Mga Hapot Hale sa mga Parabasa

◼ An natatada daw sa mga linahidan kan Kagurangnan sa daga kabtang kan langitnon, garo-agom na organisasyon ni Jehova, an “Jerusalem na nasa itaas”?

An mga linahidan sa daga puwedeng apodon na naheheling na kabtang kan organisasyon nin Dios, an saiyang unibersal na pamilya nin intelihenteng mga linalang.

Bilang mga indibiduwal na “namundag giraray,” sinda nagigin espirituwal na mga aki ni Jehova. (Juan 3:3, 5; Roma 8:15-17) Si Jehova an saindang Ama. Pero igwa man sinda nin “ina,” huli ta si apostol Pablo nagsurat na “an Jerusalem na nasa itaas . . . an satong ina.” Segurado na ini nangangahulogan nin langitnon na organisasyon nin maimbod na mga espiritu na ibinibilang ni Jehova na piguratibong “agom na babae.” (Galacia 4:26) Kun akoon na nin linahidan na mga Kristiano an saindang langitnon na balos, sinda aktuwal na nagigin kabtang kan langitnon na organisasyon na iyan.—Kapahayagan 4:4; 14:1-5.

An linahidan na natatada sa daga bako pang literal na kabtang kan “Jerusalem na nasa itaas.” Alagad huli sa saindang pambihirang kamugtakan bilang espirituwal na mga aki na may paglaom sa langitnon na buhay, asin huli ta sinda nagrerepresentar sa langitnon na “agom na babae” nin Dios, kun beses iiniiba sinda ni Jehova sa naglaladawan na paagi sa mga pagboot, hula, mga panuga, asin mga pagranga na sinasabi sa saiyang garo-agom na organisasyon sa langit.

Ikakailustrar niato ini paagi sa mga tataramon na may labot sa suanoy na Israel. Paagi ki Isaias, ilinaladawan ni Jehova an sarong babae na nakakadenahan, nasa kabokabo, kaipuhan na pukawon asin magpasirang nin liwanag. (Isaias 51:9, 14; 52:1, 2; 60:1) An mga kamugtakan na iyan dai nangyari sa tahaw kan maimbod na espiritung mga aki ni Jehova na minakompuwesto sa saiyang langitnon na “babae.” Minsan siring, iyan nangyari sa nasyon nin Israel. Kan an mga Israelitas makabutas sa pagkaoripon sa Babilonya kan 537 B.C.E., sinda napagmata, tuminindog hale sa kabokabo, asin nagpoon na ipaheling an liwanag ni Jehova. An itinogdok giraray na Jerusalem (na nagrerepresentar sa nasyon) garo agom na babae na inabandono alagad ngonyan binawi na asin nagpapaluwas nin mga aki, an mga Judio sa nabuhay liwat na nasyon. (Isaias 54:1-8; 60:1-22; 66:7-14) Kaya an mga tataramon sa Isaias manongod sa situwasyon kan “babae” (na an “agom na kagsadiri” iyo si Jehova) ilinabot an daganon na nasyon na nagrerepresentar sa saiya.

Ngonyan tawan niato nin atension an espirituwal na nasyon na aakoon nin Dios kun sia (asin an saiyang langitnon na “babae”) dai na ginagamit an Israel sa laman. (Galacia 6:16) Pakatapos na magin “bawas” sa laog nin dakol na siglo, an “Jerusalem na nasa itaas” nagpoon na magpaluwas nin espirituwal na mga aki. Si Jesus an enot na ilinuwas, kan 29 C.E., na susundan nin 144,000 na iba pa, poon sa mga apostol asin nagpapadagos sagkod sa satong panahon. (Galacia 4:21-31) Sa halipot na panahon sa kapinonan kan siglong ini, an natatada sa espirituwal na mga Israelitas napadara sa mga impluwensia asin garo baga nabihag. Dangan, kan 1919, ilinuwas sinda sa pagkabihag sa Babilonya bilang bagong mamundag na nasyon sa espirituwal na daga. Kaya, maheheling niato na an makahulang mga tataramon ni Isaias manongod sa suanoy na Jerusalem igwa nin katimbang sa espirituwal na Israel sa daga.

