An Unibersal na Kaso sa Husgado na Dian Kalabot Kamo

“‘Atubangan nindo an saindong kaso,’ an sabi ni Jehova. ‘Luwasan nindo an saindong mga pangangatanosan.’”—ISAIAS 41:21.

1, 2. (a) Siisay an napapalabot sa pinakamahalagang kaso sa husgado na pinaglabanan? (b) Ano an isyu?

SA BILOG na kasaysayan nagkaigwa nin dai mabilang na kaso sa husgado. Digdi, an mga saksi ilinuwas asin iinatubang an ebidensia tanganing manindogan para sa sarong lado o sa ibong. An dakol sa mga kasong ini may labot sa mga indibiduwal, mantang an iba nakaapektar sa mas dakol na tawo. Alagad an gabos na kasong iyan nawawaran nin halaga kun ikokomparar sa unibersal na kaso sa husgado na pinaglalabanan ngonyan. Iyan an pinakamahalagang kaso sa husgado sa kasaysayan. An resulta kaiyan makaaapektar sa lambang tawo sa daga, baga man gustohon niang mapalabot o dai.

² An pangenot na kalabot sa kasong ini iyo an kaharohalangkaweng persona sa uniberso, si Jehova Dios, “an Kaglalang kan kalangitan asin an Dakulang Saro na nagbibiklad sa sainda; an Saro na nagbibiklad sa daga asin sa mga bunga kaiyan, an Saro na nagtatao nin hinangos sa mga tawong nag-eerok dian.” (Isaias 42:5) Ano an isyu? An isyu iyo an saiyang pagkadios—an pagigin makatanosan kan saiyang paghade sa bilog na uniberso, kaiba an daga asin an mga nag-eerok dian. Ini maaapod na isyu nin unibersal na soberaniya.

3. Anong mga hapot an pundamental sa isyu nin unibersal na soberaniya?

³ Pundamental sa isyu an mga hapot na ini: Arin sa gabos na dios na sinasamba an napatunayan na masasarigan nanggad na ikatataya nindo an saindong buhay asin an saindong ngapit sa sainda? Arin an aktuwal na nabuhay, asin arin an imbento sana nin mga tawo? Igwa daw nin tunay, nabubuhay, supremong Dios na makapagliligtas sa katawohan sa presenteng masakit na kamugtakan kaiyan asin makatatao kan tamang klase nin gobyerno na magarantiya nin tunay na katoninongan, katiwasayan, prosperidad, asin mabagsik na salud?

4. Ano an masasabi manongod sa mga naghohona na mayo nin isyu, ta sinasabi ninda na sinda dati nang nagtutubod sa Dios?

⁴ An dakol naghohona na mayo nin isyu para sa sainda, ta sinasabi ninda na dati na sindang nagtutubod sa Dios. Alagad makatatao daw sinda nin ebidensia na an dios na sinasamba ninda iyo an tunay na Dios, na an saiyang mga panuga masasarigan, asin na an saiyang mga katuyohan asin pagboot naggigiya sa saindang buhay? Kun an mga tawong iyan sumimbag nin iyo, kun siring maninigo na masimbag man ninda an mga hapot na ini: Ano man nanggad an ebidensia na igwa nin tunay na Dios na an mga panuga masasarigan? Ano an katuyohan nin Dios para sa katawohan asin sa daga? Saen na kita sa iskedyul nin Dios, asin ano an natatagama sa harani nang ngapit? Ano an boot niang gibohon niato bilang mga indibiduwal tanganing kita makasuportar sa saiya?

5. Kiisay ikababaing an mga tawo kun dai sinda nakatatao nin ebidensia sa pagsuportar sa saindang pagtubod sa Dios?

⁵ An kadaklan na nagsasabing sinda nagtutubod sa Dios dai nakasisimbag sa mga hapot na ini na may autoridad. An mga siring ikaaagid sa mga naghingakong nagtutubod sa Dios kan enot na siglo pero an gibo nagpahimutik sa saindang paghihingako. Manongod sa sainda an Tataramon nin Dios nagsasabi: “Sinda nagpapahayag na midbid ninda an Dios, alagad ta sinda nagpapainda sa saiya paagi sa saindang mga gibo.” Iyo, “an pagtubod na daing gibo gadan.” (Tito 1:16; Santiago 2:26) Kaya, an mga nagsasabi na nagtutubod sinda sa Dios pero dai nakatatao nin marigon na ebidensia sa pagsuportar dian dai nanggad nin kalaenan sa mga tawo kan nakaaging mga siglo na nagtubod sa falsong mga dios na haloy nang nawara bilang mga sinasamba.

