An Kristianong Pamilya Tinatabangan an mga Gurang

“Dai mo man logod ako ipagsikwal sa panahon nin kagurangan; kun an sakuyang kosog nawawara na, dai mo ako pagpabayaan.”​—SALMO 71:9.

1. Paano tinatratar an mga gurang sa dakol na kultura?

“AN MGA surbey nagpapaheling na haros anom sa pito (86%) kan inabusong mga gurang minaltrato kan saindang sadiring mga pamilya,” an sabi kan The Wall Street Journal. An magasin na Modern Maturity nagsabi: “An pag-abuso sa mga gurang iyo an solamenteng pinakahuring [kadahasan sa pamilya na] ihahayag sa mga pahina kan mga diaryo kan nasyon.” Iyo, an mga gurang sa dakol na kultura nagin nang biktima nin grabeng pag-abuso asin pagpabaya. Tunay na sa panahon niato dakol an “mamomoton sa sainda man sana, . . . dai tataong magbalos, bakong maimbod, dai nin pagkamoot.”​—2 Timoteo 3:​1-3.

2. Sono sa Hebreong Kasuratan, paano ni Jehova minamansay an mga gurang?

² Alagad, bakong iyan an nagin tratamiento sa mga gurang sa suanoy na Israel. Nagsabi an Pagboot: “Tumindog ka sa atubangan nin may uban, asin magpaheling ka nin konsiderasyon sa persona nin gurang, asin matakot ka sa saimong Dios. Ako si Jehova.” Sinasadol kita kan libro nin ipinasabong na madonong na mga talinhaga: “Maghinanyog ka sa saimong ama na nagpangyari kan saimong pagkamundag, asin dai mo pagbasangbasangon an saimong ina huli sana ta sia gurang na.” Nagboboot iyan: “Paghinanyog, aki ko, sa disiplina kan saimong ama, asin dai mo pagpabayaan an pagboot kan saimong ina.” An Mosaikong Pagboot nagtokdo nin paggalang asin pagpahalaga sa mga gurang na lalaki asin babae. Malinaw nanggad, mawot ni Jehova na tawan nin onra an mga gurang.​—Levitico 19:​32; Talinhaga 1:​8; 23:22.

Pag-ataman sa mga Gurang kan mga Panahon kan Biblia

3. Paano si Jose nagpaheling nin pagmakolog sa saiyang gurang nang ama?

³ An paggalang dapat na ipaheling bako sanang sa mga tataramon kundi man sa makonsiderasyon na mga hiro. Nagpaheling si Jose nin dakulang pagmakolog sa saiyang gurang nang ama. Boot nia na magbaklay si Jacob hale sa Canaan pasiring sa Egipto, na an distansia labi sa 300 kilometros. Kaya nagpadara si Jose ki Jacob nin “sampulong asno na may darang mararahay na bagay sa Egipto asin sampulong asnong babae na may darang tipasi asin tinapay patin kakanon para sa saiyang ama sa dalan.” Pag-abot ni Jacob sa Gosen, duminuman si Jose saiya asin “tolos-tolos niang kinugos an saiyang liog asin nagparahibi sa saiyang liog.” Pinano ni Jose nin hararom na pagkamoot an saiyang ama. Nakakaogma nanggad na halimbawa nin pagmakolog para sa mga gurang!​—Genesis 45:​23; 46:​5, 29.

