“An Tataramon nin Dios Buhay Asin Mapuwersa”
1, 2. (a) Ano an nagpapangyari nin mga pagkaliwat sa buhay kan mga nagigin Kristiano? (b) Gurano puwedeng maimpluwensiahan kan Biblia an sarong tawo?
SA KABANGAAN kan enot na siglo C.E., si apostol Pablo nagpadara nin surat sa kongregasyon Kristiano sa Roma. Dian itinampok nia an kahagadan na an tunay na mga Kristiano kaipuhan na magbakle. Sia nagsabi: “Dai kamo maglakaw na arog sa palakaw na ini nin mga bagay, kundi maliwat kamo huli kan pagbago kan saindong pag-isip, tanganing mapatunayan nindo sa saindong sadiri kun ano an marahay asin maaako patin sangkap na kabotan nin Dios.” (Roma 12:2) Ano an nakaliliwat sa mga parasunod ni Jesus, na binabago an mismong kaisipan ninda? Sa pundamental, iyan an puwersa kan Tataramon nin Dios, an Biblia.
2 Ipinaliwanag ni Pablo kun gurano an magigibong impluwensia sato kan Biblia kan sia sumurat: “An tataramon nin Dios buhay asin mapuwersa asin mas matarom kisa arin man na minasbad na may duwang tarom asin nakalalagbas sagkod sa pagbulag kan kalag asin espiritu, asin sa mga pagsokmolan asin hotok kaiyan, asin nakamimidbid kan mga kaisipan asin pagmawot kan puso.” (Hebreo 4:12) An totoo, an pambihirang puwersa kan Biblia na gibohon an siring na mga pagkaliwat sa tawo nakakokombensir na pruweba na iyan bako sanang tataramon nin tawo.
3, 4. Gurano naliliwat an mga pagkatawo nin mga Kristiano?
3 An termino sa Griego na trinadusir na “maliwat” sa Roma 12:2 hale sa me·ta·mor·phoʹo. Iyan nagpaparisa nin lubos na pagkaliwat, arog kan metamorposis nin lipay na nagigin alibangbang. Iyan lubos na marhay kaya inaapod iyan kan Biblia na pagkaliwat nin pagkatawo. Sa iba pang bersikulo kan Biblia, mababasa niato: “Halea nindo an daan na pagkatawo asin an mga gibo kaini, asin isolog nindo an bagong pagkatawo, na binabago paagi sa tamang kaaraman oyon sa ladawan kan Saro na naglalang kaiyan.”—Colosas 3:9, 10.
4 Sa pagsurat sa kongregasyon sa Corinto, ipinaheling ni Pablo kun guranong pagkaliwat sa pagkatawo an nangyari kan enot na siglo. Sia nagsabi: “Ni an mga parapakisaro, ni an mga parasamba sa ladawan, ni an mga parasambay, ni an mga binabae, ni an mga lalaki na minadurog sa kapwa lalaki, ni an mga parahabon, ni an mga paslo, ni an mga paraburat, ni an mga paramuda, ni an mga parakikil dai magmamana kan kahadean nin Dios. Alagad arog kaiyan kaidto an nagkapira saindo. Alagad kamo nahugasan na.” (1 Corinto 6:9-11) Iyo, an inmoral asin makiiwalon na mga tawo, mga parahabon asin paraburat, naliwat asin nagin arogan na mga Kristiano.
Mga Pagkaliwat nin Pagkatawo Ngonyan
5, 6. Paano an pagkatawo nin sarong barobata biyong naliwat kan puwersa kan Biblia?
5 Maheheling man ngonyan an kaparehong mga pagkaliwat sa pagkatawo. Halimbawa, an sarong barobata sa South America nailo sa edad na nuwebe anyos. Nagdakula sia na mayo kan paggiya nin mga magurang asin nagkaigwa nin grabeng mga problema sa pagkatawo. Sia nagsasaysay: “Pag-edad ko nin 18, biyo na akong adikto sa droga asin nabilanggo na ako huli sa paghabon nin pansustento sa bisyo ko.” Alagad ta an saiyang inaon saro sa mga Saksi ni Jehova, asin sa huri natabangan nia sia.
