An mga Pamibi Nagkakaipo nin mga Gibo
“Si Jehova harayo sa mga maraot, alagad an pamibi kan mga matanos saiyang dinadangog.”—TALINHAGA 15:29.
1. Ano an sarong kondisyon na dapat na maotob tanganing simbagon nin Dios an satong mga pamibi?
AN GABOS na kahagadan ni Jehova madonong, makatanosan, asin mamomoton. Iyan bako nanggad na magabat. (1 Juan 5:3) Kaiba dian an saiyang mga kahagadan manongod sa pamibi, na an saro iyo na kaipuhan kitang mamuhay sono sa satong mga pamibi. An satong gawe dapat na makapaogma ki Jehova Dios. Ta kun dai, paano niato sia malalaoman na konsideraron na may pabor an satong mga kahagadan asin pagngayongayo?
2, 3. Taano ta dai sinimbag ni Jehova an mga pamibi kan mga Israelitas, arog kan maheheling sa mga tataramon ni Isaias, Jeremias, asin Miqueas?
2 Ini sarong bagay sa pamibi na nalilingawan kan kadaklan na nasa Kakristianohan, kun paanong iyan nalingawan kan apostatang mga Israelitas kan kaaldawan ni Isaias. Iyan an dahelan na isinugo ni Jehova an saiyang propeta na irepresentar sia sa pagsabi: “Minsan pa mamibi kamo nin dakol, dai ako maghihinanyog . . . Pangaghugas kamo; pangaglinig kamo; halea nindo an karatan kan saindong mga gibo sa atubangan kan sakuyang mga mata; umontok na kamo sa paggibo nin maraot. Pag-adal kamong gumibo nin marahay.” (Isaias 1:15-17) Iyo, kun gusto kan mga Israelitas na idto na kamtan an pag-oyon nin Dios, kaipuhan sindang gumawe sa paagi na ikinaoogma nia. Arog kan marahay na sarabihon: “Tanganing dangogon ka nin Dios kun ika namimibi, kaipuhan na dangogon mo Sia kun Sia nagtataram.”
3 An totoo, paorootrong naheling ni Jehova Dios na kaipuhan na ipagirumdom sa saiyang banwaan na Israel an mga katotoohan na ini. Kaya mababasa niato: “An irinarayo an saiyang talinga tanganing dai makadangog kan pagboot—minsan an saiyang pamibi bagay na makababalde” sa Dios. “Si Jehova harayo sa mga maraot, alagad an pamibi kan mga matanos saiyang dinadangog.” (Talinhaga 28:9; 15:29) Huli sa situwasyon na ini, si Jeremias nag-agrangay: “Inolang mo [ni Jehova] nin panganoron an pagdolok sa saimo, tanganing dai makaagi an pamibi.” (Lamentacion 3:44) Tunay na naotob an patanid na ipinasabong ki Miqueas na itao: “Sinda mag-aarang nin tabang ki Jehova, alagad ta dai nia sinda sisimbagon. Asin tatagoon nia an saiyang lalauogon sa sainda sa panahon na iyan, huli ta naggiribo sinda nin maraot sa saindang mga gawe.”—Miqueas 3:4; Talinhaga 1:28-32.
4. Ano an nagpaparisa na minsan sa banwaan ni Jehova an nagkapira dai nakasasabot sa pangangaipo nin mga gibo na kaoyon sa saindang mga pamibi?
4 Kaya kaipuhan na mamuhay sono sa satong mga pamibi. Kaipuhan daw na idoon an katotoohan na ini ngonyan? Iyo nanggad, bako sanang huli sa situwasyon sa Kakristianohan kundi huli man sa situwasyon kan nagkapira sa nagdusay na banwaan ni Jehova. Sa labing 3,000,000 na parahayag kan maogmang bareta kan sarong taon, labing 37,000 an natiwalag huli sa gawe na bakong maninigo sa Kristiano. An proporsion kaiyan mga saro sa 80. Posibleng gayo, an kadaklan sa mga tawong ini namimibi kisuerra paminsanminsan. Alagad sinda daw minagawe kaoyon sa saindang mga pamibi? Dai nanggad! Pati an nagkapirang kamagurangan na dakol nang taon sa bilog na panahon na paglilingkod kabilang sa mga nadisiplina. Makamomondo nanggad! Tunay na “Mag-ingat an siisay man na naghohona na nagtitindog na dai sia mapukan,” na dai sia gumawe sa paagi na minagibo sa saiyang mga pamibi na dai na maako kan saiyang Kaggibo.—1 Corinto 10:12.
