Kun Paano Makakatabang an mga Kristiano sa mga Gurang
“DAI kami minasuko, kundi minsan ngani an samong pagkatawo sa luwas nalalapa, an samong pagkatawo sa laog nababago aroaldaw. . . . Kami nakatorohok, bakong sa mga bagay na naheheling, kundi sa mga bagay na dai naheheling. Huli ta an mga bagay na naheheling naagi sana, alagad an mga bagay na dai naheheling daing katapusan.” Siring an sabi ni apostol Pablo sa saiyang ikaduwang surat sa mga taga-Corinto.—2 Corinto 4:16-18.
Kan suanoy na mga panahon, an may pagtubod na mga lalaki asin babae nakatorohok sa mga bagay na dai naheheling, na kabale an gabos na bagay na ipinanuga na gigibohon kan saindang Dios, si Jehova, sa saiyang itinalaan na panahon. Sa libro nin Hebreo, inomaw na marhay ni Pablo an mga siring, na pinapagdanay an saindang pagtubod sagkod sa oras kan saindang kagadanan—asin an iba sainda guminurang nang marhay. Itinokdo nia sinda bilang halimbawa para sato, na nagsasabing: “Sa pagtubod ini gabos nagkagaradan, minsan ngani dai ninda nakamtan an kaotoban kan mga panuga, alagad an mga iyan natanaw ninda sa harayo asin inistimar ninda.”—Hebreo 11:13.
Ngonyan haranihon na kita sa kaotoban kan mga panugang ini. Alagad may kairiba kitang mga naghehelang asin gurang na dai nakasisierto na sinda mismo mabubuhay tanganing maheling an katapusan kan maraot na palakaw na ini. Tibaad an nagkapira kaini magagadan man na maimbod na dai naheling an gabos na panuga na naotob durante kan saindang presenteng buhay. Sa mga siring an mga tataramon ni Pablo sa 2 Corinto 4:16-18 puwedeng magin dakulang pagpapakosog.
Nagigirumdoman ni Jehova an gabos na maimbod saiya, kaiba na an mga naghehelang asin gurang. (Hebreo 6:10) An maimbod na mga gurang may paggalang na sinasambit sa dakol na kabtang kan Biblia, asin sa Pagboot ni Moises, espesyal na sinasambit an paggalang na dapat ipaheling sa mga gurang. (Levitico 19:32; Salmo 92:12-15; Talinhaga 16:31) Sa tahaw kan enot na mga Kristiano, an mga gurang trinatar na may pagpapahalaga. (1 Timoteo 5:1-3; 1 Pedro 5:5) An sarong libro sa Biblia naglalaman nin magayon na paglaladawan kan mamomoton na pangataman asin nakakapahirong pagsakripisyo sa sadiri na ipinaheling nin sarong hoben na babae sa saiyang gurang nang panugangan na babae. Angay na inaapod an libro sa ngaran kan hoben na iyan na babae, si Rut.
Sarong Maimbod na Katabang
Mapait an buhay para sa naggugurang nang si Naomi. An taggutom pinuwersa sia, kaiba an saiyang sadit na pamilya, na bayaan sa Juda an mga katood asin minana asin mag-istar sa sirangan kan Salog nin Jordan sa daga nin Moab. Digdi nagadan an agom ni Naomi, na winalat siang nagsosolo kaiba kan saiyang duwang sadit na aking lalaki. Pag-abot nin panahon, an mga ini nagdakula asin nag-aragom, pero sinda nagadan man. Nawalat si Naomi na mayo nin mga aki na mangangataman saiya.
Gurangon na sia tanganing pumoon nin bagong pamilya, asin an buhay garo kakadikit na an halaga. Bakong makasadiri, boot nia na papulion si Rut asin Orpa, an mga balo kan saiyang duwang aking lalaki, sa harong kan saindang mga ina tanganing tibaad makakua sinda nin agom ninda. Mabuwelta sia na nagsosolo sa saiyang sadiring daga. Ngonyan man, an ibang gurang nakakamate nin kamondoan, nangorogna kun nagadan an mga namomotan ninda. Arog ni Naomi, tibaad kaipuhan ninda nin saro na mangangataman sainda, alagad habo nindang magin pagabat.
