An mga Ministro kan Kahadean Nakakaatubang sa Angat
“Kaya, ano si Apolos? Iyo, ano si Pablo? Mga ministro na huli sasainda kamo nagin nagturubod.”—1 CORINTO 3:5.
1. (a) Kun dapit sa relihiyon, ano an pinagduduhan ngonyan, asin taano? (b) Anong imperyo an namemeligro, asin ano an mangyayari dian?
AN AUTORIDAD nin mga ministro nin relihiyon inaangat ngonyan. Paorog nang paorog, iyo ini an kaso mantang an politikal na elemento kan kinaban na ini nagigin kontra sa relihiyon, pati an “Kristianong” relihiyon, na ibinibilang iyan na sarong panloloko na naghahanap nin ganansia. Dawa an mga naggraduwar sa relihiyosong mga seminaryo dai tinutubod bilang autorisadong mga ministro asin prohibido sa mga nasyon na nagigin kontra sa relihiyon. Iyo, an pankinaban na imperyo nin falsong relihiyon inaatake asin namemeligro sa lakop sa dagang pagsalakay na mangangahulogan kan pagkapara kaiyan. Ini ihinula kan banal na Autor nin tunay na pagsamba asin ibinugtak an saiyang itinalagang panahon para sa kaotoban kan hulang ini. An mga linalang sa bilog na uniberso makikinabang sa dakulaon na pangyayaring ini!
2. Kun dapit sa relihiyon, ano an magdadanay asin ano an dai?
2 Alagad, an kadaihan nin relihiyon dai makakadominar nin haloy sa daga, pero an nabindikar na Kaglalang kan uniberso magdadanay! Iyo, asin an tunay na relihiyon kan daing kagadanan asin Kaharohalangkaweng Dios na ini magdadanay! An totoo, minsan ngani an binilyon na tawo sa daga nagninigar sa mga katotoohan, ngonyan mismo an mga naggigibo kan tunay na pagsamba sa Dios buhay asin aktibo sa daga. Asin an minasunod na kapahayagan na ginatos nang taon an edad totoo ngonyan: “An saiyang dai naheheling na mga kuwalidad malinaw nang naheheling poon sa paglalang kan kinaban padagos, huli ta sinda namamansayan paagi sa mga bagay na ginibo, minsan an saiyang daing sagkod na kapangyarihan asin pagka-Dios, kaya dai sinda nin sarahotan.”—Roma 1:20.
3, 4. (a) Paano mapatutunayan na si Jehova may mga ministro sa daga? (b) Paano niato naaaraman na an relihiyosong mga ministro kan Dakulang Babilonya madali nang mawaran nin trabaho?
3 Kan an mga tataramon na iyan isurat kan enot na siglo kan satong Komon na Kapanahonan, si Jehova Dios igwa na kan saiyang mga ministro sa daga. Kaya ikinasurat ni apostol Pablo: “Kaya, ano si Apolos? Iyo, ano si Pablo? Mga ministro na huli sa sainda kamo nagin nagturubod, sono sa itinao kan Kagurangnan sa lambang saro. Ako an nagtanom, si Apolos an nagbaribi, alagad an Dios iyo an nagpapatubo.”—1 Corinto 3:5-9.
4 Si Jehova kaipuhan na magkaigwa nin mga ministro sa daga ngonyan. Alagad dai nia ginagamit an relihiyosong mga ministro kan Dakulang Babilonya, an pankinaban na imperyo nin falsong relihiyon. An totoo, sinda madali nang mawaran nin trabaho. Iyan mangyayari kun an Dakulang Babilonya mismo paraon na. Sa paghula kaini, an Kapahayagan 16:19 nagsasabi: “Nagkatolo an dakulang siudad, asin naholog an mga siudad kan mga nasyon; asin nagirumdoman an Dakulang Babilonya sa atubang nin Dios, tanganing tawan sia kan kopa nin arak kan kabangisan kan saiyang kaanggotan.”
5. Ano an nangyari sa suanoy na Babilonya kan 539 B.C.E., asin kumusta man an mga ministro asin iba pang mga parasuportar sa mga relihiyon kan Dakulang Babilonya?
