Pagtao nin Onra sa Dios nin Paglaom

“An isinabi ni Jehova iyo ini: . . . ‘An nagtataong onra sa sako tatawan ko nin onra, asin an mga naoongis sa sako magigin daing halaga.’”—1 SAMUEL 2:30.

1. Ano an dahelan niato sa pagmawot na tawan nin onra si Jehova? (1 Timoteo 1:17; Kapahayagan 4:11)

HULI sa puwede niatong laoman, basado sa Biblia, angay nanggad asin rasonable na kita magtaong onra sa “Dios nin paglaom,” “Dios na nagtatao nin paglaom.” (Roma 15:13, King James Version; New World Translation) Taano man? Paano kita, na saradit sana, bakong sangkap na mga tawo, makapagtataong onra sa Makangangalas na Kaglalang sa bilog na uniberso? Asin tatawan man daw nia kita nin onra?

2. Ano an saboot ni Jesus manongod sa onrang itinatao sa Dios?

² Maaaraman niato basado sa nangyari ki Jesus. Mayo sa sato an manigar na perming boot ni Jesus na an saiyang Ama matawan nin onra, mapamuraway. (Juan 5:23; 12:28; 15:8) An totoo, tinatsaran ni Jesus an mga Fariseo asin eskriba na ‘nagtataong onra sa Dios sa saindang mga ngabil alagad an puso harayo sa saiya.’ Tabi mangnohon, an dai ninda pagtaong onra sa Dios may labot sa dai maninigong mga motibo asin gibo. (Mateo 15:7-9) Alagad, masasabi daw niato na sa pagtao ni Cristo nin onra sa Dios, kalabot an saiyang paglaom? Asin ano an reaksion ni Jehova sa pagtao sa saiya nin onra?

3. Paano niato naaaraman na si Jesus naglaom ki Jehova?

³ Isinapuso ni Jesus an mga tataramon ni David sa Salmo 16:10: “Dai mo pababayaan an sakong kalag sa Sheol. Dai mo itotogot na an saimong maimbod makaheling nin kotkot.” Huling sia igwa kan paglaom na ini na buhayon liwat, si Jesu-Cristo nakapagsabi nin nakapupukaw sa boot na mga tataramon sa sarong paragibo nin maraot na napapako kataed nia: “Sa katotoohan sinasabi ko sa saimo ngonyan, Ika makakaibahan ko sa Paraiso.” (Lucas 23:39-43) Dai nahaloy nagadan an paragibo nin maraot na idto, kaya dai nia naheling pakalihis nin tolong aldaw an patotoo sa paglaom ni Jesus na buhayon liwat. Alagad an sarong nakaheling mismo nagbareta: “An Jesus na ini binuhay liwat nin Dios, na manongod kaiyan kami gabos mga saksi.” (Gibo 2:31, 32) Idto sarong katunayan.

4. Anong onra an maninigo asin inako ni Jesus? (Kapahayagan 5:12)

⁴ An dakol sa ordinaryong mga tawo na pinaglingkodan ni Jesus nakaaaram na sia maninigong igalang, tawan nin onra. (Lucas 4:15; 19:36-38; 2 Pedro 1:17, 18) Dangan sia nagadan na siring sa kriminal. Naliwat daw kaiyan an mga bagay? Dai, huli ta yaon ki Jesus an pag-oyon kan Dios na saiyang linalaoman. Kaya, binuhay sia liwat ni Jehova. An bagay na binuhay liwat kan “Dios nin paglaom” an saiyang Aki asin ginubingan sia nin inmortalidad sa espiritung lugar nagpapatunay na an Ama padagos na nagtatao nin onra sa saiyang Aki. Si Pablo nagsasabi: “Naheheling niato si Jesus . . . na kinoronahan nin kamurawayan asin onra huli sa pagtios nin kagadanan, tanganing sia paagi sa dai na kutana maninigong pagkaherak nin Dios magnamit nin kagadanan para sa lambang tawo.”—Hebreo 2:7, 9; Filipos 2:9-11.

