Pagrisa sa Intereses kan mga Gurang
“Na nagririsa, bako sanang sa personal na interes sa saindong sadiri, kundi siring man sa personal na interes kaidto man na iba.”—FILIPOS 2:4.
1, 2. (a) Paano an namamahalang grupo kan enot na siglo nagpaheling nin interes sa mga pangangaipo kan mga gurang? (b) Ano an patotoo na an gibong paghuhulit dai pinabayaan?
DAI nahaloy pakalihis kan Pentecostes 33 C.E. “an mga Judiong nagtataram nin Griego [sa Kristianong kongregasyon] naggurumodgumod tumang sa mga Judiong nagtataram nin Hebreo, huli ta an saindang mga balong babae napapabayaan sa aroaldaw na pagwaras [nin kakanon sa mga nagkakaipo].” Daing duwa-duwa na an dakol sa mga balong ini gurang na asin dai na kayang asikasohon an sadiri. Ano man an nangyari, an mga apostol mismo nakiaram, na nagsabi: “Maghanap kamo nin pitong lalaki na marahay an dangog dian sa tahaw nindo, na pano nin espiritu asin kadonongan, tanganing manombrahan niamo sinda para sa mahalagang gibong ini.”—Gibo 6:1-3.
2 Kaya ibinilang nin enot na mga Kristiano an pag-ataman sa mga nangangaipo na “mahalagang gibo.” Pakalihis nin mga taon an disipulong si Santiago nagsurat: “An porma nin pagsamba na malinig asin daing digta sa pagheling kan satong Dios asin Ama iyo ini: an pag-ataman sa mga ilo asin balo sa saindang kasakitan.” (Santiago 1:27) Kun siring, ini daw nangahulogan na an pinakamahalagang gibong paghuhulit pinabayaan? Dai, huli ta an tala sa Mga Gibo nagsasabi na kan maorganisar na nin tama an pag-ayuda sa mga balo, “an tataramon nin Dios padagos na nag-oswag, asin an bilang nin mga disipulo marikas na nagdakol sa Jerusalem.”—Gibo 6:7.
3. Anong sadol an itinatao sa Filipos 2:4, asin taano ini ta partikularmenteng angay ngonyan?
3 Ngonyan kita napapaatubang sa “delikadong mga panahon na masakit pakibagayan.” (2 Timoteo 3:1) An pag-asikaso sa mga pangangaipo kan pamilya asin trabaho tibaad dai nang iwalat na kosog—o kamawotan—na asikasohon pa niato an mga pangangaipo kan mga gurang. Kaya angay nanggad na an Filipos 2:4 nagsasadol sato na ‘magrisa, bako sanang sa personal na interes sa [satong] sadiri, kundi siring man sa personal na interes kaidto man na iba.’ Paano ini magigibo sa timbang, praktikal na paagi?
Pagtao nin Paggalang sa mga Balo
4. (a) Taano asin paano ‘iginalang’ kan kongregasyon kan enot na siglo an mga balo? (b) Permi daw na kaipuhan an siring na mga probisyon?
4 Sa 1 Timoteo kapitulo 5, ipinaheheling ni Pablo kun paano inasikaso nin enot na mga Kristiano an gurang nang mga balo sa kongregasyon. Sinadol nia si Timoteo: “Galangan mo an mga babaeng balo na balo man nanggad.” (Bersikulo 3) An gurang nang mga balo nasabihan nin solo bilang partikularmenteng maninigo sa paggalang sa porma nin regular na pinansial na pagsuportar. An mga iyan naputolan na nin gabos na ikabubuhay asin dai nang maginibo kundi ‘maglaom sa Dios asin dai umontok sa pagngayongayo asin pamimibi banggi-aldaw.’ (Bersikulo 5) Paano sinimbag an saindang mga pamibi para sa ikabubuhay? Paagi sa kongregasyon. Sa organisadong paagi, an maninigong mga balo tinawan nin tama sanang ikabubuhay. Siyempre, kun an balo may kaya, o may mga paryentes na kayang sumuportar sa saiya, dai na kaipuhan an siring na mga probisyon.—Bersikulo 4, 16.
5. (a) Paano an ibang balo tibaad ‘namuhay sa kasingawan’? (b) Obligado daw an kongregasyon na suportaran an mga siring?