5 Kun siring ano man an dapit sa mga tawo na nagdadanay na maimbod na mga parasuportar sa mga relihiyosong palakaw na pinaglilingkodan kan propesyonal na mga ministro kan Dakulang Babilonya? Bueno, konsiderara an nangyari kan banggi nin 539 B.C.E. kan si Hadeng Belsasar asin an saiyang imbitadong mga kagurangnan nag-oomaw sa mga dios nin Babilonya sa sarong pambihirang bangkete bilang paglaban sa nakasalikop na mga Medo asin Persiano. Primero, tinawan nin paisi an mga nagpipiyesta kan maheling ninda an milagrosong surat sa lanob kan kuwarto kan bangkete asin nadangog an pakahulogan na itinao kan propeta ni Jehova na si Daniel. Dangan, kadungan kan pagbagsak nin Babilonya kan mismong bangging idto, an hade asin maliwanag na an iba pang nagpipiyesta na nag-oomaw sa falsong mga dios ginadan kan suminalakay na mga nananakop. (Daniel, kapitulo 5) An kaagid na kapahamakan naghahalat sa mga ministro asin sa mga nagdadanay na maimbod sa relihiyosong mga palakaw kan Dakulang Babilonya.
An mga Ministro Kaipuhan na Gayo
6. (a) Sa delikadong panahon na ini, ano an seguradong itatagama nin Dios para sa pamilya nin tawo? (b) Kasuarin natapos an Mga Panahon nin mga Hentil, asin ano an isinabi ni Jesus manongod digdi?
6 Mayo nin siisay man na makakapagduda sa katotoohan na kita ngonyan nabubuhay sa pinakadelikadong panahon sa kasaysayan nin tawo poon kan panglobong Baha kan aldaw ni Noe. (2 Timoteo 3:1-5) Kaya kaipuhan na magkaigwa ngonyan nin tunay na mga ministro kan Dios ni Noe. Segurado na kun paanong si Jehova nagtao nin mga patanid sa mga tawo kan panahon ni Noe asin sa mga nagpipiyesta sa bangkete ni Belsasar, Sia igwa man nin apretadong mensahe para sa pamilya nin tawo poon kan 1914, kan pumutok an enot na guerra mundial. An totoo, sa mahiwas na nalalakopan sa publiko, sa laog nin mga apat na dekada an mga lingkod nin Dios nagtokdo sa taon na iyan bilang nagtanda sa katapusan kan Mga Panahon nin mga Hentil, na dapit dian si Jesus nagsabi: “An Jerusalem babatayan kan mga Hentil, sagkod na an mga panahon kan mga Hentil maotob.”—Lucas 21:24, King James Version.
7. (a) Sagkod kasuarin na binatayan nin mga nasyon na bakong Judio an daganon na Jerusalem? (b) Ano an sa katapustapusi boot sabihon ni Jesus kan sia magtaram manongod sa ‘pagbatay kan mga Hentil’ sa Jerusalem?
7 Sa laog nin mga 53 na taon pakalihis nin 1914, o sagkod kan Anom na Aldaw na Guerra kan 1967, an daganon na Jerusalem padagos na binatayan nin mga nasyon na bakong Judio. Alagad malinaw na an boot sabihon ni Jesus bakong an Judiong Jerusalem ngonyan kundi an ipinagrepresentar kan siudad na iyan sagkod kan 607 B.C.E. Asin ano an ipinagrepresentar kaiyan? Tara, an Kahadean ni Jehova Dios paagi sa saiyang linahidan na Hade kan makahadeng harong ni David!—Lucas 1:32; 1 Cronica 29:11.
8. Kiisay itatao ni Jehova an kahadean ni David, asin taano ta dai maheheling nin mga tawo an ihinulang pagtukaw sa trono?