Alagad dai binayaan ni Rut an saiyang panugangan na babae. Namotan nia an mas gurang nang babaeng ini, asin namotan nia si Jehova, an Dios na sinasamba ni Naomi. (Rut 1:16) Kaya magkaiba sindang nagbaklay pabalik sa Juda. Sa dagang iyan, igwa nin mamomoton na areglo sa irarom kan Pagboot ni Jehova na an mga dukha puwedeng maggutol, o magtipon, kan ano man na nawalat sa oma pakadaraha kan inani. Si Rut, na mas hoben, gikan sa boot na nag-alok na gibohon ini, na nagsasabing: “Tabi, togoti ako na dumuman.” Mayong kapagalan siang nagtrabaho para sa kapakinabangan nindang duwa.—Rut 2:2, 17, 18.
An kaimbodan asin pagkamoot ni Rut ki Jehova nagin masarig na pagpakosog ki Naomi, na nagpoon na mag-isip sa positibo asin nakakatabang na paagi. An saiyang kaaraman sa Pagboot asin sa mga kaugalean kan nasyon kapakipakinabang ngonyan. Nagtao sia nin madonong na sadol sa saiyang maimbod na katabang tanganing an hoben na babae, paagi sa areglong pagpaagom sa bayaw, puwedeng ikabalik liwat an mamanahon kan pamilya asin magkaigwa nin aki tanganing ikapadagos an linya nin pamilya. (Rut, kapitulo 3) Si Rut magayon na halimbawa sa mga nagsasakripisyo tanganing atamanon an mga naghehelang asin gurang. (Rut 2:10-12) Sa laog kan kongregasyon ngonyan, dakol an magigibo sa kaparehong paagi tanganing tabangan an mga naghehelang asin gurang. Paano?
An Pag-organisar Mahalaga
Sa enot na Kristianong kongregasyon, igwa nin listahan nin mga balo na nangangaipo nin materyal na pagsuportar. (1 Timoteo 5:9, 10) Siring man ngonyan, sa pirang situwasyon an mga magurang puwedeng gumibo nin listahan nin mga naghehelang asin gurang na nangangaipo nin espesyal na atension. Sa nagkapirang kongregasyon an sarong magurang inasignaran na mangataman kaini bilang saiyang espesyal na responsibilidad. Mantang kadakol na gurang, arog ni Naomi, an mayo nin tendensia na humagad nin tabang, an siring na tugang na lalaki kinakaipuhan na magin eksperto sa pag-analisar sa sarong situwasyon asin—sa mataktika asin madonong na paagi—siertohon na nagigibo an kinakaipuhan na mga bagay. Halimbawa, puwede niang reparohon kun an Kingdom Hall igwa nin bastanteng probisyon para sa mga naghehelang asin gurang. Kun praktikal, puwede niang konsideraron an mga bagay arog nin rampa para sa mga wheelchair, angay na mga kasilyas, pantabang sa pagdangog nin mga bongog, asin lugar para sa espesyal na mga tukawan. An tugang na ini puwede man na siertohon na an gabos na dai nakakaduman sa Kingdom Hall puwedeng sumubli nin tape recording kan mga pagtiripon o magdangog dian paagi sa pagkonektar sa telepono.
Tibaad magkaigwa man nin pangangaipo na organisaron an transportasyon pasiring sa mga pagtiripon asin kombension. An sarong gurang nang tugang na babae nagkaigwa nin problema huli ta an regular na nagsusundo saiya pasiring sa mga pagtiripon dai puwede. Kinaipuhan niang tumelepono sa dakol na indibiduwal bago sia sa katapustapusi nakakua nin malulunadan asin bilang resulta nakamate na sia pagabat. An pakikiareglo sa sarong magurang na puwedeng magreparo sa gabos na siring na bagay nakaina kutana kan saiyang pagkasopog.
An magurang na ini puwede man na kaolayon an laen-laen na pamilya kun sinda makakasarosalida sa pagdalaw sa mga gurang. Sa paaging ini an mga aki makakanood na an pag-ataman sa mga gurang kabtang nin buhay nin sarong Kristiano. Marahay para sa mga aki na makanood na magsaabaga kan responsibilidad na ini. (1 Timoteo 5:4) An sarong paraataman sa sirkito nagsasabi: “Sa sakong eksperyensia, kakadikit na aki o hobenes an nagdadalaw sa mga gurang o naghehelang sa saindang sadiring kabotan.” Tibaad dai sana ninda naiisip iyan, o tibaad dai sinda nakasisierto kun ano an gigibohon o itataram; an mga magurang puwedeng tokdoan sinda kaini.
