Magpaheling nin Pagkagalaga na Ipahayag an Maogmang Bareta
“Ako galagang ipahayag man an maogmang bareta sa saindo.”—ROMA 1:15.
1, 2. Ano an parateng reaksion nin mga tawo sa sarong emerhensia?
“NAGHARALE sinda sa gabos na lugar . . . ginatos na boluntaryo na nagduduman sa lugar sa pag-oltanan nin duwang distrito, na nag-aabot na dara an mga trak na pano nin kakanon asin gubing, nagtitindog nin mga dadagusan sa pag-ebakuet, na an iba nagtatrabaho nin 18 sagkod 20 oras kada aldaw, an iba daing torog sa enot na mga aldaw pakatapos na mangyari an makatatakot na pagkagaba kan basog.”
2 Iyan an reaksion nin mga tawo kan mangyari an biglang pagbaha sa sarong komunidad sa sentral California kan nakaaging tigsoli, na dahelan na an mga 24,000 na tawo dumulag para sa kaligtasan. Iyo, kun nangyayari an kalamidad—magpoon sa lokal na mga baha sagkod sa mga linog sagkod sa mga aksidente nuklear—an mga tawo parateng boluntad na minahiro asin minatabang. Sinda nangangaruskus, sabi ngani, inaatubang an dakol na peligro asin kadepisilan, asin galagang minatabang sa iba—dawa sa mga dai kamidbid.
Panahon nin Kasibotan
3. Anong pinakagrabeng emerhensia an inaatubang nin katawohan ngonyan?
3 Ngonyan, an katawohan napapaatubang sa pinakagrabeng kalamidad sa kasaysayan. Iyan bakong huli sa danyos na ginigibo nin tawo sa palibot, sa peligro nin guerra nuklear, o sa pagdakol nin krimen asin kadahasan, minsan ngani seryoso an mga bagay na ini. Imbes, an katawohan napapaatubang sa inaapod ni Jesu-Cristo na “dakulang kahorasaan na dai pang kaagid na nangyari poon sa kapinonan kan kinaban sagkod ngonyan, dai pa, ni mangyayari pa giraray.” Tanganing ipaheling kun gurano an kapahamakan na dara kan “dakulang kahorasaan,” si Jesus nagpadagos sa pagsabi: “Sa katotoohan, kun dai pahalipoton an mga aldaw na iyan, mayong laman na makaliligtas.”—Mateo 24:21, 22.
4. Sa atubang nin siring na emerhensia, ano an maninigong gibohon niato?
4 Ano an gigibohon nindo kun aram nindo na an dakol na tawo, kaiba an nagkapira na harani sa saindo, madali nang magadan sa kahorasaan na iyan? Kamo daw magigin galagang tumabang? Girumdoma an makahulang bisyon ni Ezequiel manongod sa lalaking may tintero nin sekretaryo. Sinabihan sia na idto sanang igwa kan simbolikong tanda sa saindang angog an makaliligtas sa kalaglagan nin Jerusalem, asin sia an matao kan nagliligtas-buhay na tandang iyan. Ano an reaksion nia? “Ginibo ko na an siring sa ipinagboot mo sa sako,” an sabi nia.—Ezequiel 9:1-11.
5. Ano an ipinagboot satong gibohon, asin gurano iyan kaapretado?
5 Ipinaheheling daw nindo an pagigin andam asin galaga na kapareho kan lalaking nakalino, na ginigibo an siring sa ipinagboot ni Jehova? Ano an ipinagboot ni Jehova? Paagi sa saiyang Aking si Jesu-Cristo, sia nagboot: “Kaya paduman kamo asin gumibo kamo nin mga disipulo sa mga tawo kan gabos na nasyon, . . . na tokdoan nindo sinda na otobon an gabos na bagay na ipinagboot ko sa saindo.” (Mateo 28:19, 20) An gibohon na ini nagliligtas man nin buhay kapareho kan simbolikong pagtanda sa mga angog kan aldaw ni Ezequiel. An siisay man na dai magdangog asin magin disipulo ni Jesu-Cristo malalaglag sa kamot kan Poon na Parakastigo nin Dios. (2 Tesalonica 1:6-8) Namamatean daw nindo an kasibotan? Ipinaririsa daw nindo iyan paagi sa pagpaheling nin pagkagalaga na ipahayag an maogmang bareta?
