Relihiyon Asin Superstisyon—Magkaamigo o Magkaiwal?

KAN Sabado, Hunyo 11, 1983, an mga tagaduman sa isla nin Java sa Indonesia maheheling na nagdadaralagan pasiring sa saindang harong, natatarantang pinapasakan an gabos na gatak sa mga kisame, bintana, asin pinto. Taano ta natataranta sinda? Nagpoon an sarong eklipseng solar, asin an mga tagaduman natatakot na an anino kan eklipse tibaad lumaog sa saindang harong asin gikanan nin kalamidad.

An mga nag-iistar sa inaapod na nagpoprogresong kinaban parateng nagkukuyog sa siring na mga paniniwala na may relihiyosong init. Kaya, sa nagkapirang lugar sa Aprika, an mga tawo naglilikay na lumakaw sa liwanag kan aldaw kun odto ta “tibaad makapay” sinda. An mga aki pinangangaladan na kumakan nin sogok sa takot na “sinda magin parahabon.” An mga magurang habong isabi an eksaktong bilang kan saindang mga aki, ta “tibaad madangog kang naghahambog kan mga aswang asin kuanon an saro sa sainda.”—African Primal Religions.

An mga taga-Solnopan may tendensiang pagngisihan an siring na mga gawe bilang pagpapaheling nin superstisyosong takot, na bunga nin ‘paganong pagkaignorante.’ Pero, an siring na mga paniniwala bako sanang sa mga bakong Kristiano. An mga iyan “manonompongan sa mga tawo sa bilog na kinaban,” sabi ni Dr. Wayland Hand, propesor sa mga osipon asin mga tataramon na Germanico. Sia asin an kaiba niang si Dr. Tally nakatipon na nin haros sarong milyon na halimbawa nin mga superstisyon sa Estados Unidos sana.

Sa pagmawot na maaraman an kapaladan ninda, dakol na mga Kristiano daa an naglalaom sa astrolohiya—saro sa pinakagurang na klase nin superstisyon. Asin makangangalas nanggad, an superstisyosong mga paniniwala may beses na nagkakamit kan hayag na pagsuportar asin pagtabang nin relihiyosong mga namomoon. Halimbawa, sa sarong malipot na aldaw sa Nueva York, kan Enero 10, 1982, an patriarka kan Eastern Greek Orthodox na si Vasilios nangenot sa sarong Misa sa luwas sa pagselebrar kan Kapiyestahan kan Epifania. Pakatapos, an bareta kan New York Post, idinaklag nia an sarong krus na bulawan sa East River asin sinabihan an mga miron na an enot na makakua kan krus magigin masuwerte sa bilog niang buhay.

Alagad ta magkaoyon daw an Kristianong pagtubod asin an superstisyon? May parasurat na sarong beses nagkomento: “Sa ibabaw kan linubngan nin pagtubod minabukad an burak nin superstisyon.” Kun siring, dai daw nindo lalaoman an Kristianong relihiyon na paglabanan asin haleon an superstisyosong takot?

An Relihiyon—Hinahale daw Kaiyan an Superstisyosong Takot?

Iyan an maninigong gibohon nin tunay na relihiyon, asin kan enot na siglo iyan an ginibo kaiyan. Minsan ngani an enot na mga Kristiano nabubuhay sa tahaw kan superstisyosong Romanong kinaban, isinikwal ninda an mga superstisyon. Alagad pagkagadan kan mga apostol ni Cristo, an falsong relihiyosong mga katokdoan, kaiba na an superstisyon, nagpoon na makalaog sa kongregasyon. (1 Timoteo 4:1, 7; Gibo 20:30) Nagpoon na lumataw an sarong grupong klero na, sono sa librong A History of the Christian Church, nag-iba sa kaugalean na gumamit nin mga horoskopo asin sumunod sa iba pang superstisyon. Pag-abot nin panahon an popular na mga kaugalean na iyan inapod na “Kristiano.”

Asin ngonyan? Kinokonsinte pa man giraray nin relihiyon an superstisyosong mga kostumbre. Helinga an Suriname, na duman an mga naghihingakong Kristiano na may Aprikanong ginikanan parateng maheheling na may sulot na mga anting-anting para daa sa proteksion tumang sa maraot na mga espiritu. Sabi nin sarong nagmamasid: “Aroaldaw an mga tawong ini nabubuhay, nagkakakan, nagtatrabaho asin natotorog sa takot.” An minilyon sa bilog na kinaban may kaparehong pagkatakot sa “mga espiritu” kan gadan. Kabaliktaran sa malalaoman, an relihiyon parateng nagpapalakop sa siring na superstisyosong mga paniniwala.

Helinga halimbawa an nangyari sa isla nin Aprika na Madagascar. Kan an mga misyonero nin Kakristianohan ponan na ilakop an saindang mga paniniwala, an mga taga-Madagascar nag-ako pero habong bayaan an tradisyonal na mga paniniwala. An reaksion kan mga iglesya? Sabi kan Daily Nation, sarong diaryo hale sa Kenya: “An enot na mga misyonero mapagpabaya asin madaling makibagay patin inako an situwasyon na ini.” An resulta? Ngonyan, an kabanga sa mga taga-Madagascar nalilistang Kristiano. Pero, natatakot man sinda sa “espiritu” nin gadan nang mga apoon! Kaya, kausohan nang imbitaran ninda an padi o pastor na bendisyonan an mga kalabera nin sarong apoon bago iyan ibalik sa lolobngan kan pamilya. Iyo, pinadagos kan relihiyosong mga namomoon an kaputikan na an Dios, an Diablo, asin an gadan na mga apoon puwedeng agyaton, lanalanahan, asin subornohan paagi sa pag-otob sa superstisyosong mga kostumbre.

Iyo man sa South Africa, na duman 77 porsiento sa populasyon an naghihingakong Kristiano asin dakol an nagsisimba. Pero, an tradisyonal na relihiyon nin Aprika, na may superstisyosong takot sa gadan nang mga apoon, nagdadanay sa minilyon na mga parasimbang iyan. Kaya, sa dakol na Kristiano daang mga nasyon, an relihiyon paimbabaw sana. Kaykayon mo an ibabaw, asin maheheling mo na an dating mga superstisyon nagdadanay asin nabubuhay.

Alagad, an tunay na relihiyon hinahale an superstisyosong takot. Paano? An kaipuhan kaaraman. Kaaraman sa ano? Asin paano nindo iyan makakamtan?