Kun Taano ta Nagkakaipo nin mga Gibo an Pamibi
5. Tanganing simbagon ni Jehova an satong mga pamibi, paano niato dapat na patunayan an satong sinseridad?
5 Tanganing dangogon ni Jehova Dios an satong mga pamibi, bako sana na kita kaipuhan na magin malinig sa moral asin espirituwal kundi kaipuhan man na patunayan niato an pagigin sinsero kan satong mga pamibi paagi sa paggibo para sa satong ipinamimibi. An pamibi sana bakong pansalida sa sadiosan, intelihenteng paghihingoa. Dai gigibohon ni Jehova para sa sato an kaya niatong gibohon mismo paagi sa odok na pag-aplikar kan hatol kan saiyang Tataramon asin pagkuyog sa paggiya kan saiyang banal na espiritu. Maninigo na kita andam na gibohon an bilog niatong makakaya sa bagay na ini tangani na sia may basihan sa pagsimbag sa satong mga pamibi. Kaya, ‘dai kita maninigong humagad nin labi sa andam niatong pagmaigotan,’ arog kan marahay na pagkasabi nin saro.
6. Huli sa anong duwang dahelan na kita maninigong mamibi?
6 Minsan siring, tibaad may maghapot: ‘Taano ta mamimibi pa kun kaipuhan kitang gumibo para sa satong ipinamimibi?’ Kita maninigong mamibi huli sa kisuerra duwang marahay na dahelan. Enot, paagi sa satong mga pamibi minimidbid niato na an gabos na bagay gikan sa Dios. Sia an Paratao kan gabos na marahay asin sangkap na balaog—an liwanag kan aldaw, an oran, an mabungang mga panahon, asin dakol pang iba! (Mateo 5:45; Gibo 14:16, 17; Santiago 1:17) Ikaduwa, an kapangganahan o dai kan satong mga paghihingoa depende sa bendisyon ni Jehova. Arog kan mababasa niato sa Salmo 127:1: “Sagkod na bakong si Jehova mismo an magtogdok sa harong, basang sana an pagpapagal dian kan mga nagtotogdok kaiyan. Sagkod na bakong si Jehova mismo an magbantay sa siudad, basang sana na an bantay nagdanay na mata.” Iyan man an punto kan mga tataramon na ini ni apostol Pablo sa 1 Corinto 3:6, 7: “Ako an nagtanom, si Apolos an nagbaribi, alagad an Dios iyo an nagpapatubo; kaya minsan an nagtatanom daing halaga ni an nagbabaribi, kundi an Dios na nagpapatubo kaiyan.”
Mga Halimbawa kan Suanoy
7, 8. (a) Anong pangyayari sa buhay ni Jacob an nagpapaheling na nasabotan nia na kaipuhan na may kaibang gibo an pamibi? (b) Anong halimbawa an itinao ni Hadeng David sa bagay na ini?
7 Dakol na mga pangyayari an sinasabi kan Kasuratan na nagpapaheling na an maimbod na mga lingkod ni Jehova naggibo para sa ipinamimibi ninda. Helingon niato an nagkapirang halimbawa. Huling an makoapo ni Abraham na si Jacob an nagkamit kan bendisyon sa pagkamatua, an matua niang tugang na si Esau nagkaigwa nin mapanggadan na pagkaongis sa saiya. (Genesis 27:41) Pakalihis nin mga 20 taon, kan si Jacob papuli na hale sa Padan-aram pasiring sa dagang namundagan nia kaiba an dakulang pamilya asin dakol na hayop, nabaretaan nia na sasabaton sia ni Esau. Sa pakagirumdom sa kaanggotan ni Esau, si Jacob odok na namibi ki Jehova para sa proteksion tumang sa kaanggotan kan saiyang tugang. Alagad iyo na sana daw iyan an ginibo nia? Dai nanggad. Nagsobol sia nin dakol na regalo sa enotan nia, na nangangatanosan: “Maranga ko logod sia kan regalo na naeenot sa sakuya.” Asin iyan man nanggad an nangyari, ta kan magkasabat an duwang magtugang, kinugos ni Esau si Jacob asin hinadokan sia.—Genesis, kapitulo 32, 33.