4. Taano si Rut ta marahay na halimbawa na dapat arogon?

⁴ An saro pang magayon na halimbawa na dapat arogon huli sa kabootan sa mga gurang iyo si Rut. Minsan ngani sarong Hentil, nagdanay siang dayupot sa pakikiiba sa saiyang gurang na, balong panugangan na Judia, si Naomi. Binayaan nia an saiyang sadiring banwaan asin inako an posibilidad na dai na makakua giraray nin agom. Kan pakiolayan sia ni Naomi na bumalik sa saiyang sadiring banwaan, nagsimbag si Rut kan pira sa pinakamagayon na mga tataramon sa Biblia: “Dai ka makimaherak sako na pabayaan taka, na sumuway ako sa saimo; huli ta kun saen ka magduman ako maduman man, asin kun saen ka magtorog duman man ako matorog. An saimong banwaan magigin sakong banwaan, asin an saimong Dios sakong Dios. Kun saen ka magadan duman man ako magagadan, asin duman ako ilolobong. Gibohon logod ni Jehova an siring sa sako asin dugangan pa iyan kun may ibang bagay puwera sa kagadanan na magpasuhay sa sakuya asin sa saimo.” (Rut 1:​16, 17) Nagpaheling man si Rut nin marahay na mga kuwalidad kan andam siang magpakasal sa gurang nang si Booz sa irarom kan areglo nin pagpaagom sa bayaw.​—Rut, kapitulo 2 sagkod 4.

5. Anong mga kuwalidad an ipinaheling ni Jesus sa pakikiiba sa mga tawo?

⁵ Nagtao si Jesus nin kaparehong halimbawa sa saiyang pakikiiba sa mga tawo. Sia mapasensia, mapagmakolog, maboot, asin nakakarepresko. Nagkaigwa sia nin personal na interes sa dukhang lalaki na may diperensia, na dai na nakakalakaw, sa laog nin 38 taon asin pinaomayan sia. Nagpaheling sia nin konsiderasyon sa mga balo. (Lucas 7:​11-15; Juan 5:​1-9) Minsan durante kan pag-agrangay sa saiyang makologon na kagadanan sa hariging pasakitan, sinierto nia na an saiyang ina, na posibleng nasa amay niang edad na 50, aatamanon. Dai kabale an saiyang mapagsaginsagin na mga kaiwal, si Jesus nakakarepreskong kaibaiba para sa gabos. Kaya, masasabi nia: “Madia kamo sa sako, kamo gabos na napapagal asin nagagabatan, asin tatawan ko kamo nin kaginhawahan. Pasana nindo an sakong sakal asin magin sakong mga disipulo, huli ta ako maboot asin mapakumbaba sa puso, asin makakakua kamo nin kaginhawahan para sa saindong kalag.”​—Mateo 9:​36; 11:​28, 29; Juan 19:​25-27.

Sairisay an Dapat Tawan nin Konsiderasyon?

6. (a) Sairisay an dapat na tawan nin espesyal na pag-ataman? (b) Anong mga hapot an puwede niatong ihapot sa satong sadiri?

⁶ Huling nagtao si Jehova Dios asin an saiyang Aki, si Jesu-Cristo, nin siring karahay na mga halimbawa manongod sa pag-ataman, tama sana na arogon kan nagdusay na mga Kristiano an saindang halimbawa. Igwa kita nin pirang kairiba na nagmahigos asin nasasakitan na sa laog nin dakol na taon​—an mga gurang nang tugang na lalaki asin babae na naglaog na sa nagluluyang mga taon kan saindang buhay. An iba tibaad satong mga magurang o apoon. Kakadikit daw an pagpahalaga niato sainda? Sinda daw satong tinatratar na mas hababa asin minimenus? O tunay daw niatong inaapresyar an saindang dakol na kabatidan asin kadonongan? Totoo, an iba tibaad baloon an satong pasensia paagi sa palaen na mga ugale asin kaluyahan na ordinaryo sa paggurang. Pero, hapota an saindong sadiri, ‘Magigin laen daw ako kisa sainda sa irarom kan mga kamugtakan na idto?’

7. Ano an nag-iilustrar sa pangangaipo na magkaigwa nin empatiya sa mga gurang?

⁷ Igwa nin nakakapahirong estorya hale sa Tahaw na Sirangan manongod sa pagmakolog nin sadit na aking babae sa mga gurang. Nagtatabang an lola sa kusina asin dai tinutuyong naholog asin napasa nia an platong porselana. Naanggot sia huli sa sadiri niang kaluyahan; mas naanggot pa ngani an saiyang aking babae. Kaya inapod kan saiyang aking babae an saiyang sadiring sadit na aking babae asin pinaduman sia sa tindahan tanganing ibakal an saiyang lola nin bakong mapapasaon na platong gibo sa kahoy. Nagbuwelta an sadit na aking babae na may darang duwang platong gibo sa kahoy. Hinapot sia kan saiyang ina: “Taano ta duwa an binakal mong plato?” An makoapo, na nagduduwaduwa, suminimbag: “An saro po para ki lola asin an saro po para saindo kun kamo gurang na.” Iyo, sa kinaban na ini kita gabos napapaatubang sa paglaom na gumurang. Dai ta daw aapresyaron an pagtratar na may pagpasensia asin kabootan?​—Salmo 71:9.

