Gurano Kamakahulogan kan Saindong mga Pamibi?
“Nag-apod ako sa bilog kong puso. Simbaga ako, O Jehova.”—SALMO 119:145.
1, 2. (a) Anong parabola ni Jesus an manongod sa pamibi? (b) Anong konklusyon an isinabi ni Jesus sa duwang pamibi, asin ano an maninigong ipaheling kaini sa sato?
ANONG klaseng pamibi an dinadangog kan Kaglalang, si Jehova Dios? An sarong parabola na isinaysay ni Jesu-Cristo nagpaparisa kan saro sa pundamental na mga kondisyon tanganing simbagon nin Dios an mga pamibi. Si Jesus nagsabi na may duwang tawo na namimibi sa templo duman sa Jerusalem. An saro iginagalang na gayong Fariseo, an saro man ikinaoongis na parasingil nin buhis. An Fariseo namibi: “O Dios, ako nagpapasalamat saimo na bako akong arog kan iba, . . . o minsan arog kan parasingil nin buhis na ini. Ako nag-aayuno nin makaduwa kada semana, nagtatao ako kan tinagba nin gabos na nakukua ko.” Alagad an mapakumbabang parasingil nin buhis “daing ontok na tinutumbok an saiyang daghan, na nagsasabi, ‘O Dios, kaherake ako na parakasala.’”—Lucas 18:9-13.
2 Sa pagkomento sa duwang pamibing ini, si Jesus nagsabi: “Ako nagsasabi saindo, An tawong ini [an parasingil nin buhis] nagpuli sa saiyang harong na napatunayan na orog na matanos kisa saro [an Fariseo]; huli ta an lambang nagpapalangkaw sa saiya man sana ibababa, alagad an nagpapakumbaba ilalangkaw.” (Lucas 18:14) Malinaw na ipinaheling ni Jesus na an pamimibi sana sa satong langitnon na Ama bakong igo. An paagi kan satong pamimibi—an satong kaisipan—mahalaga man.
3. (a) Isabi an pirang pundamental na mga reglamento sa pamibi. (b) An pamibi puwedeng sa anong mga porma?
3 Tunay na an pamibi sarong napakahalaga, magabat, seryosong pribilehiyo, asin an gabos na may kaaraman na Kristiano pamilyar sa pundamental na mga reglamento mapadapit kaiyan. An mga pamibi kaipuhan na pasiring sa sarong tunay na Dios, si Jehova. Iyan kaipuhan na arangon sa ngaran kan saiyang Aki, si Jesu-Cristo. Tanganing akoon, iyan kaipuhan na idolot sa pagtubod. Iyo, “an minadolok sa Dios kaipuhan na magtubod na sia iyo nanggad.” Dugang pa, an mga pamibi nin saro dapat na kaoyon sa kabotan nin Dios. (Hebreo 11:6; Salmo 65:2; Mateo 17:20; Juan 14:6, 14; 1 Juan 5:14) Asin sa mga halimbawa sa Kasuratan, nanonodan niato na an mga pamibi puwedeng sa porma nin pag-omaw, pagpasalamat, kahagadan, asin pagngayongayo.—Lucas 10:21; Efeso 5:20; Filipos 4:6; Hebreo 5:7.
Mga Halimbawa nin Makahulogan na mga Pamibi
4. (a) Anong mga halimbawa nin makahulogan na pamibi an itinao ni Moises asin Josue? (b) Anong mga halimbawa an itinao ni David asin Hadeng Ezequias? (c) Anong pararehong karakteristiko an nasa nagkapira kan mga pamibing ini?