8 Si David nagtao nin saro pang halimbawa sa paggibo para sa ipinamimibi niato. Kan agawon kan aki niang si Absalom an saiyang trono, an parahatol ni David na si Ahitofel uminiba ki Absalom. Kaya si David nagngayongayo nin odok na masudya logod an hatol ni Ahitofel. Namibi sana daw si David? Dai, pinagbotan nia an saiyang maimbod na parahatol na si Husai na umiba ki Absalom tanganing masudya nia an hatol ni Ahitofel. Asin iyan an nangyari. Kinuyog ni Absalom an salang hatol na itinao saiya ni Husai, na isinikwal an hatol ni Ahitofel.—2 Samuel 15:31-37; 17:1-14; 18:6-8.
9. Paano ipinaheling ni Nehemias na nasabotan nia an prinsipyo na an pamibi nagkakaipo nin gibo?
9 An saro pang halimbawa na puwedeng sitaron para sa paghatol sato iyo an ki Nehemias. May dakula siang proyekto na kaipuhan na tapuson—an pagtogdok liwat sa mga lanob nin Jerusalem. Minsan siring, dakol na kaiwal an nagkakasapakat tumang sa saiya. Si Nehemias namibi asin naggibo, arog kan satong mababasa: “Kami namibi sa samong Dios asin nagbugtak nin bantay tumang sa sainda aldaw asin banggi.” Poon kaidto, an kabanga sa mga tawohan ni Nehemias nagtindog na andam na protehiran an kabanga, an mga nagtotogdok kan lanob.—Nehemias 4:9, 16.
An Halimbawa ni Jesus
10, 11. Anong mga halimbawa na itinao ni Jesus an nagpapaheling na sia naghiro oyon sa saiyang mga pamibi?
10 Si Jesu-Cristo nagtao sato nin marahay na halimbawa sa paggibo para sa satong ipinamimibi. Tinokdoan nia kitang mamibi: “Pakangbanalon logod an saimong ngaran.” (Mateo 6:9) Alagad ginibo man ni Jesus an bilog niang makakaya tanganing an mga naghihinanyog sa saiya magpakangbanal sa ngaran kan saiyang Ama. Siring man, si Jesus dai sana namibi na: “Ama, pamurawaya an saimong ngaran.” (Juan 12:28) Dai, ginibo nia an saiyang makakaya na mapamuraway an ngaran kan saiyang Ama asin madagka an iba na gibohon man iyan.—Lucas 5:23-26; 17:12-15; Juan 17:4.
11 Sa pakaheling kan dakulang espirituwal na pangangaipo kan banwaan, sinabihan ni Jesus an saiyang mga disipulo: “An anihon mahiwas, alagad an mga paraani kakadikit. Kaya makimaherak kamo sa Kagurangnan kan anihon [si Jehova Dios] na magsobol nin mga paraani sa saiyang anihon.” (Mateo 9:37, 38) Iyan sana daw an ginibo ni Jesus? Bako nanggad! Pakatapos tolos kaiyan, isinugo nia an saiyang 12 apostol na padis-padis sa paghuhulit, o ‘pag-ani.’ Kan huri, isinugo ni Jesus an 70 paraebanghelyo na gumibo man kaiyan.—Mateo 10:1-10; Lucas 10:1-9.