Pagkagalaga—Paano Ipinaheheling?
6. Ano an boot sabihon kan “pagkagalaga”?
6 An banwaan ni Jehova, sa kabilogan, nakamamate nanggad sa kasibotan kan panahon. Kita gabos galaga na maheling an pinakadakol na mapupuwede na makaligtas sa nagdadangadang na “dakulang kahorasaan.” An pagkagalaga, sono sa sarong diksionaryo, “makosog o maigot na kamawotan sa paghanap o pakaabot sa sarong bagay.” An saro na galaga manongod sa sarong bagay idinidirehir an isip asin paghiro sa pagkakamit kaiyan. Gigibohon nia an gabos na kaya nia tanganing mapangganahan an ano man na olang asin istorbo, asin padagos niang gigibohon iyan sagkod na maabot nia an saiyang pasohan. Iyan an saboot ni apostol Pablo manongod sa saiyang ministeryo, asin marahay na arogon niato sia.—1 Corinto 4:16.
7. Taano ta boot ni Pablo na magduman sa Roma?
7 Halimbawa, horophoropa an mga tataramon ni Pablo sa mga Kristiano sa Roma, sa Roma 1:13-16. “Sa balakid na panahon ako nagmawot na makadian sa saindo,” sabi nia sainda. Taano? “Tanganing ako magkaigwa man nin bunga dian sa saindo,” an paliwanag nia. Digdi, an nasa isip sana daw ni Pablo songkoon an mga tugang sa Roma asin seguro pakosogon sinda na orog na pataluboon an “mga bunga kan espiritu,” arog kan sabi nin pirang komentarista? (Galacia 5:22, 23) Bako, huli ta liniliwanag kan dugang niang isinabi na “siring kan sa iba sa mga nasyon” na an katuyohan nia magkaigwa nin mga bungang pan-Kahadean sa tahaw kan bakong Kristianong komunidad duman sa Roma. Boot niang darahon an maogmang bareta sa Roma asin tibaad hale duman sa iba pang lugar.—Roma 15:23, 24.
8. Paano si Pablo ‘naolang’ sa pagduman sa Roma?
8 “Alagad ta ako naoolang sagkod ngonyan,” sabi ni Pablo. Naoolang nin ano? Sia daw sibot-sibot sa personal na mga bagay tanganing may magibo pa? Bueno, si Pablo kaidto sibot na tawo pero bakong sa personal na mga intereses. Kan panahon na sia sumurat sa mga taga-Roma (mga 56 C.E.), natapos na nia an duwang mahiwas na pagbiyahe sa pagmisyonero asin nasisibot sa ikatolo. Parate, sa mga biyaheng ini sia ginigiyahan kan banal na espiritu sa espisipikong mga asignasyon. (Helingon an Gibo 16:6-9.) Kaidtong isinusurat nia an saiyang surat, haman na an plano na sia paduman sa Jerusalem “tanganing maglingkod sa mga banal” duman. (Roma 15:25, 26) Asin inagihan man nia an dakol na ibang ‘kaolangan’ na arog kaini.—Helingon an 2 Corinto 11:23-28.
9. Paano si Pablo nagpaheling nin pagkagalaga na ipahayag an maogmang bareta?
9 Minsan siring, dai inisip ni Pablo na bastante na an trabaho nia, ni nangatanosan man sia na igwa na sia nin asignasyon asin dakol na iyan. Boot niang gumibo nin orog pa. An totoo, sia nagsabi: “Ako galagang ipahayag man an maogmang bareta sa saindo na yaon sa Roma.” Iyan an pagkagalaga! Tamang-tama, si Propesor F. F. Bruce sa saiyang librong The Epistle of Paul to the Romans nagsabi kaini manongod sa apostol: “An paghuhulit kan ebanghelyo nasa dugo nia, asin dai nia iyan mapogolan; noarin man sia dai minapondo sa trabaho kundi perming ginigibo iyan, na binabayadan nin kadikit pa an utang nia sa gabos na tawo—utang na noarin man dai nia lubos na mababayadan sagkod na sia nabubuhay.” Iyan daw an punto-de-vista nindo manongod sa ministeryo?
