Espiritismo—Ano an Pagheling nin Dios?

“AN MAGUSTO asin humabo sa parehong mga bagay, ini an minagibo sa marigon na pagkakaamigo,” sabi kan Romanong historyador na si Sallust. Totoo nanggad, an amigo saro na pinakanakakapareho nindo, saro na masasarigan nindo. Siring man, ibinibilang kita nin Dios na amigo asin tinotogotan kitang rumani sa saiya kun gusto asin hinahaboan niato an mga bagay na gusto asin hinahaboan nia. Ini nangangahulogan na naaakit kita sa mga kuwalidad nin Dios na arog kan pagkamoot, katoninongan, kabootan, asin karahayan, asin naghihingoa kita nin odok na arogon an mga ugaleng ini sa satong buhay.—Galacia 5:22, 23.

Tanganing maaraman kun an espiritismo inooyonan nin Dios, puwedeng siyasaton nguna niato an bunga kaiyan. (Mateo 7:17, 18) Iyan daw nakatatabang sato na makultibar an nakaaakit na diosnon na mga kuwalidad. Tanganing maaaraman iyan, helingon niato an duwang halimbawang tunay na nangyari.

Pagtoodtood, Pagsalakay, Asin Kagadanan

Si Asamaja Amelia, sarong medyo may edad nang babae sa Suriname, 17 anyos kaidto kan sia enot na mapalabot sa pagtoodtood, sarong porma nin espiritismo. Mantang an saiyang mga ihinuhula naotob asin nakinabang sa saiyang hatol an mga nakikihumapot, halangkaw an pagheling sa saiya kan saiyang komunidad. (Ikomparar an Gibo 16:16.) Alagad may sarong bagay na nakariribok saiya.

“An mga espiritu na nagtataram paagi sa sako maboot sa mga naghahagad nin tabang sa sainda,” sabi nia, “pero kadungan kaiyan ginibo nindang miserable an sakong buhay. Pakatapos kan kada sesyon, an pagmate ko garo ako binugbog asin haros dai na makahiro. Kun banggi na, naglalaom akong makapahingalo, pero dai ako binabayaan kan mga espiritu. Riniribok ninda ako, na kinakaolay ako asin dai ako pinatotorog. Asin grabe an mga sinasabi ninda!” Nag-aagagha sia asin minadoko, na nagpupulongpulong huli sa pagkabalde. “Gustong-gusto nindang magtaram manongod sa sekso asin pinipirit na makidorog sa sako. Nakakukubhan idto. May agom ako. Habo kong magtraydor asin sinabi ko iyan sa sainda. Mayong nangyari. Sarong beses an sarong dai naheheling na puwersa nadaog ako sa kosog, hinapiyap asin kinugos nin higot an sakong hawak, asin kinagat pa ako. Grabe an sakong kamondoan.”

‘Mga espiritu na nagsasadol nin seksuwal na inmoralidad? Imposible man iyan!’ tibaad sabihon nindo. Talaga daw na arog kaiyan karigsok an mga espiritung iyan?

“Mas grabe pa!” sabi ni Izaak, na nasambitan sa enotan. “Sarong banggi inapodan kaming tumabang sa sarong naghehelang na babae na riniribok nin sarong espiritu. An nangengenot sa grupo—na patagolainan nin mas makosog na espiritu—hiningoang pahaleon an espiritu. Sa laog nin sarong aldaw nakimaherak kami sa tabang kan saiyang espiritu. Nagbayle kami asin nagpatanog nin mga bombo, asin luway-luway na narahayan an babae. Pinaluwas nia an espiritu sa babae, asin nagkaepekto ini. ‘Nanggana kita,’ an may kaogmahan na sabi kan nangengenot. Dangan kami nagtukaw asin nagpahingalo.”

An nagmumustrang mga kamot ni Izaak napondo nin kadikit mantang sia may kahulogan na nag-ontok. Dangan sia nagpadagos: “Sa kadikit na panahon marahay an gabos, alagad ta biglang may nagkagsing. Nagdaralagan kami sa harong na pinaghalean kaiyan asin naheling mi an agom kan nangengenot. Garo sia nakakapay sa paghibi. Sa laog kan harong, naheling mi an saiyang aking babae—na an payo birik! May puwersa na tinilok asin binari an saiyang liog, na ginadan sia na garo manok—malinaw na an pagbalos kan pinaluwas na espiritu. Makababalde! An mga espiritung idto maringis na mga paragadan.”

