Si Jehova Nagtatao nin Kapangyarihan sa Napapagal
“An mga naglalaom ki Jehova magkakamit nin bagong kapangyarihan. Sinda maralayog na may mga pakpak na siring sa mga agila.”—ISAIAS 40:31.
1, 2. Ano an itinatao ni Jehova sa mga nananarig sa saiya, asin ano ngonyan an satong pag-oolayan?
AN MGA agila kabilang sa pinakamakapangyarihan na mga gamgam sa kalangitan. Puede sindang magsayongsayong nin hararayong distansia na dai man lamang ikinukupadkupad an saindang mga pakpak. May pakpak na puedeng bumuka nin labing duwang metro, “an Hade nin mga Gamgam,” an agilang bulaw, “saro sa pinakakahangahanga sa gabos na agila; minaitaas sa ibabaw nin mga bolod asin kapatagan, [iyan] minalayog sa laog nin dakol na oras sa ibabaw nin alitoktok nin bukid, dangan minaitaas na pabilog an layog sagkod na garo na sana tuldok sa langit.”—The Audubon Society Encyclopedia of North American Birds.
2 Nasa isip an mga kakayahan sa paglayog kan agila, si Isaias nagsurat: “[Si Jehova] nagtatao nin kapangyarihan sa napapagal; asin sa saro na mayo nin dinamikong kosog saiyang pinadadakol an bilog na puersa. An mga hagbayon manruruluya asin magkakaparagal, asin an mga barobata magkakapurukan nanggad, alagad an mga naglalaom ki Jehova magkakamit nin bagong kapangyarihan. Sinda maralayog na may mga pakpak na siring sa mga agila. Sinda madaralagan asin dai magkakaparagal; sinda maralakaw asin dai panluluyahon.” (Isaias 40:29-31) Nakararanga nanggad na maaraman na si Jehova nagtatao nin kapangyarihan na makapadagos sa mga nananarig sa saiya, na garo sinasangkapan sinda nin garo daing kapagalan na mga pakpak kan naglalayog na agila! Ngonyan, horophoropa an nagkapirang probisyon nia na tawan nin kapangyarihan an napapagal.
An Kapangyarihan nin Pamibi
3, 4. (a) Sinadol ni Jesus an saiyang mga disipulo na gibohon an ano? (b) Ano an puedeng laoman niato na gigibohon ni Jehova bilang simbag sa satong mga pamibi?
3 Sinadol ni Jesus an saiyang mga disipulo na “danay na mamibi asin dai manluya.” (Lucas 18:1) An pagsabi daw ki Jehova kan gabos na nasa satong puso talagang nakatatabang sa sato na magkaigwa nin bagong kapangyarihan asin malikayan an pag-ontok kun an mga kasakitan sa buhay garo dai na makaya? Iyo, alagad igwa nin pirang bagay na dapat niatong girumdomon.
4 Dapat kitang magin realistiko sa satong linalaoman na gigibohon ni Jehova bilang simbag sa satong mga pamibi. An sarong Kristiana na nag-agi nin grabeng depresyon kan huri nagkomento: “Arog sa ibang helang, si Jehova dai nagmimilagro sa panahon na ini. Alagad talagang tinatabangan nia kita na makapanggana asin maomayan sagkod sa mapupuede sa palakaw na ini.” Ipinaliliwanag kun taano ta nakatabang na marhay an saiyang mga pamibi, sia nagsabi pa: “Nakaaarang ako sa banal na espiritu ni Jehova nin 24 oras kada aldaw.” Sa siring, dai sinasagang ni Jehova para sa sato an mga kasakitan sa buhay na puedeng magpagabat sa sato, alagad sia talagang ‘nagtatao nin banal na espiritu sa mga naghahagad sa saiya!’ (Lucas 11:13; Salmo 88:1-3) Puedeng papangyarihon kan espiritung iyan na makaya niato an ano man na pagbalo o kasakitan na tibaad atubangon niato. (1 Corinto 10:13) Kun kinakaipuhan, puede kitang tawan kaiyan nin “kapangyarihan na lihis sa ordinaryo” tanganing makatagal sagkod na haleon na kan Kahadean nin Dios an gabos na makahahadit na problema sa bagong kinaban na haranihon nang marhay.—2 Corinto 4:7.