Horophoropa man an Kapahayagan 12:1-17. Kan matapos an Mga Panahon nin mga Hentil kan 1914, ipinangaki kan langitnon na “babae” nin Dios an gobyernong Kahadean bilang “omboy na lalaki.” An ihinolog na si Satanas “naanggot sa babae.” Alagad ta an saiyang pagsalakay bakong direktang tumang sa garo-agom na organisasyon nin Dios sa langit, na dai na nia madudumanan. Imbes, si Satanas nakipaglaban “sa mga natatada kan saiyang banhi” na nagrerepresentar sa saiya digdi sa daga.

Kaya, kun paano kaidtong nakaagi sa daganon na Israel, siring man sa espirituwal na Israel. An situwasyon sa “Jerusalem na nasa itaas” naheheling sa tahaw kan saiyang mga aki digdi sa daga. Sa praktikal na sentido, an mga pagboot, pagtatanos, pagranga, asin mga panuga na itinatao sa langitnon na babae ni Jehova, sa pangenot nakakaapektar sa mga nasa daga na nagrerepresentar sa saiya asin igwa kan paglaom na magin kabtang kan langitnon na organisasyon nin Dios.

◼ An mga kabilang daw sa “dakulang kadaklan” nagigin kabtang kan unibersal na organisasyon ni Jehova?

Ngonyan, bago an “dakulang kahorasaan,” an gabos na Saksi ni Jehova maogmang naglilingkod sa Dios na may pagkasararo. (Mateo 24:21) Mayo nin pagkabaranga huli sa bagay na an nagkapira linahidan nin espiritu asin naglalaom na paduman sa langit, mantang an kadaklan may paglaom sa buhay na daing sagkod sa daganon na paraiso. Arog kan ipinarisa ni Jesus, an “mga karnero” asin an “ibang karnero” pareho magkakasararo sa “sarong aripompon.” (Juan 10:11, 16) Kaya, an presenteng organisasyon nin mga lingkod ni Jehova kompuwesto kan duwang grupong ini, na may duwang kaaabtan.

Natanaw ni Jehova patienot pa na an saiyang babae magkakaigwa nin siring na prosperidad. Ipinaheling nia na an mga tawo hale sa gabos na nasyon, an mga bakong espirituwal na Israelita, magkakatiripon sa dakulang kabilangan. (Isaias 60:1-22; 61:5-9) Ilinaladawan kan libro nin Kapahayagan “an sarong dakulang kadaklan, na dai nin siisay man na makakabilang, hale sa gabos na nasyon asin tribo asin banwaan patin tataramon, na nagtitindog sa atubang kan trono asin sa atubang kan Kordero.” An mga ini an igwa nin daganon na paglaom, bakong kabilang kan espirituwal na nasyon nin mga linahidan na partikularmenteng nagrerepresentar sa unibersal na organisasyon ni Jehova ngonyan. Pero, an “dakulang kadaklan” nagtitindog sa atubang kan trono nin Dios asin kan Kordero na may sulot na mga gubing na pinaputi paagi sa paghugas kaiyan sa dugo kan Kordero. Marahayon nanggad an kamugtakan ninda minsan ngonyan!—Kapahayagan 7:9-17.

An mga kabilang sa “dakulang kadaklan” binalo man kun dapit sa saindang integridad. An saindang padagos na kaimbodan ngonyan asin sagkod sa Sangribong Taon na Paghade asin sa ultimong pagbalo magbubunga kan pagpahayag sa sainda ni Jehova na matanos bilang sangkap na mga tawo, kaiba an mga binuhay liwat na magigin kabtang kan “ibang karnero” ni Jesus. Mantang sinda “bubutasan man hale sa kaoripnan nin kalapaan,” kakamtan ninda an “mamuraway na katalingkasan kan mga aki nin Dios.” (Roma 8:21) Sa panahon na iyan sinda, kapareho ni Adan asin Eva kan enot, magigin naheheling na kabtang kan unibersal na organisasyon ni Jehova. Sinda magigin an sangkap, intelihenteng mga aki ni Jehova asin kan saiyang garo-agom na organisasyon sa langit.