Kapahayagan—An Mamuraway na Kulminasyon Kaiyan Harani Na

Kasumpay kan Kapitulo 27: Namundag an Kahadean nin Dios!

An Karibal na Herak Man!

21. Paano si Satanas nagdara nin herak man sa daga asin sa dagat?

²¹ Nasusurang huli sa ikatolong herak man, intension ngonyan ni Satanas na pasakitan an katawohan kan saiyang sadiring partikular na klase nin herak man. Ini an: “Herak man kan daga asin kan dagat, huli ta huminilig na dian saindo an Diablo, na may dakulang kaanggotan, sa pakaaram na halipot na sana an saiyang panahon.” (Kapahayagan 12:​12b) An pagpahale ki Satanas sa langit nangahulogan nanggad nin herak man para sa literal na daga, na linalaglag kan paslong mga tawo na nasa irarom kan saiyang kontrol. (Deuteronomio 32:5) Alagad orog pa, an palakaw ni Satanas na ‘mamahala o manlaglag’ nagdara nin herak man sa simbolikong daga, an estruktura kan sosyedad nin tawo, siring man sa simbolikong dagat, an ribaraw na masa nin katawohan mismo. Durante kan duwang guerra mundial, an kaanggotan ni Satanas naheling sa kaanggotan kan mga nasyon na sakop nia, asin an kaagid na mga pagputok nin demonikong kaanggotan nagpadagos sagkod sa panahon na ini​—alagad dai na maghahaloy! (Marcos 13:​7, 8) Alagad minsan tibaad grabe an mga pakana kan Diablo, nungka na iyan magkaigwa kan nakaheherak na epekto kan ikatolong herak man​—an aksion kan Kahadean nin Dios—​na pangyayarihon sa naheheling na organisasyon ni Satanas!

22, 23. (a) Ano an sinabi ni Juan na nangyayari pakatapos na an dragon iinapon sa daga? (b) Paano nagin posible sa dragon na paglamagon “an babae na nangaki sa omboy na lalaki”?

²² Magpoon kan pagpahale ki Satanas huli sa lubos na pagkadaog, an mga tugang ni Cristo na uya pa sa daga an nagsakit huli kan saiyang kaanggotan. Ibinabareta ni Juan: “Ngonyan kan maheling kan dragon na iyan ihinolog sa daga, pinaglamag kaiyan an babae na nangaki sa omboy na lalaki. Alagad itinao sa babae an duwang pakpak kan dakulang agila, tangani siang makalayog pasiring sa kapatagan sa saiyang lugar; duman sia pinagpakakan sa laog nin sarong panahon asin mga panahon patin kabangang panahon na harayo sa lalauogon kan halas.”​—Kapahayagan 12:​13, 14.

²³ Digdi ipinagpapadagos kan bisyon an punto na iinintrodusir sa bersikulo 6, na nagsasabi sato na pakatapos kan pagkamundag kan saiyang aki, an babae nagdulag sa kapatagan, parayo sa dragon. Tibaad isipon niato kun paano paglalamagon kan dragon an babae, mantang sia nasa langit asin an dragon ihinolog na ngonyan sa daga. Bueno, girumdomon na an babae may mga aki digdi sa daga, an saiyang banhi. Sa pagpapadagos kan bisyon na ini, ipinaaaram sa sato na si Satanas nagpahayag kan saiyang kaanggotan sa babae paagi sa paglamag sa saiyang banhi. (Kapahayagan 12:17) An nangyayari sa banhi kan babae digdi sa daga puwedeng ibilang na nangyayari sa babae mismo. (Ikomparar an Mateo 25:40.) Asin an nagdadakol na kairiba kan banhi digdi sa daga makaeeksperyensia man kan mga paglamag na ini.