5. (a) anganing magin epektibo an satong mga pamibi, anong duwang bagay an kaipuhan? (b) Paano kita makapamimibi kun may linalabanan kitang kaluyahan kan laman? (c) Ano an ipaheheling ki Jehova kan satong desidido asin espesipikong mga pamibi?
5 Minsan siring, tanganing magin epektibo an satong mga pamibi kaipuhan kitang magmaigot, asin dapat kitang magin espesipiko. (Roma 12:12) Halimbawa, kun may beses na napapagal kamo huli ta may linalabanan kamong sarong kaluyahan kan laman, sa pagpoon kan kada aldaw, hagadon nindo ki Jehova na tabangan kamong makalikay na madara sa espesipikong kaluyahan na iyan durante kan aldaw. Ipamibi man iyan sa bilog na aldaw asin bago magtorog kada banggi. Kun nakababalik kamo sa dating kaluyahan, makimaherak ki Jehova na logod patawadon kamo, alagad sabihon man nindo sa saiya kun ano an dahelan kan pagkaotro asin kun ano an puede nindong gibohon tanganing malikayan an mga kamugtakan na iyan sa ngapit. An siring na desidido asin espesipikong mga pamibi ipaheheling sa “Paradangog nin pamibi” an sinseridad kan saindong pagmawot na manggana sa pakipaglaban.—Salmo 65:2; Lucas 11:5-13.
6. Taano ta tamang makalalaom kita ki Jehova na dadangogon nia an satong mga pamibi dawa kun kita tibaad nakamamate na bako nang angay na mamibi?
6 Minsan siring, may mga panahon na an mga napapagal tibaad makamate na bako nang angay na mamibi. An sarong Kristiana na nakamate nin siring nagkomento kan huri: “Iyan peligrosong marhay na kaisipan huli ta nangangahulogan iyan na kita na mismo an naghusgar sa satong sadiri, alagad bako iyan na sa sato.” Tunay nanggad, “an Dios mismo Hokom.” (Salmo 50:6) Inaasegurar kita kan Biblia na minsan ngani ‘kita tibaad kinokondenar kan satong puso, an Dios orog kadakula kisa sa satong puso asin nakaaaram kan gabos na bagay.’ (1 Juan 3:20) Nakararanga nanggad na maaraman na kun tibaad hinuhusgaran ta an satong sadiri na bako nang angay na mamibi, tibaad bakong arog kaiyan an saboot ni Jehova sa sato! Sia “nakaaaram kan gabos na bagay” manongod sa sato, kabale an mga kamugtakan sa satong buhay na tibaad nagpangyari sa sato na makamate na dai na kita nin halaga. (Salmo 103:10-14) An saiyang pagkaherak asin rarom nin pagsabot nagpapahiro sa saiya na dangogon an mga pamibi gikan sa “pusong laglag asin nanluluya.” (Salmo 51:17) Paano nia masasayumahan na dangogon an satong mga agrangay para sa tabang kun kinokondenar nia mismo “an siisay man na nagtatahob kan saiyang talinga sa nagrereklamong agrangay kan dukha”?—Talinhaga 21:13.
An Init kan Asosasyon nin Magturugang
7. (a) Ano an saro pang probisyon na itinao ni Jehova na tabangan kitang magkaigwa nin bagong kapangyarihan? (b) Makapakokosog sa sato an pakaaram nin ano manongod sa satong asosasyon nin magturugang?
7 An saro pang probisyon na itinao ni Jehova na tabangan kitang magkaigwa nin bagong kapangyarihan iyo an satong Kristianong asosasyon nin magturugang. Kanigoan kahalagang pribilehio na magin kabtang nin pambilog na kinaban na pamilya nin mga tugang na lalaki asin babae! (1 Pedro 2:17) Kun nagagabatan kita sa mga kasakitan sa buhay, an init kan satong asosasyon nin magturugang makatatabang sa sato na magkaigwa nin bagong kapangyarihan. Taano? An pakaaram na dai kita nagsosolo sa pag-atubang sa makahahadit na mga angat puedeng magin nakapakokosog mismo. Sa tahaw kan satong mga tugang na lalaki asin babae, daing duwa-duwa na may nagkapira na napaatubang sa kaparehong mga kasakitan o pagbalo asin nakaeksperyensia nin mga pagmate na arog nanggad kan sa sato. (1 Pedro 5:9) Nakapakokosog sa boot na maaraman na an satong inaagihan bakong bihira asin an satong mga saboot bakong palaen.