5 “Alagad an [balo na] namumuhay sa kasingawan,” an patanid ni Pablo, “gadan na [sa espirituwal] minsan ngani sia buhay pa.” (Bersikulo 6) Dai ipinaliliwanag ni Pablo kun paano na an iba, arog kan literal na pagkatradusir kan Kingdom Interlinear, “nagpapangana sa kasingawan.” An iba tibaad pinaglalabanan an saindang “horot sa sekso.” (Bersikulo 11) Minsan siring, sono sa Liddell & Scott’s Greek-English Lexicon, an “nagpapangana sa kasingawan” tibaad may labot man sa ‘pamumuhay nin daing trabaho o sa sobrang katrangkilohan o pagpangana.’ Kun siring, tibaad an iba gustong payamanon sinda kan kongregasyon, na sustentohan an maluho, mapagpanganang pamumuhay. Ano man an kamugtakan, ipinaririsa ni Pablo na an mga siring dai kuwalipikadong umako kan pagsuportar kan kongregasyon.
6, 7, asin nota sa ibaba. (a) Ano an ‘lista’? (b) Taano an mga mayo pa nin edad na 60 ta diskuwalipikado sa pag-ako nin suporta? (c) Paano tinabangan ni Pablo an hoben pang mga balo na dai mag-ako nin ‘silot’?
6 Dangan isinabi ni Pablo: “Ilista sana [sa listahan nin mga maako nin pinansial na pagsuportar] an balo na anom na polong taon na an edad.” Kan kaaldawan ni Pablo an babae na lihis na sa edad na 60 malinaw na ibinibilang na dai na kayang suportaran an sadiri asin mayo na nin posibilidad na paagom liwat.a “Sa ibong na kampi,” an sabi ni Pablo, “sayumahan mo [na ilista] an mga babaeng balo na hoben pa, huli ta kun an saindang horot sa sekso namumugtak sa pag-oltanan ninda asin kan Cristo, boot nindang paagom, na sinisilotan huli ta binayaan ninda an saindang enot na kapahayagan nin pagtubod.”—Bersikulo 9, 11, 12.
7 Kun an ‘lista’ bukas sa hoben pang mga balo, an iba tibaad pabigla-biglang magsabi na an intension ninda dai na paagom. Alagad sa pag-agi nin panahon, tibaad sinda madepisilan na pogolan an saindang “horot sa sekso” asin boot na paagom liwat, “na sinisilotan huli ta binayaan ninda an saindang enot na kapahayagan nin pagtubod” na dai paagom. (Ikomparar an Eclesiastes 5:2-6.) Linikayan ni Pablo an siring na mga problema, na sinabi pa, “Minamawot ko na an mga babaeng balo na hoben pa magpaagom, mangaki.”—Bersikulo 14.
8. (a) Paano an mga giyang itinao ni Pablo nakaprotehir sa kongregasyon? (b) Inataman man daw an nangangaipong hoben pang mga balong babae o gurang na mga lalaki?
8 Linimitaran man kan apostol an lista sa mga may halawig na rekord nin marahay na mga gibong Kristiano. (Bersikulo 10) Kaya an kongregasyon bakong “estadong may asistensia publika” para sa mga hugakon o mga paslo. (2 Tesalonica 3:10, 11) Alagad kumusta man an mga gurang nang lalaki o hoben pang mga balong babae? Kun mangaipo an mga siring, sierto na aatamanon man sinda kan kongregasyon bilang indibiduwal.—Ikomparar an 1 Juan 3:17, 18.
9. (a) Taano an mga areglo sa pag-ataman sa mga gurang ngonyan ta napapalaen sa mga ginibo kan enot na siglo? (b) An paliwanag ni Pablo manongod sa mga babaeng balo sa 1 Timoteo kapitulo 5 tinatabangan kitang masabotan ngonyan an ano?
9 An siring na mga areglo posible na igo sa mga pangangaipo kan mga kongregasyon kan enot na siglo. Alagad arog kan komento kan The Expositor’s Bible Commentary: “Ngonyan, huli sa nakukua sa seguro, social security, asin mga oportunidad na magtrabaho, laen nanggad an kamugtakan.” Bilang resulta nin nagliwat na sosyal asin ekonomikong kamugtakan, bihira nang kaipuhan na an mga kongregasyon ngonyan magkaigwa nin listahan nin gurang na mga benepisyaryo. Minsan siring, an mga tataramon ni Pablo ki Timoteo minatabang sato na masabotan na: (1) An mga problema kan mga gurang maninigong asikasohon kan bilog na kongregasyon—partikularmente kan kamagurangan. (2) An pag-ataman sa mga gurang maninigong organisaron nin tama. (3) An siring na pag-ataman para sana sa mga tunay na nangangaipo.