Pag-aplikar kan Prinsipyo
12. Ano an koneksion nin gibo sa satong mga pamibi na tawan logod kita nin Dios kan satong kakanon sa aroaldaw?
12 Malinaw na linalaoman kita ni Jehova Dios na dai magin pabarobago, na gumawe kaoyon sa satong mga pamibi, sa siring pinatutunayan an satong pagkasinsero. Sinabihan kita ni Jesus na mamibi: “Itao mo samo ngonyan an samong kakanon para sa aldaw na ini.” (Mateo 6:11) Kaya tama sana, an gabos niang parasunod naghahagad nin siring sa Dios. Alagad linalaoman daw niato an satong langitnon na Ama na simbagon an pamibing iyan na kita mayo nin ginigibo para dian? Dai nanggad. Kaya ngani mababasa niato: “An hugakon nagpapaheling na sia may pagmawot”—tibaad paagi pa ngani sa pamibi—“alagad an saiyang kalag mayong-mayo.” (Talinhaga 13:4) Iyan man an puntong idinoon ni apostol Pablo sa 2 Tesalonica 3:10, na an sabi: “Kun an siisay man habong magpagal, dai man sia pagpakakanon.” An pamibi para sa satong kakanon sa aroaldaw kaipuhan na ibanan nin pagigin andam na magtrabaho. Kawiliwili nanggad, madonong na sinabi ni Pablo na an mga “habong magpagal” dai maninigong magkakan. An iba na gustong magtrabaho tibaad daing trabaho, naghehelang, o gurangon na tanganing magtrabaho. Gusto nindang magtrabaho, pero ini dai kaya kan saindang kamugtakan. Kaya, sinda tama sanang mamibi para sa saindang kakanon sa aroaldaw asin maglaom na akoon iyan.
13. Tanganing simbagon ni Jehova an satong mga pamibi para sa saiyang banal na espiritu, ano an kaipuhan niatong gibohon?
13 Hinatolan man kita ni Jesus na humagad sa saiyang langitnon na Ama kan Saiyang banal na espiritu. Arog kan ipinanuga sato ni Jesus, an Dios mas andam na tawan kita kan banal na espiritu kisa daganon na mga magurang na tumao nin marahay na mga bagay sa saindang mga aki. (Lucas 11:13) Alagad malalaoman daw niato si Jehova Dios na milagrosong itao sa sato an saiyang banal na espiritu, na dai kita nin ginigibong paghihingoa? Dai nanggad! Kaipuhan na gibohon niato an gabos niatong makakaya tanganing akoon an banal na espiritu. Apuwera sa pag-arang kaiyan sa pamibi, kaipuhan kitang maigot na magkakan kan Tataramon nin Dios. Taano? Huli ta si Jehova Dios dai nagtatao kan saiyang banal na espiritu nin siblag sa saiyang Tataramon, asin dai kita makalalaom na akoon an banal na espiritu kun dai niato iintindihon an daganon na paagihan na ginagamit ni Jehova ngonyan, “an maimbod asin madonong na oripon,” na ipinagrerepresentar kan Namamahalang Grupo kan mga Saksi ni Jehova. Kun mayo kan tabang hale sa “oripon” na ini, dai niato masasabotan an bilog na kahulogan kan satong binabasa ni maaaraman man niato kun paano iaaplikar an satong nanonodan.—Mateo 24:45-47.
14, 15. (a) Tanganing simbagon ni Jehova an satong mga pamibi para sa kadonongan, paano kita dapat na magkooperar? (b) Paano ini pinatutunayan kan halimbawa ni Hadeng Salomon?