6 An barobata nagpapaliwanag: “Pinonan akong adalan sa Biblia kan sakong inaon, asin pakalihis nin pitong bulan nahale ko an bisyo sa droga.” Sinuwayan man nia an dati niang kairibaiba asin nakanompong nin bagong mga amigo sa mga Saksi ni Jehova. Ipinagpapadagos nia: “An bagong kairibaibang ini, kadungan kan sakong regular na pag-adal sa Biblia, nagpangyari sako na umoswag asin sa katapustapusi idusay an sakong buhay na maglingkod sa Dios.” Iyo, an dating adikto sa droga asin parahabon na ini ngonyan aktibo, malinig an pamumuhay na Kristiano. Paano nangyari an siring na radikal na pagkaliwat nin pagkatawo? Paagi sa puwersa kan Biblia.
7, 8. Isaysay kun paano an sarong masakit na problema sa personalidad naresolberan sa tabang kan Biblia.
7 An saro pang halimbawa hale sa parteng timog nin Europa. Duman, an sarong barobata nagdakula na may masakit na problema sa personalidad: madali siang maanggot. Permi siang nakikipag-iwal. Sa sarong diskutiran sa pamilya, binugbog ngani nia an sadiri niang ama, na sinuntok ini sagkod na mapukan! Alagad, sa katapustapusi, sia nag-adal sa Biblia kaiba nin mga Saksi ni Jehova asin namangno nia an pagboot nin Dios sa librong Mga Taga-Roma: “Dai kamo magbalos nin maraot sa maraot sa kiisay man. . . . Kun mahihimo, siring sa makakaya nindo, makipagkatoninongan sa gabos na tawo. Dai kamo magbalos, mga namomotan, kundi magtao nin lugar sa karatan.”—Roma 12:17-19.
8 An mga tataramon na iyan nakatabang saiya na marealisar kun gurano karaot kan saiyang kaluyahan. An nag-oorog na kaaraman sa Biblia nakapadalisay sa saiyang konsensia, na nakatabang saiya na madaog an saiyang pagigin aranggoton. Sarong beses, kan sia may kadikit nang pag-oswag sa saiyang pag-adal, may sarong estranghero na pinagsisilyakan sia. Namatean kan barobata an pagtubo sa boot nia kan dating kaanggotan. Dangan namatean nia an saro pang puwersa: an pakamate nin kasopganan; asin ini nakaolang sa saiya sa pagpadara sa saiyang kaanggotan. Nakultibar na nia an pagpopogol sa sadiri, sarong mahalagang bunga kan espiritu. (Galacia 5:22, 23) Iba na ngonyan an saiyang pagkatawo, salamat sa puwersa kan Tataramon nin Dios.
9. Sono ki Pablo, paagi sa ano na naliliwat an satong pagkatawo?
9 Alagad, paano nagkakaigwa nin siring kamapuwersang epekto an Biblia? Si Pablo, sa Colosas 3:10, nagsabi na an satong pagkatawo naliliwat paagi sa tamang kaaraman, kaaraman na manonompongan sa Biblia. Alagad paano nakaliliwat sa tawo an kaaraman?
An Kabtang kan Tamang Kaaraman
10, 11. (a) Kun kita nag-aadal sa Biblia, ano an nanonodan niato manongod sa marahay asin maraot na mga ugale? (b) Ano an kaipuhan apuwera sa kaaraman tanganing maliwat an satong pagkatawo?
