Alkohol—Ano an Kristianong Punto-de-Vista Manongod Kaiyan?

“SIISAY an may kasakitan? Siisay an may karibarawan? Siisay an may mga pag-iriwal? Siisay an may kahaditan? Siisay an may mga lugad na daing kadahilanan? Siisay an yurupyup na an mga mata? An naghaharaloy sa arak.” (Talinhaga 23:29, 30) Iyo, inaadmitir kan Biblia na an mga inomon na de alkohol puwedeng magtao nin maraot nanggad na mga epekto: mga halusinasyon, makasosopog na gawe, kapay na mga paghiro, diperensia sa salud, problema sa pamilya, asin pati an pagtios.

Mangnoha na an teksto sa Biblia na nasa enotan nagtataram manongod sa mga “naghaharaloy” sa arak, mga may bisyong magburat! Para sa mga siring, an alkohol garo ilo, na parateng ginigikanan nin maraot na pisikal asin mental na mga epekto. (Talinhaga 23:32-35) An makosog na mga parainom puwedeng mawaran nin pagpopogol sa sadiri asin gumibo nin mga kun sa normal ikasosopog ninda. Kaya an Biblia nagpapatanid: “Dai ka makiiba sa mga makosog na parainom nin arak, sa mga paslong parakakan nin karne. Huli ta an paraburat asin paslo magigin dukha, asin an pagtungka magubing sa saro nin mga trapo.” (Talinhaga 23:20, 21) An pagbuburat kabilang man sa “mga gibo kan laman,” na puwedeng makaolang sa saro sa paglaog sa Kahadean nin Dios.—Galacia 5:19, 21; 1 Corinto 6:10.

“Bakong Madonong”—Para Kiisay?

Ini daw nangangahulogan na an alkohol biyong ipinangangalad sa mga Kristiano? Ano an masasabi manongod sa sinabi kan klerigo, na nasambitan sa sinusundan na artikulo, na basado daa sa Talinhaga 20:1, na “an mga madonong dai nanggad nag-iinom nin arak.” Isinalin kan King James Version an bersikulong ini na: “An arak paraolog-olog, an makosog na inomon nakapariribok: asin an siisay man na madaya kaiyan bakong madonong.” Sa liwat, dai sinasagwe kan Biblia an mga nag-iinom nin arak kundi, imbes, an mga nadadaya kaiyan! “An naghaharaloy sa arak” asin an “mga makosog na parainom nin arak”—an mga ini iyo an “bakong madonong.”

Horophoropon man an Isaias 5:11, 22. An mga bersikulong ini nagsasabi: “Herak man kan mga nagmamata nin amay sa aga tanganing hanapon sana ninda an nakabuburat na arak, na nagdadanay sagkod sa matangang banggi tanganing palaadon sinda kan arak mismo! Herak man kan mga makokosog sa pag-inom nin arak, asin kan mga tawong makokosog sa pagsalak nin nakabuburat na arak.” Ano an kinokondenar ni Isaias? Bako daw na an labi-labing pag-inom, an pag-inom poon sa “amay sa aga” sagkod sa “matangang banggi”?

An maimbod na mga lingkod nin Dios—kapareho ni Abraham, Isaac, asin Jesus—natalang nag-inom nin arak, nin tama sana. (Genesis 14:18; 27:25; Lucas 7:34) Nasasabihan man kan Biblia an arak kabilang sa mga bendisyon na gikan ki Jehova. (Genesis 27:37; Deuteronomio 11:14; Isaias 25:6-8) Ipinaririsa ngani kan Biblia na an tama sanang pag-inom nin arak puwedeng magtao nin kapakipakinabang na mga epekto. An arak “nagpapagayagaya sa puso nin magagadanon na tawo,” sabi kan salmista. (Salmo 104:15) Irinekomendar ni apostol Pablo ki Timoteo: “Dai ka na uminom nin tubig [na maati], kundi gumamit ka nin kadikit na arak para sa saimong tulak asin sa parate mong kahelangan.”—1 Timoteo 5:23.

Arak o Tagok nin Ubas?