Bilang Kamagurangan, Pagrisa sa Saindang Interes
10. Paano an kamagurangan ngonyan makapangengenot sa pagpaheling nin interes sa mga gurang?
10 Paano an kamagurangan ngonyan nangengenot sa pagpaheling nin interes sa mga gurang? Sa panapanahon puwede nindang iiba sa agenda kan saindang miting an mga pangangaipo kan mga gurang. Kun kaipuhan an espisipikong tabang, puwede nindang iareglo na iyan ikatao. Tibaad bakong sinda mismo an personal na mag-ataman, ta parate na dakol an andam—kaiba an mga barobata—sa kongregasyon na makatatabang. Minsan siring, puwede nindang tawan nin pagdirehir an siring na pag-ataman, tibaad paagi sa pag-asignar sa sarong tugang na asikasohon an pag-ataman sa saro.
11. Paano aaramon nin kamagurangan an mga pangangaipo nin mga gurang?
11 Si Salomon naghatol: “Kaipuhan na maaraman mong gayo an kamugtakan kan saimong aripompon.” (Talinhaga 27:23) Kaya puwedeng personal na bisitahon nin mga paraataman an mga gurang tanganing aramon an pinakamarahay na paagi na “maghiras . . . sono sa saindang mga pangangaipo.” (Roma 12:13) Arog kaini an pagkasabi dian nin sarong nagbibiyaheng paraataman: “An ibang gurang sobra kaindependiente, asin daing pakinabang an paghapot sana sainda kun ano an kaipuhan na gibohon. Pinakamarahay na mansayan kun ano an kaipuhan na gibohon asin gibohon iyan!” Sa Hapon nadiskobre nin pirang paraataman na an sarong 80 anyos na tugang na babae nagkakaipo nin dakulang atension. Sinda nagbabareta: “Sinisierto mi ngonyan na may makapakipag-olay saiya duwang beses kada aldaw, aga asin banggi, paagi sa pagbisita o pagtelepono.”—Ikomparar an Mateo 25:36.
12. (a) Paano masisierto nin kamagurangan na an mga gurang makinabang sa pagtiripon kan kongregasyon? (b) Paano magagamit an mga tape na ginibo kan Sosyedad?
12 Inaasikaso man nin mga paraataman na an mga gurang makinabang sa mga pagtiripon kan kongregasyon. (Hebreo 10:24, 25) Nagkakaipo daw nin malulunadan an iba? An iba daw dai ‘nakapaghihinanyog asin nakasasabot’ sa pagtiripon huli sana sa diperensia sa pagdangog? (Mateo 15:10) Tibaad praktikal na magbugtak nin mga headphone para sa sainda. Siring man, an nagkapirang kongregasyon ngonyan ginigibo an pagtiripon na konektado sa telepono tanganing an mga may helang makadangog sa harong. An iba irenerekord an pagtiripon sa tape para sa mga dai nakaaatender huli sa helang—sa nagkapirang kaso ibinakal pa sinda nin mga tape recorder. Asin dapit sa tape, an saro sa kamagurangan sa Alemania nagkomento: “May nabisita akong pirang gurang na nagtutukaw sana sa atubangan kan telebisyon asin nagheheling sa mga programa na dai masasabing nakapakokosog sa espirituwal.” Taano ta dai sinda sadolon na maghinanyog sa mga tape na ginibo kan Sosyedad, arog baga kan mga igwa nin togtog na pan-Kahadean asin pagbasa kan Biblia?