5. Sa anong espesyal na paagi na si Jesus tinawan nin onra, na nagbunga nin anong dugang na onra sa Dios?

⁵ Si Jesus, na nagtaong onra ki Jehova, nagsabi nin sarong espesyal na paagi nin pagtaong onra sa saiya kan Ama. Sa pagpaheling sa saiyang maimbod na mga apostol, sia nagsabi: “An gabos na kapangyarihan sa langit asin sa daga itinao na sa sako. Kaya paduman kamo asin gumibo kamo nin mga disipulo sa mga tawo kan gabos na nasyon, na bautismohan nindo sinda sa ngaran kan Ama asin kan Aki patin kan banal na espiritu . . . Uya! ako danay na nasa saindo sagkod sa pagtatapos kan palakaw nin mga bagay.” (Mateo 28:18-20) Kaya tinawan pa nin onra kan Ama an Aki paagi sa pagtao saiya nin pambihirang kapangyarihan. Ini gagamiton para sa mga tawo na magibo nin sarong gibohon na nagtataong onra sa Saro na hinihingoa ni Jesus na tawan nin onra. Kun siring, ini daw nangangahulogan na kitang mga bakong sangkap na tawo makatatao nin onra sa Ama asin tatawan man nia nin onra?

An mga Tawo Nagtataong Onra sa Dios

6. Angay daw na magmawot na magkamit nin onra, alagad ano an peligro digdi? (Lucas 14:10)

⁶ An kadaklan na tawo haros dai iniisip an pagtao nguna nin onra sa Dios, ta mas interesado sinda sa pagkakamit nin onra para sa saindang sadiri. An iba tibaad magsabi pa ngani na normal sana para sa sato an magmawot na magkamit nin onra. May katotoohan ini, ta normal an pagmawot nin marahay na dangog, na may onra gikan digdi. (1 Timoteo 3:2, 13; 5:17; Gibo 28:10) Pero, an pagmawot nin onra gikan sa tawo madaling magsobra. Ini maheheling sa dakol na naghahanap nin kabantugan minsan sa anong paagi o na gigibohon an ano man tanganing dai mapasopog.

7. Taano ta limitado sana an halaga kan onra gikan sa mga tawo?

⁷ Kun iisip-isipon nindo, dawa an pinakadakulang onra hale sa tawo minaagi sana, huli ta dai mahaloy an gabos nagagadan. A, an memorya nin pirang eroe tibaad tawan nin onra sa kadikit na panahon, alagad an kadaklan na gadan nalilingawan na. Pira an tatao kan ngaran kan saindang apoon sa tuhod o midbid kun siisay an mga namomoon sa saindang nasyon kaidtong sanggatos na taon na an nakaagi? An totoo, dai naliliwat an mga bagay kun baga an saro nabuhay o dai nabuhay. Sia gapunto sanang kabokabo sa timbangan nin panahon, sadit na toro sa salog nin buhay. Asin dawa kun sia tawan nin onra sa kadikit na panahon pagkagadan nia, dai nia man iyan aram. (Job 14:21; 2 Cronica 32:33; Eclesiastes 9:5; Salmo 49:12, 20) An solamenteng makaliliwat kaiyan iyo an pagkaigwa kan paglaom na itinatao nin Dios, pagtaong onra sa saiya, asin pag-ako man nin onra. Maheheling niato ini sa nagin buhay nin duwang kontemporanyo sa suanoy na Israel.

8. Si Eli naholog sa anong siod mapadapit sa pagtao nin onra?

⁸ Saro si Eli. Sia naglingkod sa Dios sa pambihirang katongdan nin halangkaw na saserdote sa laog nin 40 taon asin nagkapribilehiyo man na maghokom sa Israel. (1 Samuel 1:3, 9; 4:18) Minsan siring, pag-abot nin panahon sia nagpaheling nin kaluyahan manongod sa saiyang mga aking si Ofni asin Fineas. Minsan ngani mga saserdote, inabuso ninda an saindang katongdan paagi sa paghabon sa mga kabtang kan mga atang asin sa inmoral na pakikidorog sa sekso. Kan an saindang ama daing ginibo kundi sagweon sana sinda nin kadikit, sinabi nin Dios na si Eli ‘tinatawan nin onra an saiyang mga aki nin orog kisa sako.’ Si Jehova nanuga na padadaguson an Aaronikong pagkasaserdote, pero popohoon nia an pamilya ni Eli sa katongdan na halangkaw na saserdote. Taano? An Dios nagpaliwanag: “An nagtataong onra sa sako tatawan ko nin onra, asin an mga naoongis sa sako magigin daing halaga.”—1 Samuel 2:12-17, 29-36; 3:12-14.