8 Si Jesu-Cristo iyo an tatawan ni Jehova Dios kan kahadean kan saiyang apoon na si David kan suanoy. Sa atubang ni Pilato bilang hokom, si Jesus nagsabi na an Saiyang Kahadean bakong gikan sa kinaban na ini, na an boot sabihon iyan magigin langitnon. (Juan 18:36) Kaya makatanosan sana, an maabot na pagtukaw ni Jesus sa Kahadean sa katapusan kan Mga Panahon nin mga Hentil mangyayari sa dai naheheling na kalangitan. Kaya an saiyang pagtukaw sa trono dai maheheling nin mga mata nin tawo, asin iyan an dahelan na kita asin an mga nasyon na Hentil dai literal na nakaheling sa saiya na natutukaw sa trono sa saiyang may diretso, itinao nin Dios na Kahadean kan 1914. An mga nasyon na iyan tunay na dai nagtubod na nangyari an okasyon na ini, sa ibong kan bagay na iyan ibinalangibog kan banwaan ni Jehova poon kan mga taon nin 1870.
9. (a) Ano an ginibo kan mga nasyon na dai iniintindi an mensahe kan Kahadean? (b) Huli sa ginibo kan mga nasyon kan 1914, ano an kinaipuhan?
9 Dai iniintindi an mensahe kan Kahadean, kan tigholog nin 1914 an mga nasyon nagguerra. Arog kan ihinula sa Salmo 2:1-12, pinatunayan ninda na sinda mga kaiwal ni Jesus, na habong “humadok” sa bagong tumukaw na Hade bilang tanda kan saindang pagpasakop asin kaimbodan. Kaya, kinaipuhan na otobon an Salmo 110:1, 2, na dian mababasa niato: “An sabi ni Jehova sa sakong Kagurangnan: ‘Tumukaw ka sa sakong too sagkod na ibugtak ko an saimong mga kaiwal na tongtongan kan saimong mga bitis.’ An sogkod kan saimong kakosogan ipapadara ni Jehova gikan sa Sion, na nagsasabi: ‘Mandaog ka sa tahaw kan saimong mga kaiwal.’”
10. (a) Sa irarom nin anong mga kamugtakan na si Jesus nagpoon na maghade kan 1914? (b) Siisay an nagrerepresentar ki Jehova sa ika-20 siglo?
10 An Judiong mga paratumang nagpaheling kan saindang pakikiiwal sa mga apostol ni Jesus kan si Jesus tumukaw sa too nin Dios tanganing halaton an panahon na pumoon na maghade sa tahaw kan saiyang mga kaiwal. (Gibo 4:24-26) Katimbang kaiyan, sa tahaw nin mga kaiwal na pinonan kan pinamuraway na si Jesu-Cristo an saiyang paghade sa katapusan kan Mga Panahon nin mga Hentil kan 1914. Kaya sa ika-20 siglong ini, arog kan mga nakaagi, sa tahaw nin mga kaiwal na si Jehova nagkaigwa nin mga paradara kan saiyang mensahe, an saiyang tunay na mga ministro kan Kahadean. Sinda an saiyang mga saksi.—Isaias 43:10-12.
Pagdepensa sa Satong Kuwalipikasyon Bilang mga Ministro
11. Siisay an nag-aangat sa autorisasyon kan mga Saksi ni Jehova bilang ordenado nin Dios na mga ministro kan Kahadean?
11 Poon pa kaidto, kinaipuhan na para sa tunay na ordenado nin Dios na mga ministro kan Kahadean na idipensa an saindang autorisasyon sa ministeryo. Iyan totoo nanggad sa mga Saksi ni Jehova sa ika-20 siglong ini. An saindang kuwalipikasyon bilang maninigong ordenadong mga ministro nin Dios inangat asin dai pinaniwalaan. Niisay? Partikularmente kan mga graduwado sa mga seminaryo nin teolohiya kan Kakristianohan na nag-aako nin sertipikasyon nin ordenasyon asin nagigin suweldohan na mga klerigo. Ibinibilang ninda an saindang sadiri na nakapag-adal nin tama asin may igong kuwalipikasyon na magin an iyo sanang propesyonal na mga ministro kan Dios kan Biblia.
