Saksi ni Jehova an klero sono sa Kasuratan sa paagi na magkakaigwa nin kaparehong epekto.a
11. Ano an ginibo kan banwaan ni Jehova bago an 1914, asin paano dai nakagirong an mga kritiko sa sainda?
11 Poon 1876 padagos, pinaisi kan banwaan ni Jehova an kinaban, asin partikularmente an Kakristianohan, na an Mga Panahon nin mga Hentil matatapos sa tigholog nin 1914. (Lucas 21:24, King James Version) Dai puwedeng dai intindihon kan klero an preliminaryong gibohon na ini nin haros 40 taon—sarong gibohon na nakakaagid kan gibohon ni Juan Bautista. An mga klerigong idto may pagkalangkag na naghalat na salakayon an editor kan magasin na ini kun halimbawa umagi an 1914 na mayo nin ano man na pambihirang pangyayari tanganing magin katimbang kan saiyang ipinatanid. Alagad, ah, dai sinda nakagirong kan kaidtong Hulyo 28, 1914, an katoninongan malaglag sa pagputok kan Guerra Mundial I!
12. Anong mga kasakitan an kadungan asin kasunod kan Guerra Mundial I?
12 An panlaglag kan guerra asin an paghale nin dakol na lalaki sa pag-oma nagbunga nin mga kakulangan sa pagkakan. Natanyog nin mga linog an laen-laen na kabtang kan daga, na ginikanan nin labi-labing danyos asin kasakitan. Kan 1915 an linog sa Avezzano, Italia, guminadan sa 29,970, asin an makosogon na linog kan 1920 nagdara nin kagadanan sa 200,000 sa Probinsia nin Kansu, Tsina. Kan 1923, labing 140,000 an nagadan sa linog sa Great Kanto duman sa Hapon. Kasunod kan guerra an trangkaso Española na sa laog nin sarong taon guminadan nin mas dakol na biktima ki sa apat na taon nin guerra. Dai man paglingawan an paglamag sa mga lingkod ni Jehova sa panahon kan enot na guerrang idto, na natapos sa daing katanosan na pagkabilanggo nin siyam na bulan kan presidente asin kan sekretaryo-tesurero kan Watch Tower Society asin nin anom pa sa saindang mga katabang.
13. Ano an ihinapot nin mga Saksi ni Jehova sa klero kan Kakristianohan, asin ano an kaipuhan na admitiron kan mga kritikong ini kun sinda sumimbag nin sadiosan?
13 Poon kan matapos an Guerra Mundial I, ihinapot nin mga Saksi ni Jehova sa klero kan Kakristianohan: ‘An kapahapahamak daw na mga pangyayari na inagihan kan satong daga poon kan 1914 kaotoban kan hula ni Jesus sa Mateo 24:3-13?’ Kun an mga klerigong iyan sadiosan na magsabing iyo, kaipuhan na admitiron ninda na si Jesu-Cristo tuminukaw sa saiyang langitnon na Kahadean kan 1914. Naturalmente, mantang sinabi ni Jesus na ‘an kinaban dai na makakaheling sa saiya’ asin ngonyan sia sarong inmortal na espiritung persona, an saiyang “pagdatong,” o “presensia,” dai naheheling. (Juan 14:19; Mateo 24:3, KJ; 1 Pedro 3:18) Alagad an pag-admitir sa gabos na ini makakaolang sa klero sa pangangatanosan na an nakatatanyog sa kinaban na mga pangyayari kan 1914-18 normal sanang mga pag-iiwal nin mga nasyon sa pag-agi nin kasaysayan.
14. (a) Kun aadmitiron kan mga namomoon sa relihiyon an tama, sa anong gibohon sinda mapipiritan na makikabtang? (b) Anong pansalida sa Kahadean an kaipuhan na talikdan ninda, alagad ta ano an ginibo ninda?
