Galagang Ihulit an Maogmang Bareta
1 “Ako nagmamawot na maheling kamo . . . Ako galagang ipahayag man an maogmang bareta sa saindo.” Arog kaini an pagkapahayag ni apostol Pablo sa saiyang sadiri sa kapinonan kan saiyang surat sa mga tugang sa Roma. Taano ta galaga si Pablo na dalawon sinda? Sia nagsabi: “Tanganing ako magkaigwa man nin bunga dian sa saindo . . . Huli ta dai ko ikinasosopog an maogmang bareta; iyan, sa katotoohan, iyo an kapangyarihan nin Dios para sa kaligtasan.”—Roma 1:11-16.
2 Ipinabanaag ni Pablo an iyo man sanang pagkagalagang ini sa pakikipag-olay sa kamagurangan na lalaki sa Efeso. Pinagirumdom nia sinda: “Poon kan enot na aldaw na ako magtongtong sa distrito nin Asia . . . , dai ako nagpogol . . . sa pagtokdo sa saindo sa publiko asin sa pagharongharong. Kundi lubos akong nagpatotoo kapwa sa mga Judio asin Griego.” (Gibo 20:18-21) Sa gabos na iinasignar sa saiya na teritoryo, desidido si Pablo na ipalakop an maogmang bareta nin kaligtasan asin magkamit kan mga bunga nin Kahadean. Abaa karahay na espiritu na dapat arogon!
3 Puede niatong hapoton an satong sadiri: ‘Ipinaheheling ko daw an iyo man sanang pagkagalagang iyan sa pagpahayag kan maogmang bareta sa sakong komunidad? Imbes na mansayon an paghuhulit bilang obligasyon sana, ako daw galagang ihiras an maogmang bareta sa pinakadakol na tawong mapupuede? Mapagngayongayo ko na daw na inestudyaran an personal kong mga kamugtakan? Siniyasat ko na daw an gabos na posibilidad na yaon sa samong teritoryo, siring baga kan paghuhulit sa mga pinto, sa tinampo, sa mga lugar nin negosyo, paagi sa telepono, asin sa impormal na paagi?’
4 Galagang Makikabtang Ngonyan na Abril: An bulan nin Abril marahay na panahon na dugangan niato an satong personal na pakikikabtang sa paghuhulit. An ibinabang kahagadan na oras maninigong magpagin posible para sa dakol pa na mag-auxiliary payunir. Tibaad an saindong mga kamugtakan matogot sa saindo na maglingkod bilang auxiliary payunir ngonyan na Abril asin sa Mayo. O tibaad puede kamong magpalista bilang regular payunir, huli sa liniwat na kahagadan na oras. Kun kamo sarong parahayag sa kongregasyon, puede daw kamong gumamit nin mas dakol na oras kisa kan dati sa paglilingkod ngonyan na bulan asin sa masunod, na sinusuportaran an mga nakakapagpayunir? Paoogmahon kaiyan an puso ni Jehova!
5 An mga parahayag kan Kahadean maninigo na, siring ki Pablo, padagos na magpaheling nin pagkagalaga paagi sa pagmamaigot sa paghuhulit. An paggibo kan bilog niatong makakaya sa ministeryo magtatao sa sato nin tunay na kagayagayahan. Yaon ki Pablo an kagayagayahan na ini sa saiyang sagradong paglilingkod. Marahay na arogon niato an saiyang ekselenteng halimbawa.—Roma 11:13; 1 Cor. 4:16.