Nakapaparehong mga Kaso

6, 7. (a) Iladawan an relihiyon kan suanoy na mga Egipcio. (b) Paano napalabot an mga Israelitas sa isyu sa pag-oltanan ni Jehova asin kan mga dios nin Egipto?

⁶ An sarong halimbawa kaini iyo an kaso tumang sa mga dios nin suanoy na Egipto mga 1,500 na taon bago an satong Komon na Kapanahonan. An mga Egipcio nagsasamba sa kadakol na dios, kaiba an mga hayop na arog kan toro, ikos, baka, buaya, kulago, talapang, layas na ayam, leon, halas, buwitre, asin lobo. An dakol sa mga hayop na ini pinaghonang pagmateryalisar nin sarong dios o diosa, asin an tuyong paggadan sa saro pinadudusahan nin kagadanan. An sagradong mga hayop iniembalsamar asin tinatawan nin maluhong nga lobong.

⁷ Katumang kan gabos na dios na iyan an Dios na sinasamba kan suanoy na Israel, si Jehova. An saiyang representante, si Moises, isinugo na hagadon ki Faraon na butasan an banwaan ni Jehova, na kaidto naooripon, ta pinanugaan sinda ni Jehova kan saindang katalingkasan. (Exodo 3:6-10) Alagad ta si Faraon nagsabi: “Siisay man si Jehova, tanganing kuyogon ko an saiyang tingog na pahaleon an Israel? Dai ko man lamang namimidbid si Jehova asin, saro pa, dai ko totogotan na humale an Israel.” (Exodo 5:2) Si Faraon may kompiansa na an mga dios nin Egipto mas makapangyarihan ki Jehova.

8, 9. (a) Paano pinatunayan ni Jehova an saiyang pagkasuperyor sa mga dios nin Egipto? (b) Huli sa nangyari, ano an dapat na sabihon manongod sa mga dios nin Egipto?

⁸ Siisay daw an mapatutunayan na tunay na Dios na kayang otobon an saiyang mga panuga asin ingatan an saiyang banwaan? An simbag madali nang umabot. Ihinula ni Jehova: “Hohokoman ko an gabos na dios nin Egipto.” (Exodo 12:12) Inotob daw nia an hulang iyan? Iyo! Si Jehova nagpaabot nin sampulong mapanlaglag na damat na an katuyohan supogon an mga dios nin Egipto. Mayo sa mga dios na idto an nakaprotehir sa mga Egipcio. Asin an ikasampulong damat espesyalmenteng makahulogan, huli ta ginadan kaiyan an mga panganay sa Egipto, pati an aki ni Faraon. Ini direktang patama sa saindang poon na dios na si Ra (Amon-Ra), ta an mga hade nin Egipto ibinibilang an saindang sadiri na mga dios, mga aki ni Ra. Para sa mga Egipcio, an pagkagadan kan panganay ni Faraon nangahulogan kan pagkagadan nin sarong dios.

⁹ Minsan siring, mayo ni sarong Israelitang panganay na nagadan, ta nasa sainda an proteksion ni Jehova. Saro pa, itinao nin Dios sa saiyang banwaan an katalingkasan na ipinanuga nia sa sainda. Asin bilang ultimong patama sa falsong mga dios nin Egipto, si Faraon asin an saiyang hukbo—an kada saro sa sainda—ginadan sa Dagat na Pula. Kaya, si Jehova napatunayan na iyo an tunay na Dios. An saiyang mga panuga an naotob, asin an saiyang mga parasamba an naingatan. (Exodo 14:21-31) Sa ibong na kampi, an mga dios nin Egipto daing maginibo na tabangan an mga nagsasamba sa sainda. An mga dios na idto talagang dai man nabuhay kundi imbento sana nin mga tawo.

10. Anong isyu an napaatubang sa mga parasamba ki Jehova asin sa Asiria?

¹⁰ An saro pang kaso may labot sa pagkadios naglataw pakalihis nin mga walong siglo, kan panahon ni Hadeng Ezequias.a An mga parasamba ki Jehova namemeligro sa maisog na Kapangyarihan Pankinaban nin Asiria na nakadaog sa gabos na nasyon na agihan kaiyan. Ngonyan hinahagad kaiyan na sumuko an Jerusalem, an siudad na igwa kan “trono ni Jehova,” na nagrerepresentar sa pagsamba sa saiya digdi sa daga. (1 Cronica 29:23) Inadmitir kan hade nin Juda, si Ezequias, na an mga Asirio ‘ginaba an gabos na ibang daga asin isinurugba sa kalayo an mga dios kan mga dagang iyan huli ta sinda bako man na mga dios, kundi gibo nin mga kamot nin tawo.’—Isaias 37:18, 19.