Sarong Bagong Nasyon

24. Ano an nagin eksperyensia kan mga Estudyante sa Biblia na kaagid kan pagkaligtas kan mga Israelitas hale sa Egipto?

²⁴ Mantang pinaglalabanan an enot na guerra mundial, an mga tugang ni Jesus maimbod na nagpadagos sa saindang pagpatotoo sagkod sa mapupuwede. Ginibo ini sa atubang kan nag-oorog na pagtumang hale ki Satanas asin sa saiyang maringis na mga kampon. Sa katapustapusi, an panpublikong pagpatotoo kan mga Estudyante sa Biblia haros napaontok. (Kapahayagan 11:​7-10) Iyan kan nagkaigwa sinda nin eksperyensia na kaagid kan sa mga Israelitas sa Egipto na nagtios man sa irarom nin grabeng pagdaogdaog. Dangan sinda marikas na dinara ni Jehova, na garo sa mga pakpak nin mga agila, pasiring sa kaligtasan sa disyerto nin Sinai. (Exodo 19:​1-4) Siring man, pakatapos kan mapait na paglamag kan 1918-19, ilinigtas ni Jehova an saiyang mga saksi, na nagrerepresentar sa saiyang babae, pasiring sa espirituwal na kamugtakan na ligtas para sasainda kun paanong an mga Israelitas nagin ligtas sa disyerto. Nagdatong ini bilang simbag sa saindang mga pamibi.​—Ikomparar an Salmo 55:​6-9.

25. (a) Ano an pinaluwas ni Jehova kan 1919, na kaagid nanggad kan pagpaluwas sa mga Israelitas bilang sarong nasyon sa kapatagan? (b) Sairisay an minabilog sa nasyon na ini, asin sa ano sinda dinara?

²⁵ Sa kaawagan, pinaluwas ni Jehova an mga Israelita bilang sarong nasyon, na pinangatamanan sinda sa espirituwal asin pisikal na paagi. Siring man, magpoon kan 1919, pinaluwas ni Jehova an banhi kan babae bilang sarong espirituwal na nasyon. Dai ini dapat ikaribong sa Mesiyanikong Kahadean na namamahala na hale sa kalangitan magpoon kan 1914. Imbes, an bagong nasyon na ini binibilog kan natatada kan linahidan na mga saksi sa daga, na dinara pasiring sa mamuraway na espirituwal na estado kan 1919. Huli ta tinatawan ngonyan kan “saindang kakanon sa igong panahon,” napakosog sinda para sa gibohon na nasa enotan.​—Lucas 12:​42; Isaias 66:8.

26. (a) Gurano kahaloy an lawig nin panahon na sinambit sa Kapahayagan 12:​6, 14? (b) Ano an katuyohan kan peryodo na tolo may kabangang panahon, kasuarin ini nagpoon, asin kasuarin ini natapos?

²⁶ Gurano kahaloy an pahingalong ini para sa babae nin Dios? An Kapahayagan 12:​6 nagsasabi na 1,260 aldaw. Inaapod kan Kapahayagan 12:​14 an peryodo na sarong panahon, mga panahon, asin kabangang panahon; sa ibang pagtaram, tolo may kabangang panahon. Sa katunayan, an duwang ekspresyon pareho nangangahulogan nin tolo may kabangang taon, na nangyari sa Norteng Hemisperyo magpoon kan tigsoli kan 1919 sagkod sa tigholog kan 1922. Ini an panahon nin nakagiginhawang pagpaomay asin reorganisasyon sa ibinalik liwat na grupong Juan.

27. (a) Sono sa bareta ni Juan, ano an ginibo kan dragon pakatapos kan 1922? (b) Ano an katuyohan ni Satanas sa pagpaluwas nin baha nin paglamag tumang sa mga Saksi?

²⁷ An dragon dai nag-ontok! “Asin an halas nagpaluwas nin tubig na siring sa salog hale sa saiyang ngoso sa likod kan babae, tanganing ikapaanod sia sa salog.” (Kapahayagan 12:​15) Ano an kahulogan kan “tubig na siring sa salog,” o “sarong baha nin tubig”? (The New English Bible) Sinambit kan suanoy na si Hadeng David an maraot na mga tawo na nagtumang saiya bilang “mga baha nin mga tawong daing data” [“mga salog nin mga daing kamanungdanan,” Young]. (Salmo 18:​4, 5, 16, 17) Nagpaluwas ngonyan si Satanas nin kaagid na paglamag paagi sa daing kamanungdanan o “mga tawong daing data.” Pakatapos kan 1922 nagpaluwas si Satanas nin baha nin paglamag tumang sa mga Saksi. (Mateo 24:​9-13) Kabilang digdi an pisikal na kadahasan, “paggibo nin karatan paagi sa pagboot,” mga pagbilanggo, asin pati paggadan paagi sa pagbitay, pagbadil, asin pagpugot. (Salmo 94:20) An pinababang si Satanas, na dai na direktang makararani sa langitnon na babae nin Dios, naghirong may kaanggotan sa pag-atake sa saiyang natatadang banhi sa daga asin tanganing laglagon sinda, magsalang direkta o paagi sa pagpangyari saindang mawaran kan pag-oyon nin Dios paagi sa pagbalga kan saindang integridad. Alagad an saindang determinasyon napatunayan na siring ki Job: “Sagkod na ako magadan dai ko hahaleon sa sakuyang sadiri an sakuyang integridad!”​—Job 27:5.