8, 9. (a) Paano niato maninigong trataron an mga gurang nang kairiba niato? (b) Ano an kaipuhan na girumdomon kan pira sa mga dai pa sana nahaloy na magin Kristiano?

⁸ Dai paglingawan na dakol sa satong gurang nang tugang na lalaki asin babae an nagkaigwa kan nakaagi nin halawig na rekord nin maimbod na Kristianong aktibidad. Sinda dapat nanggad na tawan nin satong onra asin konsiderasyon, nin satong maboot na tabang asin pagpakosog. Tama an pagkasabi kan madonong na tawo: “An pagkaigwa nin uban korona nin kagayonan kun iyan nakukua sa dalan nin katanosan.” Asin na an may uban, lalaki o babae, maninigong igalang. An iba sa mga gurang nang lalaki asin babae na ini naglilingkod pa bilang maimbod na mga payunir, asin dakol na lalaki an padagos na naglilingkod na maimbod bilang mga magurang sa kongregasyon; an iba naggigibo nin arogan na mga trabaho bilang nagbibiyaheng mga paraataman.​—Talinhaga 16:31.

⁹ Sinadol ni Pablo si Timoteo: “Dai mo pagtatsaran nin labi-labi an sarong gurang. Kundi pakiolayan mo sia siring sa ama, an hoben na mga lalaki siring sa mga tugang na lalaki, an gurang na mga babae siring sa mga ina, an hoben na mga babae siring sa mga tugang na babae sa bilog na kabinian.” (1 Timoteo 5:​1, 2) An mga dai pa sana nahaloy na naglaog sa Kristianong kongregasyon na nagluwas sa daing galang na kinaban maninigong nangorognang isapuso an mga tataramon ni Pablo, na basado sa pagkamoot. Sadit na mga aki, dai pag-arogon an maraot na mga ugale na tibaad naheling nindo sa eskuwelahan. Dai ikaanggot an maboot na sadol kan mga gurang nang Saksi. (1 Corinto 13:​4-8; Hebreo 12:​5, 6, 11) Alagad, kun an mga gurang nagkakaipo nin tabang huli sa maluyang salud o pinansial na mga problema, siisay an igwa nin pangenot na responsibilidad tanganing tabangan sinda?

An Kabtang kan Pamilya sa Pag-ataman sa mga Gurang

10, 11. (a) Sono sa Biblia, siisay an maninigong mangenot sa pag-ataman sa mga gurang? (b) Taano ta bakong perming pasil na atamanon an mga gurang?

¹⁰ Sa enot na Kristianong kongregasyon, naglataw an mga problema manongod sa pag-ataman sa mga balo. Paano ipinaheling ni apostol Pablo na an siring na mga pangangaipo maninigong ikatao? “Tawan mo nin onra an mga babaeng balo na balo man nanggad. Alagad kun an siisay man na balo igwa nin mga aki o makoapo, pabayaan nguna an mga ini na makanood na maggibo nin diosnon na debosyon sa saindang sadiring pamilya asin padagos na magbalos sa saindang mga magurang asin apoon, huli ta ini an marahay sa pagheling nin Dios. Tunay na kun an siisay man dai nag-aataman sa mga sadiri nia, asin orog na sa mga miembro kan saiyang harong, sia nagpainda kan pagtubod asin orog pa karaot sa tawong dai nin pagtubod.”​—1 Timoteo 5:​3, 4, 8.

