Akuon an Tabang ni Jehova Tanganing Malabanan an Maraot na mga Espiritu

1. Arog kan sinasabi sa Efeso 6:10-13, ano an saro sa pinakanakakaugmang paagi na ipinapahiling ni Jehova an saiyang pagmalasakit sa sato? Ipaliwanag.

AN SARO sa pinakanakakaugmang paagi na ipinapahiling ni Jehova an pagmalasakit niya sa sato na saiyang mga lingkod iyo an pagtabang sa sato na malabanan an mga kaiwal ta. An panginot niyatong mga kaiwal iyo si Satanas asin an mga demonyo. Pinapatanidan kita ni Jehova mapadapit sa mga kaiwal na ini, asin tinatawan niya kita kan kinakaipuhan niyato tanganing malabanan sinda. (Basahon an Efeso 6:10-13.) Kun aakuon ta an tabang ni Jehova asin lubos na mananarig sa saiya, magigin mapanggana kita sa paglaban sa Diyablo. Magkakaigwa kita kan pagtitiwala na arog kan ki apostol Pablo. Isinurat niya: “Kun an Diyos nasa kampi niyato, siisay an makakalaban sa sato?”—Roma 8:31.

2. Ano an pag-uulayan niyato sa artikulong ini?

² Bilang tunay na mga Kristiyano, dai niyato gayong tinatawan nin atensiyon si Satanas asin an mga demonyo. An tinatawan niyatong marhay nin atensiyon iyo an pakanuod dapit ki Jehova asin an paglilingkod sa saiya. (Sal. 25:5) Alagad, kaipuhan niyatong maaraman an dapit sa mga bagay na ginigibo ni Satanas. Taano? Tanganing dai niya kita madaya. (2 Cor. 2:11) Sa artikulong ini, pag-uulayan niyato an sarong panginot na paagi na ginagamit ni Satanas asin kan mga demonyo tanganing dayaon an mga tawo. Pag-uulayan man niyato kun paano ta sinda malalabanan.

KUN PAANO DINADAYA KAN MARAOT NA MGA ESPIRITU AN MGA TAWO

3-4. (a) Ano an espiritismo? (b) Gurano kalakop an paniniwala sa espiritismo?

³ An sarong panginot na paagi na ginagamit ni Satanas asin kan mga demonyo tanganing dayaon an mga tawo iyo an espiritismo. An mga nagsasagibo nin espiritismo naghihingako na naaaraman o nakokontrol ninda an mga bagay na dai basta kayang aramon o kontrulon nin mga tawo. Halimbawa, may mga naghihingako na kaya nindang maaraman an mangyayari sa maabot na panahon paagi sa panghuhula o astrolohiya. An iba tibaad mag-akto na garo nakikipag-ulay sinda sa mga gadan. An iba man nagsasagibo nin pangkukulam o mahika, asin tibaad purbaran nindang orasyunan an sarong tawo.b

⁴ Gurano kalakop an paniniwala sa kapangyarihan nin espiritismo? Sa ginibong surbey sa 18 nasyon sa Latin America asin sa Caribbean, naaraman na mga saro sa kada tulong tawo na sinurbey an naniniwala sa mahika, pangkukulam, asin haros arog man kaiyan kadakul an naniniwala na posible na makikomunikar sa mga espiritu. May ginibo pang surbey sa 18 nasyon sa Aprika. May average na labing kabanga kan mga tawong sinurbey diyan an nagsasabi na naniniwala sinda sa pangkukulam. Siyempre, sain man kita nakaistar, dapat niyatong protektaran an satong sadiri laban sa espiritismo huling gusto ni Satanas na dayaon an “bilog na kinaban.”—Kap. 12:9.

5. Ano an sabuot ni Jehova mapadapit sa espiritismo?

⁵ Si Jehova an “Diyos nin katotoohan.” (Sal. 31:5, NW) Kaya ano an sabuot niya mapadapit sa espiritismo? Ikinakaungis niya nanggad iyan! Sinabi ni Jehova sa mga Israelita: “Dai dapat magkaigwa sa saindo nin siisay man na nagsusulo kan saiyang aking lalaki o kan saiyang aking babayi bilang atang, nin siisay man na naghuhula, nin siisay man na nagmamahika, nin siisay man na naghahanap nin mga senyales, nin espiritista, nin siisay man na naggagamit nin orasyon para gibuhan nin maraot an iba, nin siisay man na nagkokonsulta sa sarong espiritista o parahula, o nin siisay man na naghahapot sa gadan. Huli ta an siisay man na naggigibo kan mga bagay na iyan makababaldi ki Jehova.” (Deut. 18:10-12, NW) An mga Kristiyano bako nang sakop kan Katugunan na itinao ni Jehova sa mga Israelita. Pero aram niyato na dai nagbago an sabuot niya mapadapit sa espiritismo.—Mal. 3:6.

