Pagbawi sa Kosog, na Dai Nanluluya

“Sia nagtatao nin kosog sa napapagal; asin sa saro na mayo nin dinamikong kosog saiyang pinadadakol an bilog na puwersa.”—ISAIAS 40:29.

1, 2. Paano nindo ikakailustrar an pagkakapareho kan mga Kristiano sa mga paradalagan sa maraton?

SARONG aga nin Oktubre kan 1984, an garo dagat na katawohan na kompuwesto nin mga 16,000 na nakikipagkontest uminulakbo sa mga tinampo para sa pagpopoon kan Maraton sa Siudad nin Nueva York. Mga 26.2 milyas (42.2 km) an rayo kan sagkodan. An mayo sa kapanahonan na mainit na aldaw na idto nin tigholog may darang nakakapungot na init asin grabeng hanglas na nakapaluya sa mga paradalagan asin nakabalo sa saindang pakatagal. An paorumbasan nagin nakapapagal na pakipaglaban minsan para sa mga pinakamatibay na parakawat. An dakol na paradalagan nanluya asin puminondo na; haros 2,000 an dai nakaabot sa sagkodan. An mga nakaabot nakapanggana sa masakit na gayong mga kamugtakan.

² An mga Kristiano nasa paorumbasan man. An premyo? Buhay na daing katapusan. Asin arog kan paradalagan sa maraton, sinda kaipuhan na makipaglaban sagkod sa katapusan. Kaipuhan an pakatagal. An kosog kaipuhan na mapagdanay asin an kapagalan kaipuhan na likayan. An pakipag-umbasan niato para sa buhay bakong kapareho nin marikas na karera sa halipot na distansia kundi, imbes, kapareho nin karera na halawig an distansia. Si Pablo nagsabi sa saiyang mga kapwa Kristiano sa Corinto: “Dai kamo nakakaaram na an mga paradalagan sa paorumbasan gabos nagdadalagan, alagad ta saro sana an nag-aako kan premyo? Dumalagan kamo sa paagi na kamtan nindo iyan.” (1 Corinto 9:24) An pagdalagan nin mga Kristiano may maigot na paghihingoa.—Lucas 13:24.

3. Paano sana mapagdadanay nin mga Kristiano an mabagsik na rikas sagkod na matapos ninda an paorumbasan?

³ Alagad tibaad iniisip nindo: ‘Siisay an makakahimong mapagdanay an siring na rikas tanganing makatapos sa paorumbasan?’ Mayo sa sato an makakahimo kaiyan sa sadiri niatong kosog. Tanganing kamtan an premyo, kaipuhan na kumua kita sa mismong Burabod nin dinamikong kosog, si Jehova Dios.—Job 36:22; Salmo 108:13.

Si Jehova—An Burabod nin Dinamikong Kosog

4. Sono ki propeta Isaias, taano ta makakasarig kita sa kakayahan ni Jehova na tawan nin kosog an saiyang mga lingkod?

⁴ Daing duwa-duwa na kaya ni Jehova na tawan nin kosog an saiyang mga lingkod. Paagi sa ngoso kan saiyang propetang si Isaias, an Makakamhan sa gabos nagtaram manongod sa kadaihan nin kasagkodan kan Saiyang mga kakayahan asin sa kadaihan nin kaagid kan Saiyang makapangyarihan na mga gibo. “Tingagan an saindong mga mata asin helinga nindo,” sabi Nia. “Siisay an naglalang kan mga bagay na ini? Iyan iyo an Saro na nagpapaluwas kan saindang hukbo nin oyon sa kabilangan, na gabos inaapod nia sa mismong ngaran. Huli sa kadakolan nin dinamikong kosog, mantang sia man makosog sa kapangyarihan, ni saro sa sainda mayong mawawara. . . . Dai mo naaraman o dai mo nadangog? Si Jehova, an Kaglalang kan mga kaporoporohi kan daga, Dios sagkod sa panahon na daing katapusan. Dai sia nanluluya o napapagal. Dai marorop an saiyang pakasabot.”—Isaias 40:26-28.

5, 6. Tumao nin mga halimbawa kan ebidensia nin dinamikong kosog ni Jehova.