Alagad girumdomon na an kadaklan na gurang aapresyaron na maaraman nin patienot na maabot an sarong katood. Ini nagtatao sainda nin dugang pang kagayagayahan sa paghalat sa bisita. Kun an mga bisita nagdadara nin mga merienda, siring baga nin kape o cake, asin tolos na sinasaray pakatapos, an dagdag na pagabat sa gurang nalilikayan. An gurang nang mag-agom, na makosogon pa, nagkakaigwa nin regular na aldaw kada semana na sinda nag-aandam nin sarong sadit na lalagan sa piknik asin sunod-sunod na dinadalaw an mga gurang sa kongregasyon. An saindang mga pagdalaw pinahalagahan na gayo.
Para sa kapakinabangan kan mga gurang, dakol na kongregasyon an ginigibo an Pag-adal sa Libro kan Kongregasyon durante sa aldaw. Sa sarong lugar an nagkapirang pamilya asin dai pang agom na mga parahayag hinapot kun sinda magigin andam asin kayang suportaran an siring na grupo, asin an resulta iyo an pagkaigwa nin sarong grupo nin pag-adal sa libro kun saen an mga gurang asin hobenes makakapangataman sa kada saro.
Dai maninigong iwalat sa mga magurang sana an pangengenot sa bagay na ini. Kita gabos kaipuhan na nakakaisi kan mga pangangaipo kan mga naghehelang asin gurang. Puwede ta sindang taratarahon sa Kingdom Hall asin magkaigwa nin panahon na makipag-olay sa sainda. An imbitasyon sa impormal na asosasyon tibaad akoon. O puwede niato sindang imbitaran na ibanan kita sa sarong piknik o minsan sa bakasyon. An sarong Saksi parateng iiniiba sa saiyang kotse an mga gurang na parahayag kun minaluwas sa banwaan sa pagnegosyo. Mahalaga na tabangan an mga gurang na padagos na makamateng kabale. Dai sinda pagtogotan na sumuko, arog kan tendensiang gibohon ni Naomi, na makakaparikas sa paggurang o pagkaulianon.
An mga hobenes na may diperensia sa hawak o naghehelang nangangaipo man nin atension. An tugang na lalaking Saksi na igwa nin tolong aking lalaki na naghehelang na dai na mabobolong, na poon kaidto duwa na an nagadan, nagsabi: “Depisil para sa sarong kongregasyon na padagos na magpaheling nin pag-ataman kun an saro may helang na napapadagos sa halawig na peryodo nin panahon. Taano ta dai iasignar an pirang malalaoman na hoben na parahayag na ipakipag-olay an pan-aroaldaw na teksto asin basahon an sarong kapitulo sa Biblia kada aldaw kaiba an saindang nasa higdaan na katood? An mga hobenes, kabale na an mga payunir, puwedeng magsarosaralida.”
Kun an Kagadanan Garo Dai Malilikayan
An mga lingkod ni Jehova perming may kapusoan na inaatubang an kagadanan, baga man iyan huli sa helang o paglamag. Kun an mga naghehelang magpoon nang makamate na madali nang magadan, natural sainda na makaeksperyensia nin laen-laen na emosyon. Pagkagadan ninda, an sainda man na mga paryentes maagi nin peryodo nin pagliliwat, grabeng kamondoan, asin pag-ako. Kaya parateng marahay para sa naghehelang na tawo na magtaram nin prangka manongod sa kagadanan, arog kan ginibo ni Jacob, David, asin Pablo.—Genesis, kapitulo 48 asin 49; 1 Hade 2:1-10; 2 Timoteo 4:6-8.
An sarong lalaking doktor na Saksi nagsurat: “Kaipuhan kitang magin prangkang marhay dapit sa temang ini. Nungka na naheling ko sa sakong propesyon na nakagibo nin ano man na karahayan para sa pasyente na itago an katunayan na sia may terminadong helang.” Minsan siring, kaipuhan tang masabotan kun ano an boot na maaraman kan pasyente mismo, asin kun noarin nia ini boot na maaraman. An ibang pasyente malinaw na sinasabi na aram ninda an kaharanihan nin kagadanan, asin kinakaipuhan nindang ipakipag-olay an saindang mga iniisip asin saboot dapit digdi. An iba man garo ipinipirit an paglaom, asin marahay para sa saindang mga paryentes na maglaom kaiba ninda.—Ikomparar an Roma 12:12-15.
An saro na madali nang magadan tibaad napapagal nang gayo o nariribaraw na depisil para saiya na mamibi. An siring na pasyente posibleng maranga paagi sa pakaaram sa Roma 8:26, 27 na an Dios nakakasabot sa “mga pag-agrangay na dai masabi.” Aram ni Jehova na sa irarom nin siring na tension an saro puwedeng madepisilan sa paghanap nin mga tataramon para sa pamibi.