8. (a) Anong mga halimbawa an nagpapaheling kun paano kita makakukua nin kinakaipuhan na gayong tabang asin karangahan sa satong asosasyon nin magturugang? (b) Sa anong paagi na kamo personal na natabangan o naranga nin sarong “tunay na katood”?
8 Sa init kan asosasyon nin magturugang makanonompong kita nin ‘tunay na mga katood’ na, kun kita nasa kasakitan, makatatao nin kinakaipuhan na gayong tabang asin karangahan. (Talinhaga 17:17) Parate na an kaipuhan sana maboot na mga tataramon o mapaggirumdom na mga hiro. An sarong Kristiana na linabanan an mga pakamate nin kadaihan nin halaga nakagigirumdom: “May mga katood na nagtataram sa sako nin positibong mga bagay manongod sa sako tanganing tabangan ako na daogon an sakong negatibong mga kaisipan.” (Talinhaga 15:23) Pagkagadan kan saiyang sadit na aking babae, an sarong tugang na babae nadepisilan kan primero na umawit nin mga awit na pan-Kahadean sa mga pagtiripon kan kongregasyon, nangorogna an mga awit na nagsasambit kan pagkabuhay liwat. “Sarong beses,” an paggirumdom nia, “an sarong tugang na babae na nagtutukaw kahampang ko sa ibong na raya naheling akong naghihibi. Nagrani sia, kinugos ako, asin sinabayan ako sa pag-awit kan natatada pang kabtang kan awit. Ako nakamate nin lubos na gayong pagkamoot sa mga tugang na lalaki asin babae asin naogmang marhay na nakaatender kami sa mga pagtiripon, na narerealisar na yaon duman an tabang sa samo, duman sa Kingdom Hall.”
9, 10. (a) Paano kita makakokontribwir sa init kan satong asosasyon nin magturugang? (b) Sairisay an nangorognang nangangaipo nin nakararahay na kairiba? (c) Ano an magigibo niato tanganing matabangan an mga nangangaipo nin pampakosog?
9 Siempre, an kada saro sa sato may paninimbagan na magkontribwir sa init kan Kristianong asosasyon nin magturugang. Sa siring, an satong puso maninigong “humiwas” tanganing ikabale an gabos niatong tugang na lalaki asin babae. (2 Corinto 6:13) Makamomondo nanggad na mamatean kan mga napapagal na an pagkamoot sa sainda kan mga tugang luminipot na! Pero, an ibang Kristiano nagsasabi na sinda nakamamateng mamondo asin pinabayaan. An sarong tugang na babae na an agom kontra sa katotoohan nakimaherak: “Siisay baga an dai nagmamawot asin nangangaipo nin nakapakokosog na pakikatood, pampakosog, asin mamomoton na kairiba? Ipagirumdom tabi nindo sa satong mga tugang na lalaki asin babae na kaipuhan mi sinda!” Iyo, nangorogna idtong an mga kamugtakan sa buhay nagpapagabat sa sainda—an mga an agom daing pagtubod, nagsosolong magurang, an igwa nin dai nahahaleng mga problema sa salud, gurang, asin iba pa—nangangaipo nin nakararahay na kairiba. Kaipuhan daw na ipagirumdom iyan sa nagkapira sa sato?
10 Ano an magigibo niato tanganing makatabang? Humiwas kita sa pagpahayag kan satong pagkamoot. Kun nag-iistimar, dai niato paglingawan an mga nangangaipo nin pampakosog. (Lucas 14:12-14; Hebreo 13:2) Imbes na ipamugtak na dai ninda iyan aakoon huli sa saindang mga kamugtakan, taano ta dai man giraray nindo sinda imbitaran? Dangan pabayaan na sinda an magdesisyon. Dawa kun dai sinda puede, daing duwa-duwa na mapakokosog sinda na maaraman na nagigirumdoman sinda nin iba. Tibaad iyan sana an kaipuhan ninda tanganing magkaigwa nin bagong kapangyarihan.