10 Enot, sinasabi kan Biblia an bakong marahay na mga ugale na kaipuhan na haleon. Kaiba digdi an mga bagay na arog baga kan “mapaabaw-abaw na mga mata, an putikon na dila, asin an mga kamot na nagpapabolos nin dugo kan mga daing sala, an puso na nagpapakana nin maraot, mga bitis na maliksi sa pagdalagan pasiring sa karatan, an putikon na saksi na nagtataram nin mga kaputikan, asin an siisay man na nagpapangyari nin iriwal sa tahaw nin magturugang.” (Talinhaga 6:16-19) Ikaduwa, sinasabi kan Biblia an marahay na mga ugale na maninigo niatong kultibaron, kaiba an “pagkamoot, kaogmahan, katoninongan, pakatios, kabootan, karahayan, pagtubod, kahoyoan, pagpopogol sa sadiri.”—Galacia 5:22, 23.
11 An siring na tamang kaaraman nakatatabang sa sarong sinserong tawo na siyasaton an saiyang sadiri asin helingon kun arin na mga ugale an kaipuhan niang pataluboon asin kun arin an kaipuhan na pagmaigotan niang haleon. (Santiago 1:25) Minsan siring, iyan kapinonan sana. Apuwera sa kaaraman, kaipuhan an motibasyon, bagay na magpapahiro saiya tanganing magmawot siang magbakle. Digdi liwat, kaipuhan nia an tamang kaaraman hale sa Biblia.
Pinahihirong Magin Marahay
12. Paano an kaaraman manongod sa personalidad nin Dios nakatatabang satong magbakle?
12 Sinabi ni Pablo na an marahay na bagong pagkatawo namomolde “oyon sa ladawan kan Saro na naglalang kaiyan.” (Colosas 3:10) Kaya an Kristianong personalidad kaipuhan na nakaaagid sa mismong personalidad nin Dios. (Efeso 5:1) Paagi sa Biblia, an personalidad nin Dios ipinahahayag sa sato. Naheheling niato an saiyang mga ginigibo sa mga tawo asin namamasdan an saiyang marahay na mga kuwalidad, arog baga kan saiyang pagkamoot, kabootan, karahayan, pagkaherak, asin katanosan. An siring na kaaraman nagpapahiro sa sarong may matanos na puso na kamotan an Dios asin magmawot na magin an klase nin tawo na inooyonan nin Dios. (Mateo 22:37) Bilang mamomoton na mga aki, boot niatong paogmahon an satong langitnon na Ama, kaya hinihingoa niatong arogon an saiyang personalidad sagkod sa makakaya niato sa satong maluya, bakong sangkap na kamugtakan.—Efeso 5:1.
13. Anong kaaraman an nagtotokdo sato na ‘kamotan an katanosan asin ikaongis an karatan’?
13 An motibasyon niato pinakokosog kan kaaraman na itinatao kan Biblia sa kun saen minasagkod an marahay na ugale asin nin maraot. (Salmo 14:1-5; 15:1-5; 18:20, 24) Nanonodan niato na si David binendisyonan huli sa saiyang diosnon na debosyon asin pagkamoot sa katanosan alagad ta sia nagsakit kan sia mawaran nin pagpopogol sa sadiri. Naheheling niato an makamomondong bunga kan an marahay na mga kuwalidad ni Salomon naraot kan sia gurang na. Ipinaheheling an kalaenan kan mga bendisyon na bunga kan pagigin matanos ni Josias asin Ezequias sa mga kapahamakan na bunga kan kaluyahan ni Acab asin masumbikal na apostasiya ni Manases. (Galacia 6:7) Kaya nakakanood kitang ‘kamotan an katanosan asin ikaongis an karatan.’—Hebreo 1:9; Salmo 45:7; 97:10.