¹¹ Sa mga panahon nin pangangaipo, an haraning mga miembro kan pamilya an maninigong enot na tumabang sa mga gurang?a Sa paaging ini, an darakula nang aki puwedeng makapaheling nin apresasyon sa dakol na taon nin pagkamoot, pagtrabaho, asin pangangataman na itinao kan saindang mga magurang. Ini tibaad bakong pasil. Mantang an mga tawo naggugurang, sinda natural sanang magluya, asin an iba dai na ngani makatrabaho. An iba tibaad magin makasadiri asin mapaghanap, na tibaad dai iyan narerealisar. Pero kan kita mga omboy pa, bako daw na kita makasadiri asin mapaghanap man? Asin bako daw nagmaigot an satong mga magurang tanganing tabangan kita? Ngonyan an mga bagay naliwat na sa saindang kagurangan. Kun siring, ano an kaipuhan? Pagmakolog asin pagpasensia.​—Ikomparar an 1 Tesalonica 2:​7, 8.

12. Anong mga kuwalidad an kaipuhan sa pag-ataman sa mga gurang​—asin sa iba pa sa Kristianong kongregasyon?

¹² Si apostol Pablo nagtao nin praktikal na sadol kan sia sumurat: “Kaya, bilang mga pinili nin Dios, banal asin namomotan, isolog nindo an mamomoton na mga pagmate nin pagkaherak, kabootan, kababaan nin boot, kahoyoan, asin pakatios. Padagos kamong magpatiriostios asin magpatarawadtawadan kun an siisay man igwa nin sumbong tumang sa saro. Kun paanong pinatawad kamo ni Jehova, siring man an gibohon nindo. Alagad, laen pa sa gabos na bagay na ini, isolog nindo an pagkamoot, huli ta iyan sangkap na bogkos nin pagkasararo.” Kun maninigo niatong ipaheling sa kongregasyon an klaseng ini nin pagkaherak asin pagkamoot, bako daw na maninigo niatong orog pang ipaheling iyan sa pamilya?​—Colosas 3:​12-14.

13. Sairisay, apuwera sa mga gurang asin apoon, an tibaad nangangaipo nin tabang?

¹³ Kun minsan an klaseng ini nin tabang tibaad kaipuhan man bako sana kan mga magurang o apoon kundi man kan iba pang gurang nang paryentes. An ibang gurang na mayo nin mga aki naglingkod sa laog nin kadakol nang taon sa pagmimisyonero, sa pagbiyaheng ministeryo, asin iba pang pambilog na panahon na aktibidad. Tunay na inenot ninda an Kahadean sa bilog nindang buhay. (Mateo 6:33) Kun siring, bako daw angay na pahelingan sinda nin mapagmakolog na espiritu? Sierto nanggad na igwa kita nin marahay na halimbawa sa paagi nin pag-ataman kan Watch Tower Society sa gurang nang mga miembro kaiyan sa Bethel. Sa prinsipal na opisina kan Bethel sa Brooklyn asin sa nagkapirang sanga kan Sosyedad, an dakol na gurang nang tugang na lalaki asin babae nakakakua nin pan-aroaldaw na atension hale sa sinanay na mga miembro kan pamilya na iinasignar sa trabahong ini. Naoogma sindang atamanon an mga gurang na ini na garo baga sinda sadiring mga magurang o apoon ninda. Kadungan kaini, dakol sindang nanonodan sa mga kabatidan kan mga gurang.​—Talinhaga 22:17.