An iba nangangatanosan na an “arak” na sinasabi sa mga tekstong iyan kan Biblia ordinaryo sanang tagok nin ubas. Alagad ta ipinagigirumdom sato kan Cyclopedia ni McClintock asin Strong na “dai pinaglalaen kan Biblia an nakabuburat asin dai nakabuburat na arak—noarin man dai nagtataram manongod sa o nagpaparisa kan siring na pagkakalaen.” Kaoyon digdi, sa Biblia an “arak” ipinaheheling na nakabuburat na inomon asin iinaasosyar sa “makosog na inomon.”—Genesis 9:21; Lucas 1:15; Deuteronomio 14:26; Talinhaga 31:4, 6.

Makawiwili, an enot na milagro ni Jesus gibohon na arak an tubig. An tala kan Biblia nagsasabi: “Ngonyan, kan manamitan kan namamahala sa punsion an . . . arak alagad dai aram an pinaghalean kaiyan, inapod [nia] an nobyo asin sinabihan sia: ‘An iba ilinuluwas nguna an marahay na arak, asin kun burat na an mga tawo, an hababang klase. Itinagama mo an marahay na arak sagkod ngonyan.’” (Juan 2:9, 10) Iyo, an “marahay na arak” na ginibo ni Jesus tunay na arak.

An totoo, an nagpapakangmatanos na mga namomoon sa relihiyon kan aldaw ni Jesus tinatsaran sia sa paminsanminsan na pag-inom nin arak. Sabi ni Jesus: “Si Juan Bautista napadigdi na dai nagkakakan nin tinapay ni nag-iinom nin arak, alagad kamo nagsasarabi, ‘Igwa sia nin demonyo.’ Napadigdi an Aki nin tawo na nagkakakan asin nag-iinom, alagad kamo nagsasarabi, ‘Uya! Sarong tawong paslo asin parainom nin arak!’” (Lucas 7:33, 34) Ano an magigin puntong pinagkakalaenan sa pag-oltanan kan pag-inom ni Jesus asin kan dai pag-inom ni Juan kun an iniinom sana ni Jesus daing alkohol na tagok nin ubas? Girumdoma, sinabi manongod ki Juan na “dai sia dapat na uminom nin arak asin nin makosog na inomon.”—Lucas 1:15.

Malinaw na dai kinondenar ni Jesus an tama sanang pag-inom nin mga inomon na de alkohol. Kan saiyang kaaldawan an pag-inom nin arak kaiba sa pagselebrar kan Paskua.a Asin an tunay na arak padagos na nagin kabtang kan Pamanggihan kan Kagurangnan, na nagin kasalihid kan Paskua.

Kaipuhan an Paghusgar

Kaya dai ipinangangalad kan Biblia an pag-inom nin mga inomon na de alkohol. Sa kadaklan na kaso, nasa personal na pagdedesisyon kun baga an saro mainom nin makosog na inomon o dai. Pero mapuwersang kinokondenar kan Biblia an pagbuburat, kaiba an kapasloan: “Dai ka makiiba sa mga makosog na parainom nin arak, . . . mga paslong parakakan nin karne. Huli ta an paraburat asin paslo magigin dukha.” (Talinhaga 23:20, 21) Kaya, an gabos maninigong magpaheling nin pagigin tama sana asin nin pagpopogol sa sadiri. “Dai kamo maburat sa arak, na dian igwa nin pagpangana, kundi padagos kamong mapano nin espiritu.” Girumdoma, an pagpopogol sa sadiri saro sa mga bunga kan espiritu nin Dios.—Efeso 5:18; Galacia 5:19-23.

An totoo, an saro dai kaipuhan na maburat tanganing magkaproblema sa alkohol. An sarong pulyeto na ginibo kan U.S. National Institute on Drug Abuse nagpapagirumdom sato: “Kun minainom an saro, an alkohol nakasasagom paagi sa panunaw pasiring sa dugo asin nakaaabot tolos sa hotok. Pinoponan kaiyan na paluwayon an mga parte kan hotok na nagkokontrol sa pag-isip asin emosyon. An tawo nakamamate na mas kadikit an kontrol, mas libre.” An pagmateng ini na “mas kadikit an kontrol” puwedeng magdara sa saro sa moral na mga peligro.