14 Saro pa, kun aadmitiron kan klero nin Kakristianohan na an mga pangyayari kan 1914-18 nagtanda sa kapinonan kan katapusan para sa daan na palakaw nin mga bagay, mapipiritan sindang admitiron an iba pang mga kabtang kan “tanda” sa “presensia” ni Jesus asin kaipuhan na makikabtang sa pag-otob sa saiyang mga tataramon: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon.” (Mateo 24:14) Iyan mangangahulogan nin paghuhulit, bakong kan Ebanghelyo na ihinulit ninda sa laog nin dakol na siglo, kundi kan maogmang bareta kan Kahadean na tinindog sa langit kan matapos an Mga Panahon nin mga Hentil kan 1914. Kaipuhan na talikdan ninda an Liga de Naciones bilang “an politikal na kapahayagan kan Kahadean nin Dios sa daga” asin ibilang iyan asin an kasalihid kaiyan, an Naciones Unidas, bilang ‘an nakaoongis na bagay nin kagabaan na nagtitindog sa banal na lugar.’ (Mateo 24:15, KJ) Alagad sagkod ngonyan na taon nin 1986, an klero nin Kakristianohan nagsasayumang apodon an Liga de Naciones asin an Naciones Unidas bilang an “nakaoongis na bagay” o “makababaldeng bagay” na iyan.
15. Anong ngapit an naghahalat sa klero, alagad ano an ginigibo kan mga Saksi ni Jehova?
15 Kaya an klero nin Kakristianohan habong manindogan para sa Kahadean ni Jehova paagi ki Jesu-Cristo. Sa dai pakasuportar dian, sinda lalaglagon sa “dakulang kahorasaan” na harani na. Alagad bakong arog ninda, an mga Saksi ni Jehova nagtalikod sa Dakulang Babilonya, an pankinaban na imperyo nin falsong relihiyon, asin naghuhulit kan mensahe kan Kahadean sa 205 kadagaan. An daing kaagid na gibohon na ini sarong pambihirang kabtang kan “tanda” na nagpapatunay na kan 1914 si Jesus pinatukaw bilang langitnon na Hade, tanganing maghade sa tahaw kan saiyang mga kaiwal.—Mateo 24:3, 14, 21; Salmo 110:1, 2; Kapahayagan 18:1-5.
Kaipuhan daw an Sarong Rekomendasyon?
16. Anong mga hapot an minalataw dapit sa rekomendasyon, asin ano an isinabi ni Pablo manongod digdi?
16 Satuya daw na irenerekomendar an satong sadiri bilang linahidan na mga saksi ni Jehova na mayo man nin basihan? O tuso daw niatong minamaniobra an mga bagay tanganing magkaigwa nin siring na rekomendasyon para sa mga “ibang karnero” ni Jesus? (Juan 10:16) Dai ginibo ni Pablo an siring na bagay kundi nakapagsabi sia sa mga taga-Corintong idto na nagin mga Kristiano huli sa saiyang daing kapagalan na mga paghihingoa: “Nagpopoon na naman daw kami na irekomendar an samong sadiri? O kami daw, arog nin nagkapira, tibaad nagkakaipo nin mga surat nin rekomendasyon sa saindo o gikan sa saindo? Kamo mismo an samong surat, na nalalagda sa samong puso asin naaaraman asin nababasa nin gabos na tawo. Huling kamo nahahayag bilang surat ni Cristo na samong isinurat bilang mga ministro, na nalagda bakong sa tinta kundi sa espiritu kan nabubuhay na Dios, bakong sa mga tabla nin gapo, kundi sa mga tabla nin laman, sa mga puso.”—2 Corinto 3:1-3.
17. Taano ta masasabi na si Pablo kuwalipikado nin igo para sa ministeryo, asin sa bagay na ini, ano an masasabi manongod sa mga Saksi ni Jehova?
17 Sa tabang kan espiritu ni Jehova, si Pablo nagsurat nin nagkapirang libro sa Biblia asin nakombertir an dakol sa Kristianismo. Kaya tunay na napatunayan nia na sia kuwalipikado nin igo para sa Kristianong ministeryo. Sa modernong katimbang, nangorogna poon kan enot na ipublikar an magasin na ini kan 1879, an linahidan na natatada kan mga disipulo ni Cristo, minsan ngani dai pinasabngan kapareho ni Pablo, nakaprodusir nin dakol na babasahon sa Biblia. Poon kan 1920, sinda nakapagpublikar nin rinibong milyon na mga libro, pulyeto, magasin, asin pampleta sa dakol na tataramon. An babasahon na ini iwinawaras sa hababaon na halaga, na an dakol dian itinatao nin libre sa mga dukha. An Watch Tower Society nag-areglo man nin daing bayad na mga pahayag sa Biblia asin nagsugo nin mga misyonero sa dai pa napaglilingkodan na mga teritoryo sa bilog na globo. Manampulong ribo an naghinanyog sa inimprenta asin berbal na mensahe asin sinimbolisaran an saindang pagdusay ki Jehova Dios paagi sa pagpabautismo, partikularmente poon kan 1935 kan enot na liwanagon na an daing kabilangan na “dakulang kadaklan” kan “ibang karnero” ni Jesus puwedeng maglaom sa daing sagkod na buhay sa nakabalik na paraiso sa daga.—Kapahayagan 7:9-17; Lucas 23:43.