10. Anong mga ‘kaolangan’ an tibaad nasa atubangan niato, alagad paano niato iyan maninigong atubangon?
10 Ngonyan, an bilog na banwaan ni Jehova sibot sa dakol na paninimbagan. An iba may inaataman na mga pamilya. An iba may mga paninimbagan sa ibang bagay. An iba limitado an magigibo huli sa edad o maluyang salud. Asin an iba man igwa nin magagabat na asignasyon sa Kristianong kongregasyon. Pero, aram man niato na nauubos na an panahon para sa presenteng palakaw nin mga bagay, asin an pagpatotoo sa Kahadean kaipuhan na itao. (Marcos 13:10) Kaya, arog ni Pablo, maninigo kitang magpaheling nin pagkagalaga na maghingoa sa paghuhulit sa ibong kan ‘mga olang’ na tibaad nasa atubangan niato. Dai kita maninigong makontento na sana sa sadiri, na iniisip na bastante na an trabaho niato.—1 Corinto 15:58.
“May Utang” sa Gabos
11. Ano an boot sabihon kan “Ako may utang”?
11 Igwa nin saro pang nagmomotibar na puwersa sa likod kan daing kapagalan na mga paghihingoa ni Pablo sa pagpahayag kan maogmang bareta. “Ako may utang sa mga Griego asin sa mga Barbaro, sa mga madonong asin sa mga mangmang,” sabi ni Pablo. (Roma 1:14) Sa anong paagi na si Pablo “may utang”? An ibang traduksion isinasalin an mga tataramon na ini na “Ako nasa irarom nin obligasyon” (New English Bible), “Ako may obligasyon” (Today’s English Version), o “Ako may paninimbagan” (Jerusalem Bible). Kun siring, an boot daw niang sabihon an paghuhulit magabat na paninimbagan o obligasyon na kaipuhan niang otobon sa atubang nin Dios? Madali sanang magkaigwa nin siring na kaisipan kun malingawan niato an kasibotan o malingling kita sa mga pan-akit kan kinaban. Alagad ta bako iyan an nasa isip ni Pablo.
12. Kiisay “may utang” si Pablo, asin taano?
12 Bilang “piniling lalagan” nin Dios asin bilang “apostol sa mga nasyon,” tunay na si Pablo may magabat nanggad na paninimbagan sa atubang nin Dios. (Gibo 9:15; Roma 11:13) Alagad an pakamate nia nin obligasyon bako sanang sa Dios. Sia nagsabi na sia “may utang” sa ‘mga Griego, Barbaro, madonong asin mangmang.’ Huli sa pagkaherak asin pribilehiyo na itinao sa saiya, namatean nia an paninimbagan na maghulit tanganing an gabos na tawo makadangog kan maogmang bareta. Aram man nia na kabotan nin Dios na “an gabos na klase nin tawo makaligtas asin makaabot sa tamang kaaraman kan katotoohan.” (1 Timoteo 1:12-16; 2:3, 4) Iyan an dahelan na sia nagpagal nin daing ontok, bako sanang tanganing maotob an saiyang paninimbagan sa Dios kundi tanganing mabayadan man an saiyang utang sa saiyang mga kapwa. Nakakamate daw kamo nin siring na personal na pagkakautang sa mga tawo na nasa saindong teritoryo? Namamatean daw nindo na utang nindo sa sainda na maghingoa tanganing darahan sinda kan maogmang bareta?
“Dai Ko Ikinasosopog an Maogmang Bareta”
13. Ano an pagheling ni Pablo sa maogmang bareta?
13 Tunay na si Pablo pambihirang halimbawa sa pagpaheling nin pagkagalaga na ipahayag an maogmang bareta. Pinahalagahan niang gayo an dai na kutana maninigong kabootan na ipinaheling sa saiya nin Dios, asin habo nia na idto magin basang sana. (1 Corinto 15:9, 10) Iyan an dahelan na sia nagsabi: “Huli ta dai ko ikinasosopog an maogmang bareta.” (Roma 1:16) Sa punto-de-vista nin tawo, an mga Kristiano bako sanang bakong popular kundi minimenus pa. “Nagin kaming tapok kan kinaban, an ramog kan gabos na bagay,” sabi ni Pablo. (1 Corinto 4:13) Pero dai sia nasopog na darahon an maogmang bareta sa Roma, an sentro kan edukadong kinaban asin an kabesera kan Imperyo nin Roma. Kun napapaatubang sa pagkaindiperente, pagtuya, o pati pagtumang sa satong paghuhulit, puwede niatong girumdomon an nakapakokosog na halimbawa ni Pablo.
