Ginigirumdom ni Jehova an mga Naghehelang Asin Gurang
AN PAG-ATUBANG sa “panahon nin kalamidad” puwedeng masakiton. (Salmo 37:18, 19) An siring na panahon tibaad umabot paagi sa paggurang asin an mga kaluyahan na kadungan kaiyan. An iba minalaog sa panahon nin kalamidad kun sinda nag-aagi nin masakit, halawig na helang. Tibaad mamatean ninda na garo baga an saindang helang pinamamahalaan an saindang buhay, na dinodominar an gabos nindang kaisipan asin hiro.
Pero nakaparirigon na girumdomon na pinagdadanay ni Jehova an saiyang mga mata sa gabos niang lingkod. Nakapagagayagaya sa saiyang puso kun an saiyang nagdusay na mga lingkod nagpapadagos na magpaheling nin kaimbodan asin kadonongan sa ibong nin paggurang, paghelang, asin iba pang masakit na kamugtakan. (2 Cronica 16:9a; Talinhaga 27:11) Inaasegurar kita ni Hadeng David: “Si Jehova harani sa mga nag-aarang sa saiya, . . . asin dadangogon nia an agrangay ninda na tabangan.” Iyo, aram nia an saindang mga pagsakit; pinakokosog nia sinda paagi sa saiyang espiritu. “Asin sinda saiyang ililigtas.” Ginigirumdom nia sinda asin tinatabangan nia sindang makatagal. (Salmo 145:18, 19) Alagad kumusta man kita? Kita daw, arog ni Jehova, nakakagirumdom sa mga naghehelang asin gurang?
An mga kaluyahan huli sa paghelang o paggurang mga katunayan nin buhay sa presenteng palakaw na ini. Iyan mga katunayan na kaipuhan niatong paglabanan sagkod na lubos nang otobon ni Jehova an saiyang katuyohan para sa daga asin katawohan. Ngonyan, padakol nang padakol an naggugurang, kaya an dakol aram an mga kaluyahan kan mga iyan. Dugang pa, mientras na hoben pa, kadakol an tinatamaan nin nakagagadan o nakababaldadong mga aksidente o helang. Sagkod na lumihis an gurang na kinaban na ini, an paghelang asin paggurang magpapadagos na magin dakulang angat.
Pinahahalagahan nanggad niato an satong mga naghehelang asin gurang na nagpapadagos bilang arogan sa “pagtios nin karatan asin sa pagpaheling nin pakatagal”! Iyo, “inaapod tang maogma idtong mga nakatagal.” (Santiago 5:10, 11) An dakol na gurang na an kosog ngonyan nainaan na nakikabtang sa laog nin mga dekada sa pagtotokdo, pagsasanay, asin pagmolde sa mga nangengenot ngonyan sa kongregasyon. An dakol na gurang naggagayagaya man na maheling na an mga aki ninda nakikabtang sa pambilog na panahon na ministeryo.—Salmo 71:17, 18; 3 Juan 4.
Sa kaagid na paagi, pinahahalagahan niato an kairiba niato na naghehelang nin grabe alagad, sa ibong nin mga kasakitan ninda, nakakayang magpakosog sato paagi sa saindang kaimbodan. Kun nakatatao an mga ini nin ebidensia kan saindang paglaom na dai nagduduwaduwa, an resulta nakapahihiro asin nakapakokosog na gayo sa pagtubod. An saindang katoninongan nin isip asin pagkakontento nagpapahayag nin pagtubod na tunay nanggad na angay na arogon.