Kun posible, importante na mamibi kaiba kan pasyente. Sarong tugang na lalaki an nag-estorya: “Kan magagadan na an sakong ina asin mayo na nin kosog na makataram, ipinasabot nia paagi sa pagtiklop kan saiyang mga kamot na boot niang mamibi kami kaiba nia. Pakapamibi niamo, kinanta mi an saro kan mga kanta na pan-Kahadean, huli ta an sakong ina mahilig sa musika poon pa kaidto. Kan primero, kinokorokanta mi an tono, dangan maluway niamong kinanta an liriko. Malinaw na naogma sia kaiyan. Daing duwa-duwa, an mga kantang ini na ikinokonektar ta sa satong buhay bilang mga Saksi ni Jehova naglaladawan nin mga saboot na tibaad masakit nganing ipahayag.”
An pakipag-olay sa sarong magagadan na nagkakaipo nin pagkamoot, taktika, asin pagmate. An nagdadalaw puwedeng mag-andam nin isasaysay na mga bagay na nakakapakosog asin nakakaparigon sa pagtubod, asin maninigo siang magin alerto na likayan an negatibong orolay dapit sa ibang tawo asin sa saindang mga problema. Siring man, an lawig kan pagdalaw maninigong iangay sa kun ano an rasonable asin angay. Kun an pasyente garo daing pakamate, marahay na girumdomon na tibaad nakakadangog pa sia kan sinasabi. Kaya magin maingat sa itinataram nindo.
Responsibilidad Man Niato
An pag-ataman sa mga naghehelang asin gurang sarong magabat na responsibilidad. Sa mga pinakadayupot sa pasyente, naghahagad iyan nin dakol, kapwa sa pisikal asin emosyonal. Sinda nagkakaipo asin angay na tawan nin pagsabot patin tabang kan iba sa kongregasyon. An mga nag-aataman sa naghehelang na mga miembro kan pamilya o kapagtubod naggigibo kan marahay, minsan ngani nangangahulogan iyan na sinda dai nakakaatender sa pirang pagtiripon o na an saindang pakikabtang sa ministeryo sa langtad naiinaan sa laog nin sarong peryodo. (Ikomparar an 1 Timoteo 5:8.) Mapapakosog sinda paagi sa mapagsabot na kaisipan kan kongregasyon. Paminsanminsan an sarong tugang na lalaki o babae puwedeng temporaryong sumalida tanganing an regular na nag-aataman makaatender sa pagtiripon o magkaigwa nin pirang nakarerepreskong oras sa paghuhulit.
Siyempre, kun kamo mismo an naghehelang, puwede man na may magibo kamo. An kawaran nin paglaom asin pagkadaing maginibo kun manongod sa saindong helang puwedeng makapagpahinanakit saindo, alagad an paghinanakit ibinubulag an saro asin pinararayo an iba. Imbes puwede kamong magmaigot na ipahayag an pag-apresyar asin magin makooperasyon. (1 Tesalonica 5:18) Mamibi para sa iba na nasasakitan. (Colosas 4:12) Maghorophorop sa makangangalas na mga katotoohan kan Biblia, asin ipakipag-olay iyan sa mga nagdadalaw. (Salmo 71:17, 18) Galagang subaybayan an nakakapakosog sa pagtubod na pag-oswag kan banwaan nin Dios. (Salmo 48:12-14) Pasalamatan si Jehova sa maogmang mga pag-oswag na ini. An paghorophorop sa siring na mga bagay puwedeng, arog sa nagsosolnop na aldaw na nagpapasirang nin orog pa asin mas mainit na liwanag kisa aldaw kun odto, makatao nin pambihirang gayon kaiyan sa satong ultimong mga aldaw.
Maninigong makilaban kita gabos tanganing mapagdanay an paglaom na, nangorogna sa masakit na mga panahon, nagbabantay sa satong isip arog sa takop sa payo. (1 Tesalonica 5:8) Marahay na maghorophorop sa paglaom sa pagkabuhay liwat asin sa makosog na pundasyon kaiyan. Makakalaom kita na may kasegurohan asin galagang paghalat sa aldaw na mawawara na an helang o kaluyahan huli sa paggurang. Dangan, gabos makakamate nin marahay. Minsan an mga gadan mabubuhay liwat. (Juan 5:28, 29) An “mga bagay [na ini] na dai naheheling” naheheling niato paagi kan satong mga mata nin pagtubod asin satong puso. Nungka na iwara an mga iyan.—Isaias 25:8; 33:24; Kapahayagan 21:3, 4.