⁵ Magpoon sa may kasagkodan sagkod sa daing kasagkodan, makangangalas nanggad an pagpaheling kan kapangyarihan ni Jehova sa paglalang! Halimbawa, horophoropa an materyales na gikan dian ginibo an gabos, pati kita—an atomo. An mga iyan saraditon na an sarong toro nin tubig igwa nin 100 bilyon bilyones na atomo (Amerikanong sistema nin pagbilang). Alagad ta makangangalas, nasa nukleo nin mga atomo an igong enerhiya tanganing magpaluwas, sa sarong kaso, nin sarong putok na may igong kosog tanganing malabot an daga sa rarom na 32 na eskalon asin sa lakbang na un-kuwarto nin sarong milya.

⁶ Sa ibong naman kan grado nin mga sokol, helinga an aldaw. An dakulaon na nuklear na hornong ini, na binilyon na tonelada an gabat, iyo an nagpapainit sa satong sistema solar. Iyan pinalalaad kan enerhiya na hale sa saradit na atomo. Minsan ngani an gabos na buhay sa daga—mga pananom, hayop, asin tawo—nagdedepende sa enerhiya na hale sa dakulaon na plantang iyan sa langit, saditon sanang kabtang kan enerhiya kan aldaw an aktuwal na nakakaabot sa daga. Pero, iyan bastante na tanganing magsuportar sa buhay. Sa saiyang librong Astronomy, an astronomong si Fred Hoyle nagsurat: “An saditon na kabtang kan enerhiya kan Aldaw na minaabot sa Daga—na kinakarkulong mga limang parte sa sanggatos na milyon milyones—mga 100,000 na beses na mas makosog ki sa gabos na enerhiya na ginagamit sa mga industriya kan kinaban.”

7. Ano an maninigong magin saboot niato manongod ki Jehova pakatapos na horophoropon an kosog na hayag sa saiyang mga linalang?

⁷ Minsan siring, an aldaw saro sana sa binilyon na bitoon na minakompuwesto sa satong galaksiang Milky Way—asin iyan bitoon na kasiyahan sana an pagkadakula. Dugang pa, an mga astronomo nagkakarkulo na igwa nin mga 100,000,000,000 na galaksia sa midbid na uniberso. Ini haros dai marorop, bako daw? Bakong makangangalas na an tawong si Job, pakapaghorophorop kun paano si Jehova ‘inunat an kalangitan nin solo sana,’ nagsabi na an Dios “naggigibo nin darakulang bagay na dai marorop, asin nin makangangalas na mga bagay na dai mabilang.”—Job 9:8-10.

Kaya Kamong Pakosogon ni Jehova

8. (a) Siisay sana an puwedeng kumua nin lubos sa kosog ni Jehova, asin taano? (b) Paano nakapagpapakosog sa pagtubod an panuga sa Isaias 40:29-31?

⁸ An tunay na mga parasamba ki Jehova puwedeng libre asin biyong kumua nin kosog sa Burabod na ini nin dinamikong kosog na naglalang asin nagsusustenir sa uniberso. An mga lingkod ni Jehova puwedeng ‘pakosogon nin kapangyarihan paagi kan saiyang banal na espiritu,’ na dai natatakot na maubosan nin kosog. (Efeso 3:16; Salmo 84:4, 5) An totoo, an panggagana niato sa paorumbasan para sa buhay nasasarig sa lubos na pagsarig na kaya kitang darahon kan makakamhan na kamot nin Dios nin lihis pa sa sagkodan. Kaya nia kitang pakosogon. Arog kan sabi ni propeta Isaias manongod ki Jehova: “Sia nagtatao nin kosog sa napapagal; asin sa saro na mayo nin dinamikong kosog saiyang pinadadakol an bilog na puwersa. An mga hagbayon magruruluya asin magkakaparagal, asin an mga barobata magkakapurukan nanggad, alagad an mga nananarig ki Jehova magkakamit nin bagong kosog. Sinda maralayog na may mga pakpak na siring sa agila. Sinda madaralagan asin dai magkakaparagal; sinda maralakaw asin dai panluluyahon.” (Isaias 40:29-31) Tara, an pagbasa sana sa mga tataramon na iyan nakakapalaad na sa satong espiritu!

9. Paano kamo matatabangan ni Jehova sa ‘garo bukid’ na mga problema?

⁹ Kun napapaatubang sa garo baga darakulaon na problema na nag-uumang makaolang sa saindong kaigotan para sa tunay na pagsamba, tibaad kamo makamate na kamo saditon asin daing halaga. Dai kamo mawaran nin boot. Dumolok sa saindong makakamhan sa gabos na langitnon na Ama. Saiyang pinakokosog ‘an gabos na nananarig sa saiya.’ Dai daw kaya kan Kaglalang sa atomo na tawan nin igong dinamikong kosog an saiyang banwaan tanganing mahale an ‘mga bukid’ na iyan? Tunay na kaya nia!—Marcos 11:23.