12. An autorisasyon niisay na prominenteng Kristiano kan enot na siglo an inangat, asin ano an dapat na magin pagheling sa siisay man na nagdadara nin laen na maogmang bareta?
12 An kamugtakan nakakaagid kan enot na siglo C.E. Sa Romanong probinsia nin Galacia, dawa an pinasabngan na kagsurat sa mga kabanga sa libro kan Kristianong Griegong Kasuratan napaatubang sa sarong situwasyon na nakaangat sa saiyang kuwalipikasyon bilang apostol ni Jesu-Cristo, ta iyan nagbugtak sa pagduda kan katamaan kan saiyang itinotokdo bilang Kristianismo. Kaya napiritan siang sabihan an mga taga-Galacia: “Ako nagngangalas na kamo madalion na minabulag sa Saro na nag-apod sa saindo paagi sa dai na kutana maninigong kabootan kan Cristo pasiring sa laen na maogmang bareta. Alagad ta iyan bakong laen; kundi igwa nin nagkapira na nanriribok sa saindo asin boot na raoton an maogmang bareta manongod kan Cristo. Alagad, minsan pa kun kami o an sarong anghel hale sa langit magpahayag sa saindo bilang maogmang bareta nin bagay na lihis sa ipinahayag niamo sa saindo bilang maogmang bareta, sumpaon nindo sia. Arog kan isinabi niamo sa enotan, sinasabi ko man liwat ngonyan, An siisay man na nagpapahayag sa saindo bilang maogmang bareta nin bagay na lihis sa inako na nindo, sumpaon nindo sia.”—Galacia 1:6-9.
13. Taano ta dai maninigong pinagdudahan kan mga taga-Galacia an autoridad ni Pablo?
13 Totoo, an kagsurat na iyan, si apostol Pablo, dai enot na nakanood kan Kristianong mga katokdoan paagi sa personal na pakikiiba ki Jesu-Cristo o sa Saiyang 12 apostol. Kan huri, si Pablo nakaibaiba ni apostol Pedro, o Cefas. (Juan 1:42; Galacia 1:18, 19) Alagad bilang pagdepensa sa saiyang pagigin kuwalipikadong ministro kan maogmang bareta gikan sa Dios paagi ki Cristo, ikinasabi ni Pablo sa daing karigonan na mga Kristianong taga-Galacia: “Iyo, kan maaraman ninda an dai na kutana maninigong pagkaherak na itinao sa sako, si Santiago asin Cefas patin Juan, an mga ibinibilang na harigi, nag-oyon na ako asin si Bernabe mag-iba, na kami maninigong magduman sa mga nasyon, alagad sinda sa mga tinuri.” (Galacia 2:9) Kaya maninigong ihinapot kutana kan mga taga-Galaciang idto sa saindang sadiri: Kun an mga disipulo ni Jesus na si Santiago, Pedro asin Juan minimidbid si Pablo bilang paradara kan tunay na maogmang bareta, ano an basihan niato sa pag-angat sa saiyang mensahe asin pagrayo dian?
14. Taano ta bakong makangangalas na an pagkaministro kan mga Saksi ni Jehova inaangat?
14 Alagad kumusta man an banwaan ni Jehova ngonyan? Bueno, mantang an tawong kapareho ni Pablo napiritan na ipagdepensa an saiyang mga kuwalipikasyon bilang ministro nin Dios asin ni Cristo, taano man kita ta mapapangalas kun kita, bilang nagdusay, bautisadong mga saksi ni Jehova, inaangat asin kaipuhan na ipagdepensa an satong kamugtakan bilang mga ministro kan Kahadean? Siyempre, kapareho ni Pablo, an siring na daing pasisikadan na pag-angat sa sato daing ano man na pinatutunayan.
Pati si Jesus Inangat
15. Siisay, na mas halangkaw an ranggo ki sa mga apostol, an inangat man kun dapit sa saiyang autoridad sa pagtotokdo, asin sa kiisay nia iinatribuwir an saiyang autoridad?