4 Kun may inaatubang na magagabat na problema, kaipuhan an seryosong mga pagdedesisyon, may naginibong grabeng mga kasalan, o namemeligro an satong buhay, an satong mga pamibi espesyalmenteng nagigin odok asin makahulogan. Huling an mga Israelitas nagrebelde pakadangog sa negatibong bareta kan sampulong espiyang bakong maimbod, sinabihan ni Jehova si Moises na an banwaan maninigong paraon. Sa sarong odok asin makahulogan na pamibi, si Moises nakimaherak ki Jehova na dai ini gibohon huli ta napapalabot an Saiyang ngaran. (Bilang 14:11-19) Kan an Israel madaog sa Hai huli sa kapasloan ni Acan, si Josue nagpahayag man nin mainit na pakimaherak basado sa ngaran ni Jehova. (Josue 7:6-9) An dakol sa mga salmo ni David sa porma nin odok na mga pamibi, na an sarong pambihirang halimbawa iyo an Salmo 51. An pamibi ni Hadeng Ezequias kan panahon na salakayon ni Hadeng Senaquerib nin Asiria an Juda saro pang marahay na halimbawa nin makahulogan na pamibi, asin sa giraray kalabot an ngaran ni Jehova.—Isaias 37:14-20.
5. Igwa kita nin ano pang ibang halimbawa nin makahulogan na mga pamibi na ipinamibi nin nagkapirang lingkod ni Jehova?
5 An librong Mga Lamentacion masasabing sarong halawig, odok na pamibi ni Jeremias para sa saiyang banwaan, ta si Jehova paorootrong inaapod dian. (Lamentacion 1:20; 2:20; 3:40-45, 55-66; 5:1-22) Si Esdras asin Daniel nagdolot man nin makahulogan asin odok na mga pamibi para sa saindang banwaan, na itinutuga an mga kasalan kan saindang nasyon asin nakikimaherak na patawadon. (Esdras 9:5-15; Daniel 9:4-19) Asin makasisierto kita na an pamibi ni Jonas kan sia nasa tulak kan dakulang sira odok asin makahulogan.—Jonas 2:1-9.
6. (a) Si Jesus nagtao sato nin anong mga halimbawa nin makahulogan na mga pamibi? (b) Anong pundamental na bagay an kaipuhan tanganing magin makahulogan an satong mga pamibi?
6 Bago pilion an 12 apostol, bilog na bangging namibi si Jesus tanganing an kabotan kan saiyang Ama maotob sa saiyang pagpili. (Lucas 6:12-16) Yaon man an makahulogan na pamibi ni Jesus kan banggi na sia pasaloiban, arog kan nasusurat sa Juan kapitulo 17. An gabos na pamibing ini nagtatao nin makosog na patotoo sa marahay na relasyon ki Jehova Dios kan mga nagpahayag kaiyan. Daing duwa-duwa, ini kaipuhan na magin pundamental na bagay sa satong mga pamibi tangani na iyan magin makahulogan. Asin iyan kaipuhan na odok asin makahulogan tangani na iyan magin ‘mapuwersa’ ki Jehova Dios.—Santiago 5:16, The Jerusalem Bible.
Mga Diperensia Huli sa Pagkabakong Sangkap nin Tawo
7. Anong mga hapot an puwede niatong ihapot sa satong sadiri manongod sa satong mga pamibi?
7 Arog kan nasabi na, sa masakit na mga kamugtakan an satong mga pamibi posibleng magin nangorognang odok asin makahulogan. Alagad kumusta man an satong pamibi sa aroaldaw? Iyan daw nagtatao nin ebidensia sa mainit, haraning relasyon na namamatean niato sa satong langitnon na Ama, si Jehova Dios? Marahay an sarabihon na: “An pamibi dapat na magin makahulogan sa sato tangani na iyan magkaigwa nin kahulogan sa Dios.” Tinatawan daw niato an satong mga pamibi kan paghorophorop na maninigo dian asin sinisierto na iyan talagang gumikan sa satong piguratibong puso?