10. (a) Anong mga bagay an puwedeng ikapagal nin mga paradalagan na Kristiano? (b) Ano an boot na gibohon sa saindo ni Satanas?

¹⁰ Sa ibong na kampi, an ibang Kristiano tibaad pagalon na sa pakikipaglaban aroaldaw tumang sa mga impluwensia kan kinaban na ipinaghahambog pa an dai pag-intindi kaiyan sa mga prinsipyong Kristiano kaya an saindang pagmate gusto na nindang manluya o pumondo sa paorumbasan para sa buhay. An helang, pinansial na pagkapierde, mga problema sa pamilya, kapungawan, o iba pang mga problema puwede man na gikanan nin panluluya nin boot. Asin an panluluya nin boot madaling makaubos sa kosog nin Kristiano, kun paanong an mahanglas na aldaw madali sanang makaubos sa kosog nin paradalagan. An dakulang Kaiwal, si Satanas na Diablo, ginagamit an siring na mga bagay tanganing probaran na raoton an saindong integridad bilang lingkod ni Jehova. (1 Pedro 5:8) Dai pagtogotan an Diablo na gibohon iyan! Maglaom sa Kaglalang kan minilyon na galaksia sa langit na tawan kamo nin bagong espirituwal na kosog. Kaya kamong tabangan ni Jehova.—Salmo 37:17; 54:4.

11. Ano an manonodan niato sa pag-atubang ni David sa mga kaolangan?

¹¹ Kun napapaatubang sa mga kaolangan, si David kaidto perming nakukua na si Jehova burabod nin bagong kosog. Napakosog giraray nin banal na espiritu, si David ‘nakakasangat’ sa ano man na pagtumang. Sia nagsabi: “Sa kaibahan mo makakadalagan ako tumang sa mga parasalakat; asin sa kaibahan kan sakuyang Dios makakasakat ako sa lanob.” Sinabi man ni David: “Paagi sa Dios kita magkakamit nin kinakaipuhan na kosog, asin saiyang babatayan an satuyang mga kaiwal.” (Salmo 18:29; 60:12) Magigibo man iyan ni Jehova para sa saindo.

Paglabanan an Espirituwal na Kapagalan

12. (a) Taano ta maninigong haleon tolos an espirituwal na kapagalan? (b) Ano an mga sintomas nin espirituwal na pagkapagal? (c) Anong mga probisyon an ginibo ni Jehova tanganing pakosogon giraray an mga napapagal na sa espirituwal?

¹² Kaipuhan na mag-alisto kita na marisa an mga tanda nin espirituwal na kapagalan dangan listo man na atubangon iyan. Taano? Huli ta an pipira sana na ‘naghihingoa nin maigot na makalaog sa piot na tata,’ o an mga paradalagan sana na nakakalihis sa sagkodan, an nagkakamit kan premyong buhay na daing sagkod. (Lucas 13:24; Filipos 3:12, 13) Siyasata an kahon na may titulong “Pirang Paagi na Mapaglabanan an Espirituwal na Pagkapagal.” Naheheling daw nindo an iba sa mga sintomas sa saindong sadiri o sa sarong miembro kan pamilya? Kun iyo, gumibo tolos nin paagi na makapagliwat. Pakosogon giraray an saindong espirituwalidad paagi sa pagkua nin kosog sa nalilistang mga probisyon ni Jehova.

13, 14. (a) Anong mga halimbawa an makatatabang na makabalik an satong espirituwal na kosog? (b) Paano an hatol nin sarong gurangan nang lingkod ni Jehova makatatabang sato na magdanay sa paorumbasan?

¹³ Mapaglalabanan nindo an tendensia na manluya paagi sa pag-arog sa mga halimbawa nin mapangganang mga lingkod nin Dios na nakatala sa Biblia. Kadakol kan mga nakatagal sagkod sa katapusan, lalaki asin babae, hoben asin gurang. Basahon an kasaysayan ninda sa mga teksto na arog baga kan Hebreo 11:4-40. Siring man, sa modernong mga panahon kadakol kan satuyang namomotan na mga tugang na lalaki asin babae na nagpapadagos na maglingkod ki Jehova na daing panluluya.