An Kabtang kan Kongregasyon sa Pag-ataman

14. Anong probisyon an ginibo para sa mga gurang sa enot na Kristianong kongregasyon?

¹⁴ Dakol na nasyon ngonyan an igwa nin mga sistema nin pension sa kagurangan siring man an itinatao kan Estado na medikal na pag-ataman sa mga gurang. Puwedeng lubos na pakinabangan kan mga Kristiano an mga probisyon na ini kun sinda may diretsong gibohon an siring. Pero, kan enot na siglo, mayo nin siring na mga probisyon. Kaya an Kristianong kongregasyon naggibo nin positibong paghiro tanganing tabangan an nagtitios na mga balo. Nagboot si Pablo: “Ilista sana an balo [para sa ayuda kan kongregasyon] na anom na polong taon na an edad, nagin agom nin sarong lalaki, na may nagpapatotoo sa saiyang marahay na mga gibo, kun sia nag-ataman nin mga aki, kun sia nag-istimar sa mga estranyo, kun sia naghanaw sa mga bitis nin mga banal, kun sia nakapaginhawa sa mga nagsasakit, kun sia mahigos na nagsunod sa lambang marahay na gibo.” Kaya ipinaheling ni Pablo na an kongregasyon igwa man nin kabtang sa pagtabang sa mga gurang. An may espirituwal na kaisipan na mga babae na dai nagkaigwa nin nagtutubod na mga aki kuwalipikado para sa siring na ayuda.​—1 Timoteo 5:​9, 10.

15. Taano ta tibaad kinakaipuhan an tabang tanganing makakua nin ayuda kan Estado?

¹⁵ Kun saen an Estado igwa nin mga probisyon para sa mga gurang, an mga ini parateng kalabot an paggibo kan papeles na tibaad garo nakakapagal. Sa siring na mga kamugtakan angay sa mga paraataman sa kongregasyon na mag-areglo nin tabang na itatao tanganing an mga gurang puwedeng magpalista, makakolekta, o madagdagan pa ngani an siring na ayuda. Kun minsan an mga pagbabago nin kamugtakan puwedeng magresulta sa paglangkaw nin pension. Alagad igwa man nin dakol pang ibang praktikal na bagay na puwedeng organisaron nin mga paraataman tanganing mapangatamanan an mga gurang. Ano an pira sa mga ini?

16, 17. Sa anong manlaenlaen na paagi puwede kitang makapaheling nin pagkamapagpasakat sa mga gurang sa kongregasyon?

¹⁶ An pagpaheling nin pagkamapagpasakat sarong kaugalean kaidto pang mga panahon kan Biblia. Sagkod ngonyan sa dakol na nasyon sa Tahaw na Sirangan, ipinaheheling an pagkamapagpasakat sa mga estranyo, kisuerra paagi sa pag-alok nin sarong tasang tsa o kape. Kaya bakong makangangalas na nagsurat si Pablo: “Hirasan an mga banal sono sa saindang mga pangangaipo. Magin parapasakat.” (Roma 12:13) An terminong Griego para sa pagkamapagpasakat, phi·lo·xe·ni΄a, literal na nangangahulogan na “pagkamoot sa (pagkawili sa, o kabootan sa) mga estranyo.” Kun maninigong magin mapagpasakat an Kristiano sa mga estranyo, bako daw na maninigong orog pang magin mapagpasakat sia sa mga kapagtubod nia? An imbitasyon sa sarong karakanan parateng nagrerepresentar nin inaakong pahingalo sa rutina kan sarong gurang. Kun boot nindo an tingog nin kadonongan asin kabatidan sa saindong sosyal na mga katiriponan, iiba an mga gurang.​—Ikomparar an Lucas 14:​12-14.

¹⁷ Kadakol na paagi na puwedeng mapakosog an mga gurang. Kun minabilog kita nin grupo sa sasakyan na maduman sa Kingdom Hall o sa asamblea, igwa daw nin nagkapirang gurang na aakoon an pagpalunad? Dai maghalat na sinda an makiolay. Alokon na iiba sinda. An saro pang praktikal na tabang iyo na isaod sinda. O kun kaya pa ninda, puwede ta daw sindang iiba sa satong pagbiyahe sa satong pananaod? Pero siertohon na igwa nin mga lugar kun saen puwede sindang makapahingalo asin makarepresko kan saindang sadiri kun kinakaipuhan iyan. Daing duwa-duwa na hahagadon an pagpasensia asin kabootan, alagad an sinserong pasasalamat nin sarong gurang puwedeng kapakipakinabang.​—2 Corinto 1:​11.