11. An mga nagagabatan tibaad nangangaipo nin tabang sa anong mga paagi?
11 An mga nagagabatan tibaad nangangaipo nin tabang sa ibang paagi. Halimbawa, an sarong nagsosolong ina tibaad nangangaipo nin maygurang na tugang na lalaki na mapaheling nin interes sa saiyang aking lalaki na ilo sa ama. (Santiago 1:27) An sarong tugang na lalaki o babae na may magabat na problema sa salud tibaad nangangaipo nin tabang sa pamamakal o sa mga gibohon sa harong. An sarong gurang tibaad naghihimuyawot na may makaibaiba o nangangaipo nin tabang na makaluwas sa ministeryo sa langtad. Kun igwa nin nagpapadagos na pangangaipo para sa siring na tabang, iyan magigin tunay na ‘pagbalo sa pagigin tunay kan satong pagkamoot.’ (2 Corinto 8:8) Imbes na rumayo sa mga nangangaipo huli sa napapalabot na panahon asin paghihingoa, mapasaran logod niato an pagbalo sa Kristianong pagkamoot paagi sa pagigin mapagrisa asin matinabang sa mga pangangaipo nin iba.
An Kapangyarihan kan Tataramon nin Dios
12. Paano kita tinatabangan kan Tataramon nin Dios na magkaigwa nin bagong kapangyarihan?
12 An saro na minapondo sa pagkakan sa dai mahahaloy mawawaran nin kosog, o kapangyarihan. Huli kaiyan, an saro pang paagi na si Jehova nagtatao sa sato kan kapangyarihan na magpadagos iyo an pagsierto na kita basog sa espirituwal. (Isaias 65:13, 14) Anong espirituwal na kakanon an saiyang itinao? Orog sa gabos, an saiyang Tataramon, an Biblia. (Mateo 4:4; ikomparar an Hebreo 4:12.) Paano iyan makatatabang sa sato na magkaigwa nin bagong kapangyarihan? Kun an mga kasakitan asin problema na inaatubang niato magpoon na umubos kan satong kosog, makakukua kita nin kosog gikan sa pagbasa kan manongod sa mga pakamate asin tunay na buhay na mga pagmamaigot nin maimbod na mga lalaki asin babae kaidtong mga panahon kan Biblia. Minsan ngani pambihirang mga halimbawa nin integridad, sinda mga tawo na “may mga pakamate na arog sa sato.” (Santiago 5:17; Gibo 14:15) Sinda napaatubang sa mga pagbalo asin kasakitan na kapareho kan sa sato. Horophoropa an nagkapirang halimbawa.
13. Anong Makakasuratan na mga halimbawa an nagpapaheling na an maimbod na mga lalaki asin babae kaidtong mga panahon kan Biblia nagkaigwa nin mga pakamate asin eksperyensia na arog nanggad kan sa sato?
13 An patriarkang si Abraham nagmondong marhay sa pagkagadan kan saiyang agom minsan ngani may pagtubod sia sa pagkabuhay liwat. (Genesis 23:2; ikomparar an Hebreo 11:8-10, 17-19.) Namatean kan may pagsolsol na si David na an saiyang mga kasalan ginibo siang bako nang angay na maglingkod ki Jehova. (Salmo 51:11) Si Moises nakamate nin kadaihan nin kakayahan. (Exodo 4:10) Si Epafrodito namondong marhay kan maaraman na an saiyang aktibidad “sa gibohon kan Kagurangnan” malilimitaran nin sarong magabat na kamatean. (Filipos 2:25-30) Si Pablo nangaipong makilaban tumang sa makasalan na laman. (Roma 7:21-25) Si Euodias asin Sintique, duwang linahidan na tugang na babae sa kongregasyon sa Filipos, minalataw na dai nagkakaoyon. (Filipos 1:1; 4:2, 3) Nakapakokosog na maaraman na an mga maimbod na ini nagkaigwa nin mga pakamate asin eksperyensia na arog kan sa sato, pero dai sinda uminontok! Ni binayaan man sinda ni Jehova.
14. (a) Anong instrumento an ginamit ni Jehova tanganing matabangan kita na kumua nin kosog sa saiyang Tataramon? (b) Taano an mga magasin na Torrengbantayan asin Awake! ta nagkaigwa nin mga artikulo dapit sa sosyal, pampamilya, asin emosyonal na mga isyu?
