Kun Paano Mamimidbid an Tunay na mga Ministro nin Dios
IYAN nangyari kan 1948. An duwang ministro, mga Saksi ni Jehova, nagbibiyahe sa sarong rapak nang awto sa maantal na tinampo, hale sa sarong banwaan sa parteng amihanan nin España pasiring sa Kabukidan nin Pyrenees. Pasiring sinda sa pagsongko sa sarong nasosolong ministro. Pagpondo kan awto sa lugar na pinakaharani sa baryo na iniistaran kan ministro, naheling ninda na sia naghahalat sa sainda kaiba an saiyang kabayo. Alagad ta may narisa man sinda sa harani na pambihirang grupo—apat na armadong Guwardia Sibil asin sarong padi! Kan an mga ministro nagtutukad sa tugdok na dalan pasiring sa baryo, an saro sa mga Guwardia hinulbot an saiyang rebolber asin nagkurahaw, “Manos arriba!” (Itaas an kamot!) Inarestar an mga bisita. Taano? Sinabihan kan padi an mga Guwardia na an mga bisita terorista—na grabeng kaputikan! Bilang resulta, an tolong ministro ibinilanggo.
Ano an pinatutunayan kaini? Na bakong gabos na naghihingakong padi o ministro tunay na mga ministro nin Dios. An totoo, parate na may dakulang kalaenan an tunay asin falsong mga ministro. Ano an pundamental na mga kahagadan sa tunay na ministro?
An mga Kahagadan Para sa Tunay na mga Ministro
An pundamental na kahulogan kan “pagministro” “pagtao nin tabang o paglilingkod.” An tunay na mga ministrong Kristiano kaipuhan na may marigon na pagtubod na an Biblia iyo an ipinasabong na Tataramon nin Dios. (Juan 17:17) Minsan siring, an pundamental na kahagadan na iyan bakong igo. Kaipuhan na sinda igwa man nin mahiwas na kaaraman asin pakasabot sa Biblia. Alagad dai ninda dapat na gamiton an kaaraman na iyan nin paslo—para sana sa sadiri nindang pakinabang. Maninigo na sinda mahigos man na mga parahulit kan Ebanghelyo—an maogmang bareta manongod sa Kahadean nin Dios asin an paglaom na buhay na daing katapusan sa sarong paraisong daga.—Juan 17:3; Salmo 37:11, 29.
Kulibat palan, an bagay na an mga Saksi ni Jehova naghuhulit kan maogmang bareta kan Kahadean bako sanang sa España kundi sa bilog na kinaban kaotoban kan ihinula ni Jesus para sa panahon kan katapusan kan maraot na palakaw na ini nin mga bagay. Sia nagsabi: “Asin an maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon, dangan madatong an katapusan.”—Mateo 24:14, 33, 34.
An saro pang pundamental na kahagadan para sa tunay na mga ministro iyo na, arog kan sabi ni Jesus, sinda maninigo na “bakong kabtang kan kinaban”; kun siring, maninigo sindang lumikay sa politika. (Juan 15:19) Maninigo man na sinda mapakumbaba nanggad, mamomoton, asin maboot, na perming andam na tumabang sa mga nangangaipo na maninigong tabangan.—1 Corinto 13:1, 4; 1 Pedro 5:6.
Ini seryoso nanggad na bagay. An pakamidbid sa tunay asin falsong ministro bagay na nakataya an buhay asin kagadanan. Arog iyan kaiyan kaseryoso! Sa saiyang bantog na Sermon sa Bukid, si Jesus nagpatanid: “Magmaan kamo sa mga falsong propeta na madolok saindo sa gubing nin karnero, alagad sa laog sinda maringis na mga lobo.”—Mateo 7:15.
Minsan siring, an tunay na mga ministro nin Dios bako sanang may mga obligasyon asin kahagadan na dapat na aboton kundi may dakol man na pribilehiyo. An totoo, bilang sarong grupo, sinda an may pinakadakulang pribilehiyo, an pinakamapanggana, asin an pinakamaogmang grupo sa ibabaw kan daga ngonyan, arog kan maheheling nindo sa minasunod na artikulo.