11. Paano ilinigtas ni Jehova an saiyang mga parasamba, asin ano an ipinaheling kaini?

¹¹ Dangan an maimbod na si Ezequias namibi ki Jehova, na hinahagad an saiyang proteksion. Si Jehova nanuga na mayo ni sarong armas kan mga Asirio na matama sa Jerusalem. (Isaias 37:33) Totoo sa hulang iyan, mayo man nanggad ni sarong tuminama. Imbes, “an anghel ni Jehova luminuwas asin linugad an sanggatos may walong polo may limang ribo sa kampo kan mga Asirio.” Pakatapos kan grabeng kadaogan na iyan, an hade nin Asiria, si Senaquerib, suminibog. Kan huri, kan sia nagsasamba sa dios niang si Nisroc, ginadan sia kan saiyang mga aki. (Isaias 37:36-38) Kaya si Jehova napatunayan liwat na Dios nin tunay na hula na kayang iligtas an saiyang mga parasamba. An mga dios nin Asiria asin kan mga nasyon sa palibot napatunayan na falso, dai nag-eeksister, dai nakapoprotehir sa saindang mga parasunod.

12. Paano pinagtuya ni Belsasar si Jehova?

¹² Pakalihis nin mga duwang siglo, tinogotan nin Dios an saiyang banwaan, na dai nagmaimbod, na mabihag kan suminunod na kapangyarihan pankinaban, an Babilonya. An pangenot na karakteristiko kaiyan iyo an kadakol na dios, diosa, asin templo sa pagsamba. Alagad sa sarong atake nin kahambugan, pinagtuya si Jehova kan hade nin Babilonya na si Belsasar. Sa sarong dakulang bangkete, ipinagboot niang darahon sa saiya an banal na mga lalagan na nakua sa templo sa Jerusalem. “Iyan an ininoman kan hade asin kan saiyang mga prinsipe, kan saiyang mga sangbay asin segundang mga agom. Nag-irinom sinda nin arak, asin inomaw ninda an mga dios na bulawan asin pirak, tanso, batbat, kahoy asin gapo.”—Daniel 5:1-4.

13. Ano an ipinasabi ni Jehova ki Daniel para ki Belsasar?

¹³ Ini direktang pag-insulto ki Jehova, angat sa saiya sa ngaran kan mga dios nin Babilonya. Dangan mapusong pinapanaksi ni Jehova an saiyang propetang si Daniel ki Hadeng Belsasar asin sa gabos na yaon sa bangkete. Sinuportaran ni Daniel an pagkadios ni Jehova asin sinabihan si Hadeng Belsasar: “Dai mo pinakumbaba an saimong puso . . . kundi tumang sa Kagurangnan kan kalangitan ilinangkaw mo an saimong sadiri, . . . asin inomaw mo an mga dios na pirak asin bulawan, tanso, batbat, kahoy asin gapo, na dai nakakaheling o dai nakakadangog o dai nin naaaraman; alagad an Dios na sa saiyang kamot namumugtak an saimong hinangos asin may sadiri kan gabos mong dalan dai mo pinamuraway.”—Daniel 5:22, 23.

14. Paano ipinaheling ni Jehova na sia iyo an tunay na Dios?

¹⁴ Dangan itinao ni Daniel an mensahe ni Jehova, na iyo ini: An hambog na si Hadeng Belsasar asin an Babilonya ibabagsak kan mga Medo asin Persiano kan mismong bangging idto! (Daniel 5:24-27) Naotob daw an hulang ini? Iyo. “Kan banggi man sanang idto nagadan si Belsasar na hade kan mga Caldeo asin si Dario na Medo nag-ako kan kahadean.” (Daniel 5:30, 31) Sa giraray, kapareho sa Egipto asin Asiria, si Jehova napatunayan na iyo an tunay na Dios, an Dios na nag-ootob sa saiyang mga panuga. An mga lingkod nin Dios nakinabang, ta sinda nakabutas sa pagkabihag asin nagpuli sa sadiri nindang daga. An mga nagpadagos sa pagsunod sa falsong mga dios napahamak.

Mga Hula Para sa Satong Panahon

15. (a) Ano an karakteristiko nin dakol na hula sa Biblia? (b) Ano man an boot niatong sabihon kun ginagamit niato an terminong “dios”?

