Tunay na Kagayonan—Puwede Nindong Kultibaron iyan
AN Biblia may hatol para sa mga lalaki asin babae manongod sa kagayonan. Para sa mga lalaki, iyan nagsasabi: “An kagayonan nin mga barobata iyo an saindang kakosogan.” (Talinhaga 20:29) Iyo, an kosog asin bagsik nin mga barobata puwedeng magin nakaaakit nanggad. Alagad ano an nangyayari kun mawara na an bagsik na iyan sa pagkabarobata? An talinhaga sa Biblia nagsasabi: “An pagkaigwa nin uban korona nin kagayonan kun iyan nakukua sa dalan nin katanosan.” (Talinhaga 16:31) An katanosan sarong kabtang nin panlaog na kagayonan. Kun iyan kultibaron nin barobata, iyan magdadanay kun mawara na sa saiya an magayon na bagsik nin pagkabarobata.
Manongod sa mga babae an Biblia nagsasabi: “An pan-akit tibaad falso, asin an kagayonan basang sana; alagad an babae na natatakot ki Jehova iyo an nag-aako nin kaomawan para sa saiya man sana.” (Talinhaga 31:30) An magayon, nakaaakit na daraga makawiwiling kaiba. Alagad ano kun may pagsaginsagin asin paslong kapalangkawan sa likod kan pisikal na pan-akit? Kun siring an kagayonan pan-ibabaw sana, asin iyan may itinatagong panlaog na kakanosan. Kun mawara na an kagayonan, ano an matatada? Gurano karahay kun an kagayonan pinapadisan nin dai nawawarang panlaog na kagayonan, na nakagamot sa takot ki Jehova’!
Pagliwat nin Pagkatawo
Puwede daw na kultibaron an panlaog na kagayonan na ini? Iyo. An totoo, para sa mga Kristiano, iyan kaipuhan. Pinahahalagahan nin Dios an tunay na kagayonan. “Ginibo nia an gabos na magayon sa kapanahonan kaiyan.” (Eclesiastes 3:11, Revised Standard Version) Dai nia aakoon an pagsamba nin mga tawo na an gawe nagpaparisa nin makanos na panlaog na mga kuwalidad.
An mga tataramon ni apostol Pablo sa mga taga-Colosas nagpaparisa kan pangangaipo na kultibaron an panlaog na kagayonan. Enot, sia nagsadol: “Irayo nanggad nindo an gabos na iyan sa saindo, an kaanggotan, kaongisan, pan-aapi, pagraway, asin maraot na pagtaram hale sa saindong ngoso. Dai kamo magpapurutikputik. Halea nindo an daan na pagkatawo asin an mga gibo kaini.” Iyo, an siisay man na naggigibo kan makakanos na mga bagay na iyan ikinababalde nin Dios—asin nin mga tawong may matanos na isip. Dangan, ipinagpadagos ni Pablo: “Isolog nindo an bagong pagkatawo, na binabago paagi sa tumang kaaraman oyon sa ladawan kan Saro na naglalang kaiyan.” (Colosas 3: 8-10) Kaipuhan na niato an kaisipan asin saboot na oyon sa kabotan nin Dios. Ano an mga ugale kan “bagong pagkatawong” ini?
Kristianong mga Kuwalidad
An Biblia may ilinistang dakol na magagayon na kuwalidad na minakompuwesto dian. Alagad an pasisikadan kan panlaog na kagayonan na ini sinasabi kan mga tataramon ni Jesus: “‘Mamotan mo si Jehova na saimong Dios sa bilog mong puso asin sa bilog mong kalag patin sa bilog mong isip.’ Iyo ini an pinakadakula asin enot na pagboot. An ikaduwa, na arog kaini, iyo ini, ‘Mamotan mo an saimong kataed nin siring sa saimo man sana.’” (Mateo 22:37-39) An pagkamoot sa Dios minagiya sato na magmawot na magin an klase nin tawo na ikinaoogma nia. An pagkamoot na iyan nagpapahiro sato na ipakipag-olay sia sa iba, na tinatabangan man sinda na mamidbid an saindang Kaglalang.—Isaias 52:7.
An iba pang kuwalidad na minakompuwesto sa bagong pagkatawo sinasabi ni apostol Pablo: “Pagkamoot, kaogmahan, katoninongan, pakatios, kabootan, karahayan, pagtubod, kahoyoan, pagpopogol sa sadiri. Tumang sa mga siring dai nin pagboot.”—Galacia 5:22, 23.