6. (a) Paano ginagamit ni Satanas an espiritismo tanganing gibuhan nin maraot an mga tawo? (b) Sigun sa Parahulit 9:5, ano an katotoohan mapadapit sa kamugtakan kan mga gadan?

⁶ Pinapatanidan kita ni Jehova mapadapit sa espiritismo huling aram niya na ginagamit iyan ni Satanas tanganing gibuhan nin maraot an mga tawo. Ginagamit ni Satanas an espiritismo tanganing magpalakop nin mga kaputikan—kaiba diyan an kaputikan na an mga gadan padagos na nabubuhay sa lugar nin mga espiritu. (Basahon an Parahulit 9:5.) Ginagamit man ni Satanas an espiritismo tanganing padagos na makamati nin takot an mga tawo asin mairayo sinda ki Jehova. An katuyuhan niya iyo na an mga tawong nagsasagibo nin espiritismo magtiwala sa maraot na mga espiritu imbes na ki Jehova.

KUN PAANO NIYATO MALALABANAN AN MARAOT NA MGA ESPIRITU

7. Ano an sinasabi sa sato ni Jehova?

⁷ Arog kan nasambit kasubago, sinasabi sa sato ni Jehova kun ano an kaipuhan niyatong maaraman tanganing dai kita madaya ni Satanas asin kan mga demonyo. Pag-ulayan niyato an pirang praktikal na mga bagay na magigibo ta tanganing malabanan si Satanas asin an mga demonyo.

8. (a) Ano an panginot na paagi na linalabanan ta an maraot na mga espiritu? (b) Paano ibinubuyagyag kan Salmo 146:4 an kaputikan ni Satanas mapadapit sa mga gadan?

⁸ Basahon an Tataramon nin Diyos asin hurop-hurupon iyan. Ini an panginot na paagi na isinisikwal ta an mga kaputikan na pinapalakop kan maraot na mga espiritu. An Tataramon nin Diyos garo sarong matarom na espada na kayang magbuyagyag kan mga kaputikan na ipinapalakop ni Satanas. (Efe. 6:17) Halimbawa, ibinubuyagyag kan Tataramon nin Diyos an kaputikan na kaya kan mga gadan na makikomunikar sa mga buhay. (Basahon an Salmo 146:4.) Ipinapagirumdom man kaiyan sa sato na si Jehova sana an makakapagsabi nin eksakto kan mangyayari sa maabot. (Isa. 45:21; 46:10) Kun babasahon niyato an Tataramon nin Diyos asin regular na huhurop-hurupon iyan, magigin andam kita na isikwal asin ikaungis an mga kaputikan na pinapaniwala sa sato kan maraot na mga espiritu.

9. Anong mga klase nin espiritismo an linilikayan niyato?

⁹ Dai maggibo nin ano man na konektado sa espiritismo. Bilang tunay na mga Kristiyano, dai nanggad kita nagsasagibo nin ano man na klase nin espiritismo. Halimbawa, dai kita nagduduman sa mga espiritista o nakikikomunikar sa gadan sa ano man na paagi. Arog kan pinag-ulayan sa sinundan na artikulo, linilikayan niyato an mga kaugalian sa paglubong na nakabase sa paniniwala na an gadan padagos na nabubuhay sa lugar nin mga espiritu. Asin dai kita naggagamit nin astrolohiya o panghuhula tanganing maaraman an mangyayari sa maabot. (Isa. 8:19) Aram niyato na gabos iyan peligrosong marhay asin puwede kitang magkaigwa nin direktang koneksiyon ki Satanas asin sa mga demonyo paagi kaiyan.

10-11. (a) Ano an ginibo kan nagkapira kan inot na siglo kan maaraman ninda an katotoohan? (b) Sigun sa 1 Corinto 10:21, taano ta dapat niyatong arugon an halimbawa kan inot na mga Kristiyano, asin paano ta iyan magigibo?