9. Paano si Samuel tinawan kan oportunidad na magtaong onra ki Jehova?

⁹ Kabaliktaran yaon si Samuel. Posibleng aram nindo na dinara sia kan saiyang mga magurang na aki pa tanganing maglingkod sa tabernakulo sa Silo. Sarong banggi kinaolay ni Jehova an aki. Tibaad maogma kamong basahon an tala kaini sa 1 Samuel 3:1-14, na iniimahinar an pagkamata kan aki, bakong paagi sa garo linog na boses, kundi paagi sa maluway na boses na namaluan niang sa gurang nang si Eli. Dangan isipon kun gurano nakanenerbiyos para sa aking si Samuel na sabihon sa gurang nang halangkaw na saserdote an desisyon nin Dios na padusahan an harong ni Eli. Pero ginibo iyan ni Samuel; tinawan nia nin onra an Dios paagi sa pagkuyog.—1 Samuel 3:18, 19.

10. Bilang balos sa pagtao nin onra sa saiya, paano tinawan nin onra nin Dios si Samuel?

¹⁰ Si Samuel nagtaong onra ki Jehova sa dakol na taon bilang propeta, asin tinawan sia nin onra nin Dios. Helingon ini sa 1 Samuel 7:7-13. Si Jehova listong sinimbag an pamibi ni Samuel sa pagpatabang na daogon an mga Filisteo. Dai daw nindo ibibilang na dakulang onra an pagkaigwa nin siring na banal na pagmidbid? Kan an mga aki ni Samuel dai nagkuyog sa saiyang pangengenot, dai sia isinikwal nin Dios arog kan pagsikwal nin Dios ki Eli. Ini malinaw na huli ta ginibo ni Samuel an gabos niang makakaya na matawan nin onra an Dios. Orog pang ipinaheheling ini, dai inoyonan ni Samuel an paghagad kan banwaan nin tawong hade. (1 Samuel 8:6, 7) Ginamit nin Dios si Samuel na lahidan si Saul asin David. Kan magadan si Samuel, tinawan sia nin onra nin Israel paagi sa pagmondo. Alagad, orog na mahalaga, tinawan sia nin onra nin Dios paagi sa pagsambit sa saiya sa Biblia kabilang sa mga tawong may pagtubod na bebendisyonan nin pagkabuhay liwat asin nin marahay na mga bagay na tagama sa sainda nin Dios. (Salmo 99:6; Jeremias 15:1; Hebreo 11:6, 16, 32, 39, 40) Dai daw kaini ipinaheheling na an pagtaong onra sa “Dios nin paglaom” may dakulang halaga?

Tatawan daw Nindo nin Onra an “Dios nin Paglaom”?

11, 12. Ano an kaipuhan niatong konsideraron manongod sa pagtaong onra ki Jehova, asin ano an sarong paagi na iyan magibo niato?

¹¹ An nagin buhay ni Jesus asin Samuel, sa pagtao nin duwa sanang halimbawa sa Biblia, nagpapatunay na puwedeng ipaorog nin mga tawo sa buhay an pagtaong onra sa saindang “Dios nin paglaom.” Asin an duwang halimbawang iyan nagpapaheling na sa paggibo kaiyan kita puwede man na humanap asin mag-ako nin onra hale sa Dios. Alagad paano nindo ini magigibo na may rasonableng kasiertohan na kamo makapaoogma sa Dios, tatawan nia nin onra, asin kakamtan an saindong paglaom na basado sa Biblia?

¹² An sarong paagi iyo an pagkaigwa nin tunay, may paggalang na pagkatakot na mapaanggot an Dios. (Malaquias 1:6) Posible na kita oyon tolos sa mga tataramon na iyan. Pero, girumdoma an mga aki ni Eli. Kun sinda hinapot nindo kun baga boot nindang tawan nin onra an Dios paagi sa magalang na pagkatakot sa saiya, posibleng gayo na masabi sindang iyo. An problema yaon sa pagbugtak sa gibo sa pan-aroaldaw na buhay kan satong kamawotan na tawan nin onra an Dios paagi sa pagkatakot sa saiya.