Sarong Magayon na Kayamanan sa Kongregasyon

18. Taano an mga gurang ta sarong bendisyon sa kongregasyon?

¹⁸ Dakulaon na bendisyon na maheling an pirang ubanon (asin siring man an mga angas huli sa paggurang) sa kongregasyon! Iyan nangangahulogan na sa tahaw nin kakosogan asin kabagsikan kan mga hobenes, igwa kita nin pagwirik nin kadonongan asin kabatidan​—sarong tunay na kayamanan sa arin man na kongregasyon. An saindang kaaraman siring sa nakakarepreskong tubig na kaipuhan na sakdohon sa bubon. Iyan arog sa pagkasabi sa Talinhaga 18:​4: “Hararom na tubig an mga tataramon sa ngoso nin tawo. An burabod nin kadonongan salog na nagbuburokbusok.” Nakakapakosog nanggad sa mga gurang na mamatean na sinda nagugustohan asin inaapresyar!​—Ikomparar an Salmo 92:14.

19. Paano an nagkapira guminibo nin mga pagsakripisyo para sa saindang gurang nang mga magurang?

¹⁹ An iba na nasa pambilog na panahon na paglilingkod nakamate kan pangangaipo na pumondo sa saindang mga pribilehiyo tanganing pumuli tanganing atamanon an gurang na, naghehelang nang mga magurang. Guminibo sinda nin pagsakripisyo para sa mga nagsakripisyo man para sa sainda kaidto. An sarong mag-agom, na dating mga misyonero asin yaon pa sa pambilog na panahon na paglilingkod, nagpuli tanganing atamanon an saindang gurang nang mga magurang. Ginibo ninda ini sa laog nin labing 20 taon. Kan nakaaging apat na taon an ina kan lalaki kinaipuhan na paistaron sa sarong harong para sa pag-ataman sa mga gurang. An agom na lalaking dating misyonero, na ngonyan labing 60 anyos na, dinadalaw an saiyang 93 anyos nang ina aroaldaw. An paliwanag nia: “Paano ko sia pababayaan? Sia an sakong ina!” Sa ibang kamugtakan an mga kongregasyon asin indibiduwal nagdorolok asin nag-alok na atamanon an mga gurang tanganing an saindang mga aki makapagdanay sa saindang mga teritoryo. An siring na daing kapasloan na pagkamoot angay man sa dakulang komendasyon. An kada situwasyon kaipuhan na asikasohon nin odok sa boot huli ta an mga gurang dai dapat pabayaan. Ipaheling na namomotan nindo an saindong gurang nang mga magurang.​—Exodus 20:​12; Efeso 6:​2, 3.

20. Anong halimbawa an itinao sato ni Jehova sa pag-ataman sa mga gurang?

²⁰ Tunay nanggad, an satong mga gurang nang tugang na lalaki asin babae korona nin kagayonan para sa pamilya o sa kongregasyon. Si Jehova nagsabi: “Minsan sa kagurangan nin saro ako iyo man sana an Saro; asin sa pagkaubanon nin saro ako mismo magtitios. Ako mismo mahiro, tanganing ako mismo makatagal asin ako mismo makatios patin makatao nin dudulagan.” Magpaheling logod kita kan iyo man sanang pagpasensia asin pag-ataman sa satong mga gurang nang tugang na lalaki asin babae sa Kristianong pamilya.​—Isaias 46:​4; Talinhaga 16:31.

[Nota sa Ibaba]

Nagigirumdoman daw Nindo?

◻ Ano an satong mga halimbawa sa Biblia nin pag-ataman sa mga gurang?

◻ Paano niato maninigong trataron an mga gurang?

◻ Paano maaataman kan mga miembro kan pamilya an namomotan nindang mga gurang?

◻ Ano an puwedeng gibohon kan kongregasyon tanganing tabangan an mga gurang?

◻ Taano an mga gurang ta sarong bendisyon sa sato gabos?

[Ritrato sa pahina 17]

Pinahelingan ni Rut an gurang nang si Naomi nin kabootan asin paggalang

[Ritrato sa pahina 18]

An mga gurang pinahahalagahan na miembro kan kongregasyon