An saro pang peligro yaon pag-abot sa pagmaneho nin sakayan. Sono sa pirang karkulo, sa Estados Unidos sana 25,000 katawo sa laog nin sarong taon an nagagadan sa mga aksidente na an causa burat na mga drayber. Malinaw na dakol an daing gayo minimidbid kun gurano pinaluluya kan alkohol an pagkaalisto ninda. Alagad ta an mga Kristiano ibinibilang an buhay na balaog ni Jehova. (Salmo 36:9) Magigin kaoyon daw sa punto-de-vistang ini an pagsapeligro nin saro sa saiyang buhay, asin sa buhay nin iba, paagi sa pagmaneho nin sakayan mantang an saiyang pagkaalisto pinaluya nin alkohol? Kaya, dakol na Kristiano an nagdesisyon na dai nanggad uminom nin alkohol kun sinda kaipuhan na magmaneho.

Ginigirumdom man nin Kristiano an epekto sa iba kan saiyang pag-inom. Sierto na ini an dahelan na an Kristianong mga paraataman, ministeryal na mga lingkod, asin gurang na mga babae gabos sinasadol na dai magin “makiarak.” (1 Timoteo 3:2, 3, 8; Tito 2:2, 3) Minsan pa an saro tibaad garo baga kayang uminom nin dakol na nakabuburat na inomon, nagmamaan sia na uminom nin tama sana tanganing dai maimpluwensiahan nin sala an iba; ni ipinipirit man nia an arak sa saro na habong uminom. An Biblia nagsasabi pa: “Marahay na dai magkakan nin karne o mag-inom nin arak o maggibo nin ano man na bagay na ikinasisingkog kan saimong tugang.”—Roma 14:21.

An nagkapirang kamugtakan tibaad humagad pa ngani kan lubos na paglikay sa pag-inom. Halimbawa an pagbabados. An International Herald Tribune (edisyon sa Paris) sinitar an sarong pagsiyasat na ginibo sa University of North Carolina (E.U.A.) asin nagbareta na “an saro sanang makosog na pag-inom sa pagpopoon nin pagbabados puwedeng magbunga nin grabeng pisikal asin mental na danyos sa nagdadakulang aki.” Maninigong seryosong pagturotimbangon nin mga babae an posibleng mga peligrong iyan nin pag-inom sa panahon nin pagbabados.

An mga dating paraburat o may hilig na magpalabilabi tibaad makarisa man na pinakamarahay na biyo nang talikdan an pag-inom.b Tibaad pinakamarahay man na likayan an pag-inom sa atubangan nin saro na alkoholiko o na an konsensia kinokondenar an pag-inom. Asin an pag-inom nin nakabuburat na mga inomon bago an Kristianong pagtiripon o kun naghuhulit sa publiko sala. An suanoy na mga Levita nagtao kan arogan digdi sa paglikay kun nagtatrabaho sa templo.—Levitico 10:8-10.

Ultimo, maninigong igalang an ley kan nasyon. Sa nagkapirang nasyon an alkohol lubos na ipinangangalad. Sa iba, iyan limitado sa mga nasa edad na asin lihis na sa sarong itinalaan na edad. An Kristiano nagkukuyog sa siring na mga palakaw kan “haralangkaw na kapangyarihan.”—Roma 13:1.

Siyempre, personal na pagdedesisyon an kun baga mainom kamo nin mga inomon na de alkohol o dai o kun gurano kadakol o kun gurano kakadikit an iinomon nindo. An Dios napamumuraway kun ginagamit niato an pagmansay asin boluntad na pinipili an dalan nin pagigin tama sana. Kun siring, sunodon an madonong na dalan na ini tanganing “kamo man nagkakakan o nag-iinom o ano man an saindong ginigibo,” saindong “gibohon an gabos na mga bagay sa ikamumuraway nin Dios.”—1 Corinto 10:31.

[Mga Nota sa Ibaba]

[Retrato para sa pahina 6]

An Kristiano tibaad magdesisyon na lumikay sa pag-inom nin mga inomon na de alkohol huli sa konsensia nin iba