14. Taano ta si Pablo ‘dai ikinasopog an maogmang bareta’?
14 An ‘dai ikinasosopog an maogmang bareta’ sa katunayan saro pang paagi nin pagsabing “ipinag-oorgolyo an maogmang bareta,” asin iyan an maninigo niatong mamatean. Taano? Huli ta “iyan, sa katotoohan, iyo an kapangyarihan nin Dios para sa kaligtasan kan lambang saro na nagtutubod,” an paliwanag ni Pablo. Igwa sia nin bastanteng personal na eksperyensia sa pagsuportar sa saiyang isinabi. Paagi sa maogmang bareta, sabi ni Pablo, “itinutumba niamo an mga pangangatanosan asin lambang halangkaw na bagay na pinatitindog tumang sa kaaraman nin Dios; asin dinadara niamo an lambang kaisipan sa pagkabihag tanganing iyan magin makinuyog ki Cristo.” (2 Corinto 10:5) Baga man tumang sa tradisyon kan mga Judio, sa pilosopiya kan mga Griego, o sa kapangyarihan kan mga Romano, an maogmang bareta nanggana.
15. Paano an pagkagalaga sarong nagmomotibar na puwersa sa buhay ni Pablo?
15 Marahayon nanggad na imbes na magabatan, si Pablo ‘galagang’ otobon an saiyang paninimbagan na itinao nin Dios! Arog kan pagkasabi nia mismo: “Huli ta iyan kaipuhan na gibohon ko. Sa katotoohan, herak man sa sako kun dai ako maghulit kan maogmang bareta!” (1 Corinto 9:16) An pagkagalagang ini nakatabang saiya na magpadagos sa dakol na taon nin daing kapagalan na paglilingkod, kaya sa katapustapusi sia nakapagsabi: “Nakipaglaban ako kan marahay na pakilaban, natapos ko an paorumbasan, naingatan ko an pagtubod.”—2 Timoteo 4:7.
An Pagigin Epektibo Nakadudugang sa Nagigin Bunga
16. Anong posibleng mga angat an sa paghona nindo napaatubang sa lalaki na may tintero nin sekretaryo sa bisyon ni Ezequiel?
16 Kapareho ni Pablo, an lalaki na may tintero nin sekretaryo sa bisyon ni Ezequiel sierto na galaga manongod sa asignasyon sa saiya. May dara siang marahay na report: Tapos na an misyon! Dai sinasabi sato kan tala kun paano nia hinanap an mga “nag-aaragagha asin nag-aaragrangay huli sa gabos na makababaldeng bagay na ginigibo.” (Ezequiel 9:4) Minsan ngani mayo nin sinasabi manongod sa kun paano ginibo an pantandang ini, malinaw na idto bakong simpleng trabaho.
17. (a) Anong mga angat an inaatubang nindo sa paggibo nin disipulo, asin paano nindo iyan inaatubang? (b) Kapakipakinabang daw an kinakaipuhan na mga paghihingoa?
17 Siring man ngonyan, an trabahong itinao sato bakong simple. Kaya an hapot: Gurano kita kaepektibo sa nagliligtas-buhay na trabahong ini? Tanganing magibong disipulo an pinakadakol na mapupuwede, kaipuhan na gibohon niato ini nin dayaday asin sistematiko, na dai pinalilihis an ano man na oportunidad na ikahiras an maogmang bareta. Kapareho niato, an mga tawo sa satong komunidad sibot; tibaad bihira sindang matagbuan sa harong kun kita minadalaw, asin dawa kun yaon sinda, parate na sinda may ginigibo. Ano an magigibo niato? Bueno, kaipuhan na kita may tamang rekord asin bumuwelta sa laen-laen na oras, paorootro, sa paglaom na may matatagbuan kitang makakaolay. Kapakipakinabang daw an siring na mga paghihingoa? An pasimbagon niato iyo an minasunod na haralipot na surat hale sa duwang kagharong:
“Boot kong pasalamatan an mga Saksi ni Jehova para sa dakol nindang pagsongko sa harong ko. Aram ko na kun beses an saindong misyon dai tinatawan nin mga nasa luwas kan saindong iglesya kan pagpapahalaga na maninigo nanggad dian. Kaya naisip ko na isaysay saindo an sakong mga eksperyensia asin magpasalamat!”