An Espiritismo Asin “mga Gibo kan Laman”

An karigsokan, seksuwal na inmoralidad, asin paggadan—siring sa inagihan sa duwang eksperyensiang ini sa espiritismo—mga ugale na tumang nanggad sa personalidad nin Dios. Asin iyan nakatatabang na mamidbid kun sairisay man nanggad an mga espiritung iyan. Tibaad magsagin sindang mga mensahero nin Dios, alagad an saindang mga gibong inmoral asin paggadan nagpapamidbid na sinda mga paraarog sa kaiwal nin Dios asin sa enot na paragadan sa kasaysayan, si Satanas na Diablo. (Juan 8:44) Sia an namomoon sa sainda. Sinda mga katabang nia—maraot na mga anghel, o demonyo.—Lucas 11:15-20.

Pero tibaad ihapot nindo: ‘Pambihira sana daw na lumataw an satanikong mga ugaleng ini sa espiritismo? Sa kadaklan daw puwede akong makikomunikar paagi sa espiritismo sa marahay na mga espiritu na makatatabang na ako orog na makarani sa Dios?’ Dai, iiniiba kan Biblia an “paggibo nin espiritismo” sa ibang “mga gibo kan laman” na tumang nanggad sa Kristianong mga kuwalidad.—Galacia 5:19-21.

Sa Kapahayagan 21:8 an “mga naggigibo nin espiritismo” (“mga nakikipag-olay sa mga demonyo,” The Living Bible) ibinubugtak sa kategoriya na kapareho kan “mga dai nin pagtubod asin idtong mga makababalde sa saindang ramog asin mga paragadan asin mga parapakisaro . . . asin mga parasamba sa ladawan patin an gabos na putikon.” Ano an pagheling ni Jehova sa mga tuyong putikon, parapakisaro, paragadan, asin paragibo nin espiritismo? Ikinaoongis nia an saindang mga gibo!—Talinhaga 6:16-19.

Kun siring an pag-usyoso sa espiritismo nagigin pagkamoot sa ikinaoongis ni Jehova. Iyan garo pagsikwal ki Jehova, paglaog sa kampo ni Satanas, asin pagkampi sa pangenot na kaiwal nin Dios asin sa mga katabang kaini. Ngonyan horophoropa ini: Gusto daw nindong rumani sa saro na nakikakampi sa saindong mga kaiwal? Siyempre dai. Imbes, rarayoan nindo an sarong iyan. Kaya malinaw na iyan man an reaksion na malalaoman niato ki Jehova Dios. Sabi kan Talinhaga 15:29, “Si Jehova harayo sa mga maraot.”—Helingon man an Salmo 5:4.

An Espiritismo Nagdadara sa Kagadanan

An pag-ayon-ayon sa espiritismo peligroso man sa buhay. Ibinilang iyan nin Dios na dahelan para sa penalidad na kagadanan sa saiyang banwaan sa suanoy na Israel. (Levitico 20:27; Deuteronomio 18:9-12) Kaya dai maninigong ipagngalas na an mga naggigibo nin espiritismo “dai magmamana kan kahadean nin Dios.” (Galacia 5:20, 21) Imbes, “an saindang kabtang masasa danaw na naglalaad nin kalayo,” na nangangahulogan kan “ikaduwang kagadanan,” o daing sagkod na pagkalaglag. (Kapahayagan 21:8) Totoo, an iba sa mga iglesya nin Kakristianohan ngonyan tibaad nagkokonsinte sa espiritismo, pero dai nagliliwat an punto-de-vista kan Biblia.

Ano kun nagibo na nindo an enot na mga tangga pasiring sa espiritismo? Kun siring marahay na kamo pumondo tolos asin bumirik. Kuyogon an ipinasabong nin Dios na hatol na itinao kan propeta nin Dios na si Isaias sa mga Israelitas kan suanoy. An situwasyon ninda nakaaagid sa mga tawo ngonyan na naggigibo nin marigsok na mga gibo pero naghohona na sinda nagsasamba man sa Dios. Kaya, igwa nin mahahalagang leksion sa saindang eksperyensia. Anong mga leksion?