8. An satong mga pamibi puwedeng magkaigwa nin anong mga diperensia huli sa pagkabakong sangkap nin tawo?
8 Pasil sana na pabayaan na lumuya an satong mga pamibi sa mga bagay na ini. Huli sa satong minanang mga tendensia na bakong sangkap, pasil sana kitang madaya kan satong puso, na hinahalean an satong mga pamibi kan mga kuwalidad na maninigo dian. (Jeremias 17:9) Apuwera sana kun, sa kadaklan na kaso, kita umontok asin maghorophorop bago kita mamibi, tibaad marisa niato na an tendensia magin mekanikal, parareho, rutina an satong mga pamibi. O tibaad iyan magin paorootro, na nagpapagirumdom kan isinabi ni Jesus manongod sa salang paagi kan ‘pamimibi nin mga tawo kan mga nasyon.’ (Mateo 6:7, 8) O tibaad an satong mga pamibi manongod sana sa pankagabsan na mga bagay imbes na sa espisipikong mga bagay o persona.
9. Ano pang ibang peligro an puwedeng lumataw kun mapadapit sa pamibi, asin ano an daing duwa-duwa na sarong dahelan kan mga peligrong ini?
9 Kun beses tibaad may tendensia kitang mag-apreta sa satong mga pamibi. Alagad ta mahalaga an komento na: “Kun kamo daing panahon na mamibi, kamo dai nanggad nin panahon.” Dai niato maninigong mawoton na toomon an nagkapirang tataramon asin otrohon na sana iyan kada mamibi kita; ni kaipuhan man na basahon nin sarong saksi ni Jehova an saiyang pamibi, arog baga kun sa panpublikong katiriponan. Daing duwa-duwa na minalataw an mga peligrong ini, kisuerra an iba, huli sa bagay na dai niato pisikal na naheheling si Jehova Dios, an Saro na pinamimibian niato. Minsan siring, dai niato sia malalaoman na maogma sa siring na mga pamibi, ni nakikinabang man kita sa pagpahayag kaiyan.
Pakahale sa mga Diperensia
10. (a) Anong gawe an magpaparisa nin kakulangan nin pag-apresyar sa halaga nin pamibi? (b) Anong pangyayari sa Kasuratan an nasabihan?
10 Malilikayan niato an nasabing mga peligro sagkod na inaapresyar niato an halaga kan satong mga pamibi sa aroaldaw asin may marahay na relasyon kita sa satong langitnon na Ama. Primero, an siring na pag-apresyar matabang sato na likayan an pag-apreta sa satong mga pamibi na garo baga kaipuhan na asikasohon niato an mas mahalagang mga bagay. Mayo nin mas mahalaga pa kisa pakipag-olay sa Unibersal na Soberano, si Jehova Dios. Totoo, tibaad may mga okasyon na limitado an oras. Halimbawa, kan hapoton ni Hadeng Artajerjes an kopero niang si Nehemias, “Ano ining pinaghahagad mo?” si Nehemias ‘tolos-tolos na namibi sa Dios kan kalangitan.’ (Nehemias 2:4) Mantang an hade naghahalat nin listong simbag, dai puwedeng pahaloyon ni Nehemias an pamibing idto. Alagad maseseguro niato na idto makahulogan asin odok sa saiyang puso huli ta sinimbag tolos idto ni Jehova. (Nehemias 2:5, 6) Alagad apuwera sa pambihirang mga okasyon na arog kaiyan, maninigong tawan niato nin panahon an satong mga pamibi asin pabayaan na maghalat an ibang mga bagay. Kun garo baga apretado an satong pamibi, dai niato lubos na inaapresyar an halaga nin pamibi.
11. Ano an saro pang peligro na kaipuhan niatong likayan, asin anong marahay na halimbawa an itinao ni Jesus sa bagay na ini?