“Kadakol ming nagugutom sa katotoohan, kadakol ming naniniwala na an gabos na dalan pasiring sa kaligtasan. Kamo na may kosog nin boot na padagos na hanapon kun siisay an saindong mapaglilingkodan, dai kamo pumondo! Bako man kaming maraot, minsan ngani kami nan-iinsulto saindo, sinosopog kamo, asin sinasayumahan kamo. Dai kamo pumondo, ta kami tinokdoan nin dakol na kaputikan, inestoryahan nin dakol na makatatakot na mga estorya, asin tinokdoan na ikaongis kamo tanganing itago samo an mensahe manongod sa Kahadean ni Jehova.”
18. (a) Paano nindo matatabangan an iba na masabotan an maogmang bareta? (b) Paano napangganahan nin sarong parahayag an pagkaindiperente?
18 An pakataros sa puso nin mga tawo asin tabangan sinda na masabotan an maogmang bareta nagkakaipo bako sanang nin ordinaryong pakipag-olay, pagtao nin inandam na mensahe, o pagwalat nin babasahon sa Biblia. Kaipuhan na pagmaigotan niatong mansayan an saindang mga pangangaipo asin pinaghahaditan, an saindang mga gusto asin hinahaboan, mga kinatatakotan asin salang paghona. Ini gabos nagkakaipo nin dakol na pag-isip-isip asin paghihingoa—asin pagkagalaga niato. Helinga an minasunod na eksperyensia:
An sarong parahayag nakaolay an sarong babae sa sarong apartment pero daing gayo nin interes. Sa pakarisa na may nagkapirang aki, ihinapot nia kun pira an aki kan babae. An babae nagsimbag na an mga ini bako niang mga aki kundi kan saiyang bayaw, na bago pa sanang umabot hale sa ibang nasyon. Dai nahaloy an orolay napasa kakulangan nin maiistaran. Nag-oyon an parahayag na depisil na makakua nin angay na istaran sa darakulang siudad, ta sia may maabot man na mga paryentes, asin nag-opresir siang tumabang. Naogma an babae asin inapod an bayaw nia. Nagpadagos an orolay, asin nagrinibayan sinda nin mga numero sa telepono. Dai nalilingawan an katuyohan kan saiyang pagsongko, mataktikang binukasan kan parahayag an pahina 157 sa librong Live Forever asin ipinaliwanag na sa ipinanugang bagong palakaw, mawawara na an mga problema sa istaran asin trabaho. Nagustohan iyan kan lalaki asin inako an libro. Dai nahaloy, an parahayag nagbuwelta na may bareta manongod sa pinaaarkilahan na apartment; ipinagpadagos man nia an orolay ninda sa Biblia.
19. Panahon na ngonyan na gibohon niato an ano? Asin ano an kaipuhan pang pag-olayan niato?
19 Marikas na nauubos an panahon para sa paghuhulit kan maogmang bareta. Kun gurano pa kahaloy na an “apat na anghel” padagos na “nagpopogol sa apat na doros kan daga” dai niato aram. (Kapahayagan 7:1) Minsan paano, an “dakulang kahorasaan” nasa ngapit pa, asin tinitipon an mga tawong may sadiosan na puso. Tunay nanggad, an “kaomahan” “maputi na para anihon.” (Mateo 24:21, 22; Juan 4:35) Ngonyan na an panahon na kita maigot na maghingoa sa dai na noarin man maootrong gibohon na ini. Paano niato magagamit sa pinakamarahay na paagi an natatadang panahon? Ano an magigibo niato tanganing orog na makapakikabtang sa nagliligtas-buhay na gibohon na ini? Asin ano an makatatabang sato na padagos na magpaheling nin pagkagalaga na ipahayag an maogmang bareta? An mga hapot na ini pag-oolayan sa masunod na luwas.
Horophoropon an Halimbawa ni Pablo Sono sa Roma 1:13-16—
◻ Taano ta galaga siang paduman sa Roma?
◻ Ano an nakaolang sa saiya sa pagduman? Alagad ano an ginibo nia?
◻ Kiisay asin taano sia ta “may utang”?
◻ Ano an saboot nia manongod sa maogmang bareta? Taano?
◻ Kapareho ni Pablo, ano an magigibo niato tanganing magin epektibo sa pagpahayag kan maogmang bareta?