Dugang pa, an Biblia espisipikong nagsasabi sa mga agom na lalaki: “An lalaki iyo an payo kan saiyang agom kun paanong si Cristo iyo man an payo kan kongregasyon . . . Mga agom na lalaki, padagos nindong mamotan an saindong mga agom na babae, kun paanong si Cristo namoot man sa kongregasyon asin iinatang an saiya man sana dahel kaiyan.” (Efeso 5:23, 25) Asin sa mga agom na babae, an Biblia nagsasabi: “Magpasakop an mga agom na babae sa saindang agom nin siring sa Kagurangnan .. . An agom na babae maninigong magkaigwa nin hararom na paggalang sa saiyang agom.” (Efeso 5:22, 23) Magayonon nanggad an buhay kan pamilya kun inootob kan agom na lalaki an saiyang mga paninimbagan sa mamomoton, daing kapasloan, asin mapasensiang paagi! Asin madalion para sa lalaki na otobon an tama niang katongdan kun ipinaheheling kan babae an saiyang panlaog na kagayonan paagi sa mamomoton na pagsuportar sa saiya asin dai nakikiribal o bakong sobra kamapagtatsar. An buhay kan pamilya sa siring na mga kamugtakan puwedeng magin kawiliwili nanggad.
An mga halimbawa na sinitar sa sinusundan na artikulo nagpaheling kan iba sa mga kuwalidad na ini na ginigibo. An daragang Sulamita nagpaheling nin karigonan asin nin hararom na pagkamoot sa saiyang pastor kan sia magsayuma na talikdan ini para sa kinang kan palasyo ni Salomon. Si Jose nagpaheling nin natural na karahayan kan sia magsayumang magkasala tumang sa saiyang kagurangnan, si Potifar. Nagpaheling man sia nin pagpopogol sa sadiri kan sia dumulag imbes na patentar sa agom ni Potifar. Asin arogan sia sa kahoyoan, katoninongan, asin pakatios kan sia magsayuma na pumait an saiyang boot huli sa dakol na kasakitan sa saiyang buhay.
Kagayonan sa Makanos na Kinaban
Praktikal daw ngonyan an magagayon na kuwalidad na iyan? An paghona nin dakol bako. Imbes, an reaksion ninda sa sadiri sana an inaasikaso, paslong kinaban na inierokan ninda iyo an pagigin matagas an boot. An paghona ninda tanganing mabuhay kaipuhan na sinda magin daing herak, ambisyoso, enoton an sadiri asin aprobetsaran an gabos na makukua ninda.
Kabaliktaran, an Biblia nagsasadol: ‘Dai paggibohon an ano man huli sa iriwal o huli sa kapalangkawan, kundi sa kapakumbabaan nin pag-isip ibilang an iba na mas halangkaw kisa saindo, na nagririsa, bako sanang sa personal na interes sa saindong sadiri, kundi siring man sa personal na interes kaidto man na iba.’ (Filipos 2:3, 4) Sa dahelan na an katawohan sa pankagabsan dai nagkukuyog sa marahay na hatol na ini na an sosyedad nin tawo nagraraot nanggad.
Dugang pa, sa presenteng kinaban, an kapangganahan nin tawo sinosokol sono sa kuwarta o sa katongdan. An mayaman ibinibilang na tawong mapanggana. Minsan siring, kun manongod sa tunay na mga pamantayan, dai nanggad nin halaga kun baga an saro mayaman o pobre. An totoo, may peligro an kayamanan. An Biblia nagpapatanid: “Idtong mga nag-iisip na magyaman nahoholog sa sugot asin sa siod asin sa dakol na rungaw asin nakararaot na horot.” Idinudugang kaiyan: “An pagkamoot sa pirak gamot nin gabos na klase nin karatan.”—1 Timoteo 6:9, 10.
Siyempre, an mga tawo na paslo, nangangamkam, materyalistiko, asin daing herak parateng nagkakamit nin temporaryong “kapangganahan” ngonyan. Alagad ta iyan bakong tunay na kapangganahan, ta an bayad sa siring kakanos na pamumuhay—personal na pagkabakong popular, laglag na pamilya, paghelang, asin pankagabsan na pagkabigo—mahalon. An tawo ginibo sa ladawan nin Dios, alagad kun sia madahas na magrebelde tumang sa mga kuwalidad na ibinugtak sa saiya nin Dios, noarin man dai sia magkakamit nin personal na kaogmahan.—Genesis 1:27.