28. Paano an baha nin paglamag nagin grabe nanggad durante kan Guerra Mundial II?

²⁸ An maringis na bahang ini nin paglamag nagin grabe nanggad kan Guerra Mundial II. Sa Europa mga sampulong ribong Saksi an ibinilanggo sa mga kampo de konsentrasyon kan Nazi, asin rinibo an nagadan. Sa irarom kan mga pamamahala kan mga lider militar sa Italia, Hapon, Korea, asin Taiwan, an maimbod na mga Saksi nagtios nin kaagid na maringis na tratamiento. Maski sa inaapod na demokratikong mga kadagaan, an mga Saksi sinalakay kan mga grupo nin Aksion Katolika, na linahidan nin alkitran asin pinatos nin mga balukag, asin pinahale sa banwaan. Rinibok an Kristianong mga asamblea asin pinahale sa eskuwelahan an mga aking Saksi.

29. (a) Paano ilinadawan ni Juan an tabang na nagdatong gikan sa dai linalaoman na paghahalean? (b) Paano nangyari na “tinabangan kan daga an babae”? (c) Ano an padagos na ginigibo kan dragon?

²⁹ An kaginhawahan nagdatong gikan sa dai linalaoman na paghahalean: “Alagad tinabangan kan daga an babae, asin ibinuka kan daga an saiyang ngoso asin hinalon an salog na pinaluwas kan dragon hale sa ngoso kaiyan. Asin an dragon naanggot sa babae, asin nagluwas sa pakilaban sa mga natatada kan saiyang banhi, na nagkukuyog sa mga pagboot nin Dios asin igwa kan gibohon nin pagpatotoo ki Jesus.” (Kapahayagan 12:​16, 17) “An daga”​—mga elemento na nasa mismong sistema nin mga bagay ni Satanas—​nagpoon na halonon “an salog,” o “baha.” Kan mga taon nin 1940 an mga Saksi nag-ako nin serye nin paborableng mga desisyon sa Korte Suprema kan Estados Unidos, asin hale sa namamahalang mga kapangyarihan sa nagkapirang ibang kadagaan, na nag-oyon sa libertad sa pagsamba. Sa katapustapusi, hinalon kan mga nasyon na Alyado an Nazi-Facistang puwersa, sa kaginhawahan kan mga Saksi na nagtios sa irarom kan maringis na mga diktador. An mga paglamag dai naontok nin lubos, huli ta an kaanggotan kan dragon nagpadagos sagkod ngonyan, asin padagos siang nakikilaban tumang sa mga “igwa kan gibohon nin pagpatotoo ki Jesus.” Sa dakol na kadagaan, an maimbod na mga saksi nasa bilanggoan pa, asin may nagkapira pang nagagadan huli sa saindang integridad. Alagad sa ibang kadagaan na ini, may panahon na an mga autoridad bakong gayong estrikto sa saindang panggigipit, asin an mga Saksi nagkakaigwa nin mas dakulang sokol nin libertad.a Kaya, bilang kaotoban kan hula, padagos na hinahalon kan daga an salog nin paglamag.

30. (a) An daga nagtao nin igong tabang tanganing mangyari an ano? (b) An integridad kan banwaan nin Dios nagresulta sa ano?