¹⁴ Si George, na nag-iistar sa parteng timog kan Estados Unidos, sarong halimbawa nin Kristianong paradalagan na dai nanluya. Pakalihis nin labing 50 taon sa paorumbasan para sa buhay na daing sagkod, sia makosog pa. Ano an hatol nia sa sato?

“Sasabihon kong may pagdodoon, magdanay sa organisasyon. Girumdomon na si Jesu-Cristo, bilang an Nombrado ni Jehova, iyo an namamahala sa organisasyon. Kaya dai manluya kun an saro na harani sa saindo dai magmaimbod. Kun igwa nin dai nindo lubos na nasasabotan o nadedepisilan kamong akoon, manarig na paghaloyhaloy iyan ikakapaliwanag. Dinara kita sagkod digdi kan organisasyon ni Jehova. Manarig na iyan magiya sa sato pasiring sa Bagong Palakaw.”—Juan 6:66-68.

15. Tanganing makapakosog sa satong espiritu an marahay na mga halimbawa, ano an kaipuhan na gibohon niato?

¹⁵ Tibaad igwa nin nagkapira sa mga namomotan na ini sa saindong kongregasyon, o puwede nindo sindang mamidbid sa mga pansirkitong asamblea. Kaolayon sinda. Makanood sa sainda. Dugang pa, an mga halimbawa nin iba pang mga maimbod makukua sa Yearbook, The Watchtower, asin iba pang publikasyon kan Watch Tower. Basahon an mga kasaysayan na ini. Helingon kun paano kamo makakakua nin kosog sa mga eksperyensiang iyan.

Kamagurangan—Magin ‘Nakapagpapakosog na Tabang’

16. (a) Paano an kamagurangan makatatabang sa mga kapwa Kristiano na makabawi nin kosog? (b) Anong pag-iingat an kaipuhan na gibohon nin kamagurangan kun nagtatao nin pagpakosog asin hatol?

¹⁶ An kamagurangan sa kongregasyon nangorognang maninigong mag-alisto na tabangan an mga miembro na nagpapaheling nin mga tanda nin panluluya nin boot. An Isaias 35:3 nagtatao nin marahay na hatol sa pagsabi: “Pakosogon nindo an maluyang mga kamot, kamo banwaan, asin pakosoga nindo an nagkukubogkubog na mga tuhod.” Alagad paano nindo magigibo mga kamagurangan an saindong kabtang dian? Primero, magin mapagmasid. Aramon an tunay na dahelan kan risang pagluya. Tumao nin praktikal, Makakasuratan na mga suhestion na iinangay sa tawong iyan. Alagad ta mag-ingat. Boot nindong pakosogon, bakong papanluyahon, an saindong tugang.a Kun siring, dai nindo ipasunod an saindong konsensia sa iba, o piriton an tawo na kumuyog sa saindong solusyon, o apodon siang Kristianong daing pagkamaygurang kun sia mag-alangan na kuyugon an saindong personal na opinyon. Kaipuhan na ibasar kan kamagurangan an saindang hatol asin pagpakosog sa Biblia. Dai ninda mamawoton na paluwayon an saindang mga kapwa paradalagan paagi sa pagtambak sa sainda nin dai kinakaipuhan na mga reglamento sa kongregasyon.—Helingon an pagkakalaen kan Mateo 11:28, 29 sa Mateo 23:2-4.

