An Binulawan na Reglamento—Taano ta Balido Sagkod Ngonyan?

AN DALISAY na bulawan nungka na mawaran nin kinang, kaya pinahahalagahan asin tinatawan nin balor an mga alahas na gibo sa bulawan. Imbes na iapon an naraot nang mga bagay na gibo sa bulawan, an mga alahero ginigibo liwat an mahalagang metal na magin bagong gibo nin arte huh ta napapadanay kan bulawan an halaga kaini.

Sa kaagid na paagi, minsan siring na sinambit ni Jesus an Binulawan na Reglamento mga duwang ribong taon na an nakaagi, dai nainaan an halaga kaini. Paagi sa pag-analisar, o pagdeterminar, kan mga dahelan kan pagigin balido kaini, orog niatong maaapresyar an halaga kaini sa sato ngonyan.

Kan itinao ni Jesus sa sato an Binulawan na Reglamento, “kaya an gabos, na boot nindong gibohon sa saindo nin mga tawo, gibohon man nindo sa sainda,” idinugang nia: “Sa katotoohan, iyo ini, an boot sabihon kan Pagboot asin kan Mga Propeta.” (Mateo 7:12) Ano an nasabotan digdi kan mga disipulo nin Jesus asin kan iba pang nagdadangog sa saiya?

“An Boot Sabihon kan Pagboot Asin kan Mga Propeta“

“An Pagboot“ igwa nin koneksion sa enot na mga surat na minakompuwesto kan enot na limang libro kan Biblia, an Genesis sagkod. Deuteronomio. Ipinahayag kan mga ini an katuyohan ni Jehova na magpaluwas nin banhi na maghahale kan karatan. (Genesis 3:15) Kairiba sa enot na mga libro kan Biblia an Pagboot, o grupo nin mga pagboot, na itinao ni Jehova sa nasyon nin Israel kan 1513 B.C.E. paagi ki Moises bilang tagapag-oltanan sa Bukid nin Sinai.

An banal na pagboot an nagbulag sa Israel sa nakapalibot na paganong mga nasyon, asin an mga Israelitas dai maninigong maggibo nin ano man na magkokompromiso kan saindang inoyonan na kamugtakan sa atubang ni Jehova. Sinda an saiyang esklusibong rogaring asin nangangaipong magdanay na siring tanganing mag-ako kan saiyang mga bendisyon. (Exodo 19:5; Deuteronomio 10:12, 13) Alagad dugang pa sa saindang mga obligasyon sa Dios, malinaw na ipinaheling kan Mosaikong Pagboot an paninimbagan kan mga Israelitas na gumibo nin marahay sa mga nakikihimanwa sa Israel. Bilang halimbawa, sinasabi kaini: “An nakikihimanwa na nag-iistar bilang nakikihimanwa sa saindo maninigong ibilang nindo na tagadigdi sa saindo; asin kamotan mo sia nin siring sa saimo man sana, huli ta kamo nagin mga nakikihimanwa sa daga nin Egipto. Ako si Jehova na saindong Dios.” (Levitico 19:34) Durante kan panahon kan mga hade sa Israel, an mga nakikihimanwa nagkaigwa nin kadakol na pribilehiyo, siring kan pakikabtang sa pagpatindog kan templo nin Dios sa Jerusalem.—1 Cronica 22:2.

An Pagboot na itinao sa Israel nagbawal sa pagsambay, paggadan, paghabon asin pagkaara. An mga pagboot na ini, kairiba kan “ano pa man na ibang pagboot, puwedeng pagsararoon sa reglamentong, “Mamotan mo an saimong kataed siring sa saimo man sana.” Idinugang pa ni apostol Pablo: “An pagkamoot dai naggigibo nin maraot sa saiyang kataed; kun siring an pagkamoot iyo an kaotoban kan pagboot.”—Roma 13:9, 10.

Kun ibinugtak kan Pagboot an mismong basehan para sa Binulawan na Reglamento, kumusta an manongod sa “Mga Propeta”?