¹⁰ Halion an mga bagay na konektado sa okulto. An nagkapira sa mga nakaistar sa Efeso kan inot na siglo nagsasagibo nin espiritismo. Kan maaraman ninda an katotoohan, naghiro tulos sinda. “Dakul sa mga nagsasagibo nin mahika tiniripon an saindang mga libro asin sinurulo iyan sa atubangan kan gabos.” (Gibo 19:19) Desidido an mga indibidwal na ini na labanan an maraot na mga espiritu. Mamahalon an mga libro ninda mapadapit sa mahika. Pero imbes na ipanao an mga librong idto o ipabakal, sinurulo ninda iyan. Mas mahalaga sa sainda an mapaugma si Jehova kisa sa kantidad kan mga librong idto.

¹¹ Paano niyato maaarog an mga Kristiyanong idto kan inot na siglo? Sarong kadunungan na halion an ano man na bagay na tibaad igwa kita na konektado sa okulto. Kaiba diyan an mga agimat, anting-anting, pampasuwerte, o iba pang mga bagay na isinusulot o sadiri nin mga tawo tanganing magserbing proteksiyon laban sa maraot na mga espiritu.—Basahon an 1 Corinto 10:21.

12. Ano an mga dapat niyatong ihapot sa sadiri may koneksiyon sa satong libangan?

¹² Siyasaton na marhay an saimong mga libangan. Haputon an sadiri: ‘Nagbabasa daw ako nin mga libro, magasin, o artikulo sa Internet mapadapit sa okulto? Kumusta an dinadangog kong musika, hinihiling na mga pelikula asin programa sa TV, o an mga video game na kinakawat ko? May libangan daw ako na konektado sa espiritismo? Tampok daw diyan an mga karakter arog nin bampira, zombie, o misteryosong mga bagay o pangyayari? Pinapaluwas daw kaiyan na an mahika, mga orasyon, o pangkukulam mga libangan na dai man nakakaraot?’ Siyempre, bako man gabos na libangan na nagtatampok nin pantasya o fairy tale konektado na sa espiritismo. Mantang sinisiyasat mo an mga libangan mo, magin determinado na pilion idtong makakatabang sa saimo na makalikay sa ano man na bagay na ikinakaungis ni Jehova. Gusto niyatong gibuhon an satong pinakamakakaya na “mapagdanay an malinig na konsiyensiya” sa atubangan nin Diyos.—Gibo 24:16.c

13. Ano an gusto niyatong likayan?

¹³ Likayan na magparaistorya mapadapit sa mga demonyo. Gusto niyatong arugon si Jesus mapadapit sa bagay na ini. (1 Ped. 2:21) Bago siya magdigdi sa daga, nabuhay na si Jesus sa langit, asin kadakul niyang aram mapadapit ki Satanas asin sa mga demonyo. Alagad dai siya nagsaysay nin mga istorya mapadapit sa mga ginibo kan maraot na mga espiritung idto. Gusto ni Jesus na magin saksi ni Jehova, bakong representante na nagpapamidbid ki Satanas. Puwede niyatong arugon si Jesus paagi sa dai pagpalakop nin mga istorya mapadapit sa mga demonyo. Imbes, ipinapahiling niyato sa satong mga tataramon na ‘an satong puso napahiro nin sarong marahay na bagay,’ an katotoohan.—Sal. 45:1, NW.

14-15. (a) Taano ta dai kita dapat matakot sa maraot na mga espiritu? (b) Ano an patunay na pinoprotektaran ngunyan ni Jehova an saiyang banwaan?

¹⁴ Dai matakot sa maraot na mga espiritu. Sa bakong perpektong kinaban na ini, puwedeng may mangyaring maraot sa sato. Puwedeng bigla na sana kitang maaksidente, magkahilang, o magadan pa ngani. Pero dai niyato dapat pag-isipon na an mga dai nahihiling na espiritu an dahilan kaiyan. Sinasabi kan Bibliya na “an kapaha-pahamak na panahon asin dai inaasahan na mga pangyayari” puwedeng umabot sa siisay man. (Par. 9:11, NW) Mapadapit sa mga demonyo, ipinahiling ni Jehova na mas makapangyarihan nanggad siya kisa sa sainda. Halimbawa, dai tinugutan nin Diyos si Satanas na gadanon si Job. (Job 2:6) Kan panahon ni Moises, ipinahiling ni Jehova na mas makapangyarihan nanggad siya kisa sa mga saserdote sa Ehipto na nagmamahika. (Ex. 8:18; 9:11) Paagi sa itinaong kapangyarihan ni Jehova, ipinahiling kan pinamuraway na si Jesus na may awtoridad siya ki Satanas asin sa mga demonyo kan ihulog niya an mga ini sa daga hali sa langit. Asin madali na sindang ihulog sa kairaruman, na diyan dai sinda makakagibo nin maraot sa kiisay man.—Kap. 12:9; 20:2, 3.