11 An saro pang peligro na tibaad kaipuhan niatong likayan iyo an pag-otro sa pankagabsan na mga bagay. An siring na mga pamibi dai man nagtatao nin maninigong importansia sa napakahalagang pribilehiyo nin pamibi. Sa saiyang arogan na pamibi, si Jesus nagtao nin marahay na halimbawa para sa sato sa bagay na ini. May sinabi siang pitong laen-laen na kahagadan: tolo manongod sa kapangganahan nin katanosan, saro manongod sa satong pan-aroaldaw na pisikal na mga pangangaipo, asin tolo manongod sa satong espirituwal na ikararahay.—Mateo 6:9-13.
12. Si Pablo nagtao nin anong marahay na mga halimbawa kun dapit sa pagigin espisipiko sa satong mga pamibi?
12 Si apostol Pablo nagtao man sato nin marahay na halimbawa sa bagay na ini. Sia nakiolay na ipamibi sia nin iba ‘na itao logod sa saiya an kakayahan na magtaram na may kapusoan.’ (Efeso 6:18-20) Arog man sia kaiyan kaespisipiko sa saiyang mga pamibi para sa iba. “Ini an padagos kong ipinamimibi,” sabi ni Pablo, “na an saindong pagkamoot mag-oswag nin orog sa tamang kaaraman asin lubos na pagmansay; na kamo makasierto sa orog na mahalagang mga bagay, tanganing daing masabi saindo asin dai kamo makapasingkog sa iba sagkod sa aldaw ni Cristo, asin mapano kamo nin matanos na bunga, na paagi ki Jesu-Cristo, para sa kamurawayan asin kaomawan nin Dios.”—Filipos 1:9-11.
13. Paano kita makapagpapahayag nin makahulogan na mga pamibi kun dapit sa satong laen-laen na paglilingkod ki Jehova?
13 Iyo, an satong mga pamibi maninigong manongod sa espisipikong mga bagay, asin hinahagad kaini na horophoropon niato an satong mga pamibi. (Ikomparar an Talinhaga 15:28.) Mantang nasa ministeryo sa langtad, puwede niatong hagadon sa Dios bako sanang an saiyang bendisyon sa satong mga paghihingoa kundi pati an kadonongan, pagkamataktika, pagkamadinamayon, katalingkasan sa pagtaram, o tabang sa ano man na kaluyahan na tibaad nakaoolang sa pagkaepektibo niato sa paghuhulit. Dugang pa, dai daw niato maaarang sa Dios na giyahan kita sa mga nagugutom asin napapaha sa katanosan? Bago tumao nin pahayag-publiko o pagkaigwa nin kabtang sa Pagtiripon sa Paglilingkod o sa Teokratikong Paadalan sa Pagmiministro, puwede niatong arangon ki Jehova na mapasatuya logod nin nagsosopay an saiyang banal na espiritu. Taano? Tangani kitang magkaigwa nin pagkompiar asin marahay na tindog, makapagtaram nin odok asin may marigon na pagtubod, tanganing makatao nin kaomawan sa ngaran nin Dios asin makapakosog sa satong mga tugang. An gabos na pamibing arog kaiyan nakatatabang man na kita magkaigwa nin tamang kamugtakan nin isip kun nagtataram.
14. Ano an maninigong magin kaisipan niato manongod sa mga kaluyahan sa laman na masakit na mapangganahan?
14 Igwa daw kita nin kaluyahan sa laman na linalabanan an satong espirituwalidad asin garo baga masakit na mapangganahan? Maninigong mawoton niato na isabi iyan nin espisipiko sa satong mga pamibi. Asin imbes na panluyahan nin boot, dai kita noarin man mapagal sa mapakumbaba asin odok na pag-arang sa Dios na tabangan kita asin patawadon kita. Iyo, sa irarom nin siring na mga kamugtakan, maninigong mawoton niato na dumolok ki Jehova kun paanong an sarong aki minadolok sa saiyang ama kun may problema, dawa kun gurano kita kaparateng namimibi sa Dios manongod sa iyo man sanang kaluyahan. Kun kita sinsero, kita tatawan ni Jehova nin tabang asin kan pakaaram na kita pinatawad na nia. Sa irarom nin siring na mga kamugtakan, mararanga man kita kan pagtuga ni apostol Pablo na sia may problema man kaidto.—Roma 7:21-25.