Nakakukubhan para sa saro na biglang maghelang nin kanser, helang sa puso, o iba pang kondisyon na biyong nakapababago sa buhay nin sarong iyan. Masakit man na pagbalo para sa mga magurang na maheling an saindang mga aki na naghehelang o nasasakitan bilang resulta nin aksidente. Ano daw an magigibo nin iba tanganing makatabang? An ano man na siring na panahon nin kalamidad sarong pagbalo sa bilog na Kristianong magturugang. Iyan an oportunidad na ipaheling na ‘an tunay na katood tugang na namundag sa panahon nin kasakitan.’ (Talinhaga 17:17) Natural, bakong gabos na naghehelang asin gurang makalalaom nin personal na tabang hale sa kada miembro kan kongregasyon. Pero sisiertohon ni Jehova na paagi sa saiyang espiritu an dakol napahihiro na tumabang sa laen-laen na paagi. Asin an mga magurang puwedeng magdanay na alisto tanganing masegurado na mayo nin siisay man na nalilihisan.—Helingon an Exodo 18:17, 18.
Hingoahon na Makasabot
Sa paghihingoa na tumabang sa saro, importante na magkaigwa nin marahay na komunikasyon, asin iyan nangangaipo nin panahon, pagpasensia, asin empatiya. Bilang paratabang, natural sanang mawot nindong ‘magpakosog paagi sa mga tataramon’; pero magdangog nin maingat bago kamo magtaram o humiro, o tibaad sa katapustapusi magin kamong “pararangang nakapariribok.”—Job 16:2, 5.
An naghehelang asin gurang sa panapanahon masasakitan na itago an saindang pagkauyam. Dakol an minahal an saindang paglaom na mabuhay tanganing makaligtas sa dakulang kahorasaan, asin ngonyan nakamamate sinda na kaibanan sa pakipag-umbasan sa panahon, paorumbasan na dai ninda sierto kun manggagana sinda. Siring man, an saindang kamugtakan sa parate nakapapagal asin nakapahahadit sainda. An pagpapadanay sa pagtubod na buhay asin makosog sarong pakikilaban, nangorogna kun an saro dai na kayang sunodon an pagmawot nin puso na lubos na makikabtang sa Kristianong ministeryo. Dinalaw nin sarong Kristianong magurang an gurang nang tugang na babae; kan namimibi kaiba nia, hinagad nia ki Jehova na patawadon an satong mga kasalan. Pakapamibi narisa nia na naghihibi an tugang na babae. Ipinaliwanag nia na namatean niang kaipuhan nia an espesyal na pagpatawad ni Jehova huli ta dai na nia kaya na makikabtang sa paghuhulit sa harong-harong. Iyo, an pakamate nin pagigin dai nang kakayahan o nagkukulang, minsan ngani sa parate dai ikakapangatanosan, puwedeng makapamondong gayo sa puso nin saro.
Dapat saboton na an paghadit asin kapagalan puwedeng makaapektar sa pagkabalanse nin isip. Huli sa mga kaluyahan nin paggurang o sa tension nin nakapaluluyang helang, an saro tibaad makamate na pinabayaan na ni Jehova, na tibaad magsabing: “Ano an nagibo ko? Taano ta ako pa? ” Girumdoma an mga tataramon sa Talinhaga 12:25: “An kahaditan sa puso nin tawo iyo an mapasuko dian, alagad an marahay na tataramon iyo an nagpapagayagaya dian.” Hingoahon na hanapon an mararahay na tataramon na makararanga. An mga gurang na nakokolgan tibaad pa ngani, arog ni Job, magpahayag nin pagmawot na magadan. Ini dai kinakaipuhan na makakubhan; pagmaigotan na makasabot. An siring na mga pagreklamo dai man nangangahulogan na ebidensia nin pagkadaing pagtubod o tiwala. Namibi si Job na ‘tagoon sa Sheol,’ alagad an saiyang mga tataramon pakatapos sana kan kapahayagan na iyan nagpapahayag kan saiyang marigon na pagtubod na sa dai na mahahaloy si Jehova bubuhayon sia liwat. An makosog na pagtubod ginigibong posible na matagalan an mga panahon nin labilabing kamondoan asin depresyon asin magdanay pang dayupot ki Jehova.—Job 14:13-15.