14 Tanganing tabangan kitang kumua nin kosog sa saiyang Tataramon, ginagamit ni Jehova an maimbod asin madonong na oripon na tawan kita nin danay na suplay nin “kakanon sa igong panahon.” (Mateo 24:45) Haloy nang ginagamit kan maimbod na oripon an mga magasin na Torrengbantayan asin Awake! tanganing idepensa an katotoohan kan Biblia asin ibalangibog an Kahadean nin Dios bilang an solamenteng paglaom nin tawo. Nangorogna sa huring pirang dekada, an mga magasin na ini igwa nin napapanahon na Makakasuratan na mga artikulo dapit sa sosyal, pampamilya, asin emosyonal na mga angat na napaaatubang dawa sa nagkapira sa banwaan nin Dios. Para sa anong katuyohan ipinublikar an siring na impormasyon? Tunay nanggad na tanganing tabangan an mga nakaeeksperyensia kan mga angat na ini na kumua nin kosog asin pampakosog sa Tataramon nin Dios. Alagad an siring na mga artikulo nagtatabang man sa sato gabos na magkaigwa nin mas malinaw na pakasabot sa tibaad inaagihan kan nagkapira sa satong mga tugang na lalaki asin babae. Sa siring mas nasasangkapan kita na kuyogon an mga tataramon ni Pablo: “Magtaram na may pagranga sa mga kalag na nagmomondo nin makuri, suportaran an maluya, magin matinios sa gabos.”—1 Tesalonica 5:14.
Kamagurangan na “Pailihan sa Doros”
15. Ano an ihinula ni Isaias manongod sa mga naglilingkod bilang kamagurangan, asin anong paninimbagan an itinatao kaini sa sainda?
15 May itinao pa si Jehova tanganing tabangan kita kun kita napapagal—an kamagurangan sa kongregasyon. Dapit sa mga ini si propeta Isaias nagsurat: “An lambang saro kaipuhan na magin siring sa pailihan sa doros asin tagoan sa bagyo, siring sa mga sapa nin tubig sa sarong disyerto, siring sa limpoy nin dakulang gapo sa tagiltil na daga.” (Isaias 32:1, 2) An kamagurangan, kun siring, may paninimbagan na makaotob sa ihinula ni Jehova manongod sa sainda. Sinda “kaipuhan na magin” gikanan nin karangahan asin kaginhawahan para sa iba asin magin andam na “padagos na magturowangan sa pagabat [o, “nakapasasakit na mga bagay”; sa literal, “magabat na mga bagay”] sa lambang saro.” (Galacia 6:2, nota sa ibaba) Paano ninda ini magigibo?
16. Ano an magigibo kan kamagurangan na tabangan an saro na nakamamate na bako nang angay na mamibi?
16 Siring kan nasambitan kasubago, kun beses an saro na napapagal tibaad makamate na bako nang angay na mamibi. Ano an magigibo kan kamagurangan? Puede sindang mamibi kaiba kan asin para sa sarong iyan. (Santiago 5:14) An pag-arang sana ki Jehova, na nadadangog kan napapagal, na tabangan an sarong iyan na masabotan kun gurano an pagkamoot sa saiya ni Jehova asin kan iba tunay na makararanga. An pakadangog sa sinsero, odok sa pusong pamibi nin sarong magurang sa kongregasyon puedeng makatabang na pakosogon an kompiansa nin saro na nasasakitan. Tibaad sia matabangan na mangatanosan na kun an kamagurangan may kompiansa na sisimbagon ni Jehova an mga pamibi para sa sarong iyan, kun siring puede man siang magkaigwa kan kompiansang iyan.
17. Taano an kamagurangan ta dapat na magin madinamayon na mga parahinanyog?
17 “An gabos na tawo kaipuhan na magin listo kun dapit sa pagdangog, maluway kun dapit sa pagtaram,” an sabi kan Santiago 1:19. Tanganing tabangan an mga napapagal na magkaigwa nin bagong kapangyarihan, an kamagurangan dapat man na magin madinamayon na mga parahinanyog. Sa nagkapirang kaso an mga miembro kan kongregasyon tibaad may linalabanan na mga problema o kasakitan na dai mareresolberan sa palakaw na ini nin mga bagay. An tibaad kaipuhan ninda, kun siring, bakong solusyon na “makareresolber” sa saindang problema kundi an makipag-olay sana sa sarong marahay na parahinanyog—saro na dai masabi sa sainda kun ano an dapat na mamatean ninda kundi mahinanyog na dai nagigin mapaghusgar.—Lucas 6:37; Roma 14:13.