18. Kun aangaton na patunayan an saindang kuwalipikasyon bilang mga ministro, ano an ikakatokdo kan linahidan na natatada?
18 Kaya, ano kun angaton kan klero an linahidan na natatada na magpaheling nin mga sertipiko bilang mga Doktor nin Dibinidad? Tara, an mga lingkod na ini ni Jehova makapagtatao nin mas makosog na ebidensia! Puwede nindang ikatokdo ngonyan an labing duwa may kabangang milyon na “ibang karnero” sa bilog na daga asin makapagsabi: ‘Yaon an samong surat na nagsusuportar!’ Puwede nindang arogon an mga tataramon ni Pablo asin sabihon sa mga kabilang sa “dakulang kadaklan”: “Kamo mismo an samong surat, na nalalagda sa samong puso asin naaaraman asin nababasa nin gabos na tawo.” (2 Corinto 3:2) Pabayaan na basahon kan klero nin Kakristianohan an buhay na surat na iyan na kompuwesto nin nagdusay, bautisadong mga Kristiano na naglilingkod ki Jehova Dios aldaw-banggi sa saiyang templo asin nagtatabang na ‘ihulit an maogmang baretang ini kan kahadean sa bilog na daga para sa pagpatotoo sa gabos na nasyon.’ (Mateo 24:14) Kapareho kan linahidan na natatada, pinatutunayan ninda na sinda kuwalipikado nin igo para sa Kristianong ministeryo.
19. Anong pambihirang surat nin rekomendasyon an iingatan sa Har-Magedon?
19 An pambihirang surat na ini nin rekomendasyon dai mapapara sa nagdadangadang na “ralaban kan dakulang aldaw nin Dios na Makakamhan sa gabos” sa simbolikong lugar na inaapod Har-Magedon. (Kapahayagan 16:14-16) Imbes, iyan babantayan asin iingatan kan Makakamhan sa gabos na Dios tanganing ieksibir sa palakaw nin mga bagay paka-Har-Magedon na sakop ni Cristo na Hade. An “dakulang kadaklan” na iyan magigin mapuwersang gayong surat para sa binilyon na gadan na bubuhayon ni Jehova Dios, paagi ki Jesu-Cristo, hale sa mga lolobngan nin girumdoman sa bilog na daga! Kaya ipagpadagos nindo an pagsurat, kamong linahidan na mga natatada! Asin ipagpadagos nindo an pagtabang sainda, kamong “dakulang kadaklan” kan “ibang karnero” kan Marahay na Pastor!
[Mga Nota sa Ibaba]
a Halimbawa, helingon an parapo 13 asin 14.
Ano an Komento Nindo?
◻ Paano inaarog si Pablo kan mga Saksi ni Jehova sa dai pagtinda kan Tataramon nin Dios?
◻ Ano an basihan sa pagigin kuwalipikado nin saro para sa tunay na Kristianong ministeryo?
◻ Kun aadmitiron nin mga namomoon sa relihiyon an tama, sinda mapipiritan na makikabtang sa anong gibohon?
◻ Puwedeng itokdo kan linahidan na natatada an anong pambihirang surat na nagpapatunay na sinda mga ministro na kuwalipikado nin igo?
[Ritrato sa pahina 9]
Tinokdoan ni Jesus an saiyang mga disipulo na magin mga ministro, alagad dai sia nagpatindog nin ano man na seminaryo teolohiko
[Ritrato sa pahina 11]
Bilang kuwalipikadong mga ministro, an mga Saksi ni Jehova naghuhulit kan maogmang bareta kan napatindog nang Kahadean. Iyo man daw kamo?