13. Iilustrar kun paano an kamawotan na magtaong onra sa Dios paagi sa pagkatakot sa saiya makatatabang sa sato.

¹³ Kun kita napapaatubang sa sarong nakatetentar na kamugtakan na dian kita puwedeng maghabon o gumibo nin salang paggawe sa sekso na dai naaaraman nin iba, an satuya daw na pagmawot na magtaong onra sa Dios makakaapektar sa satong gawe? Kaipuhan na pataluboon niato an saboot na, ‘Dawa pa magdanay na natatago an kasalan, an sakuya mismong pagpadaog sa kasalan na iyan sarong kalanghadan sa “Dios nin paglaom” na an ngaran dinadara ko.’ Asin an totoo iyo na an kasalan dai permanenteng matatago, arog kan mga ginibo kan mga aki ni Eli. Ini pinatutunayan kan mga tataramon ni Pablo manongod sa “matanos na paghokom nin Dios”: “Sia mabayad sa lambang saro sono sa saiyang mga gibo: buhay na daing katapusan sa mga naghahanap nin kamurawayan asin onra patin pagkadaing kalapaan paagi sa pagtagal sa gibong marahay; alagad, sa mga parapakiiwal asin nakikisuway sa katotoohan kundi nagkukuyog sa kabikoan magkakaigwa nin kabangisan asin kaanggotan.”—Roma 2:5-8.

14. Ano an saro pang paagi na kita makatatao nin onra sa Dios, asin ano an puwede niatong ihapot sa sato man sana?

¹⁴ Sa ibong na kampi, nasasabihan ni Pablo an pakikikabtang sa “gibong marahay,” na nagtataong onra sa Dios asin nagbubunga nin “kamurawayan asin onra” gikan sa saiya. An pangenot na gibo na arog kaini ngonyan iyo an sinabi ni Jesus sa Mateo 28:19, 20: ‘Gumibo kamo nin mga disipulo sa mga tawo kan gabos na nasyon, na bautismohan nindo sinda asin tokdoan nindo sinda na otobon an gabos na ipinagboot ko sa saindo.’ Sa bilog na daga, an minilyon na Saksi ni Jehova aktibo sa nagtataong onra sa Dios na gibong paghuhulit asin pagtotokdong ini. An dakol naghihingoa ngani na magin bilog na panahon na mga ministro bilang payunir, baga man permanente o sa panahon nin bakasyon sa trabaho o eskuwelahan. Nasa isip ini, an lambang saro sa sato may kapakinabangan na makahohorophorop kun ano an kamugtakan nia sa gibohon na ini. Halimbawa, puwede nindong ihapot, ‘Ako daw nagtataong onra sa “Dios nin paglaom” paagi sa pagkaigwa nin lubos na pakikikabtang sa paghuhulit?’

15. Ano an nangyari sa ibang Kristiano mapadapit sa pagtaong onra ki Jehova paagi sa ministeryo sa publiko?

¹⁵ An ibang Kristiano na sa dakol na taon aktibong mga parahulit luway-luway na nagluya. Nagin kaugalean na ninda an pagkaigwa sana nin kadikit o paminsanminsan na pakikikabtang sa mahalagang paggibo nin mga disipulo. Dai niato pinanonongdan an mga may pisikal na limitasyon asin minaluya huli sa epekto nin paggurang. Apuwera sa mga ini, maririsa an pagluya sa tahaw nin nagkapirang Saksi na laen-laen an edad. Interesante nanggad, bakong saro sanang edad an pinanonongdan ni Pablo kan sia magpatanid sa mga Kristiano tumang sa ‘pagkapagal.’ Imbes, ano man an edad nin saro, an mayor na bagay iyo na an regular na pakikikabtang sa ministeryo nagkakaipo nin paghihingoa. Arog kan malinaw na nangyari kan kaaldawan ni Pablo, may mga nangangatanosan ngonyan na, ‘Ginibo ko na an kabtang ko sa nag-aging mga taon, kaya ngonyan an bagong mga Kristiano naman an puwedeng maghingoa.’—Galacia 6:9; Hebreo 12:3.

16. Taano ta tibaad kita makinabang sa pagsiyasat sa sadiri sa bagay na ini?

¹⁶ An naapektaran nin arog kaini tunay na kadikit sana, pero puwede nindong ihapot, ‘Prangka ko daw na minimidbid an ano man na tendensiang arog kaiyan sa kaso ko? Paano nakakokomparar sa nakaagi an pakikikabtang ko sa ministeryo?’ Baga man may nangyaring pagluya o mayo, maninigong girumdomon niato gabos na an satong “Dios nin paglaom” nanunugang magtao nin “kamurawayan asin onra patin katoninongan para sa gabos na naggigibo nin marahay.” (Roma 2:10) Ginamit ni Pablo an sarong termino sa Griego na nangangahulogan “gumibo nin sarong bagay, papagbungahon, hamanon.” Napakahalaga nanggad na likayan niato an nangyari sa mga Fariseo asin eskriba, na nagtao sana nin onra sa Dios paagi sa paglilingkod sa ngabil! (Marcos 7:6; Kapahayagan 2:10) Kabaliktaran, kun gikan sa puso na kita aktibong nakikikabtang sa ministeryo sa publiko, pinatutunayan niato sa sato man sana asin sa iba na kita talagang may tunay na paglaom. Tinatawan niato nin onra an satong Kaglalang asin Paratao nin buhay. Asin napapabilang kita sa mga tatawan nia nin onra, ngonyan asin sagkod lamang.—Lucas 10:1, 2, 17-20.

