Pamamahala nin Dios—An Pinakamarahay na Paagi
AN KASAYSAYAN nin mga gobyerno nagpapaheling na an bakong sangkap na mga tawo dai makagagamit nin kapangyarihan sa ibang tawo sa tamang paagi. Siring kan sinabi ni Lord Acton kan Inglaterra: “An kapangyarihan nakararaot asin an lubos na kapangyarihan nakararaot nin lubos.” Kaya, siring sa sinasabi kan Biblia: “An tawo nagsakop sa tawo sa saiyang ikararaot.”—Eclesiastes 8:9.
Sa orihinal, tinawan ni Jehova Dios an tawo nin pamamahala sa mga hayop alagad bakong sa ibang tawo. Sinabihan nin Dios an saiyang enot na linalang na Aki sa mga langit: “Gibohon niato an tawo sa satong ladawan, siring sa satong kaagid, asin ipasakop sainda an mga sira sa dagat asin an naglalayog na mga linalang sa kalangitan asin an mga hayop asin an bilog na daga asin an lambang naghihirong hayop na naghihiro sa ibabaw nin daga.” (Genesis 1:26) An Kaglalang kan tawo an saiyang Hade. Paano, kun siring, iyan nabago?
Poon kan pagrebelde kan tawo sa hardin nin Eden, padagos niang sinayumahan an Dios bilang an saiyang Hade. (Genesis, kapitulo 3) Maheheling ini sa suanoy na Israel, an nasyon na pinili nin Dios bilang saiyang sadiri. Kan an mga Israelitas naghagad nin sarong tawong hade, sinabihan ni Jehova an saiyang propetang si Samuel: “Bakong ika an isinikwal ninda, kundi ako an isinikwal ninda sa pagigin hade sa sainda.”—1 Samuel 8:7.
Maboot an pamamahala nin Dios sa mga Israelitas. Paagi sa saiyang representanteng si Moises, tinawan sinda ni Jehova nin kodigo nin mga pagboot na nagpaheling nin mamomoton na konsiderasyon para sa saindang karahayan. Nagprotehir ini sainda sa kadakol na helang asin nagpaoswag kan konsiderasyon para sa mga gurang na, mga balo, asin mga ilo. An Pagboot naghagad nin paggalang para sa mga rogaring nin iba asin nin kaimbodan sa mga transaksion sa negosyo. Kinondenar kaini an pagpapaorog, falsong pagpatotoo, asin an pagsuhol. An pamamahala nin Dios tunay na may hustisya asin matanos.
Nanuga si Jehova na mamamahala bako sanang sa Israel kundi sa bilog na katawohan. Hahaleon nia sa makasalan na mga tawo an kapangyarihan na mamahala sa ibang mga tawo asin itatao an autoridad na ini sa saiyang bugtong na Aki. Sa paghula kaini, sinabi nin Dios sa hula ni Ezequiel: “Dai iyan magigin sadiri nin siisay man sagkod na magdatong sia na igwa kan legal na katanosan, asin iyan itatao ko sa saiya.”—Ezequiel 21:27.
Itinao nin Dios ki Jesu-Cristo an legal na katanosan na mamahala sa katawohan bilang sarong representante kan soberaniya ni Jehova. Huli ta an Kahadean nin Dios paagi ki Cristo an pinakamarahay na paagi nin pamamahala sa bilog na katawohan, tinokdoan ni Jesus an saiyang mga paradangog na mamibi para kaini. “Kaya mamibi kamo nin arog kaini,” an sinabi ni Cristo: “Ama niamo na nasa langit, pakangbanalon logod an saimong ngaran. Dumatong logod an kahadean mo. Gibohon logod an boot mo, kun paano sa langit, siring man sa daga.”—Mateo 6:9, 10.