An propetikong mga libro kan Hebreong Kasuratan nagpatotoo man kan pagigin balido kan Binulawan na Reglamento. Ipinaheling kaiyan si Jehova bilang Dios na maimbod na gayong inootob an saiyang katuyohan. Binibendisyonan ma an saiyang maimbod na mga lingkod na, minsan mga bakong sangkap, nagmamaigot na gibohon an saiyang kabotan asin nagpapaheling nin tun ay na pagbakle sa saindang maraot na mga gibo. “Pangaghugas kamo; pangaglinig kamo; halea nindo an karatan kan saindong mga gibo sa atubangan kan sakuyang mga mata, umontok na kamo sa paggibo nin maraot. Pag-adal kamong gumibo nin marahay; hanapa nindo hustisya, itanos nindo an nan-aapi; tawe nindo nin katanosan an ilo; suroga nindo an balo.”—Isaias 1:16,17.

Kan ginibo kan banwaan nin Dios an matanos sa iba asin sa Dios, dangan naggarantiya si Jehova kan saiyang tabang. “Ini an sinabi ni Jehova: ‘Hanapon an hustisya, nindo banwaan, asin gibohon an matanos. . . . Maogma an tawo na ginigibo ini, asin an aki nin katawohan na namomogol kaini.”—Isaias 56:1, 2.

Ginigiyahan ni Cristo an Saiyang Kongregasyon

Napadigdi si Cristo tanganing otobon an Pagboot asin an Mga Propeta, asin poon kan saiyang panahon, an daing sagkod na katuyohan ni Jehova padagos na nag-oswag. (Mateo 5:17; Efeso 3:10, 11, 17-19) An daan nang Pagboot ni Moises rinibayan na kan bagong tipan, na nakasasakop kapuwa sa linahidan na Judio asin Hentil na mga Kristiano. (Jeremias 31:31-34) Minsan siring, an Kristianong kongregasyon sa satong panahon padagos pang nagsusunod sa Binulawan na Reglamento. Asin uya an dugang pang dahelan para akoon an pagigin balido kan reglamento: Si Cristo an aktibong Payo kan modernong Kristianong kongregasyon. Dai nia liniwat an saiyang mga instruksion. An saiyang ipinasabong na sadol nagdadanay na aplikado sagkod ngonyan.

Bago maghale sa dagang ini, pinagbotan ni Jesus an saiyang mga parasunod na gumibo nin mga disipulo sa mga tawo kan gabos na nasyon asin tokdoan sinda na “otobon an gabos na bagay na ipinagboot ko sa saindo.” Kairiba sa instruksion na iyan an Binulawan na Reglamento. Sinierto ni Jesus an saiyang mga disipulo: “Uya! Ako danay na nasa saindo sagkod sa pagtatapos kan sistema nin mga bagay.”—Mateo 28:19, 20.

Siring kan isinurat sa Lucas 6:31, ipinagboot ni Jesus: “Kun ano an boot nindong gibohon saindo nin mga tawo, iyo man an gibohon nindo sainda.” Marahayon nanggad an halimbawa na ipinaheling ni Jesus sa pagkakaigwa nin inisyatiba sa paggibo nin marahay sa iba!

Sa saiyang daganon na ministeryo, maingat na gayong naobserbaran ni Jesus an tinitios nin mga tawo, asin naherak sia sa sainda. Durante kan saro kan saiyang mga pagbiyahe sa paghuhulit, naheling nia an kadaklan asin naherak sia sa sainda. Alagad orog pa dian, naggibo sia nin mga areglo tanganing tabangan sinda. Paano? Paagi sa pag-organisar nin maigot na kampanya sa paghuhulit na naghatod kan saiyang mga disipulo sa mga harong kan mga tawo. Siring kan ipinagboot nia: “Sa ano man na siudad o baryo kamo lumaog, hanapon nindo kun siisay dian an maninigo, asin magdanay kamo dian sagkod na kamo humale.” An gibohon na ini igwa nin tabang nia asin bendisyon kan saiyang Ama siring sa malinaw na maheheling sa dugang pang tataramon ni Jesus: “An minaako sa saindo minaako man sa sako, asin an minaako sa sako minaako man sa saiya na nagsugo sa sako. . . . Asin an siisay man na magtao sa saro sa saradit na ini nin minsan sarong baso nin malipot na tubig na inomon huli ta sia sarong disipulo, sa katotoohan sinasabi ko sa saindo, sa ano man na paagi dai sia mawawaran kan saiyang balos.”—Mateo 9:36-10:42.