Paagi sa Satong Mahahalagang Bagay

17, 18. Ano an saro pang paagi na kita makatatao nin onra sa Dios, asin taano ta bakong balido an pag-alangan na gibohon iyan?

¹⁷ Kun manongod sa saro pang paagi na kita makatatao nin onra sa satong “Dios nin paglaom,” an Talinhaga 3:9 nagsasabi: “Tawan nin onra si Jehova paagi sa saimong mahahalagang bagay asin paagi sa enot na mga bunga kan saimong inani.” An pagkasalin ni Spurrell sa bersikulong ini: “Pamurawaya si Jehova paagi sa saimong kayamanan, asin paagi sa pinakamarahay sa gabos na bunga mo.”—A Translation of the Old Testament Scriptures from the Original Hebrew.

¹⁸ Mantang an laen-laen na klerigo nabantog huli sa saindang daing katapusan na kahanaban asin maluhong pamumuhay, an dakol nag-aalangan na magdonar sa mga iglesya asin relihiyosong organisasyon na an katuyohan maliwanag na garo baga pagkakamit sana nin kayamanan. (Kapahayagan 18:4-8) Alagad an siring na mga pag-abuso dai nakaliliwat sa katamaan kan Talinhaga 3:9. Kaoyon sa ipinasabong na hatol na iyan, paano niato magagamit an satong “mahahalagang bagay” sa ‘pagtao nin onra ki Jehova,’ an satong “Dios nin paglaom”?

19. Iilustrar kun paano iinaplikar nin iba an Talinhaga 3:9.

¹⁹ Naheling nin mga Saksi ni Jehova na an pagdakol nin mga tawo na naghihinanyog sa mensahe kan Kahadean nagkakaipo kan pagpahiwas sa mga Kingdom Hall o pagtogdok nin mga bago. Kun siring, uya an sarong paagi na ‘pamurawayon si Jehova paagi sa saimong kayamanan.’ An hoben asin gurang nakikabtang sa paggibo kaini, arog baga kan personal na pagdesisyon na magdonar sa pondo sa pagtotogdok. An pag-otob sa sekretong mga desisyon na iyan tibaad magkaipo nin personal na disiplina o nin sakripisyo pa ngani, nangorogna kun an pagpaplano asin pagtapos sa sarong proyekto nin pagtotogdok minalawig. (2 Corinto 9:6, 7) Pero, an paggamit sa kuwarta sa paaging ini tunay na nagtataong onra ki Jehova, huli ta an mga Kingdom Hall lugar na dian sia sinasamba nin mga Kristiano asin dian sinda asin an saindang kairiba nagkakamit nin kaaraman gikan sa Dios. An mga tataramon ni Jesus sa Mateo 6:3, 4 nagtatao sato nin marahay na dahelan na manarig na tatawan nin Dios nin onra an mga nagtaong onra sa saiya sa siring na paagi.

20. (a) Taano ta kaipuhan an pagsiyasat sa sadiri sa pag-aplikar kan Talinhaga 3:9? (b) Ano an mga puwedeng ihapot niato sa satong sadiri?