Mga Pantabang sa Pagdolot nin Makahulogan na mga Pamibi
15. May anong kaisipan na kita maninigong dumolok ki Jehova Dios sa pamibi?
15 Tanganing magin tunay na makahulogan an satong mga pamibi, kaipuhan na pagmaigotan niato na haleon sa isip an gabos na ibang bagay asin magkonsentrar sa bagay na kita minaatubang sa Dakulang Dios, si Jehova. Kaipuhan na dumolok kita sa saiya na may hararom na paggalang, na inaapresyar an saiyang pagigin mamurawayon. Arog kan sabi ni Jehova ki Moises, mayo nin tawong makaheheling sa Dios pero mabuhay. (Exodo 33:20) Kaya kaipuhan na dumolok kita ki Jehova na may igong kapakumbabaan asin hababang boot, na sarong punto na idinoon ni Jesus sa saiyang parabola manongod sa Fariseo asin parasingil nin buhis. (Miqueas 6:8; Lucas 18:9-14) Si Jehova kaipuhan na tunay nanggad para sa sato. Kaipuhan na an satong kaisipan kapareho kan ki Moises. “Sia nagpadagos na marigon na garo baga nakakaheling kan Saro na dai naheheling.” (Hebreo 11:27) An siring na mga ugale nagpapatotoo na kita may marahay na relasyon sa satong langitnon na Ama.
16. Ano an kabtang kan satong puso sa pagpahayag nin makahulogan na mga pamibi?
16 An satong mga pamibi magigin man makahulogan kun kita dumolok ki Jehova na an satong puso pano nin pagkamoot asin pagpadangat sa saiya. Halimbawa, kanigoan na pag-apresyar ki Jehova Dios asin pagkamoot sa saiya an ipinahayag kan salmistang si David sa Salmo 23 asin 103! Dai mapagdududahan an pagkaigwa ni David nin marahay na relasyon sa saiyang Dakulang Pastor, si Jehova Dios. Sa Teokratikong Paadalan sa Pagmiministro, kita hinahatolan na magtaram na may init asin pagmate. Ini nangorognang maninigo kun kita nagbabasa nin teksto asin orog na kun kita namimibi sa satong langitnon na Ama. Iyo, boot niato na makamate nin arog ki David kan sia mamibi: “Paaraman sa sako an saimong mga dalan, O Jehova; tokdoi ako kan saimong mga dana. Palakawa ako sa saimong katotoohan asin tokdoi ako, huli ta ika an sakuyang Dios nin kaligtasan.” Nagpaparisa man kan maninigong magin pagmate niato an mga tataramon na ini kan saro pang salmista: “Nag-apod ako sa bilog kong puso. Simbaga ako, O Jehova.”—Salmo 25:4, 5; 119:145.
17. Paano niato malilikayan na dai magin paorootro an satong mga pamibi?
17 Tanganing mapagdanay na makahulogan an satong mga pamibi asin malikayan na iyan magin paorootro, marahay na liwat-liwaton niato an mga puntong laog kaiyan. An teksto sa Biblia para sa aldaw o an sarong Kristianong publikasyon na binabasa niato tibaad makatao nin punto. An tema kan leksion sa Torrengbantayan, kan pahayag-publiko, o kan asamblea o kombension na inaatenderan niato puwedeng iyo an magin punto kaiyan.
18. Tanganing magin mas makahulogan an satong mga pamibi, ano an puwede niatong gibohon kaoyon sa mga tataramon asin halimbawa sa Biblia?