15 An Kagurangnan na Jesu-Cristo mismo inangat asin napaatubang sa pagsayuma kan saiyang sadiring banwaan na akoon sia bilang autorisadong ministro nin Dios. Halimbawa, mababasa niato: “Kan kabangaan na an kapiyestahan [nin mga tabernakulo], si Jesus naglaog sa templo asin nagpoon na magtokdo. Kun siring nagngaralas an mga Judio, na an sabi: ‘Taano ta may kaaraman an tawong ini sa mga letra, mantang dai man sia nag-adal sa mga paadalan?’” Hampangan na inatubang ni Jesus an angat na iyan, na an sabi: “An sakong itinotokdo bako ko, kundi kaidtong nagsugo sa sako. Kun an siisay man boot na gumibo kan Saiyang pagboot, makakaaram sia kan katokdoan kun baga iyan sa Dios o kun baga ako nagtataram nin hale sa sako man sana. An nagtataram nin hale sa saiya man sana naghahanap kan saiyang sadiring kaomawan; alagad an naghahanap kan kamurawayan kaidtong nagsugo sa saiya, an sarong iyan totoo, asin daing kabikoan sa saiya.”—Juan 7:14-18.
16. Taano ta naghona an relihiyosong mga namomoon sa Judaismo na may dahelan sindang pagdudahan an abilidad sa pagtotokdo ni Jesus?
16 An pagheling ki Jesu-Cristo kan relihiyosong mga namomoon sa Judaismo ordinaryong Galileo sana. Siyempre, dai ninda pinaghona na dai sia tataong magbasa huli sa dai pag-eskuwela, nangorogna sa nakakaagid sa sarong teolohikong seminaryo. Total, ikinapaheling na ni Jesus na nababasa nia an teksto kan Hebreong Kasuratan. (Lucas 4:16-21) An dai maako kan mga Judiong idto na taga-Judea asin Jerusalem iyo na an dating panday na iyan bakong teologo asin dai puwedeng ipantay sa mga eskriba, Fariseo, asin Saduceo kan saindang nasyon. Kun siring, taano ta mangangahas sia sa publiko na garo nakakaaram kun ano an kahulogan kan Hebreong Kasuratan asin kun paano iyan minaaplikar, na nagtataram na igwa nin siring na autoridad? Ini an dahelan na an mga Judiong idto nagin sobra kabongog sa espirituwal tanganing madangog an tanog kan banal na katotoohan. Sobra an saindang kapaabhawan tanganing akoon an gikan sa sarong tawo na dai naggraduwar sa teolohikong paadalan.
“Tinokdoan ni Jehova”
17. Kun dapit ki Jesu-Cristo, siisay na Paratokdo an nalingawan kan Judiong mga namomoon sa relihiyon, asin anong klaseng iskolar si Jesus?
17 Nalingawan kan madonong sa kinaban na mga Judiong idto an Saro na iyo an tunay na nagtokdo ki Jesu-Cristo. Tara, an abilidad ni Jesus bilang sarong paratokdo gikan sa “kadarudakulaing paratokdo sa gabos,” si Jehova Dios! (Job 36:22, Today’s English Version) Sa pagtaram manongod sa Dios sa katongdan na ini, si Jesus nagsabi: “Kun ikinaitaas na nindo an Aki nin tawo, dangan maaaraman nindo na ako iyo sia, asin na dai ako naggigibo nin ano man sa sakong sadiring kabotan; kundi siring sa pagkatokdo sa sako kan Ama na itinataram ko an mga bagay na ini.” (Juan 8:28) Kaya pinatunayan ni Jesus na sia an pinakaprimerong eskuwela sa unibersal na eskuwelahan kan kaharohalangkaweng Paratokdo na nabubuhay. Ini kaomawan sa Saro na nagtokdo sa saiya. Bakong makangangalas na an mga Nazareno nagsabi manongod sa saindang dating kahimanwa: “Saen kinua kan tawong ini an kadonongan na ini asin an makangangalas na mga gibong ini?”—Mateo 13:54.
18. (a) Anong klaseng paratokdo an maninigo niatong mawoton? (b) Ano an isinabi ni Jesus manongod sa kadarudakulaing Paratokdo asin sa mga tinotokdoan Nia?