²⁰ Alagad uya an sarong patanid: An mga Fariseo asin eskriba, na sinabi ni Jesus na dai ipinaoorog an pagtaong onra sa Dios, sineguro na sinda an enot na nakikinabang sa saindang kayamanan. Kaya an hatol sa Mateo 15:4-8 nagrerekomendar na siyasaton niato an satong sadiri kun dapit sa ‘pagtaong onra ki Jehova paagi sa satong mahahalagang bagay.’ (Jeremias 17:9, 10) Halimbawa, an sarong Kristiano na medyo nagyaman na paagi sa saiyang negosyo tibaad ipangatanosan an saiyang pagpapadagos na magtrabaho nin bilog na panahon tanganing madugangan pa an nakukua. Tibaad mangatanosan sia, ‘An iba minalaog sa pagpapayunir o minabalyo tanganing maglingkod kun saen kinakaipuhan an mga parahulit, pero an sakong espesyal na paagi sa paglilingkod sa Dios iyo an paghanap nin mas dakol dangan pagdonar nin dakol.’ Tibaad dakulang karahayan an nagigibo kan saiyang mga donasyon. Pero marahay na ihapot nia sa sadiri, ‘Ipinaririsa daw kan sakong personal na pamumuhay na an paggamit sa kuwarta sa pagtaong onra sa Dios iyo an sakuyang pangenot na motibo sa paghanap pa nin mas dakol?’ (Lucas 12:16-19; ikomparar an Marcos 12:41-44.) Asin, ‘Puwede ko daw na iareglo an sakong mga gibo tanganing magkaigwa nin mas dakulang personal na pakikikabtang sa pinakamahalagang gibohon para sa satong kaaldawan—an pagpahayag kan maogmang bareta?’ An totoo, ano man an kamugtakan niato sa buhay, puwede niatong siyasaton an satong motibo asin gawe patin ihapot, ‘Paano ko daw mas lubos na matatawan nin onra an sakong Paratao nin buhay asin “Dios nin paglaom”?’

21. Ano an malalaoman niato kun kita magtataong onra ki Jehova ngonyan?

²¹ Dai kita susudyaon ni Jehova. Kawiliwili nanggad na paglaom na tibaad sabihon nia manongod sa sato, ngonyan asin padagos sagkod sa ngapit, an isinabi nia manongod sa maimbod na Israel: “Huli ta ika nagin pinakamahal sa sakuyang mga mata, ika ibinilang na kagalang-galang, asin namotan taka”! (Isaias 43:4) An Sarong iyan nanuga man nin “buhay na daing katapusan sa mga naghahanap nin kamurawayan asin onra.” An panugang ini itinao nia sa mga nagtatagal “sa gibong marahay.” Kanigoan kamakangangalas na “Dios nin paglaom”!

Ano an Isisimbag Nindo?

◻ Kun manongod sa pagtaong onra nin mga tawo ki Jehova, ano an manonodan niato sa halimbawa ni Jesus?

◻ Paano si Eli asin Samuel nagkalaen manongod sa pagtaong onra sa Dios?

◻ Ano an nagkapirang paagi na madudugangan nindo an onra na itinatao nindo sa Dios, asin anong balos an puwede nindong akoon?

◻ Anong ngapit an natatagama sa mga inienot an pagtaong onra sa satong “Dios nin paglaom”?

[Kahon sa pahina 18]

MGA SURAT MANONGOD SA DONASYON

Uya an nagkapirang kabtang nin mga surat na naresibi kan opisina sa Brooklyn, Nueva York, kan Watch Tower Society:

“An ngaran ko Abijah. Nuebe anyos an edad ko. Boot kong magtao saindo nin $4 para sa mga tugang na nagtatrabaho sa mga Kingdom Hall. Puwede nindang gamiton ini para sa kahoy o para sa dulse, areglado lang sako.”—Oregon.

‘Maheheling nindong kalakip kaini an sakong personal na tseke. Lihis na ako sa edad na 96 asin nasasakitan nang makadangog, pero tunay na ikinaoogma kong tiponon an kuwarta ko para digdi. Iyo, aram ko, segunda mano an kotse ko, asin dai ko pinaaagi an tiglipotan sa Florida o California. Kakadikit kan nagigibo ko sa paghuhulit kan maogmang bareta kan Kahadean paagi sa pagtoktok sa mga harong. Pero paagi sa pagtipon kan kuwarta ko asin pagpadara kan iba sa saindo, namamate ko na may kabtang pa man giraray ako.’—Ohio.

‘Salamat sa gabos na ginibo nindo para sa Kingdom Hall. An kuwartang ini [$5] para sa pagtabang saindo sa mga libro asin Torrengbantayan na babasahon para sa samo. An kuwarta hale sa sakong alkansia. Salamat sa pulyetong School na nagsasabi samo manongod sa mga droga.’

“Kalakip kaini an sarong tseke. An dos sientos dolyares kaiyan para sa Kingdom Hall Building Fund. An iba para magamit sa ano man na paaging pinaghohona nindong maninigo sa pagpaoswag kan gibong paghuhulit.”—Missouri.