Sa paagi nin pagtratar ni Jesus sa mga tawo, ipinaheling nia kun magigin anong klase siang hade. Igwa nanggad si Cristo nin pagkaherak, huli ta “kan maheling nia an kadaklan naherak sia sainda, huli ta sinda maniwang asin nagkakaralagalag siring sa mga karnero na mayong pastor.” (Mateo 9:36) Ipinaheling ni Jesus an rarom kan saiyang pagkamoot sa saiyang mga parasunod kan sinabi nia: “Tinatawan ko kamo nin bagong togon, na kamo magkaminorootmootan; siring sa pagkamoot ko sa saindo, na kamo man magkaminorootmootan.” (Juan 13:34) Namotan nia nin igo an mga tawo tanganing ikatao an saiyang buhay bilang pantubos. Pinagin posible kan atang na iyan na idtong mga nag-aako kaiyan makalda hale sa kasalan, helang, asin minsan sa kagadanan.—1 Juan 2:1, 2; Kapahayagan 21:1-4.
Sa paghula kun paano an pamamahala nin Dios paagi ki Jesu-Cristo magigin may hustisya, matanos, asin matoninong, an propetang si Isaias pinasabngan tanganing isurat: “Huling namundag sa sato an sarong aki, may itinao sa satong sarong aking lalaki; asin an makaprinsipeng pamamahala mamumugtak sa saiyang abaga. Asin an saiyang ngaran aapodon na Makangangalas na Parahatol, Makosog na Dios, Amang Daing Katapusan, Prinsipe nin Katoninongan. An kadakolan kan sa-prinsipeng pamamahala asin katoninongan magigin daing kasagkodan, sa trono ni David asin sa saiyang kahadean tanganing iyan marigon na patindogon asin tanganing papagdanayon iyan paagi sa hustisya asin paagi sa katanosan, poon ngonyan asin sagkod sa panahon na daing katapusan. An mismong kaigotan ni Jehova nin mga hukbo iyo an magibo kaini.”—Isaias 9:6, 7.
An daganon na mga representante kan pamamahala nin Dios magigin siring sa mga lalaki na nagpapaheling na ngonyan kan mamomoton na mga kuwalidad ni Jesus bilang mga paraataman sa tunay na Kristianong kongregasyon. Bakong siring sa mariringis na klero, an mga lalaking ini nagpapaheling nin mamomoton na pagmakolog para sa aripompon, siring kan ginibo ni Jesu-Cristo. Manongod sa siring na diosnon na mga lalaki, an propetang si Isaias nagsurat: “Uya! An sarong hade magsasakop para sa katanosan mismo; asin kun manongod sa mga prinsipe, magsasakop sinda bilang mga prinsipe para sa hustisya mismo.” (Isaias 32:1) An siring na mga representante kan pamamahala nin Dios maglilingkod man sa banal na mga interes sa bagong kinaban.—Salmo 45:16.
An Sarong Dakulang Pagbabago Harani Na!
Bago magsalihid an Kahadean nin Dios sa daing kalaban na pamamahala sa katawohan, sarong dakulang pagbabago an kaipuhan na mangyari. An pagbabagong ini an matapos kan gabos na nasyonal na pagkabaranga. Imbes na kadakol na nagraralaban na gobyerno nin tawo, magkakaigwa nin sarong matanos na langitnon na pamamahala na nagsasaro sa katawohan bilang sarong banwaan na mamumuhay sa katoninongan. Sa paghula kaini, si propeta Daniel nagsurat: “Sa mga aldaw kan mga hadeng idto an Dios nin kalangitan mapatindog nin sarong kahadean na dai noarin man malalaglag. Asin an kahadean mismo dai itatao sa ibang banwaan. Iyan mismo an maronot asin matapos kan gabos na ining kahadean [mga gobyerno nin tawo], asin iyan magdadanay sagkod lamang.”—Daniel 2:44.
An pamamahala nin Dios an solamenteng solusyon sa mga problema nin gobyerno na napapaatubang sa katawohan ngonyan. An kamugtakan ngonyan nin mga tawo nagsasapeligro sa sainda mismong pag-eksister! Asin mayo nin tunay na solusyon an tawo. Magigin madonong, kun siring, na magtao nin atension sa solusyon kan Biblia asin tumanaw sa enotan na may pananarig sa panahon na bako nang harayo na an matanos an pusong mga tawo maggagayagaya sa pagsakop kan daing kalaban asin benendisyonan na pamamahala nin Dios.
[Ritrato sa pahina 6]
“An sarong hade magsasakop para sa katanosan mismo”