17. Paano mapaglalabanan nin kamagurangan an mga taktika ni Satanas na sa katuyohan na paluyahon an mga kapwa Kristiano?

¹⁷ An kamagurangan puwedeng makapagpaheling nin marahay na mga halimbawa bilang mga parasunod ni Cristo paagi sa pagigin listong mag-omaw sa mga miembro kan kongregasyon. Ipamate sa sainda na sinda tunay na namomotan asin kinakaipuhan! An palakaw ni Satanas perming andam nanggad na ipamate sa Kristiano na sia may kakulangan. Sa panahon na ini sa saindang pakipag-umbasan para sa buhay, an satong mga tugang nagkakaipo, bakong nin mga paratatsar, kundi nin mga katood na mapakosog sa sainda pasiring sa kapangganahan. Halimbawa, kan an sarong tugang na babae na labi na sa kuwarenta kinaipuhan na pumondo sa pagpapayunir, an saiyang puso naglalaad sa pagmawot na makabuwelta sa bilog na panahon na paglilingkod. Alagad ta dai nia mahimo huli sa mga kamugtakan sa pinansial. Minsan ngani marahay man an saiyang intension, an saro sa kamagurangan naghapot saiya sa medyo may pagkritikong paagi: “Noarin ka magpapayunir giraray?” Napangalas sia sa halipot pero makahulogan na simbag kan tugang na babae: “Kun kaya nang bayadan kan agom ko an arkila.” An dai narealisar kan magurang, alagad kan huri naaraman nia, iyo na an pagpapayunir kan tugang na babae sustentado kan nakukua kan saiyang agom. Alagad kan an among kan saiyang agom paorog nang paorog na nag-aako nin trabaho na kustionable para sa Kristiano, an konsensia kan saiyang agom nagpahiro saiya na humanap nin ibang trabaho. Sa edad nia, bako nang pasil na makakua nin trabaho. Kaya kinaipuhan na akoon nia an sarong trabaho na mas hababang gayo an suweldo; kaya, kinaipuhan na an saiyang agom na babae magtrabaho nin bilog na panahon.

18. Sa anong paagi na an kamagurangan puwedeng magin “nakapagpapakosog na tabang”?

¹⁸ Basado sa eksperyensiang iyan, sasaboton daw niato na an kamagurangan maninigong mag-alangan na magtao nin hatol sa mga kapwa Kristiano? Dai. Imbes, kun kaipuhan an hatol o pagpakosog maninigong mansayan kan kamagurangan an aktuwal na kamugtakan kan saindang mga tugang asin dai sana paghelingon an panluwas na kamugtakan. (Santiago 2:15, 16) Sa paaging ini, an kamagurangan puwedeng magin “nakapagpapakosog na tabang” sa saindang kongregasyon.—Colosas 4:11.

19. Ano an magigibo nindo tanganing matabangan na dai manluya an mga payunir?

¹⁹ An nagdadakol na mga parahayag sa Kahadean rinikasan an saindang dalagan asin ngonyan mga regular payunir na. An kurahaw kan kadaklan nakakapakosog sa mga paradalagan sa maraton na bawion an saindang kosog. Kaya ano an ginigibo nindo tanganing pakosogon pasiring sa kapangganahan an mga payunir sa saindong kongregasyon? Si Doug asin Joanne ginibo an bilog na panahon na paglilingkod na karera kan saindang buhay. Nakapagpapaluya nanggad kun hinahapot sinda nin iba, “Noarin kamo magkakaaki?” o, “Noarin kamo mapirme?” Minsan siring, ano an nangyayari kun an mga kapwa Saksi nagtatao sainda nin moral na pagsuportar paagi sa pagsabi, “Ipagpadagos nindo an marahay na trabaho. Naoogma kami na kamo yaon bilang mga payunir sa satong kongregasyon”? Tara, bako sana na sinda nakakalikay sa espirituwal na kapagalan kundi natatabangan man na lumayog na siring sa mga agila sa saindang pagpapayunir!—Ikomparar an Isaias 40:31.

Kun Paano an mga Payunir Makakabawi nin Kosog

20, 21. Paano nakabawi nin kosog an nagkapira na nasa bilog na panahon na paglilingkod?

²⁰ Hinanyoga an mag-agom na ini, si Frederick asin Marian. Tatao sindang makabawi nin kosog. Sindang duwa misyonero na naglilingkod sa sarong nasyon sa Central America, asin pareho na sindang nasa edad na 70. Si Frederick nagpoon sa saiyang pagmimisyonero kan 1946, asin si Marian kan 1950. Ano an nakatatabang sainda na magpadagos sa paglilingkod ki Jehova? Si Frederick minasimbag: “Apuwera sa pagkamoot ki Jehova asin sa pagmawot na tabangan an iba, iyan an perming paggirumdom sa pasohan na buhay na daing katapusan.” An saiyang agom na babae minasimbag na ‘an mga panuga nin Dios an nagtatao samo nin kosog na magpadagos.’ Paano ninda linilikayan an panluluya? “Ano man an saindong asignasyon,” an hatol ni Frederick, “magmasibot kamo dian.” Si Marian nagrerekomendar nin “pagpapadagos sa teokratikong gibohon” asin idinugang pa: “Kun kamo naggugurang na, dai na nindo kayang gibohon an boot nindong gibohon. Iyan ikinakapungot ko, alagad ipinakikipag-olay ko iyan ki Jehova sa pamibi.” Si Frederick nagkonklusyon paagi sa marahay na hatol na ini: “Kami namimibi barobanggi asin inaarang ki Jehova na tabangan kami.”—1 Pedro 4:7.