An Binulawan na Reglamento nangangaipo nin positibong paghiro sa kapakanan nin iba siring kan maheheling sa pangangatanosan ni Jesus sa saro pang okasyon: “Kun namomoot kamo sa mga namomoot saindo, ano an pakinabang saindo? Huli ta minsan an mga parakasala namomoot sa mga namomoot sainda. Asin kun maggibo kamo nin marahay sa mga naggigibo nin marahay saindo, sa katotoohan ano an pakinabang kaini saindo? Minsan an mga parakasala ginigibo an siring. Kabaliktaran kaiyan, padagos na mamotan an saindong kaiwal asin maggibo nin marahay . . . asin an saindong balos magigin dakula.” (Lucas 6:32, 33, 35 ) Kun siring, an pag-otob kan balido sagkod ngonyan na Binulawan na Reglamento magpapahiro sa sato na magkaigwa nin inisyatiba tanganing maggibo nin marahay minsan sa mga tawong bako niatong personal na midbid.

Balido Sagkod Ngonyan, Epektibo Sagkod Ngonyan

Tibaad an kapanipaniwala sa gabos na patotoo na an Binulawan na Reglamento balido sagkod ngonyan iyo an aktuwal na mga eksperyensia kaidtong namuhay oyon kaini. An mga Kristiano na aroaldaw minagaweng kaoyon kan mga pagboot nin Dios nakanonompong nin dakulang kagayagayahan asin, parate, nin dai linalaoman na mga bendisyon. Paagi sa pagigin magalang asin maboot sa mga opisyal kan medikal na klinika na pinagpabolongan nia, sarong Kristianong babae an nakanompong na nakinabang sia paagi kan orog kisa sa ordinaryong pangangataman sa saiya kan mga nars asin doktor.

An mga Saksi ni Jehova na nakikabtang sa mga proyekto nin madali sanang napatindog na Kingdom Hall puwede man makagarantiya kan pagigin balido kan Binulawan na Reglamento. An maboot na mga pagsongko sa mga tawo na harani sa lugar kan konstruksion tanganing ipaisi sainda kun ano an isinaplano parateng nagkakaigwa nin positibong reaksion. An mga tawo na dating tumang sa mga Saksi nakaoobserbar sa siring na naggigibo sinda nin marahay sa saindang mga kataed, asin naheheling ninda mismo an paagi kan banwaan nin Dios sa pagkooperar sa saindang gibohon. Bilang resulta, an nagkapira nag-alok nin tabang sa konstruksion, magsalang sa direktang paagi o sa pag-areglong makukua an mga suplay.—Ikomparar an Zacarias 8:23.

Kan an sarong Saksing taga-Iran na nag-iistar sa Londres, Inglaterra, nagbakal nin mga kakanon sa sarong tindahan, ininsulto sia kan tindero huli ta sia tagaibang lugar. Dai nadisganar, maboot asin mataktikang ipinaliwanag kan Saksi na sia, bilang sarong Saksi ni Jehova, dai nin maraot na boot sa mga tawong iba an pinaghalean na nasyon. Imbes, sinosongko nia an gabos na kataraed na dara an mensahe kan Kahadean. An resulta? Dinugangan kan kagsadiri kan tindahan nin ekstrang kakanon an binakal kan Saksi.

Siyempre, an Binulawan na Reglamento bako sanang limitado sa siring na saradit na gibo nin kabootan. Sierto nanggad, an pinakadakulang kapahayagan kaini iyo an karahayan na ginigibo kan mga Saksi ni Jehova sa bilog na kinaban paagi sa regular na pagsongko sa mga harong kan saindang kataraed na dara an mensahe kan maogmang bareta kan Kahadean nin Dios.

Pamumuhay Sono sa Binulawan na Reglamento

An pag-aplikar kan Binulawan na Reglamento nangangahulogan nin pagtao kan saindong atension sa iba. Ini sarong positibong susunudon. Kaipuhan kamong humanap nin mga okasyon na gumibo nin marahay sa mga nakapalibot saindo. Magin makiamigo asin may pagmakolog sa iba, magkaigwa nin personal na interes sa sainda! (Filipos 2:4) Sa paggibo kaini, mag-aani kamo nin mayaman na mga bendisyon. Masusunod nindo an sadol ni Jesus: “Paliwanaga an saindong ilawan sa atubang nin mga tawo, tanganing maheling ninda an saindong marahay na mga gibo asin pamurawayon ninda an saindong Ama na nasa kalangitan.” (Mateo 5:16) Bilang resulta, si Jehova an saindong magigin Parabalos mantang maigot nindong hinahanap sia asin namumuhay aroaldaw sono sa Binulawan na Reglamento.—Hebreo 11:6.