14. Ano an mga katuyohan ni Jehova para sa kinaban asin sa mga indibiduwal na yaon dian?
14 An motibasyon na ini orog pang pinakokosog nin tamang kaaraman sa mga katuyohan nin Dios. An siring na kaaraman nakatatabang na maliwat an mismong “puwersa na nagpapahiro kan saindong isip,” an espiritu na nagmomotibar sa satong mga pag-isip asin hiro. (Efeso 4:23, 24) Kun pinag-aadalan niato an Biblia, nanonodan niato na dai sagkod lamang na totogotan ni Jehova an karatan. Sa dai na mahahaloy, lalaglagon nia an maraot na kinaban na ini asin eestablisaron an ‘bagong kalangitan asin sarong bagong daga na dian an katanosan an magdadanay.’ (2 Pedro 3:8-10, 13) Siisay an mag-iistar sa bagong kinaban na ini? “An mga matanos iyo an mag-eerok sa daga, asin an mga daing kanawayan iyo an matatada dian. Kun manongod sa mga maraot, sinda popohoon sa daga; asin kun manongod sa mga madaya, sinda hahaleon dian.”—Talinhaga 2:21, 22.
15. Kun talagang nagtutubod kita sa sinasabi kan Biblia manongod sa mga katuyohan ni Jehova, paano kita maaapektaran kaini bilang mga persona?
15 Kun talagang nagtutubod kita sa panugang ini, maaapektaran an bilog niatong pag-isip. Si apostol Pedro, pakahulaan kan paglaglag sa mga maraot, nagsasabi: “Mantang an gabos na bagay na ini tutunawon nin siring, kamo maninigong magin anong klaseng mga tawo sa banal na mga gawe asin gibo nin diosnon na debosyon, na naghahalat asin naggigirumdom sa presensia kan aldaw ni Jehova.” (2 Pedro 3:11, 12) An satong pagkatawo maninigong moldehon kan satong makosog na pagmawot na makabilang kan mga matanos na mawawalat kun laglagon na an mga maraot.
16. Anong klaseng mga pagkatawo an dai magkakaigwa nin lugar sa bagong kinaban, asin paano kita maninigong maapektaran kan kaaraman na ini?
16 An librong Kapahayagan nanunuga sa mga matanos na; pagkatapos kan kinaban na ini, “papahidon [nin Dios] an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.” Alagad iyan nagpapatanid na “idtong mga matatakton asin idtong mga dai nin pagtubod asin idtong mga makababalde sa saindang ramog asin mga paragadan asin mga parapakisaro asin idtong mga naggigibo nin espiritismo asin mga parasamba sa ladawan patin an gabos na putikon” isisikwal. (Kapahayagan 21:4, 8) Madonong nanggad na likayan an maraot na mga kuwalidad na dai totogotan nin Dios sa bagong kinaban!
Tabang Hale sa Luwas
17. Anong klaseng tabang an ihinahatol kan Biblia na hanapon niato?
17 Minsan siring, an mga tawo maluya, asin parate na may kaipuhan pa sinda apuwera sa impormasyon asin motibasyon tangani sindang magbakle. Kaipuhan ninda an personal na tabang, asin ipinaheheling sato kan Biblia kun saen niato manonompongan an tabang na ini. Halimbawa, iyan nagsasabi: “Sia na naglalakaw na kaiba nin mga madonong magigin madonong, alagad sia na nakikiiba sa mga mangmang maraot an aabotan.” (Talinhaga 13:20) Siring man, kun kita makikiiba sa mga nagpapaheling kan mga kuwalidad na boot niatong kultibaron, matatabangan na gayo kita na makaarog nin orog sa sainda.—Genesis 6:9; Talinhaga 2:20; 1 Corinto 15:33.
18, 19. Ano an kaipuhan niatong gibohon tanganing mabuksan an satong isip asin puso sa espiritu nin Dios?