Pagpaheling nin Paggalang sa mga Naghehelang Asin Gurang
Pinakamahalaga na trataron an mga naghehelang asin gurang na may paggalang asin dignidad. (Roma 12:10) Kun sinda dai tolos minasimbag arog kan dati o dai na nakagigibo nin dakol, dai kamo mawaran nin pagpasensia. Dai maghidali sa pakikiaram asin paggibo nin mga desisyon para sa sainda. Minsan pa kita may marahay na intension, kun mahiro kita sa paaging nakadodominar o nakadadaogdaog, iyan daing duwa-duwa na nakahahale nin paggalang sa sadiri nin sarong tawo. Sa sarong tesis sa pagkadoktor na ipinublikar kan 1988, an parasiyasat, si Jette Ingerslev, ipinaliwanag kun ano an ibinibilang mismo kan grupo nin mga 85 anyos an edad na pinakamahalaga para sa kuwalidad nin saindang buhay: “Tinawan ninda nin halangkaw na importansia an tolong bagay: an pagigin kaiba nin mga paryentes; an marahay na salud; asin an pinakahuri alagad bakong an pinakadikit an importansia, an pakagibo nin sadiri nindang mga desisyon.” Mangnoha na an patriarkang si Jacob dai minenus kan saiyang mga aki kan sia gumurang; an saiyang mga kamawotan iginalang.—Genesis 47:29, 30; 48:17-20.
An mga naghehelang kaipuhan man na trataron na may dignidad. Nawara nin sarong magurang an saiyang abilidad na magtaram, bumasa, asin sumurat huli ta may salang nagibo durante nin operasyon. Ini makuring kolog, pero an kapwa nia mga magurang nagdesisyon na gibohon an bilog nindang makakaya tanganing maolang an saiyang pakamate na dai nang kamanungdanan. Binabasa ninda saiya ngonyan an gabos na surat sa kongregasyon asin iiniiba sia sa pagpaplano nin iba pang bagay sa kongregasyon. Sa mga miting kan mga magurang, pinagmamaigotan nindang hapoton kun ano an saiyang opinyon. Ipinaaram ninda saiya na ibinibilang pa man giraray ninda siang kapwa magurang asin inaapresyar an saiyang presensia. Sa Kristianong kongregasyon, kita gabos makagigibo nin paghihingoa tanganing mayo nin mga naghehelang o gurang na makamateng ‘isinikwal’ o pinabayaan.—Salmo 71:9.
Pagtabang Tanganing Ikabalik an Espirituwal na Kosog
Kita gabos nangangaipo nin espirituwal na kakanon tanganing mapagdanay an satong pagtubod na buhay asin makosog. Kaya iyan an dahelan kun taano ta dinadagka kita na basahon an Biblia asin an mga publikasyon sa Biblia aroaldaw patin makikabtang nin maigot sa Kristianong mga pagtiripon asin mga aktibidad sa paghuhulit. Sa parate, an mga naghehelang asin gurang nangangaipo nin tabang tanganing magibo ini, asin mahalaga na gibohon kun ano an talagang mapupuwede sa saindang partikular na kamugtakan. Makaoogma, an dakol nakaaatender pa sa mga pagtiripon kun tinatawan nin transportasyon asin dikit na tabang sa Kingdom Hall. An saindang pag-atender sa siring na mga pagtiripon sarong dakulang pagpakosog sa kongregasyon. An saindang pakatagal nakapahihiro asin nakapakokosog sa pagtubod.
Sa dakol na situwasyon an mga naghehelang asin gurang maogma man na makapakikikabtang sa Kristianong ministeryo. An iba puwedeng iiba sa sarong grupo sa kotse na maghuhulit, asin daing pagduda na narerepresko sinda paagi sa pakagibo nin pirang pagdalaw. Kun ini bako nang posible, makanonompong sinda nin kagayagayahan sa impormal na pagpapatotoo sa mga indibiduwal na nanonompongan ninda. An sarong tugang na babae na nagkakanser nagdesisyon na gamiton an natatada pa niang buhay sa espesyal na paghihingoa na ikapalakop an maogmang bareta. An saiyang mapusong paghuhulit nakapakosog sa gabos. Plinano pa ngani nia an saiyang sadiring lobong tanganing ikatao an marahay na patotoo sa dai nagtutubod na mga paryentes, katrabaho, asin kataraed. Kaya an saiyang makamomondong kamugtakan “nakapalakop kan maogmang bareta,” asin an saiyang determinasyon na magpahayag nin pagtubod asin kompiansa nagtao nin espesyal na kahulogan sa saiyang huring mga aldaw.—Filipos 1:12-14.