18 Tanganing masabotan an Biblia, boot asin kaipuhan niato an pinakamarahay na paratokdo. Asin an paratokdong iyan iyo an Nagpasabong kan dai mapapantayan na Libro. Sa pakikipag-olay sa mga miembro kan naheheling, daganon na organisasyon kan Paratokdong iyan kaidtong panahon na sia nasa daga, si Jesus nagsabi: “Dai nin makakadolok sa sako kun dai sia dagkahon kan Ama, na nagsugo sa sako, asin bubuhayon ko sia liwat sa huring aldaw. Nasusurat sa Mga Propeta, ‘Asin sinda gabos totokdoan ni Jehova.’ An gabos na nakadangog sa Ama asin nakanood minadolok sa sako.” (Juan 6:44, 45) Kinokotar dian ni Jesus an Isaias 54:13, na nagsasabi: “Asin an saimo gabos na aki magigin mga tawo na tinokdoan ni Jehova, asin magsosopay an katoninongan kan saimong mga aki.”
19. Kiisay na “mga aki” an totokdoan ni Jehova?
19 Minsan siring, ihinahapot niato: Kiisay na “mga aki” an “mga tawo na tinokdoan ni Jehova”? An makahulang panugang iyan itinao sa sarong piguratibong “babae,” na magigin ina nin “mga aki.” An “babaeng” ini iyo an kinakaolay sa Isaias 54:1, na dian sinasabi: “‘Mag-awit ka, ikang bawas na babae na dai nag-aaki! Maogma ka na may pag-awit asin magkurahaw ka sa kaogmahan, ika na dai nakamate nin kolog nin pangangaki, huli ta an mga aki kan sarong pinabayaan dakol pa ki sa mga aki kan babaeng daing agom,’ an sabi ni Jehova.”
20. Huli sa 2 Corinto 13:5, ano an dapat na padagos na gibohon kan nagdusay na mga Kristiano, asin ano an koneksion kaini sa saindang kuwalipikasyon bilang mga ministro kan Kahadean?
20 Mantang si Jehova iyo an Saro na nakikipag-olay sa “babaeng” ini asin iyo an magigin Paratokdo sa saiyang “mga aki,” sierto na sia an piguratibong Agom kan babaeng ini, asin an babaeng ini an saiyang garo-babaeng langitnon na organisasyon. An saiyang “mga aki” mga estudyante kan “kadarudakulaing paratokdo sa gabos.” Siyempre, mahalaga na an “mga aking” iyan, an linahidan na mga parasunod ni Jesus, asin an saindang kairiba, an “dakulang kadaklan,” padagos na isagibo an instruksion na itinatao ni Jehova. (Kapahayagan 7:9) Tunay na iyan sarong paagi na makuyog an hatol ni Pablo: “Padagos na baloon kun baga kamo nasa pagtubod, padagos na patunayan kun ano man nanggad kamo.” (2 Corinto 13:5) Kun an nagdusay, bautisadong mga Kristiano nagpapadagos na gibohon ini asin nagdadanay na maigot na mga estudyante kan kadarudakulaing Paratokdo, sinda maninigong magkaigwa kan kinakaipuhan na kuwalipikasyon bilang mga ministro kan Kahadean na autorisado ni Jehova. Sa masunod hehelingon niato kun paano pinatutunayan kan mga ministro nin Dios an saindang kuwalipikasyon.
Ano an Sasabihon Nindo?
◻ Paano nindo patutunayan na si Jehova may mga ministro sa daga?
◻ Ano an ipinagrepresentar kan Jerusalem na “binatayan kan mga Hentil”?
◻ Mantang dai inintindi kan mga nasyon an Kahadean, ano an kinaipuhan na gibohon ni Jesus?
◻ Taano ta bakong makangangalas na inaangat an pagkaministro kan mga Saksi ni Jehova?
◻ Ano an liningawan kan Judiong mga namomoon sa relihiyon na nag-angat sa abilidad ni Jesus sa pagtokdo?