18 Dugang pa, si Jehova mismo nagtatao nin tabang sa porma kan banal na espiritu—an iyo man sanang espiritu na ginamit nia sa paggibo nin mga milagro kan enot na mga panahon. Tunay nanggad, an marahayon na mga kuwalidad na “pagkamoot, kaogmahan, katoninongan, pakatios, kabootan, karahayan, pagtubod, kahoyoan, pagpopogol sa sadiri” inaapod na “bunga kan espiritu.” (Galacia 5:22, 23) Paano niato makakamtan an tabang kan banal na espiritu? Mantang an Biblia ipinasabong kan banal na espiritu, kun iyan binabasa niato o nakikipag-olay kita sa iba manongod dian, binubukasan niato an satong isip asin puso sa nakadadarang puwersa kan espiritung iyan. (2 Timoteo 3:16) An totoo, ipinanuga ni Jesus na kun kita nakikipag-olay sa iba manongod sa satong paglaom, tibaad mamatean niato an direktang paghiro kan espiritung iyan.—Mateo 10:18-20.
19 Apuwera kaiyan, an Biblia nagboboot: “Magmaigot kamo sa pamibi.” (Roma 12:12) Paagi sa pamibi kita nakikipag-olay ki Jehova, nag-oomaw sa saiya, nagpapasalamat sa saiya, asin naghahagad kan saiyang tabang. Kun kita mag-arang nin tabang na mahale an maraot na mga ugale, arog baga kan mainit na payo, pagkasumbikalan, daing pasensia, o kapalangkawan, tatabangan kan espiritu nin Dios an ano man na paghihingoa niato kaoyon sa pamibing iyan.—Juan 14:13, 14; Santiago 1:5; 1 Juan 5:14.
20. Taano an mga Kristiano ta kaipuhan na magpadagos sa paghihingoa na isolog an bagong pagkatawo?
20 Kan sumurat si Pablo: “Maliwat kamo huli kan pagbago kan saindong pag-isip,” an sinusuratan nia sarong kongregasyon nin bautisado, linahidan na mga Kristiano. (Roma 1:7; 12:2) Asin sa orihinal na Griego, ginamit nia an sarong porma kan berbo na nagpaparisa nin nagpapadagos na aksion. Ini nagsusuherir na an pagkaliwat na ginigibo sa sato kan tamang kaaraman sa Biblia progresibo. Kita ngonyan—kapareho nin mga Kristiano kan kaaldawan ni Pablo—napapalibotan nin kinaban na pano nin nakararaot na mga impluwensia. Asin kita—kapareho ninda—bakong sangkap, madaling makagibo nin sala. (Genesis 8:21) Kaya, kaipuhan na padagos kitang maghingoa na mahale an daan, paslong pagkatawo asin isolog an bago, arog kan ginibo ninda. An enot na mga Kristiano nagin mapanggana nanggad na sinda narisa na biyong napapalaen sa kinaban na nasa palibot ninda. Iyan man an ginigibo nin mga Kristiano ngonyan.
Sarong Banwaan na “Tinokdoan ni Jehova”
21. Ano an pira sa mga hula na naootob sa banwaan nin Dios sa huring mga aldaw na ini?
21 Tunay nanggad, an espiritu nin Dios ngonyan naghihiro bako sanang sa mga indibiduwal kundi sa bilog na organisasyon nin mga Kristiano, na minilyon na an kabilangan. Sa organisasyon na ini naootob an makahulang mga tataramon ni Isaias: “Asin dakol na banwaan an maduruman asin masarabi: ‘Madia kamo, banwaan, asin magtukad kita sa bukid ni Jehova, sa harong kan Dios ni Jacob; asin totokdoan nia kita dapit sa saiyang mga dalan, asin kita maglalakaw sa saiyang mga dana.’” (Isaias 2:3) An dugang pang hula ni Isaias naotob man sa kaso ninda: “An saimo gabos na aki magigin mga tawo na tinokdoan ni Jehova, asin magsosopay an katoninongan kan saimong mga aki.” (Isaias 54:13) Sairisay an mga ini na matoninong huli ta sinda tinokdoan ni Jehova?
22. (a) Siisay ngonyan an tinotokdoan ni Jehova? (b) Tumao nin mga halimbawa na nagpapaheling na minimidbid nin mga tagaluwas na napapalaen an mga Saksi ni Jehova.