¹⁵ Si propeta Isaias pinasabngan na sumurat nin mga hula na naotob kaidtong suanoy na mga panahon. Alagad parate na sa hula kan Biblia, igwa nin saro pang mas dakulang kaotoban na may koneksion sa satong panahon. Ini an kaso kan dakol na isinurat ni Isaias. An sarong kabtang kan saiyang mensahe may mga hula manongod sa angat ni Jehova sa gabos na nasyon asin sa saindang mga dios sa modernong aldaw. Asin sa terminong “mga dios” an boot niatong sabihon bako sanang an mga dios na direktang sinasamba nin mga tawo sa gabos na parte kan kinaban, pati an inaapod na paganong mga nasyon ngonyan, kundi pati an mga bagay na nakatatama sa kahulogan kan terminong iyan. An sarong pakahulogan kan diksionaryo sa terminong “dios” iyo ini: “An saro na namomogol sa sarong partikular na bagay o sarong kabtang nin katunayan; persona o bagay na may supremong halaga.”

16. Anong mga dios an sinasamba ngonyan kan mga tawo nin mga nasyon, pati sa Kakristianohan?

¹⁶ Kaiba sa mga ibinibilang na dios ngonyan an minilyon na dios na sinasamba nin mga Hindu, saka an mga sinasamba nin mga Budhista, Shintoista, animista, asin iba pang relihiyonista. Kaiba man dian an dios na materyalismo, an bagay na may supremong halaga para sa kadaklan digdi sa daga, an mayor na motibasyon sa saindang buhay. Kaiba man dian an mga dios na militar na kosog asin siensia na linalaoman nin mga nasyon para sa katiwasayan asin kaligtasan. Saro pa, an kadaklan pati sa Kakristianohan na nagsasabi na nagtutubod sinda sa Dios dai man tunay na nagsasarig sa saiya o maimbod na naglilingkod sa saiya, kundi imbes sinda nagsasarig o naglilingkod sa mga tawo o bagay bilang an pangenot na tinatawan ninda nin kaimbodan.

17. Ano an itinotokdo kan mas dakulang kaotoban kan mensahe ni Isaias?

¹⁷ An mas dakulang kaotoban kan mensahe ni Isaias idinidirehir sa gabos na dios na iyan sa satong panahon. Sinasabihan ni Jehova an mga banwaan na magtiripon asin “magtaram.” Inaangat nia sinda: “Magtiripon kita para sa paghokom.” (Isaias 41:1) Ngonyan, kita nabubuhay sa panahon nin “paghokom” para sa kinaban na ini. Iyan nasa “huring mga aldaw” na siring sa ihinula sa 2 Timoteo 3:1-5 asin Mateo 24:1-14. Sa panahon na ini inaangat ni Jehova an mga dios kan mga nasyon na ihula nin tama an maabot asin sa siring patunayan na sinda mga dios. Inaangat man nia sinda na protehiran an saindang mga parasunod kun kaya ninda. “Atubangan nindo an saindong kaso,” sabi nia. “Luwasan nindo an saindong mga pangangatanosan . . . asin sabihan sa samo an mga mangyayari.”—Isaias 41:21, 22.

18. Paano ipinamimidbid kan makakamhan sa gabos na Dios an saiyang sadiri, asin ano an ipinanunuga nia sa saiyang mga parasamba?

¹⁸ Ipinamimidbid kan makakamhan sa gabos na Dios kun siisay sia: “Ako si Jehova. Iyan an sakong ngaran; asin dai ko itatao sa iba an sakong kamurawayan, ni an sakong kaomawan sa mga imahen.” (Isaias 42:8) Asin sinasabihan nia an mga nagsusuportar sa saiya: “Dai ka matakot, huli ta ako nasa saimo. Dai ka mangalagkalag, huli ta ako an saimong Dios. Pakokosogon ta ka. Tatabangan ta ka nanggad.” Pinanunugaan nia sinda: “An gabos na nagkakaaranggot tumang sa saimo mapapasopog asin ibababa. An mga tawong nakikiiwal sa saimo magigin garo mayo asin mapapara.” “An ano man na armas na gibohon tumang sa saimo dai magkakaepekto . . . Iyo ini an rogaring na panonondon kan mga lingkod ni Jehova.”—Isaias 41:10, 11; 54:17.

19, 20. (a) Paano ipinaheheling ni Isaias na may itinalaan na panahon si Jehova sa paghusay sa mga bagay? (b) Siisay an pinaluluwas ni Jehova sa “huring mga aldaw” na ini, asin paano sia ninda irinirepresentar?