Pagkultibar sa Panlaog na Kagayonan
Kun siring, paano niato mapaglalabanan an maraot na impluwensia kan kinaban na ini asin makukultibar an noble, diosnon na mga kuwalidad? Kan ilista ni Pablo an mga kuwalidad na ‘pagkamoot, kaogmahan, katoninongan, pakatios, kabootan, karahayan, pagtubod, kahoyoan, asin pagpopogol sa sadiri,’ inapod nia iyan na “bunga kan espiritu.” (Galacia 5:22, 23) Kaya kaipuhan an espiritu nin Dios tangani na makultibar niato an magagayon na panlaog na kuwalidad na ini.
Paano? Bueno, an pag-adal sa Biblia, na ipinasabong paagi sa espiritu nin Dios, matabang sato na mamidbid an mga kuwalidad na ini asin pakosogon an satong pagmawot na kultibaron iyan. (2 Timoteo 3:16) An mga Saksi ni Jehova perming naoogma na tumabang sa siring na proyekto, ta ibinibilang ninda na kabtang kan saindang ministeryo an pagtabang sa mga tawo na mag-adal kan Biblia. An sadiosan na pagsiyasat sa sadiri magpapangyari sato na maheling kun saen kita nagkukulang, asin puwede niatong arangon an tabang kan espiritu nin Dios sa mga bagay na ini. An pakikiasosyar sa mga kapwa nagsasamba sa Dios magtatao kan pagsuportar nin iba na kaipuhan niato, asin pati digdi nakatatabang an espiritu nin Dios ta, arog kan sabi ni Jesus, “kun saen an duwa o tolo na nagkakatiripon sa ngaran ko, yaon ako sa tanga ninda.”—Mateo 18:20.
Sarong Magayon na Kinaban na Nagdadangadang
Naturalmente, mayo sa sato na lubos na mahahale an satong mga pagkabakong sangkap, alagad kun pagmamaigotan niato na makultibar an panlaog na kagayonan na ini, bebendisyonan nin Dios an satong mga paghihingoa. Asin babalosan nia kita sa makangangalas na paagi. Itinala kan Biblia para sa sato an katuyohan nin Dios na sa dai na mahahaloy magtao nin bagong palakaw nin mga bagay na laen nanggad sa presente. Dian, “an mga matanos mismo magmamana kan daga, asin sinda mag-eerok dian sagkod lamang.” (Salmo 37:29) Si Jesus mismo nagsabi: “Maogma an mga mahoyo, mantang mamanahon ninda an daga.”—Mateo 5:5.
Sa panahon na iyan, an makanos na pagdinaogan asin kapasloan sa palakaw na ini nin mga bagay sasalidahan nin magayon na katrangkilohan asin katoninongan. “Dai sinda magibo nin maraot o manraraot sa bilog na sakuyang banal na bukid; huli ta an daga mapapano kan kaaraman dapit ki Jehova kun paanong an tubig nakakatahob sa mismong kadagatan.” (Isaias 11:9) An totoo, “papahidon [nin Dios] an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.”—Kapahayagan 21:4.
Nakaaagyat daw an mga kamugtakan na iyan? Iyan magigin posible sana ta sa panahon na iyan an mga nag-eerok sa daga magkakaigwa nin panlaog na kagayonan na basado sa pagkamoot sa Dios asin sa kapwa. Asin an Dios nanuga na an mga naglilingkod sa saiya ngonyan, na nagkukultibar kan “bagong pagkatawo” asin naghihingoa nin maigot na kuyogon an saiyang mga pamantayan, makakaheling sa kaotoban kan panugang iyan. An marahay na itsura, pisikal na kagayonan, noarin man dai makapagtatao kan siring na mga bendisyon. Ini marahay nanggad na dahelan na kultibaron an mas makahulogan, mas haloy na panlaog na kagayonan na nawiwilihan na gayo nin mga tawong may tamang isip asin nin Dios mismo!
[Ritrato sa pahina 6]
An mga tawong magayon sa pisikal maninigong likayan an pagigin paslo asin mapan-impluwensia. imbes, maninigo nindang kultibaron an panlaog na kagayonan na ikinaoogma nin Dios