14 An prinsipyo na an mga pamibi nagkakaipo nin gibo aplikado man sa mga tataramon na ini ni disipulo Santiago, an tugang sa ina ni Jesus: “Kun an siisay man saindo kulang nin kadonongan, padagos siang maghagad sa Dios, huli ta sia abundang nagtatao sa gabos na dai nin pagbasol; asin iyan itatao saiya.” (Santiago 1:5; Mateo 13:55) Alagad itinatao daw nin Dios an kadonongan na ini paagi sa milagro? Dai. Enot sa gabos, kaipuhan na magkaigwa kita kan tamang kaisipan, arog kan mababasa niato: “Totokdoan nia an mga mahoyo kan saiyang dalan.” (Salmo 25:9) Asin paano tinotokdoan nin Dios “an mga mahoyo”? Paagi sa saiyang Tataramon. Sa giraray, kaipuhan kitang gumibo nin paghihingoa na masabotan iyan asin iaplikar iyan, arog kan ipinaririsa sa Talinhaga 2:1-6: “Aki ko, kun akoon mo an sakong mga kasabihan asin pahalagahan mo an sakong mga pagboot, na magtao nin atension sa kadonongan sa saimong talinga, tanganing ikakiling mo an saimong puso sa pakamansay; siring man, kun mag-apod ka sa pakasabot asin magkurahaw ka sa pagmansay, kun padagos mong hanapon iyan siring baga sa pirak, . . . sa siring masasabotan mo an pagkatakot ki Jehova, asin makukua mo an mismong kaaraman dapit sa Dios. Huli ta si Jehova nagtatao nin kadonongan.”
15 Kan si Hadeng Salomon mamibi para sa kadonongan asin milagrosong sinimbag nin Dios an saiyang pamibi, aplikado man daw an prinsipyo na an mga pamibi nagkakaipo nin gibo? Iyo, huli ta bilang hade sa Israel, si Salomon obligadong sumurat kan sadiri niang kopya kan Pagboot, basahon iyan aroaldaw, asin iaplikar iyan sa saiyang buhay. Alagad kan si Salomon gumibo nin tumang sa mga instruksion kaiyan, arog baga kan pagpadakol nia nin mga agom asin kabayo, an saiyang mga gibo bako nang oyon sa saiyang mga pamibi. Bilang resulta, si Salomon nagin apostata asin nagadan siring sa “mangmang.”—Salmo 14:1; Deuteronomio 17:16-20; 1 Hade 10:26; 11:3, 4, 11.
16. Anong ilustrasyon an nagpapaheling na an satong mga pamibi na mapangganahan logod an mga kaluyahan sa laman kaipuhan na may kaibang gibo?
16 An prinsipyo na an mga gibo kaipuhan na kaiba nin pamibi minaaplikar man kun kita naghahagad nin tabang sa Dios na mapangganahan an sarong natatanom, paslong ugale. Kaya an sarong payunir na tugang na babae nag-admitir na sia adikto sa mga drama, na pinagheheling iyan magpoon alas 11:00 n.a. sagkod alas 3:30 n.h. aroaldaw. Mantang nanodan sa sarong pahayag sa pandistritong kombension kun gurano an danyos kan inmoral na mga programang ini, idinolok nia an bagay na iyan sa Dios sa pamibi. Alagad nahaloyhaloy bago nia napangganahan an ugale. Taano? Huli ta, arog kan sabi nia: ‘Namimibi ako na mahale logod an ugaleng iyan dangan nagheheling man giraray ako kan mga programa. Kaya nagdesisyon ako na maglingkod sa langtad nin bilog na aldaw tanganing dai ako masugotan. Sa katapustapusi nakaya ko nang pundohon an TV pagkaaga asin dai na iyan binubukasan sa bilog na aldaw.’ Iyo, apuwera sa pamimibi na mapangganahan an saiyang kaluyahan, kinaipuhan siang maghingoa na mapangganahan iyan.
An Pamibi Asin an Satong Paghuhulit
17-19. (a) Anong mga katunayan an nagpapaheling na an mga Saksi ni Jehova minagawe oyon sa saindang mga pamibi? (b) Anong halimbawa nin sarong indibiduwal an nagdodoon kan iyo man sanang punto?
17 An prinsipyo na an pamibi nagkakaipo nin gibo orog kisa ano pa man totoo sa paghuhulit kan Kahadean. Kaya, an gabos na Saksi ni Jehova bako sanang namimibi para sa pagdakol nin mga paraani kundi naghihingoa man sa gibohon na iyan. Bilang resulta, nakaheling sinda nin makangangalas na mga pagdakol sa sunod-sunod na kadagaan. Saro sanang halimbawa: Kan 1930 sasaro sana an saksi ni Jehova na naghuhulit sa Chile. Ngonyan, an sarong Saksi nagin bako sanang sangribo kundi 30,000. (Isaias 60:22) Ini daw bunga sana nin mga pamibi? Dai, may kaiba man na gibo. Tara, kan 1986 sana an mga Saksi ni Jehova sa Chile nagdusay nin labing 6,492,000 na oras sa paghuhulit!