Kuyogon an Patanid ni Isaias

An pagbasa sa enot na kapitulo nin Isaias nagpapaheling na an mga Israelitas ‘binayaan si Jehova’ asin “nagsiribog.” (Bersikulo 4) Minsan ngani sinda nalagalag, sinda nagpadagos sa pagdolot nin mga atang, pagselebrar nin relihiyosong mga kapiyestahan, asin pagdolot nin mga pamibi. Alagad ta idto daing kamanungdanan! Mantang mayo sinda nin kamawotan sa boot na makapaogma sa saindang Kaglalang, si Jehova nagsabi: “Tinatago ko an sakong mga mata sa saindo. Minsan pa mamibi kamo nin dakol, dai ako maghihinanyog.” An mga Israelitas na idto nagrebelde tumang sa saiya paagi sa paggibo nin marigsok na mga gawe, sagkod na saindang ‘panoon nin dugo an saindang mga kamot.’—Bersikulo 11-15.

Sa anong mga kamugtakan na aakoon liwat sinda ni Jehova? Helinga an mga kahagadan na sinasabi sa Isaias 1:16. Sia nagsasabi: “Pangaghugas kamo, pangaglinig kamo.” Kaya kun isasaboot niato an hatol na iyan, kita mapondo o malikay sa marigsok na mga gibo, kaiba an espiritismo, na saro sa “mga gibo kan laman.” Mantang aram niato na an maraot na isip na nasa likod nin espiritismo ki Satanas na Diablo, patataluboon niato an pagkaongis dian.

Dangan kaipuhan na haleon niato an gabos na bagay na konektado sa espiritismo. Iyan an ginibo ni Izaak. Sia nagsasabi: “Sarong aldaw tinipon ko an gabos kong espiritistikong mga kasangkapan sa atubangan kan sakong harong, nagkua ako nin patok, asin pinagpirupidaso ko an mga iyan. An kataed ko nagkurahaw na pagbabasolan ko an ginibo ko. Mantang sia nagkukurahaw, binubuan ko nin gasolina an pirupidasong mga kasangkapan asin sinolo an kada saro sa sainda. Mayo ni sarong nawalat.”

Iyan kaidtong 28 anyos na an nakaagi. Pinagbasolan daw ni Izaak an ginibo nia? Al kontraryo. Ngonyan sia maogmang naglilingkod ki Jehova bilang Kristianong ministro sa saro kan mga kongregasyon kan mga Saksi ni Jehova.

An Isaias 1:17 nagtatao kan dugang pang hatol na ini: “Pag-adal kamong gumibo nin marahay.” Iyan nagkakaipo nin pag-adal sa Tataramon ni Jehova, an Biblia, tanganing maaraman kun ano an “marahay asin maaako patin sangkap na kabotan nin Dios.” (Roma 12:2) Asin an pag-aplikar sa bagong manompongan na kaaraman na iyan magbubunga nin nakagiginhawang mga bendisyon. Iyan an nadiskobre ni Asamaja.

Sa ibong nin mapait na pagtumang nin mga paryentes asin pagtaraed, si Asamaja mapusong nag-adal kan Biblia kaiba nin mga Saksi ni Jehova asin dai nahaloy binayaan an espiritismo. Dangan idinusay nia an saiyang buhay ki Jehova Dios asin nabautismohan sia sa sarong asamblea. Ngonyan, pakalihis nin mga 12 taon, sia may pagpasalamat na nagsasabi: “Poon kan ako mabautismohan, dai na ako rinibok nin mga espiritu.” Asin nagigirumdoman nia na may paghuyom: “Kan banggi pakapabautismo ko, nanok asin toninong nanggad an pagtorog ko kaya nahuri ako sa programa sa asamblea kan sumunod na aga.”

Nagdadanay na mga Pakinabang

Ngonyan, si Izaak asin Asamaja pareho bilog na pusong makapagsasabi kaiba kan salmistang si Asaf: “An pagrani sa Dios marahay para sa sako.” (Salmo 73:28) Tunay na an pagrani ki Jehova nagtao sainda nin pisikal asin emosyonal na mga pakinabang. Alagad orog sa gabos, iyan nagtao sainda nin panlaog na katoninongan asin dayupot na relasyon ki Jehova. An mga bendisyon na iyan orog nanggad sa kolog asin pakikilaban na kaipuhan tanganing mahale an sakal nin espiritismo.

[Ritrato sa pahina 5]

Si Asamaja Amelia nagsasaysay: “An mga espiritu . . . ginibong miserable an sakong buhay. . . . Asin grabe an mga sinasabi ninda!”