³⁰ Sa paaging ini, an daga nagtao nin igong tabang tanganing an gibohon nin Dios makalakop sa labing 200 na kadagaan asin magkaigwa nin labing tolong milyon na maimbod na mga parahulit kan maogmang bareta. Kairiba kan natatada kan banhi kan babae, an dakulang internasyonal na kadaklan nin bagong mga nagtutubod nagkukuyog kan mga pagboot nin Dios kun manongod sa pagigin siblag sa kinaban, malinig sa moral, asin pagkamoot sa mga tugang, asin nagpapatotoo sinda sa Mesiyanikong Kahadean. An saindang integridad simbag sa nanunuyang angat ni Satanas, kaya nagbabagting na para sa kagadanan ni Satanas asin kan saiyang sistema nin mga bagay.​—Talinhaga 27:11.

[Nota sa Ibaba]

17, 18. (a) Anong langitnon na reaksion an ibinareta ni Juan manongod sa pagbagsak ni Satanas hale sa langit? (b) Ano an posibleng pinaghalean kan makosog na tingog na nadadangog ni Juan?

19. (a) An pagtapos kan banal na hilom nin Dios nagbukas kan dalan ki Jesus tanganing gibohon an ano? (b) Ano an ipinaheheling kan pag-apod ki Satanas bilang “an parasumbong sa satong mga tugang”?

20. Paano an maimbod na mga Kristiano nakadaog ki Satanas?

[Tsart sa pahina 27]

(Para sa aktuwal na format, hilingon an publikasyon)

1914 Pagkamundag kan Kahadean

1919 Pagkamundag kan bagong nasyon

1919-1922 Panahon nin pagpaomay

1922- Baha nin paglamag

[Kahon sa pahina 28]

“Binuka kan Daga an Ngoso Kaiyan”

An baha ni Satanas nin paglamag binutasan sa dakol na kadagaan tumang sa linahidan na mga Kristiano asin sa saindang mga kairiba. Alagad, parateng an mga pangyayari sa laog kan sadiring sistema nin mga bagay ni Satanas nagresulta na halonon an baha.

An baha nin mga pagsururog asin pagbilanggo sa Estados Unidos sa kadaklan hinalon kan paborableng mga desisyon kan Korte Suprema kan mga taon nin 1940.

1945: An maringis na paglamag sa mga kadagaan na kontrolado kan Alemania asin Hapon pinaontok kan mga kapangganahan kan Alyado kan Guerra Mundial II.

Kan nagkaigwa nin pagbabawal sa mga Saksi ni Jehova sa Dominican Republic, an mga Saksi ibinilanggo, linatigo, asin kinulata. Kan 1960 an pagsuway sa pag-oltanan kan diktador na si Rafael Trujillo asin kan Iglesia Katolika Romana nagbunga kan paghale kan pagbabawal sa mga Saksi ni Jehova.

An pagbadil, pagsolo, paglugos, paghampak, pagpasakit, asin paggadan sa mga Saksi durante kan guerra sibil sa Nigeria naontok kan 1970 kan sinakop kan mga puwersa nin gobyerno an buminulag na probinsia kun saen nangyari an mga bagay na ini.

Sa España sinalakay an mga harong asin pinagmulta patin ibinilanggo an mga Kristiano huli sa “krimen” na pagtataram manongod sa Dios asin pagsagibo nin Kristianong mga pagtiripon. Sa katapustapusi an paglamag na ini natapos kan 1970, kan an pagbago nin gobyerno nagbunga kan paghale kan pagbabawal sa mga Saksi ni Jehova.

Sa Portugal ginatos na harong an siniyasat na mayong autorisasyon. An mga Saksi kinolgan sa pisikal asin ibinilanggo, asin kinompiskar an saindang mga Biblia. ‘Hinalon’ an terorismong ini kan 1974, kan an rebolusyon militar nagresulta sa pagbago nin gobyerno asin nagkaigwa nin ley na nagtatao nin libertad sa pagtiripon.

Sa Argentina, sa pamamahala nin gobyerno militar, an mga aki kan mga Saksi ni Jehova pinahale sa eskuwelahan, asin an mga Saksi sa bilog na nasyon inarestar huli sa paghuhulit kan maogmang bareta. An paglamag na ini sa katapustapusi natapos kan 1984 kan an namamahalang gobyerno kaidto linegalisar an Asosasyon kan mga Saksi ni Jehova.