18 Iyo man kun prohibido an paghuhulit. An mga Saksi bako sanang nag-aarang nin pagdakol kundi naggigibo nin hilom asin nagpapadagos sa paghuhulit. Kun siring, sa ibong nin opisyal na pagtumang, nagkakaigwa nin mga pag-oswag sa kadagaan na ini. Kaya, sa 33 na kadagaan na an mga Saksi ni Jehova napapaatubang sa opisyal na pagtumang, kaidtong 1986 na taon nin paglilingkod nagdusay sinda nin labing 32,600,000 na oras sa saindang paghuhulit asin nag-ogma sa 4.6-porsientong pag-oswag!
19 Siyempre, an prinsipyo na an pamibi nagkakaipo nin gibo minaaplikar man sa indibiduwal. Tibaad namimibi kita ki Jehova na makakua man logod nin pag-adal sa Biblia pero dai man ginigibo an bilog niatong makakaya tanganing makakua. Iyan an eksperyensia nin sarong payunir. Huling sasaro an inaadalan sa Biblia, sia namibi na madugangan iyan. Iyan sana daw an ginibo nia? Bako, kundi siniyasat nia nin maingat an saiyang ministeryo asin nadiskobre na sa saiyang mga pagdalaw liwat dai nia pinalalataw an tema manongod sa pag-adal sa Biblia. Sa paghiro oyon digdi, dai nahaloy nagkaigwa sia nin duwa pang pag-adal sa Biblia.
20. Paano puwedeng sumaryohon an prinsipyo na an pamibi nagkakaipo nin gibo?
20 Dakol pang halimbawa an ikatatao tanganing patunayan na an pamibi nagkakaipo nin gibo. Halimbawa, yaon an mga may koneksion sa personal na mga relasyon sa pamilya o kongregasyon. Alagad an mga halimbawa sa enotan maninigong bastante na tanganing biyong liwanagon na an pamibi talagang nagkakaipo nin gibo. Ini lohiko nanggad, ta dai niato malalaoman si Jehova Dios na tawan nin paborableng pagkonsiderar an satong mga kahagadan kun napaaanggot niato sia paagi sa sato mismong gawe. Natural man na dapat niatong gibohon an bilog niatong makakaya kaoyon sa satong mga pamibi tanganing malaoman niato si Jehova na gibohon para sa sato an dai niato kayang gibohon para sa satong sadiri. Tunay na an mga prinsipyo ni Jehova madonong asin makatanosan. Iyan rasonable, asin para sa sadiri niatong kapakinabangan na kita minagawe oyon dian.
Nagigirumdoman daw Nindo?
◻ Anong kahagadan manongod sa pamibi an nalingawan nin dakol sa suanoy na Israel?
◻ Taano ta bako man na bakong rasonable an Dios sa paghagad na kita gumibo saka mamibi para sa satong minamawot?
◻ Anong suanoy na mga halimbawa an nagpapaheling na an mga lingkod ni Jehova naggibo para sa saindang ipinamimibi?
◻ Tanganing simbagon nin Dios an satong mga pamibi para sa saiyang banal na espiritu asin para sa kadonongan, ano an kaipuhan niatong gibohon?
◻ Paano an prinsipyo na an pamibi nagkakaipo nin gibo minaaplikar sa satong ministeryo sa langtad?
[Ritrato sa pahina 9]
Sinadol ni Jesus an saiyang mga disipulo na mamibi para sa mas dakol na paraani. Alagad isinugo man nia sinda sa paghuhulit, o ‘pag-ani’
[Ritrato sa pahina 10]
Namimibi daw kamo para sa tabang na mapogolan an saindong pagheling nin telebisyon? Kun siring iaplikar an prinsipyo na an pamibi nagkakaipo nin gibo paagi sa pagpondo sa saindong TV