Marahay na tabangan an mga naghehelang asin gurang na magin makosog sa espirituwal. An mga pamilya puwedeng imbitaran sinda na makiiba sa pamilya sarong banggi, o an kabtang kan saindang pampamilyang pag-adal puwedeng ibalyo paminsanminsan sa harong nin saro na dai makaluluwas. An sarong ina dinara an duwa niang pinakangohod na aki sa harong nin gurang nang tugang na babae tanganing magkairiba sindang makabasa kan My Book of Bible Stories. Pinaogma kaini an gurang nang tugang na babae, asin naogma an mga aki sa atension na itinao nia sainda.
Alagad may mga panahon na maninigong dai madistorbong gayo an naghehelang, asin sa panahon na iyan tibaad pinakamarahay sana na paminsanminsan sindang basahan nin makosog nin pirang materyal. Pero girumdomon na kun an saro maluyang marhay an pisikal tanganing makikabtang sa pag-orolay, an sarong ini puwedeng nangangaipo pa man giraray asin nagmamawot nin pirang espirituwal na asosasyon. Makapamimibi kita kaiba kan mga iyan, basahan sinda, o estoryahan nin mga eksperyensia; alagad maninigo kitang magin maingat na dai magparahaloy kisa makakaya ninda.
Igwa nin sarong sagradong paglilingkod na magigibo pa kan kadaklan sa mga naghehelang asin gurang: an pamimibi para sa iba. An enot na mga disipulo nagtao nin dakulang kahalagahan sa ministeryong ini. Sa sarong okasyon idinistribuwir ninda an paninimbagan nin gibohon sa kongregasyon sa paagi na makakokonsentrar sa pamibi an mga apostol. An maimbod na si Epafras sinambit bilang ‘naghihingoa para sa iba sa saiyang mga pamibi.’ (Colosas 4:12; Gibo 6:4) An siring na pamibi pinakamahalaga asin kapakipakinabang.—Lucas 2:36-38; Santiago 5:16.
Ginigirumdom ni Jehova an mga naghehelang asin gurang asin binabantayan sinda sa saindang panahon nin kalamidad. Tama sanang laoman nia kita na horophoropon man kun ano an magigibo niato tanganing tabangan asin suportaran sinda. An pagmakolog na ipinaheheling niato nagpapaheling kan satong determinasyon na papagdanayon an satong sadiring integridad. Asin naoogma kitang isip-isipon an mga tataramon ni Hadeng David: “Aram ni Jehova an mga aldaw kan mga daing sala, asin an sainda mismong mamanahon magpapadagos minsan sa panahon na daing sagkod.”—Salmo 37:18.
[Kahon sa pahina 28]
Pagtao nin Praktikal na Tabang na may pakasabot
AN MGA katood asin paryentes maninigong kumua nin pundamental alagad tamang kaaraman kun paano aatamanon an mga naghehelang asin gurang. Orog sa gabos, mapakokosog sinda na papagdanayon an positibong pagmansay dapit sa buhay, na mamatean na kinakaipuhan asin inaapresyar, asin na magkaigwa nin pagmateng may pagpapahalaga sa sadiri. Kaya an saindang kuwalidad nin buhay magdadanay sa kamugtakan na mapreserbar kan saindang kagayagayahan ki Jehova, minsan sa ibong nin saindang mga pagmondo asin kolog. Narisa na dakol sa mga Saksi ni Jehova an naggugurang na. An mapuwersang nakakokontribuwir daing duwa-duwa iyo an saindang buhay na interes sa paglaom sa ngapit, an saindang maliwanag na disposisyon sa isip, asin an saindang pakikikabtang sa aktibidad kan Kahadean sagkod na posible. An dating presidente kan Watch Tower Society na si Frederick W. Franz, na matoninong na nagadan sa saiyang ika-100 na taon pakatapos nin magayagayang mabungang buhay, sarong magayon na halimbawa kaini.—Ikomparar an 1 Cronica 29:28.