13. Paano an mga gurang matatabangan na magdanay na aktibo bilang mga parabalangibog kan Kahadean?
13 An ibang gurang na miembro kan kongregasyon nagin iregular o inaktibo bilang mga parahulit. Alagad an edad dai man perming nakaoolang sa saro sa pagbalangibog kan “maogmang bareta kan kahadean.” (Mateo 24:14) An iba tibaad magusto sa simpleng imbitasyon na umiba sa saindo sa paglilingkod sa langtad. Tibaad mapukaw nindo liwat an saindang pagkamoot sa paghuhulit paagi sa pag-estorya sainda nin mga eksperyensia sa paglilingkod sa langtad. Kun problema an pagsakat sa mga hagyan, iareglo na sinda maghulit sa mga apartment na may elevator o mga harong na mayong hagyan. An ibang parahayag puwede man na paiba sa mga gurang sa mga inaadalan sa Biblia—o gibohon an pag-adal sa harong kan gurang.
14 asin kahon. (a) Ano an magigibo nin kamagurangan kun an gurang nang tugang na lalaki o babae matikapong gayo sa pinansial? (b) Paano inasikaso nin pirang kongregasyon an mga pangangaipo nin gurang nang mga parahayag?
14 ‘An pirak proteksion.’ (Eclesiastes 7:12) Pero an dakol na gurang nang tugang na lalaki o babae natitikapong gayo sa pinansial asin mayo nin mga paryentes na gustong tumabang. Pero an mga indibiduwal sa kongregasyon parateng naoogmang tumabang kun pinaaaram manongod sa pangangaipo. (Santiago 2:15-17) Puwede man na siyasaton kan kamagurangan kun ano an makukuang mga serbisyong pangobyerno o sosyal, seguro, pension, asin iba pa. Minsan siring, sa ibang nasyon an arog kaiyan na mga serbisyo masakit na makua, asin tibaad mayo nin ibang medyos kundi sunodon an arogan sa 1 Timoteo kapitulo 5 asin iareglo na an kongregasyon sa kabilogan an tumabang. (Helingon an Organized to Accomplish Our Ministry, pahina 122-3.)
An mga parahayag sa Nigeria regular na tinatabangan nin materyal na mga regalo an sarong 82 anyos na regular payunir asin an saiyang agom na babae. Kan italaan kan gobyerno na gabaon an edipisyong iniistaran ninda, inimbitaran sinda kan kongregasyon na mag-istar sa sarong kuwarto na kataed kan Kingdom Hall sagkod na ikaareglo an ibang istaran.
Sa Brazil an sarong kongregasyon nagsuweldo nin sarong nars tanganing mag-ataman sa gurang nang mag-agom. Kadungan kaiyan, may iinasignar na tugang na babae na maglinig sa harong, magluto kan saindang kakanon, asin mag-asikaso sa ibang pisikal na mga pangangaipo. Kada bulan an kongregasyon nagtatagama nin pondo para magamit ninda.
15. (a) May limitasyon daw an tabang na ikatatao kan kongregasyon? (b) Paano an hatol sa Lucas 11:34 tibaad angay sa nagkapira na tibaad magin sobra kadakol kan hinahagad?
15 Arog kan enot na siglo, an siring na mga probisyon para sana sa mga maninigo na talagang nagkakaipo kaiyan. An mga paraataman dai obligado na otobon an maluhong mga kahagadan o sunodon an bakong rasonableng mga kahagadan nin atension. An mga gurang kaipuhan man na papagdanayon an ‘simpleng mata.’—Lucas 11:34.
Bilang Indibiduwal, Pagrisa sa Saindang Interes
16, 17. (a) Taano ta mahalaga na an iba apuwera sa kamagurangan magpaheling nin interes sa mga gurang? (b) Paano an sibot na mga parahayag puwedeng ‘tumubos nin panahon’ para sa mga gurang?
16 Kaidtong nahaloyhaloy na ilinaog sa ospital an sarong gurang na tugang na babae. An nadiskobreng diperensia malnutrisyon. “Kun mas dakol sa kongregasyon an nagpaheling nin personal na interes sa saiya,” an isinurat nin saro sa kamagurangan, “tibaad dai ini nangyari.” Iyo, bako sanang an kamagurangan an dapat na magpaheling nin interes sa mga gurang. Si Pablo nagsabi: “Kita mga miembro na kabtang kan lambang saro.”—Efeso 4:25.