¹⁹ Sa halawig na panahon, sa laog nin dakol na siglo, pinabayaan ni Jehova an mga nasyon na gibohon an gusto ninda. Minsan siring, nag-abot na an itinalaan niang panahon sa paghusay sa mga bagay digdi sa daga. Kaya sia nagsasabi: “Ako nagdanay na daing girong sa haloy na panahon. Nagpadagos akong daing girong. Nagpadagos akong magpogol.” Alagad ngonyan, “siring sa tawong makosog si Jehova maluwas. Siring sa parapakilaban pupukawon nia an kaigotan. Sia makurahaw, iyo, sia makagsing; patutunayan nia na sia orog na makapangyarihan sa saiyang mga kaiwal.” (Isaias 42:13, 14) Sa mga hula ni Isaias asin iba pang parasurat sa Biblia, saka ni Jesus, ihinula ni Jehova an pagpatindog nia sa sarong banwaan sa “huring mga aldaw” na ini tanganing maigot na magpapatotoo para sa saiya, na garo sinda mga saksi sa sarong kaso sa husgado.

²⁰ An banwaan na pinaluwas ni Jehova tanganing maglingkod sa saiya nagtatao nin ebidensia na sia an tunay na Dios, an Paraligtas sa saiyang mga parasamba asin an Paralaglag sa falsong mga dios asin sa saindang mga parasunod. An banwaan ni Jehova ngonyan ‘inaawit an saiyang mga kaomawan gikan sa poro kan daga, gikan sa gabos na nasyon asin isla, gikan sa alitoktok kan mga bukid.’ (Isaias 42:10-12) Inootob kaini an saro pang hula ni Isaias na nagsabi: “Sa huring kabtang kan mga aldaw [sa satong panahon] . . . an bukid kan harong ni Jehova [an tunay na pagsamba sa saiya] magigin marigon sa ibabaw kan alitoktok kan kabukidan, asin iyan ilalangkaw nanggad sa ibabaw kan mga bolod [sa ibabaw nin gabos na ibang klase nin pagsamba]; asin an [mga tawo hale sa] gabos na nasyon maturukad dian.” Asin ano an isasadol ninda sa iba na gibohon? Pinakikiolayan ninda an mga may sadiosan na puso: “Madia kamo, banwaan, asin magtukad kita sa bukid ni Jehova, . . . asin totokdoan nia kita dapit sa saiyang mga dalan, asin kita maglalakaw sa saiyang mga dana.”—Isaias 2:2-4.

21. Anong mga hapot an pinalalataw kan angat ni Jehova sa mga dios kan mga nasyon?

²¹ Kaya, garo baga nagtataram sa husgado, si Jehova nagsasabi: “Magtiripon an gabos na nasyon sa sarong lugar, asin magsararo an mga banwaan. . . . Itao ninda an saindang mga saksi, tangani sindang ikapahayag na matanos, o magdangog sinda asin magsabi, ‘Iyan an katotoohan!’” (Isaias 43:9) Ini direktang angat sa mga dios kan mga nasyon. An siisay man daw sa sainda kayang isabi kun ano an nasa ngapit? Nagibo daw ninda ini kan mga nakaagi? May manonompongan daw sindang saro na mananaksing may marigon na ebidensia na an mga dios na iyan napatunayan na totoo, maninigong tawan kan satong kaimbodan? Anong rekord an ginibo sa satong panahon kan mga dios kan mga nasyon, asin kan saindang mga parasunod? Iyan daw mas marahay kisa nagibo kan mga dios kan suanoy na mga Egipcio, Asirio, asin Babilonyo? Sa ibong na kampi, an mga nananaksi daw ki Jehova nakapaluwas nin marigon na ebidensia na si Jehova iyo an tunay na Dios, an solamenteng Saro na maninigo niatong sambahon? Ini ipaliliwanag kan minasunod na artikulo.

[Nota sa Ibaba]

Mga Hapot sa Pagrepaso

◻ Ano an isyu nin unibersal na soberaniya?

◻ Anong mga dios kan mga nasyon an napapalabot sa isyu ngonyan?

◻ Anong resulta nin tolong nakapaparehong kaso an nagpapaheling kan pagkasuperyor ni Jehova sa falsong mga dios?

◻ Paano ipinaheheling ni Isaias na huhusayon ni Jehova an mga bagay sa satong kaaldawan?

◻ Anong mga hapot an kaipuhan na simbagon manongod sa mga parasunod sa gabos na relihiyon ngonyan?

[Ritrato sa pahina 9]

An mga dios nin Egipto daing naginibo sa atubang kan tunay na Dios, si Jehova

[Ritrato sa pahina 10]

An mga dios nin Asiria asin an saindang mga parasunod pinamate nin mapanronot na kadaogan kan tunay na Dios

[Ritrato sa pahina 11]

Itinao ni Daniel an mensahe ni Jehova sa mga parasamba sa falsong mga dios nin Babilonya