²¹ Si Lavonia 67 anyos asin 20 anyos nang regular payunir. Sa laog kan nakaaging taon, 15 aldaw sia sa ospital asin ngonyan may tinutumar na bolong para sa saiyang puso. An pagkagadan kan nagkapirang miembro nin pamilya, pati an saiyang agom asin ama, nakapaluyang gayo sa saiyang boot. Pero sia padagos pa man giraray na nagmamaigot. Paano sia nakakabawi nin kosog? “An mas lubos na pakapakikabtang sa paghuhulit aktuwal na nakatabang,” sabi nia, “huli ta kun ako nakakapakipag-olay sa iba manongod ki Jehova, hinahale kaiyan an sakong isip sa mga problema ko asin nagtatao sako nin katoninongan sa isip asin nin kaogmahan na minagibo sa buhay na kapakipakinabang.” Dai man sia nagpapaplano na pumondo sa pagpapayunir kundi nagsasabi: “An pakaheling sa iba na nakakanood manongod ki Jehova asin sa saiyang makangangalas na mga katuyohan nagtatao sakuya nin labi-labing kaogmahan kaya dai ko man lamang iisipon na pumondo sa pagpapayunir.”—Gibo 20:35.

22. Tanganing manggana sa paorumbasan para sa buhay na daing katapusan, ano an dapat na padagos niatong gibohon?

²² Baga man kita nakakapaghingoa na magpayunir sa panahon na ini sa buhay o dai, kita gabos puwedeng magdanay na harani sa Burabod nin dinamikong kosog, si Jehova, asin sa saiyang organisasyon. Padagos kitang bumawi nin kosog paagi sa maimbod na paglilingkod sa Dios. Dangan, kapareho ni Habacuc, makakapagsabi kita: “Si Jehova an Makakamhan na Kagurangnan iyo an sakong kakosogan; asin gigibohon nia an sakong mga bitis na arog kan sa usa.” (Habacuc 3:19) Sa siring dai kita manluluya o mapapagal. Girumdomon na an paorumbasan haros tapos na. Harani na kita sa pasohan!

[Mga Nota sa Ibaba]

Mga Hapot sa Repaso

◻ Siisay sana an libreng makakakua sa dinamikong kosog ni Jehova?

◻ Ano an nagkapirang tanda nin espirituwal na pagkapagal?

◻ Anong mga probisyon ni Jehova an makatatabang sato na makabawi nin kosog?

◻ Paano an kamagurangan asin iba pa sa kongregasyon makatatabang sa mga payunir na magdanay sa “paorumbasan”?

[Kahon para sa pahina 17]

Pirang Paagi na Mapaglabanan an Espirituwal na Pagkapagal

Mga Sintomas nin Pagkapagal

◻ Kakulangan nin pagpopogol sa sadiri sa pagkakan, pag-inom, asin paghanap nin kaalingan

◻ Pagkawara kan entusiasmo sa katotoohan, espiritu nin pagkakontento na sa kamugtakan

◻ Dai paghale sa seryoso asin nagdadanay na mga pagduda

◻ Pagpabaya sa pakikiasosyar sa mga pagtiripon kan kongregasyon

◻ Kakulangan nin kaigotan asin kaogmahan sa ministeryo sa langtad

◻ Pagigin sobra kakritikal sa mga kamagurangan asin sa organisasyon

Mga Pantabang sa Pakatagal

◻ Pamibi para sa tabang kan banal na espiritu—Lucas 11:13; Galacia 5:22, 23; 1 Pedro 4:7

◻ Personal na pag-adal—Salmo 1:1, 2

◻ Paghorophorop sa Makakasuratan na mga bagay—Salmo 77:12

◻ Regular na pag-atender sa mga pagtiripon asin asamblea—Nehemias 8:1-3, 8, 10; Hebreo 10:23-25

◻ Regular na pakikikabtang sa paglilingkod sa langtad—Gibo 20:18:21

◻ Espirituwal na tabang hale sa kamagurangan kan kongregasyon, nagbibiyaheng mga paraataman—Roma 1:11, 12; Hebreo 13:17

[Retrato para sa pahina 15]

Si Jehova, an Kaglalang sa uniberso, nagtatabang sa saiyang mga Saksi na makabawi nin kosog

Retrato kan NASA