An Kagayonan Puwedeng Pan-ibabaw Sana
SI Eva, an enot asin solamenteng babae na linalang nin Dios, posibleng iyo an pinakamagayon na babaeng nabuhay. Alagad ta sia asin an agom nia, si Adan, nagrebelde ki Jehova. Kaya nawara ki Eva an harani niang relasyon sa Dios asin nakakontribuwir sia sa pagtao nin teribleng kamondoan sa rasa nin tawo. Pakalihis kaiyan, segurado na magayon pa man giraray sia, pero an saiyang kagayonan pan-ibabaw na sana.
An kagayonan balaog nin Dios, asin an iba nakamana nin mas dakol kaiyan kisa iba. An iba nagmamawot na kutana mas magayon sinda—o guwapo—kisa ngonyan, asin an dakol naggagasto nin dakol na oras asin kuwarta sa pagpaoswag sa ano man na kagayonan na yaon sainda. Alagad arog kan ipinaheheling kan halimbawa ni Eva, an kagayonan sana sa kahaloyan daing halaga apuwera sana kun iyan may kaibang ibang kuwalidad. Anong ibang kuwalidad? An sarong eksperyensia kaidtong kaaldawan ni Hadeng Salomon nakatatabang sato na masimbag iyan.
Labi sa Kagayonan
An libro sa Biblia na Awit ni Salomon nagsasaysay manongod sa sarong magayon na daragang probinsiana, sarong Sulamita, na namomoot sa sarong pastor. An kagayonan nia nakaakit sa hade, asin ipinadara sia kan hade sa Jerusalem sa paglaom na agomon sia. Kanigoan karahay na oportunidad para sa sarong daraga! Duman, puwede niang kasangkapanon an kagayonan nia asin makaabot sa posisyon nin kayamanan, kapangyarihan, asin impluwensia sa kahadean. Alagad ta desididong sinayumahan kan daraga an nakapatataba sa pusong mga alok kan hade. Tinalikdan nia an kinang asin kayamanan nin Jerusalem asin nagdanay na maimbod sa saiyang pastor. Sa kaso nia, an kagayonan bakong pan-ibabaw sana. Bako siang mapagsaginsagin, oportunista, o paslo. Imbes, igwa sia nin panlaog na kagayonan na mayo sa apoon niang si Eva.—Awit ni Salomon 1:15; 4:1; 8:4, 6, 10.
An mga Siod nin Pisikal na Kagayonan
An pisikal na kagayonan, minsan ngani marahay, puwedeng gumiya sa mga problema na noarin man dai itinatao nin panlaog na kagayonan. Halimbawa, kaidtong haros 4,000 na taon na an nakaagi, an patriarkang si Jacob may aking babae na an ngaran Dina na seguradong magayonon. Kan sia mangmang na nakiamiga sa “mga aking babae kan banwaan,” an sarong soltero na an ngaran Siquem naakit na gayo sa saiya na linugos nia sia.—Genesis 34:1, 2.
Dugang pa, an panluwas na kagayonan, kun dai pinapadisan nin panlaog na kagayonan, puwedeng magpadakula nin sobra sa pagheling sa sadiri kan igwa kaiyan. Si Hadeng David may aki na an ngaran Absalom, na manongod sa saiya mababasa niato: “Kun ikokomparar ki Absalom mayo nin lalaki na nagin siring kagayon sa bilog na Israel tanganing omawon nin makuri.” (2 Samuel 14:25) Alagad ta an pisikal na kagayonan ni Absalom may itinatagong panlaog na kakanosan: Sia mapalangkaw, ambisyoso, asin daing herak. Ginamit nin tuso kan solterong ini an saiyang personal na pan-akit tanganing magkaigwa nin mga parasuportar sa Israel dangan nakikasapakat tumang sa saiyang amang hade. Sa katapustapusi sia ginadan alagad pagkatapos nang an kahadean ipahamak kan magayonon na lalaking ini sa guerra sibil.
Kagayonan nin Lalaki
Arog kan ipinaheheling sa kaso ni Absalom, inaapod kan Biblia na magayon an lalaki saka babae. An sarong halimbawa nin lalaki na dai nasiod kan saiyang kagayonan iyo si Jose, an mas nguhod na tugang sa ama ni Dina. (Genesis 30:20-24) Kan sia hoben pa, an mga tugang ni Jose ipinabakal sia huli sa pag-imon bilang oripon na dadarahon sa Egipto. Duman, binakal sia nin sarong opisyal sa militar na an ngaran Potifar, asin huli sa pagigin sadiosan asin mahigos, sia nagin namamahala sa harong ni Potifar. Mientras tanto, “si Jose nagin magayon an lalauogon asin magayon an tindog.”—Genesis 39:6.
An agom ni Potifar tinubuan nin horot para ki Jose asin daing sopog na pinagmaigotan na akiton sia. Alagad ta pinatunayan kan soltero na sia may panlaog na kagayonan saka pisikal na kagayonan. Sia nagsayuma na magkasala tumang sa saiyang kagurangnan, si Potifar, asin dinulagan an babae. Bilang resulta, sia nabilanggo. Taano? An nabigong agom ni Potifar pinagsahotan si Jose na nagprobar na lugoson sia! Alagad, minsan an mapait na eksperyensiang ini dai nakapaalsom sa ugale ni Jose, asin an saiyang marahayon na halimbawa sa irarom nin makuring kasakitan nakapakosog sa mga tawong may matanos na puso poon kaidto.
Arog kan ipinaheheling kan mga halimbawang ini, an panlaog na kagayonan—kagayonan nin personalidad nangorogna kun iyan basado sa pagtubod sa Dios—mas mahalaga nanggad kisa pisikal na kagayonan. Ini kaipuhan na maaraman nin mga hobenes na nagpaplanong mag-agom. Maninigong girumdomon iyan nin mga among na naghahanap nin mga trabahador. Asin kaipuhan na girumdomon niato gabos na baga man kita binendisyonan nin pisikal na kagayonan o dai, puwede niatong kultibaron an mas mahalaga nanggad na panlaog na kagayonan na ini. Alagad ta ano ini? Asin paano niato iyan makukultibar? Pag-oolayan niato ini sa minasunod na artikulo.