22 Bueno, mangnoha an sarong kabtang na ini kan surat na ipinadara sa New Haven Register, sarong peryodiko sa North America: “Baga man kamo nasurang o naurit [naanggot], arog ko, huli sa saindang pangongombertir, kaipuhan man na hangaan nindo an saindang pagigin dedikado, an saindang karahayan, an saindang pambihirang halimbawa nin sa-tawong paggawe asin marahay na pamumuhay.” Siisay an boot sabihon kan kagsurat? An iyo man sanang grupo na ipinaliwanag kan Herald nin Buenos Aires, Argentina, kan iyan magsabi: “Napatunayan kan mga Saksi ni Jehova sa dakol na mga taon na sinda mahigos, malinaw an isip, ekonomiya asin matatakton sa Dios na mga siudadano.” Siring man, an peryodiko nin Italia na La Stampa nagsabi: “Dai sinda naglilikay sa mga buhis o naghahanap nin paagi na madulagan an bakong kombenyenteng mga ley para sa sadiri nindang ganansia. An moral na mga prinsipyo na pagkamoot sa kataed, pagsayuma sa kapangyarihan, dai paggamit nin kadahasan asin personal na pagkasadiosan . . . nasa saindang ‘pan-aroaldaw’ na pamumuhay.”
23. Taano ta napapalaen an mga Saksi ni Jehova bilang sarong organisasyon?
23 Taano an mga Saksi ni Jehova bilang sarong grupo—kapareho kan enot na mga Kristiano—ta napapalaen na gayo? Sa dakol na bagay, kapareho sinda nin iba. Namundag sinda na may kaparehong mga pagkabakong sangkap nin tawo, asin igwa man sinda kan kaparehong mga problema sa ekonomiko asin pundamental na mga pangangaipo. Minsan siring, bilang pankinaban na kongregasyon, tinotogotan ninda an Tataramon nin Dios na magkaigwa nin puwersa sa saindang buhay. An ibinungang internasyonal na asosasyon nin magturugang na kompuwesto nin tunay na mga Kristiano mapuwersang ebidensia na an Biblia iyo an ipinasabong na Tataramon nin Dios.—Salmo 133:1.
An Biblia Ipinasabong
24. Ano an pamibi niato para sa dakol pang tawo?
24 Sa artikulong ini asin kan nakaaging luwas, napag-olayan niato an duwa sanang ebidensia tanganing ipaheling na an Biblia Tataramon nin Dios, bakong nin tawo. Baga man horophoropon ninda an daing kaparehong kadonongan kan Biblia o an puwersa kaiyan na papagbakleon an mga tawo—o an dakol pang ibang bagay na nagtatanda dian bilang pambihira—an sinserong mga tawo seguradong makakarealisar na iyan ipinasabong nin Dios. Bilang mga Kristiano, ipinamimibi niato na dakol pa an makamidbid sa katotoohan na ini. Dangan sasabihon man ninda an magayagayang mga tataramon kan salmista: “Helinga na namotan ko an saimong mga togon. O Jehova, oyon sa saimong mamomoton na pagkaherak buhaya ako. An sustansia kan saimong tataramon katotoohan, asin an lambang matanos mong paghokom sagkod sa panahon na daing katapusan.”—Salmo 119:159, 160.
Nagigirumdoman daw Nindo?
◻ Ano an epekto kan Biblia sa tunay na mga Kristiano?
◻ Paano nakatatabang an tamang kaaraman na maliwat kita?
◻ Paano nakatatabang an Biblia na pahiroon kitang kultibaron an marahay na mga kuwalidad asin haleon an mga maraot?
◻ Anong tabang an makukua sa pagkultibar sa diosnon na mga kuwalidad?
◻ Anong ebidensia na an Biblia ipinasabong an naheheling sa tahaw kan banwaan ni Jehova?