17 Daing duwa-duwa na an iba sa saindo may pasan nang personal na mga paninimbagan. Alagad ta ‘risahon, bako sanang an personal na interes kan saindong sadiri.’ (Filipos 2:4) Paagi sa tamang personal na pag-organisar, parate na kamo ‘makatutubos nin panahon.’ (Efeso 5:16) Halimbawa, puwede daw nindong bisitahon an sarong gurang pakapaglingkod sa langtad? An mga aldaw sa laog kan semana partikularmenteng mapungaw na mga aldaw para sa nagkapira. An mga tin-edyer puwede man na makikabtang sa pagbisita sa mga gurang asin pagtrabaho para sa sainda. An pamibi nin sarong tugang na babae na tinabangan nin sarong tin-edyer: “Salamat Jehova para sa barobatang si Tugang na John. Marahayon sia.”
18. (a) Taano an pakipag-olay sa gurang ta tibaad depisil kun beses? (b) Paano magigibo nin saro na pareho nakapakokosog sa duwa an pagbisita o pakiestoryahan sa sarong gurang?
18 Sa mga pagtiripon, paramas sana daw an pagkumusta nindo sa mga gurang? Totoo, tibaad bakong pasil an makipag-olay sa saro na dai na nakakadangog o nadedepisilan na magtaram. Asin huling masakit an pagluya nin lawas, bakong gabos na gurang may maogmang disposisyon. Minsan siring, “mas marahay an sarong mapasensia.” (Eclesiastes 7:8) Paagi sa kadikit na paghihingoa, puwedeng magkaigwa nin tunay na “pagriribayan nin pagpakosog.” (Roma 1:12) Probaran na mag-estorya nin eksperyensia sa paglilingkod sa langtad. Ihiras an sarong puntong nabasa nindo sa Torrengbantayan o Magmata! O mas marahay pa, maghinanyog. (Ikomparar an Job 32:7.) An mga gurang kadakol na ikahihiras kun tatawan nindo nin oportunidad. An inadmitir nin saro sa kamagurangan: “Dakulang karahayan an itinao sako kan pagbisita sa gurang na tugang na iyan.”
19. (a) An pagmakolog niato sa mga gurang sagkod kiisay? (b) Ano an pirang paagi na kita makatabang sa mga pamilya na nag-aataman sa gurang nang mga magurang?
19 Bako daw na an saindong pagmakolog sa mga gurang maninigong sagkod sa pamilya na nag-aataman sa sainda? An sarong mag-agom na nag-aataman sa naggugurang nang mga magurang nagsabi: “Imbes na pakosogon kami, an iba sa kongregasyon nagin mapagtatsar. An sarong tugang na babae nagsabi: ‘Kun permi kamong mapalta sa pagtiripon, maghehelang kamo sa espirituwal!’ Pero dai man sia andam na gumibo nin medyos tanganing matabangan kaming makaatender sa mas dakol na pagtiripon.” Nakapanluluya man an malibog na mga panuga na arog kan, Kun kaipuhan mo an tabang, sabihan mo sana ako. Ini sa parate garo man sana pagsabing, “Magpakahimbong kamo asin magpakabasog kamo.” (Santiago 2:16) Mas marahay nanggad na an saindong pagmakolog aksionan! An sabi nin sarong mag-agom: “Nagin marahayon asin mapagsuportar an mga katood! An iba inaataman si Nanay nin duwang aldaw tangani kaming makapahingalo man. An iba ipinag-iiba sia sa mga pag-adal sa Biblia. Asin talagang napakokosog kami kun kinukumusta sia nin iba.”
20, 21. Ano an magigibo nin mga gurang tanganing makatabang sa mga nag-aataman sa sainda?
20 Sa kadaklan naaataman an satong mga gurang. Minsan siring, ano an magigibo mismo nin gurang na mga Saksi tanganing an trabahong iyan gibohon na may kaogmahan asin bakong sa kamondoan? (Ikomparar an Hebreo 13:17.) Makikooperar sa mga areglong ginigibo kan kamagurangan para sa pag-ataman sa saindo. Magpahayag nin pagpasalamat asin pag-apresyar sa ano man na gibohon na kabootan, asin likayan an pagigin sobra kadakol kan hinahagad o sobra kamapagtatsar. Asin minsan ngani totoo an mga kolog nin kagurangan, pagmaigotan na magpaheling nin maogma, positibong kaisipan.—Talinhaga 15:13.