¹⁵ Nakakahiling kita nin dakul na patunay na pinoprotektaran ngunyan ni Jehova an saiyang banwaan. Pag-isipan: Ihinuhulit asin itinutukdo niyato an katotoohan sa gabos na parte kan kinaban. (Mat. 28:19, 20) Bilang resulta, naibubuyagyag niyato an maraot na mga gibo kan Diyablo. Kun kaya ni Satanas, siguradong papapunduhon niya an gabos tang aktibidad, pero dai niya iyan kaya. Huli kaiyan, dai niyato kaipuhan na matakot sa maraot na mga espiritu. Aram niyato na “an mga mata ni Jehova nagmamasid na marhay sa bilog na daga tanganing ipahiling an saiyang kusog alang-alang sa mga bilog an debosyon kan puso para sa saiya.” (2 Cron. 16:9, NW) Kun maimbod kita ki Jehova, dai kita magigibuhan kan mga demonyo nin permanenteng danyos.

MGA BENDISYON PARA SA MGA TAWONG INAAKO AN TABANG NI JEHOVA

16-17. Magtao nin halimbawa nin saro na nagpahiling nin kusog nin buot tanganing malabanan an maraot na mga espiritu.

¹⁶ Kaipuhan an kusog nin buot tanganing malabanan an maraot na mga espiritu, lalo na pag kinokontra kita kan mga amigo o mga paryente na may marahay man na intensiyon. Alagad binebendisyunan ni Jehova an mga nagpapahiling nin siring na kusog nin buot. Pag-isipan an halimbawa kan sister na si Erica na nakaistar sa Ghana. Beynte uno anyos si Erica kan mag-ako siya nin pag-adal sa Bibliya. An saiyang ama sarong padi na nagmamahika, kaya inaasahan na mapartisipar siya sa sarong espiritistikong kaugalian na kalabot an pagkakan nin karneng iinatang sa mga diyos kan saiyang ama. Kan magsayuma si Erica, ibinilang iyan kan pamilya niya na pag-insulto sa mga diyos. Naniniwala an pamilya na an mga diyos papadusahan sinda nin hilang sa isip asin hawak.

¹⁷ Pigparapuwersa si Erica kan pamilya niya na magsunod sa kaugalian, pero dai siya nagpadara, maski nangahulugan iyan na kaipuhan niyang maghali sa harong ninda. May mga Saksi na nagpadagos sa saiya. Sa paaging iyan, binendisyunan ni Jehova si Erica nin bagong pamilya—mga kapagtubod na nagin siring sa mga tugang niya. (Mar. 10:29, 30) Dawa isinikwal siya kan saiyang mga paryente asin sinulo pa ngani an saiyang mga gamit, nagdanay si Erica na maimbod ki Jehova, nagpabawtismo, asin regular payunir na siya ngunyan. Dai siya natakot sa mga demonyo. Asin mapadapit sa saiyang pamilya, sinabi ni Erica, “Ipinapamibi ko aroaldaw na maeksperyensiyahan kan pamilya ko an bendisyon na mamidbid si Jehova asin magin talingkas paagi sa paglilingkod sa satong mamumuton na Diyos.”

18. Anong mga bendisyon an makakamtan ta kun magtitiwala kita ki Jehova?

¹⁸ Dai man kita gabos mapapaatubang sa arog kaiyan kagrabeng pagbalo sa satong pagtubod. Dawa arog kaiyan, kaipuhan niyato gabos na labanan an maraot na mga espiritu asin magtiwala ki Jehova. Kun gigibuhon ta iyan, magkakamit kita nin dakul na bendisyon asin dai kita madadaya kan mga kaputikan ni Satanas. Saro pa, dai kita mapapapundo sa paglilingkod ki Jehova huli sa pagkatakot sa mga demonyo. Urog sa gabos, mapapakusog ta an satong relasyon ki Jehova. “Magpasakop kamo sa Diyos,” an isinurat kan disipulong si Santiago, “alagad labanan nindo an Diyablo, asin madulag siya sa saindo. Rumani kamo sa Diyos, asin marani siya sa saindo.”—Sant. 4:7, 8.