Sa pankagabsan, an atension sa pundamental na mga bagay nin pan-aroaldaw na pag-ataman puwedeng mangahulogan nin dakula: pisikal na kalinigan, tamang pagkakan, bastanteng inomon patin asin, rasonableng ehersisyo, preskong aire, maluway na pagmasahe, asin nakapakokosog na pag-orolay. An tamang pagkakan puwedeng makakontribuwir sa mas marahay na pagdangog, pagheling, pagpunsionar nin isip, asin pisikal na karahayan, siring man sa mas makosog na resistensia sa helang. Sa mga gurang an simpleng bagay nin tamang pagkakan asin bastanteng inomon puwedeng mangahulogan kan pagkakalaen nin marahay na kamugtakan asin pagkaulianon. Tibaad naghahagad iyan nin paghorophorop na hanapon an klase nin pisikal na ehersisyo na angay sa indibiduwal. An sarong tugang na babae na nagduduman tanganing basahan an gurang asin haros buta nang tugang na babae pinoponan asin tinatapos an kada semanal na pagdalaw paagi sa maluway na pagbayle sa palibot kan kuwarto na kaiba an tugang na gurang. Perming nakaandam an tape recorder na may piniling musika, asin an duwa naoogma sa “ehersisyo” na ini.
Sa dakol na nasyon, an mga organisasyon para sa asistensia makatatao nin mahalagang praktikal na tabang asin makatatao nin impormasyon patin sadol kun manongod sa espisipikong mga kamugtakan saka kun paano makapanggagana sa mga iyan. (Siyempre, an sarong Kristiano maninigong perming mag-ingat na dai malingling sa mga aktibidad na nakaoolang sa satong tunay na Kristianong ministeryo.) Kun minsan itinatao an tabang paagi sa pagpautang nin katreng pan-ospital, mga pansuportar sa paglakaw, pansuportar sa hawak, wheelchair, tabang sa pagdangog, asin iba pa. Mantang dakol na gurang an nakamamateng dai ninda kaipuhan an ano pa man o na bakong kapakipakinabang na magkaigwa nin siring na bagong mga bagay, an mga paryentes kaipuhan na parateng magtao nin marahay na sadol o gumamit pa ngani nin pangongombensir. An praktikal na kabitan sa pinto nin banyo puwedeng magin dahelan nin orog na tunay na kagayagayahan kisa magayon an pagkaareglar na mga burak.
An pag-ataman sa mga gurang puwedeng magcausa nin grabeng tension sa isip, nangorogna kun an saro nagigin ulianon. An pagkaulianon parateng mapandayang minaabot. An saro tibaad probaran na labanan iyan paagi sa pag-olang sa pasyente sa dai kinakaipuhan na dai paggirong. An sarong ulianon puwedeng bigla na sanang maanggot sa saro na dati niang kadayupot. Kaipuhan na marealisar nin mga paryentes na an naggugurang puwede nganing malingawan an gabos na bagay na konektado sa katotoohan—sarong mamondong resulta nin pisikal na pagluya, bakong ebidensia nin pagkawara nin pagtubod.
Kun an pasyente nasa ospital o nasa harong para sa pag-ataman sa mga gurang, kinakaipuhan an marahay na pakikomunikar sa mga tawohan tanganing maaraman kan mga namamahala kun ano an gigibohon may koneksion sa mga kompleanyo, Navidad, o iba pang kinabanon na kapiyestahan. Kun kinakaipuhan an operasyon, an mga paryentes ikapaliliwanag asin ikatatao an patotoo kan mga punto-de-vista na pinanindogan kan pasyente manongod sa pagpaineksion nin dugo.