18, 19. (a) Paano an pagigin listong maghinanyog nakatatabang sa sarong magurang sa kongregasyon na malikayan an orog pang pagpagabat sa pasan nin sarong napapagal? (b) Ano an ibinubunga kun an kamagurangan nagpapaheling nin “pakikipagkapwa”?
18 Kamagurangan, an pagigin listo sa paghinanyog makatatabang sa saindo na malikayan an dai tinutuyo na orog pang pagpagabat sa pasan nin sarong napapagal. Halimbawa, kun an sarong tugang na lalaki o babae dai nakaatender sa pirang pagtiripon o luminuway sa ministeryo sa langtad, sia daw talagang nangangaipo nin hatol manongod sa paggibo nin orog pa sa ministeryo o manongod sa pagigin mas regular sa mga pagtiripon? Seguro. Alagad aram daw nindo an bilog na situwasyon? Igwa daw nin naggagrabeng mga problema sa salud? Bago pa sana daw na magliwat an mga paninimbagan sa pamilya? Igwa daw nin iba pang kamugtakan o kasakitan na nagpapagabat sa saiya? Girumdomon, an saro tibaad nakamamate nang marhay nin kasalan manongod sa dai pakagibo nin dakol pa.
19 Kun siring, paano nindo matatabangan an tugang na lalaki o babae? Bago kamo magkonklusyon asin maghatol, maghinanyog! (Talinhaga 18:13) Paagi sa mapagmansay na mga hapot ‘sakdohon’ an mga saboot kan puso nin saro. (Talinhaga 20:5) Dai pag-ignorohon an mga saboot na ini—midbidon iyan. An napapagal tibaad nangangaipong aseguraron na si Jehova nagmamakolog sa sato asin nakasasabot na kun beses tibaad linilimitaran kita kan satong mga kamugtakan. (1 Pedro 5:7) Kun an kamagurangan nagpapaheling nin siring na “pakikipagkapwa,” an mga napapagal ‘makakukua nin kaginhawahan para sa saindang kalag.’ (1 Pedro 3:8; Mateo 11:28-30) Kun makua ninda an siring na kaginhawahan, dai na sinda kaipuhan na sabihan na gumibo nin orog pa; pahihiroon sinda kan saindang puso na gibohon an gabos na rasonableng makakaya ninda sa paglilingkod ki Jehova.—Ikomparar an 2 Corinto 8:12; 9:7.
20. Mantang haranihon na an katapusan kan maraot na kapag-arakian na ini, ano an maninigo na determinado kitang gibohon?
20 Tunay na kita nabubuhay sa pinakadepisil na panahon sa bilog na kasaysayan nin tawo. An mga kasakitan sa pamumuhay sa kinaban ni Satanas nag-oorog mantang mas naghahaloy kita sa laog kan panahon kan katapusan. Girumdomon, siring sa leon na naghahanap nin masisiba, hinahalat kan Diablo na kita mapagal asin umontok tanganing maaprobetsaran nia kita bilang madaling mabiktima. Makapasasalamat nanggad kita na si Jehova nagtatao nin kapangyarihan sa napapagal! Aprobetsaran logod niato nin lubos an mga probisyon nia na tawan kita kan kapangyarihan na magpadagos, na garo man sana itinatao nia sa sato an makosog na mga pakpak nin naglalayog na agila. Mantang haranihon na an katapusan kan maraot na kapag-arakian na ini, bako ngonyan an panahon na pumondo sa pagdalagan sa satong pakipag-umbasan para sa premyo—an buhay na daing katapusan.—Hebreo 12:1.
Ano an Saindong Simbag?
◻ Ano an puedeng laoman niatong gigibohon ni Jehova bilang simbag sa satong mga pamibi?
◻ Sa anong mga paagi kita makakukua nin kosog sa satong Kristianong asosasyon nin magturugang?
◻ Paano kita tinatabangan kan Tataramon nin Dios na magkaigwa nin bagong kapangyarihan?
◻ Ano an magigibo kan kamagurangan tanganing tabangan an mga napapagal na magkaigwa nin bagong kapangyarihan?
[Retrato sa pahina 17]
Kun nag-iistimar, dai niato paglingawan an mga nangangaipo nin pampakosog
[Retrato sa pahina 18]
An kamagurangan puedeng umarang ki Jehova na tabangan an mga napapagal na masabotan kun gurano an pagkamoot sa sainda