18 Tanganing matabangan kita na orog na magin ganadong mamibi asin gibohon na mas makahulogan an satong mga pamibi, marahay na liwaton an satong pisikal na posisyon. Para sa panpublikong mga pamibi, natural sanang idinuduko niato an satong payo. Alagad para sa mas personal na mga pamibi, may mga nakarisa na marahay na lumuhod sa atubangan ni Jehova kun namimibi nin solo o bilang pamilya huli ta narisa ninda na an posisyon na iyan nakatatabang sa pagkaigwa ninda nin mapakumbabang kaisipan. Sa Salmo 95:6 kita sinasadol: “O madia kamo, magsamba kita asin maghorohod; lumuhod kita sa atubang ni Jehova na satong Kaggibo.” Si Salomon luminuhod kan sia namimibi sa pagdusay kan templo ni Jehova, asin inugale ni Daniel na lumuhod kun namimibi.—2 Cronica 6:13; Daniel 6:10.
19. An mga may paninimbagan sa panpublikong pamibi marahay na girumdomon an anong mga bagay?
19 Huli sa kahalagahan nin pamibi, an nombradong kamagurangan maninigong gumamit nin marahay na paghusgar sa kun siisay an aapodon ninda na tumao nin panpublikong pamibi para sa kongregasyon. An bautisadong lalaki na nagrerepresentar sa kongregasyon maninigong sarong maygurang na Kristianong ministro. An saiyang pamibi maninigong magparisa na sia may marahay na relasyon sa Dios. Asin an mga may pribilehiyong magtao nin siring na mga pamibi maninigong girumdomon na sinda dapat na madangog, huli ta sinda namimibi bako sanang para sa saindang sadiri kundi para man sa bilog na kongregasyon. Ta kun dai, paano makaiiba an kongregasyon sa pagsabi nin “Amen” pagkatapos kan pamibi? (1 Corinto 14:16) Siyempre, tanganing an iba makapagsabi nin makahulogan na “Amen,” kaipuhan na sinda maghinanyog nin atento, na dai pinababayaan na rumayo an saindang isip kundi talagang ginigibong sadiri ninda an pamibi. An saro pang patanid na puwedeng idugang iyo na mantang an siring na mga pamibi idinodolot ki Jehova Dios, iyan dai maninigong gamiton na sarahotan sa pagsermon sa mga nagdadangog o sa pag-atubang nin personal sanang mga ideya.
20. Huling an makahulogan na mga pamibi na itinaram nin makosog nagtatao nin bendisyon sa mga nagdadangog, ano an itinataong suhestion?
20 Kun an satong makosog na mga pamibi talagang makahulogan, iyan nagtatao nin bendisyon sa mga nagdadangog. Huli ta siring, an mga mag-agom asin pamilya marahay na magkaigwa nin kisuerra sarong iribang pamibi kada aldaw. Dian, an saro, arog baga kan payo nin pamilya, magtataram para sa agom o sa iba sa pamilya.
21. Tanganing magin makahulogan an satong mga pamibi, ano an saro pang bagay na maninigong konsideraron?
21 Tanganing magin talagang makahulogan an satong mga pamibi, igwa nin saro pang bagay na dapat niatong tawan nin atension. Ini iyo an bagay na kita kaipuhan na daing pagliwat kun dapit sa satong mga pamibi, na ano an boot sabihon kaini? Na kita mamuhay kaoyon sa satong mga pamibi asin gibohon an ipinamimibi niato. An bagay na ini manongod sa satong mga pamibi ipaliliwanag sa masunod na luwas.
Ano an Simbag Nindo?
◻ Ano an nagkapira sa makahulogan na mga pamibi na nasusurat sa Kasuratan?
◻ Huli sa pagkabakong sangkap nin tawo, paano puwedeng magkadiperensia an satong mga pamibi?
◻ Paano niato mapanggaganahan an nagkapirang diperensia kan satong mga pamibi?
◻ Ano an nagkapirang pantabang sa satong pagdolot nin makahulogan na mga pamibi?