21 ‘Marahayon an mga tugang. Dai ko aram kun ano an gigibohon ko kun mayo sinda,’ an nadangog na sinasabi nin dakol na gurang. Minsan siring, an pangenot na paninimbagan sa pag-ataman sa mga gurang nasa saindang mga aki. Ano an kalabot digdi, asin ano an pinakamarahay na paagi na maatubang an angat na ini?
[Mga Nota sa Ibaba]
a An Levitico 27:1-7 nagtataram manongod sa pagbalukat sa mga tawong ‘idinolot’ (paagi sa sumpa) sa templo bilang mga trabahador. An halaga sa pagbalukat laen-laen sono sa edad. Sa edad na 60 an halagang ini minababang gayo, na malinaw na huli ta an tawong arog na kaiyan kagurang pinaghohona na dai na makatatrabaho nin arog sa hoben. An The Encyclopædia Judaica nagsasabi pa: “Sono sa Talmud, an kagurangan . . . minapoon sa edad na 60.”
Nagigirumdoman daw Nindo?
◻ Anong probisyon an ginibo kan enot na siglo para sa gurang nang mga balo?
◻ Paano maoorganisar nin mga paraataman an pag-ataman sa mga gurang sa kongregasyon?
◻ Paano an mga indibiduwal sa kongregasyon makapaheheling nin interes sa gurang nang mga tugang na lalaki asin babae?
◻ Ano an magigibo nin mga gurang tanganing matabangan an mga nag-aataman sa sainda?
[Kahon sa pahina 16]
Pagtabang sa mga Gurang—An Ginigibo nin Iba
An sarong kongregasyon sa Brazil nakanompong nin kombenyenteng paagi na maasikaso an pisikal na mga pangangaipo nin sarong tugang na nag-iistar harani sa saindang Kingdom Hall: An grupo nin pag-adal sa libro na asignadong maglinig sa hall naglilinig man sa saiyang harong.
An saro pang kongregasyon duman nakakua nin simpleng paagi na mapagdanay an sarong maluyang tugang na aktibo sa Teokratikong Paadalan sa Pagmiministro. Kun minaabot an turno nia na tumao nin pahayag, may tugang na lalaki na iinaasignar na ipag-iba an duwa o tolong parahayag tanganing bisitahon an tugang. An halipot na pagtiripon binubukasan nin pamibi, asin ipinahahayag kan tugang an asignasyon sa saiya. Itinatao an kinakaipuhan na konseho. Nakapagpapakosog nanggad an pagbisitang ini!
An nagbibiyaheng mga paraataman nagtao nin marahay na halimbawa sa pangengenot. Sa sarong kongregasyon an sarong gurang na tugang na lalaki na naka-wheelchair nagin purungoton na gayo asin bilang resulta bihira nang bisitahon. Pero an sarong nagbibiyaheng paraataman iinareglo na tawan nin pribadong pasale an tugang kan saiyang pahayag paagi sa slides. Napahibi an gurang nang tugang kan saiyang naheling. Sabi kan paraataman: “Nakamate ako nin dakulang balos na maheling kun paano an kadikit na atension asin pagkamoot nagbubunga nin siring na resulta.”
An nagkapirang kamagurangan sa Nigeria sinongko sa pagpastor an sarong gurang na tugang asin nadiskobre na may grabe siang helang. Dinara tolos sia sa ospital. An gurang nang tugang nadiskobre na nagkakaipo nin dakol na medikal na pagbolong, pero dai nia kayang magbayad. Kan ipaaram sa kongregasyon an saiyang pangangaipo, an mga parahayag nakatipon nin bastanteng kuwarta para sa gastos nia. An duwa sa kamagurangan nagsarusalida na darahon sia ida y buwelta sa ospital, minsan ngani ini nagkaipo na magbakasyon sinda sa trabaho. Pero nakamtan ninda an kagayagayahan na maheling an tugang na marahayan kan saiyang helang asin mag-auxiliary payunir sagkod na sia magadan mga apat na taon poon kaidto.
Digdi sa Pilipinas an sarong gurang nang tugang na babae mayo nin pamilya. An kongregasyon naggibo nin areglo sa pag-ataman sa saiya sa laog nin tolong taon na paghelang. Tinawan sia ninda nin sadit na istaran, dinadarahan sia nin pagkakan aroaldaw, asin inataman an saiyang salud.
[Ritrato sa pahina 15]
An gabos puwedeng makikabtang sa paggalang sa satong mga gurang sa kongregasyon